“Yaw tsaˬ yaw dawˇ jeˬ laꞈ kʼoeˇ dehꞈ”

1. Aˬ dui tiˬ gʼaˬ tiˇ gʼaˬ “yaw tsaˬ yaw dawˇ jeˬ” aˬ joˆ˗ehˇ za˗euˬ gaˇ kawˆ˗ahˇ ja sawˇ˗eu heu naˇ, aˬ joˆ˗ehˇ gaˇ dahˇ tsoeˬ˗eu nga?

“Nawˇ yaw tsaˬ yaw dawˇ jeˬ laꞈ kʼoeˇ aˬ joˆ˗ehˇ ahˇ laˇ deˬ?” lehˇ ehˇ˗eu dawˬ heu dawˬ˗ahˇ nawˇ dawˬ kʼoꞈ yaw mya poˆ ya biꞈ haw˗euˬ tehꞈ˗a. Aˬ myah myah naˇ aˬ dui mehˇ nmˇ deuˬ nehˬ˗ehˇ ya mawˇ dzoeˇ dah beh ngeh teu loꞈ˗ehˇ naˇ haˬ˗eu meh. Aˬ dui mehˇ nmˇ deuˬ Yeˬhawˇbaˬ˗ahˇ aˬ joˆ˗ehˇ siˬ nya laˇ˗awˇ, gaˬ laˇ˗euˬ lehˇ dzawˇ gaˇ naˇ haˬ mawꞈ˗eu ma. Aˬ dui jiˇ yaw tsaˬ yaw dawˇ jeˬ heu aˇ naˆ ni gaˇ dahˇ tsoeˬ˗eu gaˇ kawˆ˗ahˇ dzawˇ nehˬ mawꞈ˗eu ma. (Loˇmaˆ 1:11) Heu loꞈ˗ehˇ ja cawˬ˗eu heu naˇ yaw tsaˬ yaw dawˇ jeˬ heu aˇ naˆ ni aˬ poeˬ baw˗eu lehˇ bi siˬ laꞈ˗eu meh. Kʼoeˇ naˇ “yaw tsaˬ yaw dawˇ jeˬ laꞈ kʼoeˇ dehꞈ” ma, Miˬyehˇ nui kʼahˇ shiˇ˗eu jeˬ˗ehˇ dehꞈ ma lehˇ noeˬ tsehˆ taˬ˗euˬ nui ma˗ahˇ jiˇ ziꞈ dah ni bi gʼeh laˇ˗eu meh.—3 Yoˇhaˬ 4.

2. Aˬ dui heu kawˆ laꞈ kʼoeˇ aˬ jeˬ˗euˬ gaˇ kawˆ˗ahˇ ja sawˇ˗eu nga?

² Heu kawˆ laꞈ kʼoeˇ aˬ dui aˬ jeˬ miˇ neh yaw tsaˬ yaw dawˇ jeˬ˗ahˇ gaˬ˗eu tiˬ kawˆ na˗ahˇ ja sawˇ˗awˇ, aˇ poeˬ baw˗eu laꞈ sawˬ heu˗ahˇ gaˬ˗eu lehˇ aˬ joˆ˗ehˇ mˇ mawˇ daˆ leꞈ nya˗eu nga lehˇ jiˇ ja sawˇ ma. Heu naˇ aˬ dui˗ahˇ yaw tsaˬ yaw dawˇ jeˬ˗ahˇ sheuˬ ahˇ nehˬ laꞈ˗euˬ Yeˬhawˇbaˬ˗ahˇ guiˬ lahˬ huiˬ mawꞈ dzehˬ laˇ ni caw ba nehˬ laꞈ˗eu meh. (Yoˇhaˬ 6:44) Kʼoeˇ naˇ yaw tsaˬ yaw dawˇ jeˬ heu aˬ cawˬ˗ahˇ jiˇ biˇ paˆ nehˬ mawꞈ dzehˬ laˇ ni jiˇ caw ba nehˬ laꞈ˗eu meh.

Aˬ dui “yaw tsaˬ yaw dawˇ jeˬ”˗ahˇ aˬ jeˬ miˇ neh gaˬ˗eu nga?

