Miˬyehˇ Miˇkʼahˬ gaˇ kawˆ tsaꞈ gaˬ˗eu gʼaˇ duˬ, tseˇ tiꞈ siˬ ba la˗ahˇ aˬ myah myah˗ahˇ maˬ duˇ˗eu tsaꞈ gaˬ˗eu jeˬ

Yeˬsuˇ “Miˬyehˇ Miˇkʼahˬ gaˇ kawˆ laˬ kʼaˬ cehˇ˗eu guiˬ lahˬ dawˬ” tsaꞈ gaˬ˗euˬ meh. (Luˇkaꞈ 4:43) Aˬ yawꞈ Miˇkʼahˬ heu bi uˆ lahˇ le˗eu gʼaˇ duˬ, guiˬ lahˬ shaˇ lehˇ mehˬ˗eu meh. (Maꞈtehˬ 6:9, 10) Tseˇ tiꞈ siˬ ba la˗ahˇ, aˬ dui Miˬyehˇ Miˇkʼahˬ gaˇ kawˆ tsaꞈ gaˬ˗eu gʼaˇ duˬ, aˬ myah myah naˆ maˬ tseˇ kʼaˇ gʼeh nya gaˇ neh leh jeh˗eu ma. (Maꞈtehˬ 24:14) Heu poˆ tsaꞈ gaˬ gaˇ tiˬ byah tiˬ loꞈ mˇ nya˗eu gʼaˇ duˬ, nawˇ aˇ yamˬ biˇ taˬ nya˗awˇ, heu siˬ˗ahˇ tiˬ poˆ na huˬ mehˬ mehˬ˗eu gʼaˬ geuꞈ˗eu gʼaˇ duˬ, naˬ liˬ 30 laꞈ maˬ ngeuˇ naˇ 50 laꞈ tseˇ nya meh.

Aˬ dui tsaꞈ gaˬ ngeh tsawˇ haˬ deuˬ˗ahˇ Miˬyehˇ Miˇkʼahˬ nehˬ˗ehˇ taꞈ˗eu Jaˇliꞈ aˇ deuˆ deuˬ kʼaˇ gʼeh nya gaˇ neh gui nehˬ. Naˇ haˬ luꞈ˗eu deuˬ jah˗eu jeˬ nehˬ˗ehˇ tsaˬ leˇ˗eu Jaˇliꞈ aˇ deuˆ deuˬ tseˇ˗awˇ aˬ yawꞈ maꞈ aˇ dahˬ beh˗eu poˆ neh nui ma ahˇ naˇ, 2020 kʼoꞈ Nyiˬ poˆ aˬ yawꞈ poˆ˗ahˇ doˆ laˇ˗euˬ Loꞈ˗eu nymˇgoˇ biꞈ nehˬ˗awˇ kawˇ ma˗ehˇ ya gʼa kʼoꞈ iˇ˗eu meh. Kʼoeˇ naˇ Mehˬ˗eu Keu ka bawˬ keuˆ laꞈ kʼoeˇ ahˇ˗eu paˇ dmˬ hawˇ˗eu biˬdiˬoˬ zmˬ˗awˇ dzaw dahˬ beh. Aˇ yamˬ peh laˇ dui dui luꞈ˗eu meh. Gʼawˬ myahˇ maˬ gʼeh˗ehˇ Miˬyehˇ Miˇkʼahˬ˗ahˇ laˆ tsoeˬ˗eu sahˬ paˬ sahˬ ma deuˬ˗ahˇ laˆ cawˆ jiˇ˗eu meh. (Daˬyeˬlaˇ 2:44; 1 Gawˇliˬtu 15:24, 25) Teu miˇ neh aˬ dui Yeˬhawˇbaˬ hawˇ˗eu aˬ yawꞈ˗euˬ Miˇkʼahˬ˗ahˇ saˇ jaˇ ziꞈ˗awˇ gʼaˬ biꞈ˗eu lehˇ aˇ yamˬ heu poˆ˗ahˇ zmˬ˗awˇ mˇ mawˇ luꞈ˗uˇ.