Yaw awˬ awˬ˗ehˇ naˇ haˬ
Mehˇliˬ hawˇ˗eu aˬ yawꞈ˗euˬ kʼaˬ dzeˇ zaˬ Jawˬa jawˇ˗eu miˇ kʼahˬ˗ahˇ Piˇliˇpaiˬ miˇ kʼahˬ˗euˬ tsawˇ haˬ gʼawˬ mya ni gaˇ mˇ le˗eu meh. Teu miˇ neh aˬ yawꞈ nyaꞈ aˬ yawꞈ maꞈ˗ahˇ guiˬ lahˬ dawˬ tsaꞈ gaˬ˗euˬ meh. Koˇbiˬ yaw jaw naˇ gawˇ aˇ yamˬ heu laꞈ kʼoeˇ Mehˇliˬ Jaˇliꞈ dzaw zaˬ gʼawˬ mya gʼaˬ˗ahˇ mehˬ dahˬ beh nya˗euˬ meh. Dzaw zaˬ teu laꞈ kʼoeˇ, yawˬ ha hawˇ˗eu aˬ cawˬ miˇ kʼahˬ laꞈ kʼoeˇ˗euˬ deuˬ jiˇ keuˬ˗eu meh. Mehˇliˬ gʼawˬ mya gʼaˬ˗ahˇ Jaˇliꞈ aˬ joˆ˗ehˇ mehˬ dahˬ beh nya˗euˬ nga?
Mehˇliˬ aˬ yawꞈ˗euˬ Jaˇliꞈ dzaw zaˬ˗ahˇ “Nawˇ siˬ nya˗eu deuˬ laꞈ kʼoeˇ Jaˇliꞈ dzaw mawꞈ˗eu deuˬ jawˇ meh laˬ” lehˇ yaw awˬ awˬ lehˇ naˇ haˬ˗eu meh. Aˬ yawꞈ maꞈ, siˬ nya ma lehˇ ehˇ naˇ aˬ yawꞈ maꞈ nehˬ˗ehˇ bi ngehˬ cawˬ nya meh laˬ lehˇ ehˇ nehˬ˗eu meh. Teu loꞈ˗ehˇ yaw awˬ awˬ lehˇ naˇ haˬ˗euˬ tehꞈ kʼawꞈ, muiˬ˗eu jeˬ za nya˗eu meh. Aˬ jeˬ miˇ neh nga? Aˬ jeˬ miˇ neh ehˇ naˇ, Miˬyehˇ˗euˬ yaw tsaˬ yaw dawˇ jeˬ˗ahˇ aˇ poeˬ taˬ baw˗eu deuˬ naˇ, yawˬ ha nymˬ jiˇ laꞈ kʼoeˇ˗euˬ deuˬ hawˇ˗eu cawˬ deuˬ˗ahˇ, Jaˇliꞈ˗ahˇ neh ya siˬ˗euˬ jeˬ dzawˇ nehˬ mawꞈ˗eu meh. Mehˇliˬ toˆ˗ehˇ jahˇ˗euˬ miˇ neh aˬ jeˬ muiˬ˗eu jeˬ za˗euˬ nga?
