Muiˬ˗eu cawˬ aˬ joˆ˗ehˇ pyeuꞈ nya˗eu nga?

Nawˇ shaˬ zahˬ˗ahˇ tiˬ gʼaˬ tehꞈ˗ehˇ ya deuˆ ceh ceh luꞈ nya lehˇ noeˬ haw maˬ loˇ? Nymˬ˗mˇ aˬ dui “shaˬ dui dui˗eu aˇ yamˬ˗ahˇ” dehꞈ luꞈ˗eu miˇ neh gʼaˬ baˬ laˇ˗awˇ tiˬ gʼaˬ tehꞈ nya leh noeˬ laˇ nya˗eu meh. (2 Tiˆmoˇseˬ 3:1) Ehˇ kʼawꞈ aˬ dui shaˬ zahˬ˗ahˇ tiˬ gʼaˬ tehꞈ˗ehˇ deuˆ˗eu maˬ loˬ˗a. Caw ba˗eu gʼawˬ mya gʼaˬ jawˇ luꞈ˗eu meh. “Shaˬ dui dui˗eu aˇ yamˬ˗ahˇ” ngehˬ˗ehˇ dzehˬ muiˬ˗eu cawˬ loˬ dui dui˗eu meh.—Dawˬdaˬ 17:17.

Muiˬ˗eu cawˬ aˬ cawˬ˗ahˇ aˬ joˆ˗ehˇ caw ba˗eu nga?

Gʼaˬ kʼehˇ Pawˇluˆ aˬ cawˬ˗euˬ miˇ kʼahˬ˗ahˇ tsaꞈ gaˬ˗iˇ ngeh oe caw˗euˬ cawˬ deuˬ˗ahˇ neh caw ba˗eu jeˬ za˗euˬ meh. (Gawˇlawˇsehˇ 4:7-11) Pawˇluˆ Loˇmaˆ meuˬ˗ahˇ bi kaꞈ lahˇ taˬ ngeh aˬ yawꞈ˗euˬ cawˬ deuˬ aˬ yawꞈ maˬ mˇ nya˗eu gaˇ gʼawˬ mya jeˬ caw ba nehˬ˗euˬ meh. Yaw jeˬ ma jeˬ Iˇbaˬpawˬdiˇ Piˇliˇpiˆ meuˬ˗ahˇ˗euˬ mehˇ nmˇ deuˬ neh biꞈ˗euˬ myawˬ deuˬ Pawˇluˆ˗ahˇ biꞈ ha˗iˇ˗euˬ meh. (Piˇliˇpiˆ 4:18) Kʼoeˇ naˇ Diˇjiˇ kʼawꞈ Pawˇluˆ˗euˬ sahˬ boꞈ aˇ muˇ deuˬ˗ahˇ sha ha nehˬ˗iˇ˗euˬ meh. (Gawˇlawˇsehˇ 4:7) Pawˇluˆ heu loꞈ˗ehˇ gʼeh˗eu cawˬ deuˬ jawˇ˗eu miˇ neh aˬ yawꞈ iˇ kahˇ maˬ ehˇ, tawˬ˗ahˇ maˬ ehˇ, bi kaꞈ lahˇ taˬ˗euˬ kʼawꞈ Miˬyehˇ˗euˬ gaˇ yaw muiˬ˗ehˇ mˇ nya˗euˬ meh. Nymˬ˗mˇ iˬ nah aˬ dui tawˇ neh aˬ cawˬ˗euˬ muiˬ˗eu cawˬ aˬ joˆ˗ehˇ pyeuꞈ nya˗eu nga?

Nymˬ˗mˇ iˬ nah muiˬ˗eu cawˬ heu naˇ aˇ naˆ ni aˇ poeˬ baw˗eu lehˇ bi siˬ laˇ˗eu gaˇ kawˆ gʼawˬ mya kawˆ jaˆ˗eu meh. Saˆpeˆ miˇ kʼahˬ˗ahˇ aˬ myah luꞈ huˬ mehˬ mehˬ˗eu gaˇ mˇ luꞈ˗eu mehˇ nmˇ Ehˇliˇsaꞈbehˆ˗euˬ gaˇ kawˆ˗ahˇ haw ma. Ehˇliˇsaˬbehˆ˗euˬ aˬ ma kiꞈsaˬ (ma le) naˇ gawˇ aˇ saˬ saˬ˗eu aˇ tiˆ˗ah iˇ keuˆ taˬ˗euˬ meh. Mehˇ nmˇ aˬ buˇ tiˬ gʼaˬ Ehˇliˇsaˬbehˆ˗euˬ maˇ diˇ muiˬ˗eu cawˬ pyeuꞈ˗eu lehˇ mˇ mawˇ˗euˬ meh. Aˬ yawꞈ Ehˇliˇsaˬbehˆ jawˇ gaˇ Jaˇliꞈ aˇ deuˆ gʼawˬ mya deuˆ sha nehˬ˗euˬ meh. Teu miˇ neh Ehˇliˇsaˬbeh “Jaˇliꞈ aˇ deuˆ heu naˇ yawˬ nah na luꞈ ngaˬ˗ahˇ ya puˬ˗eu shaˬ zahˬ˗ahˇ yaw muiˬ˗ehˇ laˆ piˇ nya ni caw ba nehˬ laꞈ nya. Ngaˇ tiˬ gʼaˬ tehꞈ˗ehˇ ya shaˬ luꞈ nya lehˇ maˬ noeˬ laˇ ni caw ba nehˬ laꞈ nya” lehˇ ehˇ˗eu meh.—Dawˬdaˬ 18:24.

