Miˇ tsaˬ zaˬ deuˬ loꞈ˗ehˇ yawˬ ha˗euˬ gʼaˇ duˬ tehꞈ˗ehˇ taˬ shaˇ noeˬ

Nymˬ˗mˇ iˬ nah tsawˇ haˬ gʼawˬ mya ni aˬ cawˬ taꞈ˗ehˇ taˬ huiˬ nehˬ laꞈ˗eu jeˬ˗ahˇ, mˇ nehˬ laꞈ˗eu jeˬ˗ahˇ geuꞈ mawꞈ˗eu meh. Teu naˆ maˬ tseˇ za geuˇ de lehˇ jiˇ paˇ noeˬ˗eu meh. Teu loꞈ˗ehˇ noeˬ˗eu deuˬ naˇ yawˬ ha˗euˬ gʼaˇ duˬ tehꞈ˗ehˇ shaˇ noeˬ˗eu deuˬ pyeuꞈ˗awˇ guiˬ lahˬ˗ahˇ maˬ siˬ nya˗eu deuˬ pyeuꞈ meh. Heu naˇ aˇ saˬ saˬ˗eu saˇ ka nehˬ˗ehˇ taꞈ leˇ˗awˇ Jaˇliꞈ laꞈ kʼoeˇ maˬ keuˆ laˇ miˇ ehˇ taˬ˗euˬ loꞈ˗ehˇ byah laˇ˗eu jeˬ pyeuꞈ meh.—2 Tiˆmoˇseˬ 3:2.

Yawˬ ha˗euˬ gʼaˇ duˬ tehꞈ˗ehˇ shaˇ noeˬ˗eu jeˬ heu naˇ, nymˬ˗mˇ saˇ ka˗ahˇ tehꞈ˗ehˇ jaˆ˗eu maˬ ngeuˇ˗a. Gaˇ hu ba neh jaˆ ka leꞈ˗euˬ meh. Aˬdaˬ hawˇ˗eu Eˇbaˆ naˇ, aˬ jeˬ muiˬ maˬ muiˬ˗eu yawˬ ha naꞈ˗i tseˇ mawꞈ˗eu meh. Teu loꞈ˗ehˇ yawˬ ha naꞈ˗i tseˇ˗euˬ baˬ da neh aˬ dui yawˬ gʼaˬ na luꞈ shaˬ zahˬ˗ahˇ ya puˬ˗eu meh. Teu gaˇ neh gʼawˬ mya yaˇ kʼoꞈ byah laˇ ngeh Yuˇdaˆ˗euˬ sahˬ paˬ Awˇziˇ jiˇ Yeˬhawˇbaˬ˗euˬ uˬ duˬ tahˬ nymˇ nymˇ ma laꞈ kʼoeˇ aˬ yawꞈ yawˬ ha yaw saw jeˬ doˆ damˬ nya˗eu aˬ kawˬ˗aˬ jaˆ ma lehˇ noeˬ˗eu meh. Maˇ diˇ naˇ aˬ yawꞈ teu loꞈ˗ehˇ jahˇ˗eu aˬ kawˬ˗aˬ maˬ jaˆ˗a. (2 Laˬsaˬbaˬ 26:18, 19) Teu gaˇ duˇ ni Paˬliˬsehˇ hawˇ˗eu Saˬduˬgehˇ deuˬ jiˇ aˬ yawꞈ maꞈ Aˬbyaˬhaˬ˗euˬ zaˬ deuˬ uˆ deuˬ pyeuꞈ˗eu miˇ neh Miˬyehˇ aˬ yawꞈ maꞈ˗ahˇ yawˬ deuˬ yawˬ naˆ maˬ tseˇ mˇ muiˬ nehˬ laꞈ paˬ˗ehˇ gʼeh˗eu meh lehˇ noeˬ˗eu meh.—Maꞈtehˬ 3:9.

