Aˬ yawꞈ lawˬ haw laˇ˗eu jeˬ˗ahˇ maˬ tawˆ leˇ

Yoˇsehˆ˗aˬ nyiˇ ngeh neh aˬ yawꞈ˗euˬ aˬ da Yaˬkoˆ hawˇ˗eu Yeˬhawˇbaˬ gaˬ˗awˇ nui kʼahˇ shiˇ dui dui˗eu tiˬ gʼaˬ pyeuꞈ meh. Toˆ˗ehˇ nga lehˇ˗aˬ, aˬ yawꞈ˗euˬ dehꞈ ziˇ tiˬ jeˬ˗iˬ maˬ shaˬ˗eu lehˇ ehˇ mawꞈ˗eu maˬ ngeuˇ˗a. Aˇ doˆ deuˬ aˬ yawꞈ˗ahˇ bye˗eu meh. Yaˬkoˆ Yoˇsehˆ˗ahˇ zaˬ nui deuˬ˗ahˇ naˆ maˬ tseˇ gaˬ dzehˬ˗awˇ mˇ muiˬ nehˬ˗eu miˇ neh, aˬ ma maˬ duˇ˗eu aˇ doˆ deuˬ Yoˇsehˆ˗ahˇ myaˆ naˆ˗awˇ bye˗eu meh. Yoˇsehˆ 17 kʼoꞈ heu kaˬ˗ahˇ, tiˬ nah aˬ yawꞈ˗euˬ nymˇ jiˇ laꞈ kʼoeˇ˗euˬ deuˬ aˬ yawꞈ˗ahˇ ya aw byaˆ meh lehˇ Yeˬhawˇbaˬ yuꞈ maˆ bi maˆ mawˇ˗euˬ meh. Teu miˇ neh aˇ doˆ deuˬ aˬ yawꞈ˗ahˇ paˇ bye dzehˬ laˇ˗euˬ meh.

Tiˬ nah Yaˬkoˆ Yoˇsehˆ˗ahˇ yawˇ bo luꞈ˗eu aˇ doˆ deuˬ˗ahˇ bi haw iˇ˗euˬ meh. Teu gaˇ iˇ˗eu gʼaˇ duˬ yaw myaˬ nah ya cah˗eu meh. Aˇ doˆ deuˬ Yoˇsehˆ˗ahˇ ya mawˇ ngeh, nyehꞈ˗awˇ iˇ cuꞈ maˬ dahˬ˗eu lah duˬ duˬ tsoeˬ laꞈ kʼoeˇ biˬ ahˇ˗euˬ meh. Teu ngeh Yoˇsehˆ caw ba nehˬ laꞈ lehˇ ngoeˇ ngoeˇ˗ehˇ shaˇ kʼawꞈ, aˬ yawꞈ maꞈ maˬ haw cawˬ nehˬ˗aˬ. Sehꞈ˗eu lehˇ jiˇ paˇ ja˗euˬ meh. Ehˇ kʼawꞈ maˬ sehꞈ ni teu gaˇ oe tsehˆ˗euˬ jeˬ gaꞈ jeˬ ka mˇ˗eu deuˬ˗ahˇ ahˬ dzaˬ˗euˬ meh. Kʼoeˇ naˇ aˬ yawꞈ maꞈ Yaˬkoˆ˗ahˇ Yoˇsehˆ bawˇ tsahˬ jeˬ zaˬ neh bi kawꞈ sehꞈ ngaˬ lehˇ noeˬ leˇ paˬ˗ehˇ jahˇ˗euˬ meh. Maˇ diˇ naˇ Yoˇsehˆ laꞈ oˆ jaˆ˗eu Iˇjiˇtuˆ miˇ kʼahˬ˗ahˇ Paˬlawˇ uˆ lahˇ˗eu uˬ moˆ jawˇ˗eu Pawˇtiˇpaˬ˗euˬ zaˬ kʼaˆ ya geuꞈ˗iˇ˗euˬ meh.