Aˬ dui mehˇ nmˇ deuˬ˗ahˇ Miˬyehˇ˗euˬ gaˇ mˇ nya ni, mehˬ bawˬ˗ahˇ iˇ nya ni caw ba nehˬ naˇ tiˬ gʼaˬ tiˇ gʼaˬ gʼoeˇ dzehˬ laˇ˗eu meh. Yaw jeˬ ma jeˬ, nawˇ aˇ kʼoꞈ kʼawˆ laˇ˗euˬ mehˇ nmˇ deuˬ mehˬ bawˬ˗ahˇ iˇ gaˇ, tsaꞈ gaˬ˗iˇ gaˇ tawˬ sha nya ma loˇ? Nawˇ teu loꞈ˗ehˇ jahˇ naˇ nawˇ hawˇ˗eu aˬ yawꞈ maꞈ tiˬ gʼaˬ tiˇ gʼaˬ gʼaˬ biꞈ nya˗awˇ laˬ kʼaˬ cehˇ˗eu meh. (Loˇmaˆ 1:12) Ehˇ kʼawꞈ mehˇ nmˇ tiˬ gʼaˬ na tiˬ gaˇ˗iˬ maˬ iˇ doˆ nya ni iˇ kahˇ˗ahˇ tehꞈ˗ehˇ ya jawˇ˗eu meh. Nawˇ aˬ yawꞈ maꞈ˗euˬ muiˬ˗eu cawˬ aˬ joˆ˗ehˇ pyeuꞈ nya˗eu nga?

Iˇ kahˇ˗ahˇ neh maˬ iˇ doˆ nya˗eu deuˬ˗ahˇ caw ba nehˬ

Mehˇ nmˇ tiˬ gʼaˬ na jawˇ saˇ maˬ doˆ˗eu miˇ neh, gaˇ kawˆ tiˬ jeˬ na baˬ da neh, Bawˬdzaˬnymˇ˗ahˇ maˬ iˇ nya˗a. Kiꞈsaˬ (ma le) naˇ gawˇ naˇ˗eu mehˇ nmˇ Deˇbiˬ˗euˬ gaˇ kawˆ˗ahˇ haw ma. Deˇbiˬ ba la koꞈ siˬ byah ni naˇ gawˇ laˆ saˆ luꞈ ngeh aˬ yawꞈ hawˇ˗eu aˬ yawꞈ˗euˬ miˬ zaˬ Liˆdiˬ˗yaˬ mehˬ bawˬ˗ahˇ awˆlaiˇ paw neh daˆ daˆ˗ehˇ jawˇ˗euˬ meh.

Aˇ muˇ laꞈ kʼoeˇ˗euˬ mehˇ nmˇ deuˬ aˬ yawꞈ nyaꞈ˗ahˇ aˬ joˆ˗ehˇ caw ba nehˬ˗euˬ nga? Mehˬ bawˬ kʼaˇ jiˇ ngeh mehˇ nmˇ deuˬ aˬ yawꞈ nyaꞈ nehˬ˗ehˇ ngehˬ cawˬ˗eu meh. Kʼoeˇ uˬ taꞈ, aˬ yawꞈ nyaꞈ dawˬ kʼoꞈ kʼaˇ biꞈ ngeh guiˬ lahˬ huiˬ miˇ˗a lehˇ sahˬ boꞈ boꞈ˗awˇ sha nehˬ˗eu meh. Teu baˬ da neh aˬ jeˬ pyeuꞈ laˇ˗euˬ nga? Aˬ yawꞈ nyaꞈ mehˇ nmˇ deuˬ nehˬ˗ehˇ gʼoeˇ dzehˬ laˇ˗awˇ yawˬ ha tiˬ gʼaˬ tehꞈ˗ehˇ jawˇ nya lehˇ maˬ noeˬ˗a.