Nymˬ˗mˇ iˬ nah aˬ dui˗euˬ tiˬ jawˬ jiˇ yawˬ ha˗euˬ gʼaˇ duˬ tehꞈ˗ehˇ shaˇ noeˬ˗eu deuˬ byah jiˇ taˬ˗euˬ meh. Aˬ yawꞈ maꞈ˗euˬ nui noeˬ teu naˇ, aˬ dui maꞈ˗ahˇ nyawˬ laˇ deuˬ laˇ nya˗eu meh. (Gaˬlaˬtiˆ 5:26) Aˬ dui˗ahˇ ngaˬ˗ahˇ huiˬ˗eu gaˇ tiˬ jeˬ na biꞈ paˬ˗ehˇ gʼeh˗awˇ aˬ cawˬ naˆ maˬ tseˇ mˇ muiˬ nehˬ laꞈ paˬ˗ehˇ gʼeh˗eu meh lehˇ noeˬ laˇ nya˗eu meh. Aˬ dui teu loꞈ˗ehˇ maˬ noeˬ˗eu gʼaˇ duˬ aˬ joˆ˗ehˇ jahˇ nya˗eu nga? Jeˬ hu Yeˬhawˇbaˬ gaˇ kawˆ heu˗ahˇ aˬ joˆ˗ehˇ noeˬ˗eu nga lehˇ ya haw˗eu meh. Aˬ dui˗ahˇ caw ba nya˗eu Jaˇliꞈ zahˇ nyiˬ hmˬ jaˆ˗eu meh.

Aˬ dui za paˬ˗ehˇ gʼeh˗eu jeˬ˗ahˇ Yeˬhawˇbaˬ noeˬ tsehˆ˗eu aˬ kawˬ˗aˬ jaˆ. Tiˬ kawˆ na˗ahˇ haw ma.

• Nymˇ jiˇ laꞈ kʼoeˇ kʼaˬ dzeˇ zaˬ gʼaˬ miˬ zaˬ neh yaw zeu baw nehˬ laꞈ˗eu jeˬ˗ahˇ za paˬ˗ehˇ gʼeh˗awˇ, miˬ zaˬ gʼaˬ jiˇ kʼaˬ dzeˇ zaˬ˗euˬ nui gaˬ za paˬ˗ehˇ gʼeh˗eu meh. (Eˇpeˇsu 5:33) Nyiˬ gʼaˬ yaw kaˬ˗euˬ nui gaˬ yawˬ ha˗euˬ aˇ gu˗ahˇ maˬ ngeuˇ naˇ aˬ cawˬ˗ahˇ maˬ ya biꞈ nehˬ˗a. (1 Gawˇliˬtu 7:3) Aˬ da aˬ ma deuˬ jiˇ zaˬ neh yaw zeu baw nehˬ laꞈ˗eu jeˬ hawˇ˗eu ehˇ dawˬ naˇ haˬ˗eu jeˬ˗ahˇ za paˬ˗ehˇ gʼeh˗awˇ, zaˬ deuˬ jiˇ aˬ da aˬ ma˗euˬ nui gaˬ hawˇ˗eu haw saˆ nehˬ laꞈ˗eu jeˬ za paˬ˗ehˇ gʼeh˗eu meh.—2 Gawˇliˬtu 12:14; Eˇpeˇsu 6:2.

• Gaˇ deuˬ˗ahˇ leh jeh˗eu aˇ muˇ˗ahˇ sheuˬ gʼeh˗eu deuˬ aˬ dui neh yaw zeu baw nehˬ laꞈ˗euˬ jeˬ˗ahˇ za paˬ˗ehˇ gʼeh˗eu meh. (1 Teˇsaˬloˇni 5:12) Ehˇ kʼawꞈ aˬ yawꞈ maꞈ jiˇ mehˇ nmˇ deuˬ˗ahˇ nyehꞈ tehˬ˗eu, ka tiˇ˗eu aˬ kawˬ˗aˬ maˬ jaˆ˗a.—1 Beˬtuˆluˆ 5:2, 3.

• Miˬyehˇ˗aˬ, miˇ kʼahˬ sahˬ paˬ sahˬ ma deuˬ˗ahˇ zaˬ lahˇ deuˬ˗ahˇ kawˬ taꞈ˗eu aˬ kawˬ˗aˬ biꞈ taˬ˗awˇ, zaˬ lahˇ deuˬ˗ahˇ jiˇ aˬ yawꞈ maꞈ˗euˬ ehˇ dawˬ naˇ haˬ lehˇ ehˇ taˬ˗euˬ meh.—Loˇmaˆ 13:1, 6, 7.

