Ka li zaˬ˗euˬ dehꞈ ziˇ
Aˬ dui shaˬ˗eu zahˬ˗eu jeˬ˗ahˇ daˬ dzeuˇ oˇ dzeuˇ nya ni Yeˬhawˇbaˬ caw ba
Aˇ saˬ saˬ˗eu aˇ yamˬ heu laꞈ kʼoeˇ shaˬ zahˬ gʼawˬ mya jeˬ˗ahˇ ya tahˬ puˬ˗eu meh. Tiˬ poˆ na aˬ dui shaˬ˗eu zahˬ˗eu jeˬ˗ahˇ maˬ paˇ kamˬ daˬ coeˇ miˇ˗a lehˇ kʼawꞈ noeˬ laˇ nya˗eu meh. Ehˇ kʼawꞈ Yeˬhawˇbaˬ nehˬ˗ehˇ aˬ myah luꞈ gʼoeˇ naˇ, aˬ dui shaˬ˗eu zahˬ˗eu jeˬ˗ahˇ daˬ dzeuˇ oˇ dzeuˇ nya ni Yeˬhawˇbaˬ caw ba˗eu meh. (Iˇsaˬyaˇ 43:2, 4) Aˬ dui shaˬ zahˬ˗ahˇ ya tahˬ puˬ kʼawꞈ, Yeˬhawˇbaˬ nehˬ˗ehˇ aˬ joˆ˗ehˇ gʼoeˇ leˇ nya˗eu nga?
Guiˬ lahˬ shaˇ. Aˬ dui˗euˬ nui ma laꞈ kʼoeˇ pyeuꞈ luꞈ˗eu jeˬ Yeˬhawˇbaˬ˗ahˇ dzawˇ nehˬ ngeh, aˬ yawꞈ aˬ dui˗ahˇ kamˬ daˬ coeˇ ni, nui saˇ oꞈ ni hawˇ˗eu gʼaˬ kʼaˆ laˇ ni caw ba.—Piˇliˇpiˆ 4:6, 7; 1 Teˇsaˬloˇni 5:17.
Mehˬ bawˬ. Aˬ dui Yeˬhawˇbaˬ neh lehˬ hmˬ˗euˬ mehˬ bawˬ˗ahˇ neh, yaw beh naˆ maˬ tseˇ nui jah paw˗euˬ dzaˇ za mawꞈ˗awˇ, mehˇ nmˇ deuˬ nehˬ˗ehˇ jiˇ gʼoeˇ dzehˬ laˇ ni leh jeh mawꞈ˗eu ma. (Heˬbyehˇ 10:24, 25) Aˬ dui mehˬ bawˬ˗ahˇ maˬ laˇ˗eu mi naˆ˗ehˇ yaw muiˬ˗ehˇ lehˬ hmˬ naˇ, Yeˬhawˇbaˬ˗euˬ muiˬ˗eu shawˇ˗eu baoˬ laꞈ kʼoeˇ neh caw ba˗euˬ jeˬ˗ahˇ tiˬ byah tiˬ loꞈ za nya˗eu meh.—Pah mehˬ˗eu 2:29.
Miˬyehˇ˗euˬ gaˇ mˇ˗eu. Miˬyehˇ˗euˬ gaˇ mˇ gaˇ aˬ dui kʼaˇ gʼeh nya˗eu loꞈ˗ehˇ leh jeh naˇ, yaw muiˬ paw dzeˇ dzaˬ˗ahˇ haw tsoˆ taˬ nya˗eu meh. Kʼoeˇ naˇ, Miˬyehˇ˗euˬ gaˇ mˇ cawˬ deuˬ nehˬ˗ehˇ gʼoeˇ laˇ˗awˇ Yeˬhawˇbaˬ nehˬ˗ehˇ jiˇ gʼoeˇ dzehˬ laˇ˗eu meh.—1 Gawˇliˬtu 3:5-10.
Yeˬhawˇbaˬ ha geuꞈ meh lehˇ ehˇ˗eu biˬdiˬoˬ haw gʼaˬ naˇ, naˇ haˬ˗eu jeˬ heu deuˬ˗ahˇ dawˬ kʼoꞈ biꞈ.
Maˬlu shaˬ˗eu zahˬ˗eu jeˬ˗ahˇ ya daˬ ngeh, Yeˬhawˇbaˬ nehˬ˗ehˇ gʼoeˇ nya ni caw ba nehˬ˗eu aˬ jeˬ nga?
Aˬ dui Maˬlu loꞈ˗ehˇ shaˬ zahˬ˗ahˇ ya tahˬ puˬ ngeh, Ja ceuˬ 34:18 laꞈ kʼoeˇ ehˇ taˬ˗euˬ dawˬ heu aˬ dui˗ahˇ nui ma saˇ laˇ ni aˬ joˆ˗ehˇ caw ba nehˬ laꞈ˗eu nga?
Aˬ dui shaˬ zahˬ deuˬ˗ahˇ ya tahˬ puˬ ngeh, Yeˬhawˇbaˬ “huiˬ dui dui˗eu baoˬ” biꞈ nehˬ laꞈ meh lehˇ Maˬlu˗euˬ gaˇ kawˆ˗ahˇ haw ngeh aˬ joˆ˗ehˇ siˬ laˇ˗eu nga?—2 Gawˇliˬtu 4:7