Aˬ dui iˇ kahˇ tehꞈ˗ehˇ ya jawˇ˗eu deuˬ˗ahˇ Miˬyehˇ˗euˬ gaˇ mˇ nya ni caw ba nehˬ nya ngaˇ laˬ? Nawˇ ui cuiˆ na laˆ paˇ naˇ mehˇ nmˇ teu deuˬ nehˬ˗ehˇ Miˬyehˇ˗euˬ gaˇ mˇ nya˗awˇ, aˬ yawꞈ maꞈ˗ahˇ maˬ ngehˇ˗euˬ lehˇ jiˇ bi siˬ nya meh. (Dawˬdaˬ 3:27) Nawˇ aˬ yawꞈ maꞈ nehˬ˗ehˇ naˬ gaˬ neh, sahˬ boꞈ boꞈ˗awˇ neh, tsaꞈ gaˬ˗eu gʼaˇ duˬ aˇ yamˬ laˆ baw taˬ nya meh. Kʼoeˇ naˇ sheuˬ gʼeh˗eu deuˬ aˬ yawꞈ maꞈ tsaꞈ gaˬ˗eu mehˬ bawˬ˗ahˇ bi daˆ laˇ nya˗eu gʼaˇ duˬ biˬdiˬoˬ paw neh mehˬ bawˬ jahˇ nya˗eu meh. Heu baˬ da neh Deˇbiˬ hawˇ˗eu Liˆdiˬ˗yaˬ guiˬ lahˬ huiˬ dui dui˗eu meh. Deˇbiˬ “Tsaꞈ gaˬ˗eu aˇ muˇ laꞈ kʼoeˇ˗euˬ mehˇ nmˇ deuˬ nehˬ˗ehˇ tiˬ kʼehˇ laˇ kʼehˬ ya jawˇ˗awˇ guiˬ lahˬ ya shaˇ˗euˬ tehꞈ kʼawꞈ nga nyaꞈ˗ahˇ gʼaˬ za laˇ˗eu lehˇ miˇ˗aˇ” lehˇ ehˇ˗eu meh. Kʼoeˇ naˇ nawˇ tiˬ poˆ na dzaw zaˬ deuˬ sheuˬ˗awˇ iˇ kahˇ tehꞈ˗ehˇ ya jawˇ˗eu mehˇ nmˇ deuˬ nehˬ˗ehˇ Jaˇliꞈ tiˬ kawˆ loꞈ˗ehˇ dzaw˗iˇ nya meh. Ehˇ kʼawꞈ lehˬ laˇ ca laˇ˗eu jeˬ jaˆ ngaˇ laˬ, aˬ yawꞈ˗ahˇ laˆ bahˬ˗eu jeˬ pyeuꞈ ngaˇ laˬ lehˇ ya haw˗eu meh.

Aˬ dui mehˇ nmˇ heu deuˬ nehˬ˗ehˇ Miˬyehˇ˗euˬ gaˇ mˇ taꞈ ngeh aˬ yawꞈ maꞈ˗euˬ yaw muiˬ jeˬ˗ahˇ ya mawˇ ngeh aˬ yawꞈ maꞈ nehˬ˗ehˇ gʼoeˇ dzehˬ leˇ˗eu meh. Yaw jeˬ ma jeˬ nawˇ aˬ yawꞈ maꞈ nehˬ˗ehˇ Miˬyehˇ˗euˬ gaˇ mˇ ngeh aˬ yawꞈ maꞈ tsawˇ haˬ deuˬ˗euˬ nui ma˗ahˇ zaw leˇ ni Jaˇliꞈ aˇ deuˆ deuˬ dzawˇ nehˬ gaˇ ya mawˇ ngeh aˬ yawꞈ maꞈ˗ahˇ yaw zeu baw dzehˬ laˇ˗awˇ gʼoeˇ dzehˬ laˇ˗eu meh. Aˬ dui mehˇ nmˇ deuˬ˗ahˇ Ka li zaˬ˗euˬ mˇ jeˬ shaˇ kawˆ deuˬ mˇ nya ni caw ba nehˬ ngeh cawˬ yaw shuiꞈ lahˬ laˇ˗eu meh.—2 Gawˇliˬtu 6:13.