Jehˇsaꞈ˗meˬ lehˇ kuˇ˗eu tiˬ gʼaˬ Jaˇliꞈ dzaw mawꞈ nya lehˇ ehˇ˗eu oeˬ gʼaˬ˗ahˇ Mehˇliˬ nehˬ˗ehˇ bi siˬ nya˗euˬ meh. Teu laꞈ kʼoeˇ neh tiˬ gʼaˬ naˇ Kaˇ˗liˆsaꞈ˗tiˬ meh. Kaˇ˗liˆsaꞈ˗tiˬ Jaˇliꞈ dzaw gaˇ ya leˇ dui dui˗eu miˇ neh tiˬ jaw˗ahˇ Jaˇliꞈ nyiˬ poˆ dzaw nehˬ laꞈ lehˇ Mehˇliˬ˗ahˇ shaˇ˗eu meh. Mehˇliˬ, Kaˇ˗liˆsaꞈ˗tiˬ˗ahˇ nawˇ siˬ nya˗eu deuˬ laꞈ kʼoeˇ Jaˇliꞈ dzaw mawꞈ˗eu deuˬ jawˇ meh laˬ lehˇ naˇ haˬ ngeh, “Jawˇ meh nymˬ˗mˇ ngaˇ ehˇ nehˬ ma de” lehˇ ehˇ˗eu meh. Teu gaˇ neh myaˆ jaw naˇ Kaˇ˗liˆsaꞈ˗tiˬ Jaˇliꞈ dzaw mawꞈ˗eu aˬ yawꞈ˗euˬ cawˬ oeˬ gʼaˬ˗ahˇ bi siˬ nya˗euˬ meh. Aˇ nah naˇ Kaˇ˗liˆsaꞈ˗tiˬ aˬ yawꞈ˗euˬ cawˬ nui deuˬ˗ahˇ jiˇ paˇ bi siˬ nya˗euˬ meh. Kʼoeˇ naˇ cawˬ teu deuˬ jiˇ aˬ yawꞈ maꞈ siˬ nya˗eu deuˬ˗ahˇ paˇ ehˇ nehˬ˗euˬ meh.
Kaˇ˗liˆsaꞈ˗tiˬ Piˇliˇpaiˬ miˇ kʼahˬ˗ahˇ jawˇ˗eu aˬ yawꞈ˗euˬ nymˇ jiˇ laꞈ kʼoeˇ˗euˬ deuˬ˗ahˇ jiˇ Jaˇliꞈ bi dzaw mawꞈ˗eu meh. Aˬ yawꞈ aˬ yawꞈ˗euˬ aˬ buˇ Ehˇdiˬliˬ˗yaˬ nehˬ˗ehˇ ngehˬ cawˬ˗euˬ meh. Dahˬ beh ngeh ‘Yeˬhawˇbaˬ˗euˬ Saˇ kiˇ deuˬ naˇ Yeˬsuˇ˗ahˇ maˬ jah˗eu aˇ muˇ, Jaˇliꞈ yaw oeˇ dmˬ˗ahˇ tehꞈ˗ehˇ zmˬ˗eu aˇ muˇ’ lehˇ noeˬ˗eu meh. Ehˇ kʼawꞈ Ehˇdiˬliˬ˗yaˬ Jaˇliꞈ dzaw dahˬ beh laˇ ngeh poˆ neh Yeˬhawˇbaˬ˗euˬ Saˇ kiˇ deuˬ nehˬ˗ehˇ taꞈ leˇ˗awˇ aˬ yawꞈ neh ya siˬ˗euˬ jeˬ maˬ tsaˬ law hawˇ ngaˬ lehˇ ya siˬ˗euˬ meh. Aˬ yawꞈ Jaˇliꞈ˗ahˇ neh tiˬ jeˬ paˬ ya siˬ ngeh, “Teu naˇ Jaˇliꞈ laꞈ kʼoeˇ ahˇ˗eu miˇ neh ngeuˇ ngaˇ” lehˇ tiˬ kʼehˬ maˬ kaˬ ehˇ˗eu meh.
