Ka li zaˬ˗euˬ dehꞈ ziˇ
Yawˬ ha˗ahˇ Yeˬhawˇbaˬ haw˗eu loꞈ˗ehˇ haw
‘Yeˬhawˇbaˬ aˬ yawꞈ˗euˬ tsawˇ haˬ deuˬ˗ahˇ nui kʼahˇ shiˇ˗eu meh.’ (Ja ceuˬ 149:4) Aˬ dui maˬ byah kuꞈ˗eu kʼawꞈ Yeˬhawˇbaˬ aˬ dui˗euˬ yaw muiˬ jeˬ hawˇ˗eu aˬ dui mˇ nya˗eu jeˬ˗ahˇ haw˗eu meh. Ehˇ kʼawꞈ tiˬ poˆ na aˬ dui yawˬ ha˗ahˇ yaw tsaˬ tsaˬ lehˇ haw˗eu yaw shaˬ kʼawꞈ pyeuꞈ nya meh. Kʼoeˇ naˇ aˬ cawˬ neh aˬ dui˗ahˇ mˇ nehˬ laꞈ˗euˬ jeˬ baˬ da neh, yawˬ ha aˇ poeˬ maˬ baw nya lehˇ kʼawꞈ noeˬ laˇ nya˗awˇ, yawˬ ha neh mˇ lehˬ haw˗euˬ jeˬ˗ahˇ tehꞈ˗ehˇ haw tsoˆ taˬ˗eu miˇ neh, Yeˬhawˇbaˬ aˬ dui˗ahˇ maˇ diˇ gaˬ˗eu maˬ siˬ lehˇ jiˇ noeˬ laˇ nya˗eu meh. Toˆ˗ehˇ noeˬ laˇ ngeh, aˬ dui˗ahˇ caw ba nehˬ nya˗eu aˬ jeˬ nga?
Yeˬhawˇbaˬ naˇ tsawˇ haˬ zaˬ maˬ haw mawˇ nya˗eu jeˬ˗ahˇ haw mawˇ nya meh lehˇ taˬ ngehˇ. (1 Saˬmeuˬlaˆ 16:7) Teu naˇ aˬ dui yawˬ haˇ yawˬ ha haw mawˇ nya˗eu naˆ maˬ tseˇ, Yeˬhawˇbaˬ aˬ dui˗ahˇ haw mawˇ nya dzehˬ meh lehˇ ehˇ mawꞈ˗eu meh. Jaˇliꞈ Yeˬhawˇbaˬ aˬ dui˗ahˇ aˬ joˆ˗ehˇ haw˗eu lehˇ gʼoˆ shaw nya ni caw ba nehˬ laꞈ˗eu miˇ neh guiˬ lahˬ huiˬ miˇ˗a. Aˬ dui Jaˇliꞈ aˇ deuˆ deuˬ hawˇ˗eu Jaˇliꞈ laꞈ kʼoeˇ˗euˬ gaˇ kawˆ deuˬ˗ahˇ gui˗awˇ shaˇ noeˬ shaˇ sawˇ naˇ, Yeˬhawˇbaˬ aˬ yawꞈ˗euˬ gaˇ mˇ zaˬ deuˬ˗ahˇ aˇ naˆ ni gaˬ˗eu lehˇ siˬ nya laˇ˗eu meh.
Yeˬhawˇbaˬ nawˬ˗ahˇ gaˬ meh lehˇ jah ziꞈ nya lehˇ ehˇ˗eu biˬdiˬoˬ haw gʼaˬ naˇ, naˇ haˬ˗eu jeˬ heu deuˬ˗ahˇ dawˬ kʼoꞈ biꞈ.
Cehˆ ceh ceh˗eu gʼaˬ, hawˇ˗eu aˬ yawꞈ˗euˬ aˬ da˗euˬ gaˇ kawˆ heu naˇ, Yeˬhawˇbaˬ aˬ dui˗ahˇ haw˗eu jeˬ nehˬ˗ehˇ taꞈ leˇ˗awˇ, aˬ jeˬ mehˬ˗eu nga?
Huiˬ˗eu iˬ baˇ mˇ˗euˬ gʼaˬ, Yeˬhawˇbaˬ nehˬ˗ehˇ gʼoeˇ kʼoꞈ laˇ nya˗eu heu deuˬ˗ahˇ mˇ caw naˇ, aˬ yawꞈ maꞈ aˬ jeˬ˗ahˇ jah ziꞈ nya˗eu nga?—1 Yoˇhaˬ 3:19, 20
Mehˇ nmˇ heu gʼaˬ, Daˬbiˇ hawˇ˗eu Yeˬhawˇshaˬpaˇ˗euˬ gaˇ kawˆ˗ahˇ gui˗awˇ shaˇ noeˬ shaˇ sawˇ ngeh, aˬ jeˬ ya siˬ˗euˬ nga?