Teu ngeh Yoˇsehˆ tiˬ jeˬ˗ahˇ˗iˬ noeˬ tmˬ kʼaˇ maˬ za ni nui ma cawˆ˗eu kʼawꞈ pyeuꞈ nya meh. Ehˇ kʼawꞈ aˬ yawꞈ toˆ˗ehˇ maˬ gʼeh˗aˬ. Kʼaˬ duˬ ni gʼeh˗eu laꞈ kʼoeˇ gaˇ leh jeh dui dui˗euˬ meh. “Yoˇsehˆ nehˬ˗ehˇ Sahˬpaˬ Miˬyehˇ jawˇ” meh lehˇ Jaˇliꞈ laꞈ kʼoeˇ ehˇ taˬ˗euˬ meh. Yeˬhawˇbaˬ aˬ yawꞈ kʼaˇ mˇ kʼaˇ shaˇ˗eu jeˬ˗ahˇ guiˬ lahˬ biꞈ˗euˬ meh. Pawˇtiˇpaˬ aˬ yawꞈ˗ahˇ nui ma taˬ˗awˇ kʼaˇ jaˆ˗eu jeˬ dawˬ tawˆ luꞈ˗ahˇ bi haw bi pyaˆ˗euˬ meh.

Ehˇ kʼawꞈ aˬ yawꞈ˗ahˇ shaˬ zahˬ keuˆ le luꞈ meh. “Yoˇsehˆ˗aˬ, aˬ lmˬ mehˇ˗awˇ aˇ gʼehˇ muiˬ dui dui˗eu” miˇ neh, Pawˇtiˇpaˬ˗euˬ miˬ zaˬ aˬ yawꞈ˗ahˇ mawꞈ leˇ˗euˬ meh. Aˬ yawꞈ nui ma laꞈ kʼoeˇ maˬ paˇ jahˬ tehˬ coeˇ˗euˬ miˇ neh, Yoˇsehˆ˗ahˇ “Ngaˬ nehˬ˗ehˇ yuꞈ kaˇ˗euˇ” lehˇ cawˬ˗euˬ meh. Yoˇsehˆ aˬ joˆ˗ehˇ jahˇ˗euˬ nga? Teu ngeh aˬ yawꞈ nymˇ jiˇ nehˬ˗ehˇ gaˇ mahˇ kaˬ gaˇ jawˇ˗awˇ zaˬ kʼaˆ pyeuꞈ˗eu miˇ neh, aˬ yawꞈ˗euˬ baw leˬ aˬ yawꞈ˗ahˇ aˬ joˆ˗ehˇ jahˇ mawꞈ nya lehˇ jahˇ nya meh. Aˬ yawꞈ Pawˇtiˇpaˬ˗euˬ miˬ zaˬ ehˇ dawˬ maˬ naˇ haˬ naˇ, shaˬ laˇ nya˗eu yaw duˬ baw meh. Yoˇsehˆ lawˬ haw laˇ˗eu jeˬ teu˗ahˇ tawˆ leˇ ngaˬ˗aˇ laˬ? Aˬ yawꞈ “maˬ” lehˇ kʼaˬ duˬ ni ehˇ nehˬ ngaˬ˗aˇ laˬ?

‘Yoˇsehˆ maˬ tawˆ leˇ˗aˬ’ lehˇ Jaˇliꞈ ehˇ˗eu meh. Yoˇsehˆ aˬ yawꞈ˗ahˇ nui ma taˬ˗eu gʼaˬ˗ahˇ tiˬ jeˬ gʼeh neh˗iˬ saˇ jaˇ maˬ puiˬ lehˇ ehˇ nehˬ˗euˬ meh. Aˇ yeˇ kʼaˇ huiˬ˗eu jeˬ naˇ “Miˬyehˇ mehˬ shi iˬ baˇ huiˬ dui dui˗eu maˬ mˇ kʼmˬ˗eu heu jeˬ˗ahˇ, ngaˇ aˬ joˆ˗ehˇ mˇ nya nmˇ?” lehˇ ehˇ nehˬ˗euˬ meh. Yoˇsehˆ Yeˬhawˇbaˬ˗ahˇ gaˬ dui dui˗eu miˇ neh kʼaˬ duˬ ni maˬ lehˇ yaw tsehˆ tsehˆ˗ehˇ ehˇ nehˬ˗euˬ meh. Ehˇ kʼawꞈ Pawˇtiˇpaˬ˗euˬ miˬ zaˬ paˇ leh jeh˗aˬ siˬ. Yawˬ nah na luꞈ mehˇ shuiˇ shuiˇ˗eu meh. Tiˬ nah zaˬ kʼaˆ tiˬ gʼaˬ˗iˬ maˬ jawˇ ngeh, Pawˇtiˇpaˬ˗euˬ miˬ zaˬ Yoˇsehˆ˗euˬ pehˇ kʼahˬ˗ahˇ gʼeu tehˬ˗awˇ, ‘Ngaˬ nehˬ˗ehˇ yuꞈ laˇ˗awˬ lehˇ cawˬ˗euˬ meh.’ Ehˇ kʼawꞈ Yoˇsehˆ pehˇ kʼahˬ behˇ lehˆ˗awˇ coeˬ doˆ gʼeh˗euˬ meh. Teu ngeh Pawˇtiˇpaˬ˗euˬ miˬ zaˬ Yoˇsehˆ˗euˬ pehˇ kʼahˬ yuˇ taˬ˗awˇ, Yoˇsehˆ aˬ yawꞈ˗ahˇ dawꞈ laˇ˗eu leh jeh nga lehˇ Pawˇtiˇpaˬ˗ahˇ ehˇ nehˬ˗euˬ meh. Pawˇtiˇpaˬ nui ma pehˇ dui dui˗awˇ Yoˇsehˆ˗ahˇ tawˬ˗ahˇ nyehꞈ ahˇ˗euˬ meh.