Yeˬhawˇbaˬ aˬ dui za geuˇ˗eu naˆ maˬ tseˇ biꞈ. Aˬ dui iˬ baˇ zaˬ pyeuꞈ˗eu miˇ neh shiˇ˗eu geuˇ meh. (Loˇmaˆ 6:23) Ehˇ kʼawꞈ Yeˬhawˇbaˬ aˬ dui˗ahˇ ziꞈ dah ni gaˬ˗eu miˇ neh guiˬ lahˬ gʼawˬ mya ni biꞈ nehˬ˗eu meh. (Ja ceuˬ 103:10, 11) Aˬ dui neh za˗euˬ guiˬ lahˬ hawˇ˗eu huiˬ dui dui˗eu gaˇ deuˬ heu naˇ Yeˬhawˇbaˬ˗euˬ huiˬ dui dui˗eu gʼawˬ shaˬ gaˬ˗eu jeˬ baˬ da neh meh. Maˇ diˇ naˇ aˬ dui teu deuˬ˗ahˇ za˗eu maˬ geuˇ˗a.—Loˇmaˆ 12:6-8; Eˇpeˇsu 2:8.

Aˬ dui yawˬ ha˗euˬ gʼaˇ duˬ tehꞈ˗ehˇ maˬ shaˇ noeˬ˗eu gʼaˇ duˬ aˬ joˆ˗ehˇ ya jahˇ˗eu nga?

Miˇ tsaˬ zaˬ deuˬ˗euˬ nui noeˬ˗ahˇ yahˇ. Tiˬ poˆ na aˬ dui maˬ noeˬ˗euˬ gaˇ ngaˇ tiˬ jeˬ na˗ahˇ aˬ cawˬ naˆ maˬ tseˇ za geuˇ ma lehˇ noeˬ laˇ nya˗eu meh. Yeˬsuˇ aˬ dui yawˬ ha˗euˬ gʼaˇ duˬ tehꞈ˗ehˇ shaˇ noeˬ˗eu heu naˇ, aˇ naˆ ni awˬ˗eu lehˇ bi siˬ˗eu gʼaˇ duˬ gʼaˬ gaˇ aˇ poeˬ pyuˇ mehˇ byaˆ tiˬ byaˆ gʼaˇ duˬ mˇ˗eu deuˬ˗euˬ gaˇ kawˆ˗ahˇ sheu cehˆ taˬ˗euˬ meh. Yaw jeˬ ma jeˬ, gaˇ kawˆ teu laꞈ kʼoeˇ uˬ shawˬ paw neh nui tsaˇ deuˇ deuˇ˗ehˇ mˇ laˇ˗euˬ gaˇ mˇ zaˬ tiˬ deuˬ na˗ahˇ ngehˬ keuˆ taˬ˗awˇ, naˬ liˬ tiˬ laꞈ tehꞈ˗ehˇ mˇ laˇ˗euˬ deuˬ˗ahˇ jiˇ ngehˬ keuˆ taˬ˗euˬ meh. Yaw naꞈ˗ehˇ gaˇ mˇ laˇ˗euˬ deuˬ naˇ aˬ yawꞈ maꞈ gaˇ gʼawˬ mya ni mˇ dzehˬ˗euˬ miˇ neh gʼaˬ gaˇ aˇ poeˬ teu naˆ maˬ tseˇ za geuˇ ma lehˇ noeˬ˗eu meh. (Maꞈtehˬ 20:1-16) Yeˬsuˇ yaw jeˬ ma jeˬ heu˗ahˇ ngehˬ keuˆ˗eu heu naˇ, zaˬ lahˇ deuˬ˗ahˇ Miˬyehˇ neh biꞈ nehˬ laꞈ˗euˬ jeˬ˗ahˇ nui kʼahˇ shiˇ˗awˬ lehˇ mehˬ˗eu gʼaˇ duˬ meh.