Aˇ nah naˇ Ehˇdiˬliˬ˗yaˬ Mehˇliˬ˗ahˇ Jaˇliꞈ dzaw mawꞈ˗eu aˬ yawꞈ˗euˬ cawˬ nyiˬ gʼaˬ hawˇ˗eu gaˇ mˇ cawˬ tiˬ gʼaˬ˗ahˇ bi siˬ nya˗euˬ meh. Ehˇdiˬliˬ˗yaˬ Aˇjaˬlaˬ lehˇ kuˇ˗eu myaˆ behꞈ behꞈ˗eu aˬ hoˬ tiˬ gʼaˬ jawˇ˗eu meh. Ehˇdiˬliˬ˗yaˬ Jaˇliꞈ dzaw ngeh, Aˇjaˬlaˬ naˇ haˬ caw le˗eu lehˇ Mehˇliˬ maˬ siˬ nya˗a. Tiˬ nah keuˆ laˇ ngeh Aˇjaˬlaˬ Ehˇdiˬliˬ˗yaˬ˗ahˇ ngaˬ˗ahˇ jiˇ Jaˇliꞈ dzaw mawꞈ miˇ˗a, Mehˇliˬ˗ahˇ tiˬ poˆ ehˇ nehˬ laꞈ lehˇ ehˇ˗eu meh. Aˇjaˬlaˬ Jaˇliꞈ ya dzaw laˇ ngeh aˬ yawꞈ aˬ yawꞈ neh ya siˬ˗euˬ jeˬ˗ahˇ ya leˇ dui dui˗eu meh. Aˬ yawꞈ ba la tiˬ siˬ laꞈ kʼoeˇ tehꞈ˗ehˇ Jaˇliꞈ aˇ deuˆ gʼaw mya deuˆ noeˬ taˬ nya˗eu meh. Aˬ yawꞈ Mehˇliˬ˗ahˇ jiˇ tiˬ jaw laꞈ kʼoeˇ Jaˇliꞈ oeˬ poˆ dzaw mawꞈ nya lehˇ ehˇ nehˬ˗eu meh. Ehˇdiˬliˬ˗yaˬ caw ba˗eu miˇ neh Aˇjaˬlaˬ mehˬ bawˬ˗ahˇ biˬdiˬoˬ kawˇ paw neh aˬ myah luꞈ daˆ laˇ˗eu meh.
Mehˇliˬ Kaˇ˗liˆsaꞈ˗tiˬ Jaˇliꞈ kʼaˇ dzaw ngeh aˬ yawꞈ˗euˬ kʼaˬ dzeˇ zaˬ Joˇshuˬ˗aˬ gaˇ dzeˇ jawˇ gaˇ ya mawˇ˗eu meh. Teu miˇ neh Mehˇliˬ Joˇshuˬ˗aˬ˗ahˇ nawˬ˗ahˇ tiˬ kawˆ loꞈ˗ehˇ naˇ haˬ le mawꞈ miˇ˗a laˬ lehˇ naˇ haˬ˗euˬ meh. Joˇshuˬ˗aˬ “Euˬ, za meh. Ehˇ kʼawꞈ ngaˬ˗ahˇ naˇ haˬ˗eu jeˬ taˬ naˇ haˬ laˇ de. Naˇ haˬ laˇ naˇ ngaˇ doˆ˗iˇ ma” lehˇ ehˇ˗eu meh. Joˇshuˬ˗aˬ tiˬ kawˆ loꞈ˗ehˇ nuiˇ laˇ˗awˇ, tiˬ kʼehˬ gʼeh naˇ, Kaˇ˗liˆsaꞈ˗tiˬ neh naˇ haˬ˗eu naˆ maˬ tseˇ naˇ haˬ˗eu meh. Kʼoeˇ naˇ aˬ yawꞈ Jaˇliꞈ jiˇ dzaw mawꞈ˗eu meh.
Mehˇliˬ neh yaw awˬ awˬ lehˇ naˇ haˬ˗euˬ jeˬ heu baˬ da neh gʼawˬ mya gʼaˬ Jaˇliꞈ dzaw laˇ˗eu meh. Kʼoeˇ naˇ mehˇ nmˇ deuˬ˗ahˇ Jaˇliꞈ dzaw zaˬ tiˬ deuˬ na jiˇ biˇ paˆ nehˬ˗euˬ meh. Mehˇliˬ neh Jaˇliꞈ dzaw nehˬ˗euˬ deuˬ dawˬ tawˆ luꞈ miˇ kʼahˬ oeˬ kʼahˬ laꞈ kʼoeˇ 28 gʼaˬ byah˗eu meh.