Yoˇsehˆ zahˇ tsui ni gʼeh˗eu tawˬ˗ahˇ ya uˇ˗euˬ meh. Aˬ yawꞈ˗ahˇ aˇ yamˬ tiˬ yamˬ˗ahˇ keuˆ ni aˬ kuiˇ˗ahˇ shmˇ caˆ paˆ˗awˇ shmˇ lahˇ dah dah˗awˇ bi jawˇ˗euˬ meh. (Ja ceuˬ 105:17, 18) Teu ngeh aˬ yawꞈ dehꞈ ziˇ tiˬ jeˬ˗iˬ gaˇ dahˇ maˬ paˇ tsoeˬ miˇ˗a lehˇ noeˬ laˇ nya meh. Yeˬhawˇbaˬ aˬ yawꞈ˗ahˇ byehˇ dzeh ngaˬ˗aˇ laˬ? Maˬ, maˬ byehˇ dzeh˗aˬ. Aˬ yawꞈ jiˇ Yeˬhawˇbaˬ˗ahˇ aˬ myah luꞈ nui ma taˬ˗awˇ, tawˬ laꞈ kʼoeˇ gaˇ leh jeh dui dui˗eu miˇ neh, Yeˬhawˇbaˬ aˬ yawꞈ˗ahˇ guiˬ lahˬ biꞈ˗euˬ meh. Tiˬ kʼehˬ naˇ aˬ yawꞈ tawˬ zaˬ deuˬ˗ahˇ haw saˆ˗eu gaˇ ya mˇ˗euˬ meh. Aˇ yamˬ heu laꞈ kʼoeˇ aˬ yawꞈ aˬ myah luꞈ kʼaˬ duˬ ni kamˬ daˬ˗euˬ meh.