Guiˬ lahˬ huiˬ˗eu siˬ nya˗awˇ, biꞈ laꞈ gaˇ taˬ noeˬ tmˬ (1 Teˇsaˬloˇni 5:18) Gawˇliˬtu aˇ muˇ˗euˬ mehˇ nmˇ deuˬ˗ahˇ pyuˇ baꞈ shaˇ˗eu aˬ kawˬ˗aˬ jaˆ kʼawꞈ maˬ shaˇ ni gʼeh˗euˬ gʼaˬ kʼehˇ Pawˇluˆ˗ahˇ dzaw geuꞈ luꞈ˗uˇ. (1 Gawˇliˬtu 9:11-14) Aˬ dui aˬ cawˬ neh kʼaˇ mˇ nehˬ laꞈ˗euˬ jeˬ˗ahˇ aˇ poeˬ taˬ baw˗awˇ, aˬ cawˬ aˬ dui˗ahˇ aˬ joˇ joˆ˗ehˇ ya mˇ nehˬ˗eu lehˇ maˬ ya noeˬ tmˬ˗a.

Taˬ aw˗eu tiˬ gʼaˬ pyeuꞈ. Tsawˇ haˬ zaˬ˗aˬ yawˬ ha˗euˬ gʼaˇ duˬ tehꞈ˗ehˇ shaˇ noeˬ naˇ, yawˬ ha laꞈ kʼoeˇ jaˆ˗eu jeˬ˗ahˇ nui kʼahˇ maˬ shiˇ ni pyeuꞈ laˇ˗eu meh. Yawˬ ha teu myaˆ maˬ tseˇ za geuˇ de lehˇ noeˬ laˇ˗eu meh. Ehˇ kʼawꞈ taˬ aw˗eu jeˬ heu naˇ teu loꞈ˗ehˇ maˬ bi noeˬ ni caw ba nehˬ˗eu meh.

Bawˇlawˇpeh Daˬyeˬlaˇ naˇ taˬ aw˗eu jeˬ nehˬ˗ehˇ taꞈ leˇ˗awˇ dzaw geuꞈ paˬ˗ehˇ gʼeh˗eu tiˬ gʼaˬ pyeuꞈ meh. Daˬyeˬlaˇ sahˬ paˬ˗euˬ aˇ jeuˬ˗ahˇ neh oe˗euˬ miˇ neh maˬ ehˇ, aˇ gʼehˇ muiˬ˗eu miˇ neh maˬ ehˇ, nui gahˇ ahˇ˗eu miˇ neh maˬ ehˇ, bym˗eu byehˆ˗eu miˇ neh maˬ ehˇ, aˬ yawꞈ yaw muiˬ˗ehˇ mˇ nehˬ laꞈ˗eu jeˬ hawˇ˗eu huiˬ˗eu gaˇ deuˬ˗ahˇ za geuˇ ma lehˇ noeˬ naˇ kʼawꞈ noeˬ nya meh. (Daˬyeˬlaˇ 1:3, 4, 19, 20) Ehˇ kʼawꞈ Daˬyeˬlaˇ naˇ aˬ myah luꞈ taˬ aw˗eu meh. Teu baˬ da neh Yeˬhawˇbaˬ aˬ yawꞈ˗ahˇ aˇ poeˬ baw dui dui˗eu tiˬ gʼaˬ pyeuꞈ˗eu lehˇ haw˗eu meh.—Daˬyeˬlaˇ 2:30; 10:11, 12.

Teu miˇ neh nymˬ˗mˇ iˬ nah iˇ byaˆ taˬ˗euˬ yawˬ ha˗euˬ gʼaˇ duˬ tehꞈ˗ehˇ shaˇ noeˬ˗eu jeˬ˗ahˇ yahˇ. Aˬ dui Yeˬhawˇbaˬ˗euˬ huiˬ dui dui˗eu gʼawˬ shaˬ gaˬ˗eu jeˬ baˬ da neh biꞈ laꞈ˗euˬ guiˬ lahˬ deuˬ˗ahˇ laˬ kʼaˬ cehˇ daˆ leꞈ luꞈ˗uˇ.