Laꞈ taˆ ngehˬ keuˆ taˬ˗euˬ Jehˇsaꞈ˗meˬ lehˇ kuˇ˗eu dahˬ beh˗euˬ Jaˇliˬ dzaw zaˬ gʼaˬ 2021 kʼoꞈ, Oeˬ siˬ ba la˗ahˇ iˇ cuꞈ shawˇ˗euˬ meh. Kaˇ˗liˆsaꞈ˗tiˬ gʼaˬ naˇ 2022 kʼoꞈ, Ngaˬ siˬ ba la˗ahˇ iˇ cuꞈ shawˇ˗awˇ, Piˇliˇpaiˬ miˇ kʼahˬ˗ahˇ aˬ yawꞈ˗euˬ nymˇ jiˇ nehˬ˗ehˇ gʼoꞈ jawˇ˗iˇ˗euˬ meh. Kʼoeˇ naˇ Mehˇliˬ˗ahˇ Kaˇ˗liˆsaꞈ˗tiˬ neh bi siˬ nya˗euˬ Jaˇliꞈ dzaw zaˬ nyiˬ gʼaˬ jiˇ iˇ cuꞈ shawˇ˗euˬ meh. Kaˇ˗liˆsaꞈ˗tiˬ iˇ cuꞈ shawˇ˗euˬ tiˬ kʼehˬ naˇ, Aˇjaˬlaˬ jiˇ iˇ cuꞈ shawˇ˗awˇ, nymˬ˗mˇ naˇ aˬ myah luꞈ huˬ mehˬ mehˬ˗eu gʼaˬ geuꞈ luꞈ˗eu meh. Kaˇ˗liˆsaꞈ˗tiˬ˗euˬ kʼaˬ dzeˇ zaˬ Joˇshuˬ˗aˬ hawˇ˗eu, aˬ yawꞈ˗euˬ aˬ buˇ Ehˇdiˬliˬ˗yaˬ uˬ taꞈ, Jaˇliꞈ dzaw zaˬ gʼawˬ mya gʼaˬ yaw muiˬ˗ehˇ huiˬ laˇ mahˇ laˇ luꞈ˗eu meh.
Dahˬ beh˗euˬ Ka li zaˬ saˇ ka˗ahˇ gʼawˬ mya gʼaˬ Jaˇliꞈ laꞈ kʼoeˇ˗euˬ laˬ kʼaˬ cehˇ˗eu guiˬ lahˬ dawˬ yawˬ ha˗euˬ nymˇ jiˇ laꞈ kʼoeˇ˗euˬ deuˬ˗ahˇ maˬ ehˇ, cawˬ deuˬ˗ahˇ maˬ ehˇ, ja nehˬ˗eu meh. (Yoˇhaˬ 1:41, 42; Gʼaˬkʼehˇ 10:24, 27, 48; 16:25-33) Nawˇ jiˇ nawˬ˗euˬ Jaˇliꞈ dzaw zaˬ˗ahˇ maˬ ehˇ, nui ma ahˇ˗eu deuˬ˗ahˇ maˬ ehˇ, “Nawˇ siˬ nya˗eu deuˬ laꞈ kʼoeˇ Jaˇliꞈ dzaw mawꞈ˗eu deuˬ jawˇ meh laˬ” lehˇ naˇ haˬ nya meh. Heu loꞈ˗ehˇ yaw awˬ awˬ lehˇ naˇ haˬ˗euˬ tehꞈ kʼawꞈ ni, Jaˇliꞈ dzaw mawꞈ˗eu gʼawˬ mya gʼaˬ˗ahˇ poˆ mawˇ nya˗eu meh.
a Tsawˇ myahˇ tiˬ myah na tsawˇ myahˇ myahˇ maˇ maˬ ngeuˇ˗a.