Pawˇluˆ shaˬ luꞈ zahˬ luꞈ ngeh Tiˇtuˆ aˬ yawꞈ jawˇ gaˇ gʼa laˇ˗euˬ miˇ neh aˬ yawꞈ gʼaˬ za˗euˬ meh. (2 Gawˇliˬtu 7:5-7) Gaˇ kawˆ heu naˇ mehˇ nmˇ deuˬ˗ahˇ kʼaˬ meh neh tehꞈ˗ehˇ gʼaˬ biꞈ nehˬ˗eu maˬ ngeuˇ ni, aˬ yawꞈ maꞈ jawˇ gaˇ iˇ keuˆ˗awˇ caw ba˗eu gʼaˇ duˬ kʼaˇ jahˇ nya˗eu jeˬ jahˇ ni laˆ noeˬ nehˬ˗eu meh.—1 Yoˇhaˬ 3:18.

Kʼehˬ˗eu kʼaˆ˗eu jeˬ˗ahˇ ya puˬ˗eu mehˇ nmˇ deuˬ˗ahˇ caw ba

Tiˬ gʼaˬ tiˇ gʼaˬ caw ba˗eu jeˬ nehˬ˗ehˇ taꞈ leˇ˗awˇ aˬ dui mehˇ nmˇ Laˇsiˬ˗yaˬ deuˬ˗ahˇ dzaw geuꞈ paˬ˗ehˇ gʼeh˗eu meh. Mehˇ nmˇ Seuˇkeꞈ hawˇ˗eu aˬ yawꞈ˗euˬ miˬ zaˬ Daˬyaˬnaˬ˗euˬ gaˇ kawˆ˗ahˇ haw ma. Yehˇ deuˬ aˬ yawꞈ nyaꞈ˗euˬ iˇ kahˇ˗ahˇ goˬ gʼaˬ ngeh aˬ yawꞈ nyaꞈ˗ahˇ naˇ haˬ tseˇ˗eu gʼaˇ duˬ sheuˬ gʼeh˗euˬ meh. Aˬ yawꞈ˗euˬ miˬ zaˬ jeˬ hu bi pyehˬ kʼoꞈ laꞈ˗euˬ meh. Seuˇkeꞈ “Ngaˬ˗euˬ miˬ zaˬ iˇ kahˇ˗ahˇ gʼoꞈ keuˆ˗iˇ˗euˬ nehˬ˗ehˇ kʼaˬ duˬ ni gʼeh˗eu mehˇ nmˇ aˬ buˇ tiˬ gʼaˬ ngaˬ˗euˬ iˇ kahˇ˗ahˇ taˆ lehˇ laˇ keuˆ˗euˬ meh. Kʼoeˇ naˇ mehˇ nmˇ gʼawˬ mya gʼaˬ laˇ˗awˇ iˇ kahˇ˗ahˇ laˆ luiˆ laˆ buˇ caw nehˬ le˗euˬ meh” lehˇ ehˇ˗eu meh.

Seuˇkeꞈ “Ngaˬ˗ahˇ Dawˬdaˬ 17:17-ahˇ ya leˇ˗eu lehˇ miˇ˗a. Teu gaˇ ‘Cawˬ yaw muiˬ yamˬ maˬ tseˇ ni gʼoeˇ˗awˇ mehˇ nmˇ˗aˬ shaˬ zahˬ caw pi˗eu gʼaˇ duˬ meh’ lehˇ ehˇ taˬ˗euˬ meh. Kʼehˬ laˇ kʼaˆ laˇ˗eu jeˬ˗ahˇ ya daˬ˗eu miˇ neh ngaˇ tiˬ gʼaˬ tehꞈ˗ehˇ maˬ kamˬ daˬ coeˇ ngeh ngehˬ˗ehˇ dzehˬ Jaˇliꞈ heu deuˆ ngaˬ˗euˬ gʼaˇ duˬ aˇ poeˬ baw˗eu lehˇ miˇ˗a. Yeˬhawˇbaˬ kʼaˬ duˬ ni gʼeh˗eu cawˬ deuˬ ngaˬ˗euˬ behˇ dzeˇ bi jawˇ laꞈ˗euˬ meh” lehˇ ehˇ˗eu meh.a

Aˬ dui shaˬ zahˬ deuˬ˗ahˇ ngehˬ˗ehˇ ya puˬ naˇ ngehˬ˗ehˇ tiˬ gʼaˬ tiˇ gʼaˬ caw ba nehˬ˗eu cawˬ deuˬ loˬ˗eu meh. Huiˬ dui dui˗eu shaˬ zahˬ aˇ yamˬ˗ahˇ ngehˬ˗ehˇ dzehˬ loˬ dui dui˗eu meh. Teu miˇ neh aˬ dui nymˬ˗mˇ neh tiˬ gʼaˬ tiˇ gʼaˬ˗euˬ muiˬ˗eu cawˬ pyeuꞈ nya ni kʼaˇ gʼeh nya gaˇ neh leh jeh kaˇ˗euˇ.—1 Beˬtuˆluˆ 4:7, 8.