Yoˇsehˆ nui jah ziꞈ dah ni gʼeh˗awˇ kʼaˬ duˬ ni gʼeh˗eu miˇ neh, Yeˬhawˇbaˬ aˬ yawꞈ˗ahˇ gaˇ yawˬ jeˬ yawˬ paˇ bi mˇ˗euˬ meh. Tiˬ nah Yeˬhawˇbaˬ Paˬlawˇ˗ahˇ mehˬ hu paw pyeuꞈ laˇ˗eu gaˇ kawˆ yuꞈ maˆ bi maˆ mawˇ˗euˬ meh. Yeˬhawˇbaˬ Yoˇsehˆ˗ahˇ yuꞈ maˆ˗euˬ dawˬ tsuiꞈ dzawˇ nehˬ nya ni caw ba nehˬ˗euˬ meh. Yoˇsehˆ Paˬlawˇ˗ahˇ 7 kʼoꞈ byah ni dzaˬ˗eu dawˇ˗eu tiˬ byah tiˬ loꞈ jaˆ˗awˇ kʼoeˇ gaˇ neh 7 kʼoꞈ naˇ, mehꞈ˗eu shuꞈ˗eu jeˬ keuˆ le meh lehˇ dzawˇ nehˬ˗euˬ meh. Paˬlawˇ toˆ˗ehˇ dzawˇ nehˬ nya gaˇ zahˬ leˇ˗awˇ, Yoˇsehˆ˗ahˇ aˬ yawꞈ jiˇ naˇ kʼaˇ huiˬ˗eu gʼaˬ bi geuꞈ˗awˇ, mehꞈ˗eu shuꞈ˗eu jeˬ keuˆ le ngeh˗euˬ gʼaˇ duˬ gaˇ bi mˇ˗euˬ meh. Teu miˇ neh mehꞈ˗eu shuꞈ˗eu jeˬ keuˆ le ngeh, Yoˇsehˆ Iˇjiˇtuˆ miˇ kʼahˬ˗ahˇ tehꞈ˗ehˇ maˬ ngeuˇ˗eu, aˬ yawꞈ˗euˬ nymˇ jiˇ˗ahˇ jiˇ caw ba nehˬ nya˗euˬ meh. Aˬ yawꞈ˗euˬ aˇ doˆ deuˬ Iˇjiˇtuˆ miˇ kʼahˬ˗ahˇ dzaˬ˗eu dawˇ˗eu jeˬ zeuˇ le ngeh, aˬ yawꞈ maꞈ˗euˬ aˬ nyiˇ˗ahˇ aw byaˆ luꞈ˗eu lehˇ maˬ siˬ nya˗a. Yaw nyiˇ ngeh Yoˇsehˆ neh yuꞈ maˆ maˆ˗euˬ jeˬ maˇ diˇ pyeuꞈ laˇ˗euˬ meh. Aˇ doˆ deuˬ jiˇ yaw beh loꞈ˗ehˇ maˬ paˇ duˇ ni nui ma paˇ˗iˇ˗euˬ meh. Yaw beh aˬ yawꞈ maꞈ bye˗eu Yoˇsehˆ nymˬ˗mˇ naˇ aˬ yawꞈ maꞈ˗ahˇ maˬ ehˇ, aˬ yawꞈ maꞈ˗euˬ aˬ da˗ahˇ maˬ ehˇ, mehˬ hu paw Iˇsaˬleˬlaˆ tsawˇ jeuˬ pyeuꞈ laˇ˗eu zaˬ deuˬ uˆ deuˬ˗ahˇ maˬ ehˇ, caw ba nehˬ nya˗euˬ meh. Heu naˇ Yoˇsehˆ kʼaˬ duˬ ni gʼeh˗awˇ aˬ myah luꞈ Yeˬhawˇbaˬ˗ahˇ jah˗eu miˇ neh ngaˇ.

Jaˇliꞈ aˇ deuˆ heu deuˬ˗ahˇ gui:

• Aˇdahˬbeh˗eu 37:1-36; 39:1-23; 41:1–45:28

Ja sawˇ˗eu gʼaˇ duˬ:

Yoˇsehˆ kʼaˬ duˬ ni gʼeh˗eu lehˇ aˬ joˇ joˆ˗ehˇ mˇ mawˇ˗euˬ nga?

Naꞈ suiˇ ni poˆ tseˇ

1. 1. Yoˇsehˆ Iˇjiˇtuˆ miˇ kʼahˬ˗ahˇ dehꞈ yaꞈ˗euˬ gaˇ kawˆ maˇ diˇ ngeuˇ˗eu lehˇ aˬ joˆ˗ehˇ siˬ laˇ˗eu nga? (g˗SI 11/10 15 ¶2)

   Dawˬ kʼoꞈ

2. 2. Aˬ cawˬ nehˬ˗ehˇ joe˗eu heu naˇ, Yeˬhawˇbaˬ˗euˬ mehˬ shi “iˬ baˇ huiˬ dui dui˗eu” jeˬ pyeuꞈ˗eu lehˇ Yoˇsehˆ aˬ joˆ˗ehˇ siˬ nya˗eu nga? (Aˇdahˬbeh˗eu 39:9; w22.08 26 ¶2)

   Dawˬ kʼoꞈ

3. 3. Yeˬhawˇbaˬ aˬ jeˬ miˇ neh Yoˇsehˆ˗ahˇ Paˬlawˇ jiˇ naˇ kʼaˇ huiˬ˗eu gʼaˬ bi geuꞈ˗euˬ nga? (w96-SI 5/1 11 ¶4) (Aˇ baˇ 1)

   Dawˬ kʼoꞈ

   

