Mehˬ hu paw ya buˬ˗iˇ˗eu jeˬ˗euˬ gʼaˇ duˬ, Miˬyehˇ hawˇ˗eu Yeˬsuˇ˗ahˇ guiˬ lahˬ huiˬ

Yawˬ nah na luꞈ nawˇ aˬ jeˬ jeˇ˗ahˇ ya daˬ luꞈ le? Nawˇ gʼawˬ mya jeˬ˗ahˇ ya mˇ˗eu aˬ da gʼaˬ pyeuꞈ ma loˇ? Nawˇ nymˇ jiˇ˗ahˇ ya haw saˆ˗eu, zaˬ˗ahˇ tiˬ gʼaˬ tehꞈ˗ehˇ cu˗eu aˬ da maˬ ngeuˇ naˇ aˬ ma pyeuꞈ de loˇ? Nawˇ dzaw nymˇ˗ahˇ caw deuˬ neh bi behˬ dzaˬ˗eu zaˬ tiˬ gʼaˬ pyeuꞈ de laˬ? Nawˇ jawˇ saˇ maˬ doˆ˗eu maˬ ngeuˇ naˇ aˇ kʼoꞈ kʼawˆ laˇ˗euˬ tiˬ gʼaˬ pyeuꞈ ma laˬ? Aˬ dui yawˬ gʼaˬ na luꞈ shaˬ zahˬ jaˆ˗awˇ, Ka li zaˬ gʼawˬ mya gʼaˬ tiˬ poˆ tehꞈ˗ehˇ shaˬ zahˬ gʼawˬ mya jeˬ˗ahˇ ya daˬ˗euˬ meh. Ehˇ kʼawꞈ gʼawˬ myahˇ maˬ gʼeh˗ehˇ Yeˬhawˇbaˬ shaˬ zahˬ deuˬ˗ahˇ neh bi buˬ bi lawˇ iˇ nya ni caw ba nehˬ laꞈ meh lehˇ aˬ dui siˬ nya˗eu ma.—2 Gawˇliˬtu 4:16-18.

Ehˇ kʼawꞈ teu maˬ keuˆ laˇ mi naˆ˗ehˇ Yeˬhawˇbaˬ aˬ dui aˬ jeˬ jeˇ˗ahˇ daˬ luꞈ˗eu lehˇ siˬ nya˗awˇ, aˬ dui neh saˇ jaˇ ziꞈ˗eu jeˬ hawˇ˗eu oˇ oꞈ˗eu jeˬ˗ahˇ aˇ poeˬ taˬ baw˗eu uˬ taꞈ, aˬ dui˗euˬ gʼaˇ duˬ yaw muiˬ jeˬ lehˬ hmˬ nehˬ taˬ˗euˬ lehˇ ya siˬ˗euˬ miˇ neh gʼaˬ za laˇ miˇ˗a. (Yeˬlaˬmiˇ 29:11, 12) Yeˬsuˇ jiˇ aˬ dui˗ahˇ kʼahˬ lahˇ˗eu meh. Aˬ dui Ka li zaˬ deuˬ ya mˇ˗eu jeˬ˗ahˇ yaw muiˬ˗ehˇ mˇ ngeh, Yeˬsuˇ neh “Naw maꞈ nehˬ˗ehˇ aˬ myah luꞈ ngaˇ jawˇ ma” lehˇ ehˇ˗euˬ dawˬ˗ahˇ jah ziꞈ nya˗eu meh. (Maꞈtehˬ 28:20) Aˬ dui mehˬ hu paw Miˬyehˇ˗euˬ Miˇkʼahˬ uˆ lahˇ ngeh za˗eu buˬ˗iˇ lawˇ˗iˇ˗eu jeˬ˗ahˇ yaw muiˬ˗ehˇ shaˇ noeˬ shaˇ sawˇ ngeh, aˬ dui˗euˬ noeˬ tmˬ˗eu jeˬ maˇ jawˆ ni gʼeh laˇ˗awˇ, nymˬ˗mˇ˗euˬ shaˬ zahˬ deuˬ˗ahˇ jiˇ oˇ oꞈ mawꞈ dzehˬ laˇ˗eu meh.—Loˇmaˆ 8:19-21.

Jaˬ lehˇ lehˇ ma peh le ngeh Yeˬsuˇ˗ahˇ tehꞈ˗ehˇ ya haw tsoˆ taˬ—Mehˬ hu paw Miˬyehˇ Miˇkʼahˬ˗ahˇ neh za˗eu guiˬ lahˬ lehˇ ehˇ˗eu biˬdiˬoˬ haw gʼaˬ naˇ, naˇ haˬ˗eu jeˬ heu deuˬ˗ahˇ dawˬ kʼoꞈ biꞈ.

• Tsawˇ haˬ zaˬ Miˬyehˇ neh biꞈ˗euˬ yaw dehꞈ dehꞈ˗eu jeˬ˗ahˇ aˬ jeˬ miˇ neh maˬ za˗euˬ nga? Teu baˬ da neh aˬ jeˬ pyeuꞈ laˇ˗euˬ nga?

• Yeˬhawˇbaˬ˗ahˇ saˇ jaˇ ziꞈ˗eu deuˬ, mehˬ hu paw aˬ joˆ˗ehˇ gʼeh˗eu dehꞈ ziˇ za˗eu nga?

• Mehˬ hu paw zawˇ˗ehˇ muiˬ˗eu jeˬ heu, aˬ joˆ˗ehˇ pyeuꞈ leˇ nya˗eu nga?

• Nawˬ˗ahˇ saˇ jaˇ dawˬ aˬ geu hmˬ bi pyeuꞈ laˇ mawꞈ dzehˬ nya?