4. 4. Yoˇsehˆ 110 kʼoꞈ byah laˇ ngeh kʼawꞈ, Yeˬhawˇbaˬ˗ahˇ jah ziꞈ˗eu lehˇ aˬ jeˬ miˇ neh ehˇ nya nga? (Aˇdahˬbeh˗eu 50:25, 26; w07-SI 6/1 28 ¶10-11) (Aˇ baˇ 2)

   Dawˬ kʼoꞈ

   

Aˬ joˆ˗ehˇ zmˬ iˇ nya nga lehˇ shaˇ noeˬ

• Mehˇ nmˇ tiˬ gʼaˬ gʼaˬ aˬ dui˗ahˇ maˬ tsaˬ maˬ dawˇ˗eu jeˬ˗ehˇ mˇ nehˬ laꞈ ngeh, Yoˇsehˆ˗ahˇ aˬ joˆ˗ehˇ dzaw geuꞈ nya nga? (Aˇdahˬbeh˗eu 45:4, 5; 50:19-21)

  Dawˬ kʼoꞈ

• Yoˇsehˆ nymˇ jiˇ laꞈ kʼoeˇ˗euˬ deuˬ nehˬ˗ehˇ gaˇ mahˇ kaˬ gaˇ jawˇ kʼawꞈ, aˬ myah luꞈ Yeˬhawˇbaˬ˗ahˇ saˇ jaˇ ziꞈ meh.

  • Sahˬ boꞈ dzaw nymˇ˗ahˇ jawˇ ngeh Yoˇsehˆ˗ahˇ aˬ joˆ˗ehˇ dzaw geuꞈ nya nga? (Aˇ baˇ 3)

    Dawˬ kʼoꞈ

    

  • Yawˬ gaˇ yawꞈ iˇ ngeh Yoˇsehˆ˗ahˇ aˬ joˆ˗ehˇ dzaw geuꞈ nya nga? (Aˇ baˇ 4)

    Dawˬ kʼoꞈ

    

  • Naˬ gaˬ lawˬ muˇ mui ngeh Yoˇsehˆ˗ahˇ aˬ joˆ˗ehˇ dzaw geuꞈ nya nga? (Aˇ baˇ 5)

    Dawˬ kʼoꞈ

    

• Yoˇsehˆ˗euˬ kʼaˬ duˬ ni gʼeh˗eu jeˬ˗ahˇ aˬ joˆ˗ehˇ dzaw geuꞈ nya nga?

  Dawˬ kʼoꞈ

Naꞈ suiˇ ni shaˇ noeˬ

• Gaˇ kawˆ heu Yeˬhawˇbaˬ nehˬ˗ehˇ taꞈ leˇ˗awˇ ngaˬ˗ahˇ aˬ jeˬ bi siˬ laꞈ˗eu nga?

  Dawˬ kʼoꞈ

• Gaˇ kawˆ heu miˇ shuiꞈ˗ahˇ Yeˬhawˇbaˬ neh saˇ jaˇ dzaˬ taˬ˗euˬ jeˬ nehˬ˗ehˇ aˬ joˆ˗ehˇ taꞈ nga?

  Dawˬ kʼoꞈ

• Yoˇsehˆ gʼoꞈ dehꞈ laˇ ngeh ngaˇ aˬ jeˬ naˇ haˬ paˬ nga?

  Dawˬ kʼoꞈ

Haw lahˬ

Yeˬhawˇbaˬ Yoˇsehˆ˗ahˇ shaˬ zahˬ˗ahˇ maˬ ya puˬ ni maˬ jahˇ nehˬ kʼawꞈ, kamˬ daˬ coeˇ ni caw ba nehˬ˗euˬ meh. Nawˬ˗ahˇ jiˇ aˬ joˆ˗ehˇ caw ba nehˬ nya nga lehˇ haw.

“Yeˬhawˇbaˬ nawˇ mˇ pyeuꞈ nya˗awˇ, guiˬ lahˬ baw ni caw ba nehˬ luꞈ” (w23.01 14-19)

Cawˬ deuˬ behˬ dzaˬ laˇ ngeh, zaˬ deuˬ Yoˇsehˆ˗ahˇ aˬ joˆ˗ehˇ dzaw geuꞈ nya nga?

Maˬ tsaˬ maˬ dawˇ˗eu jeˬ˗ahˇ ya tahˬ puˬ kʼawꞈ oˇ daˆ leꞈ (1:31)