3. Aˬ dui yaw tsaˬ yaw dawˇ jeˬ˗ahˇ gaˬ˗eu aˇ yeˇ kʼaˇ huiˬ˗eu jeˬ naˇ aˬ jeˬ nga?

³ Aˬ dui yaw tsaˬ yaw dawˇ jeˬ˗ahˇ gʼawˬ mya jeˬ baˬ da neh gaˬ˗eu ma. Aˇ yeˇ kʼaˇ huiˬ˗eu jeˬ naˇ, yaw tsaˬ yaw dawˇ jeˬ˗euˬ dawˬ pehˬ dawˬ puˇ pyeuꞈ˗eu Yeˬhawˇbaˬ˗ahˇ gaˬ˗eu miˇ neh ma. Jaˇliꞈ dzaw ngeh tiˬ jawˇ aˬ dui Yeˬhawˇbaˬ naˇ, mˬ hawˇ˗eu miˇ˗ahˇ beh˗eu baoˬ ahˇ˗eu tehꞈ˗ehˇ maˬ ngeuˇ˗eu aˬ dui˗ahˇ yaw kʼaˆ˗ehˇ gaˬ˗awˇ ngehˬ gʼeh˗eu mˬ taˆ Aˬda pyeuꞈ˗eu lehˇ ya siˬ˗euˬ ma. (1 Beˬtuˆluˆ 5:7) Kʼoeˇ uˬ taꞈ Yeˬhawˇbaˬ naˇ, ‘gʼawˬ shaˬ gaˬ nya˗awˇ, caw ba nya˗eu, yaw awˇ laꞈ˗ehˇ nui maˬ maˬ pehˇ˗eu uˬ taꞈ, gʼoeˇ˗eu gaˬ˗eu jeˬ tiˬ byah ni ahˇ˗awˇ, saˇ jaˇ ziꞈ dui dui˗eu’ Miˬyehˇ pyeuꞈ˗eu lehˇ jiˇ ya siˬ˗euˬ ma. (Doˆ˗iˇ˗eu 34:6) Yeˬhawˇbaˬ yaw tsaˬ yaw dawˇ jeˬ˗ahˇ jiˇ gaˬ˗eu meh. (Iˇsaˬyaˇ 61:8) Aˬ dui˗euˬ shaˬ zahˬ˗ahˇ Miˬyehˇ ya mawˇ ngeh aˬ yawꞈ˗euˬ nui ma˗ahˇ deuˬ dui dui leˇ˗eu meh. Miˬyehˇ aˬ yawꞈ neh nah paˇ paˇ taˬ˗euˬ aˇ nah tsaˬ laˇ ngeh shaˬ zahˬ heu dawˬ tawˆ luꞈ˗ahˇ laˆ byoˆ jiˇ nehˬ˗eu meh. (Yeˬlaˬmiˇ 29:11) Aˇ yamˬ teu naˇ muiˬ dui dui˗eu aˇ yamˬ pyeuꞈ meh. Teu miˇ neh aˬ dui Yeˬhawˇbaˬ˗ahˇ gaˬ dui dui˗eu ma.

4-5. Pawˇluˆ aˬ jeˬ miˇ neh noeˬ tmˬ˗eu jeˬ˗ahˇ shmˇ kuˆ seuˬ seuˬ ma nehˬ˗ehˇ sheu cehˆ taˬ˗euˬ nga?

⁴ Aˬ dui yaw tsaˬ yaw dawˇ jeˬ˗ahˇ gaˬ˗eu heu naˇ aˬ jeˬ baˬ da neh nga siˬ? Yaw tsaˬ yaw dawˇ jeˬ heu naˇ aˬ dui˗ahˇ gaˇ dahˇ tsoeˬ dui dui˗eu meh. Yaw jeˬ ma jeˬ Jaˇliꞈ laꞈ kʼoeˇ˗euˬ yaw tsaˬ yaw dawˇ heu naˇ, aˬ dui˗ahˇ mehˬ hu paw noeˬ tmˬ˗eu jeˬ biꞈ˗eu meh. Gʼaˬ kʼehˇ Pawˇluˆ noeˬ tmˬ˗eu jeˬ heu nehˬ˗ehˇ taꞈ leˇ˗awˇ, “Saˇ baoˬ maˬ bi luˆ˗iˇ nya ni shmˇ kuˆ seuˬ seuˬ ma neh gʼeu tehˬ taˬ˗euˬ loꞈ˗ehˇ, aˬ dui dehꞈ˗eu jeˬ maˬ poˆ maˬ paˇ laˇ nya ni, aˬ dui˗euˬ noeˬ tmˬ˗eu jeˬ kʼoeˇ aˬ dui˗ahˇ ziꞈ dah ni bi jaˆ˗eu meh” lehˇ ehˇ˗eu meh. (Heˬbyehˇ 6:19) Shmˇ kuˆ seuˬ seuˬ ma heu naˇ saˇ baoˬ maˬ bi luˆ˗iˇ ni gʼeu tehˬ taˬ˗eu loꞈ˗ehˇ Jaˇliꞈ˗ahˇ dawˬ pehˬ taˬ˗eu noeˬ tmˬ˗eu jeˬ heu jiˇ dehꞈ ziˇ laꞈ kʼoeˇ shaˬ zahˬ lawˬ haw laˇ˗eu jeˬ˗ahˇ ya puˬ ngeh maˬ poˆ maˬ paˇ laˇ ni ziꞈ dah ni bi gʼeh˗eu meh.

⁵ Maˇ diˇ naˇ Pawˇluˆ gaˇ kawˆ heu tseˇ doˆ taˬ˗euˬ deuˬ aˇ poeˬ taˬ baw dui dui˗eu mˬ taˆ noeˬ tmˬ˗eu jeˬ˗ahˇ ngehˬ keuˆ luꞈ˗eu meh. Ehˇ kʼawꞈ gaˇ heu naˇ Miˇ tsaˬ Baˬlaˬdiˇsuˆ˗ahˇ mˬ maˬ maˬ byaˆ zaˇ ziˇ dehꞈ gʼeh˗eu noeˬ tmˬ˗eu jeˬ jaˆ˗eu Ka li zaˬ deuˬ nehˬ˗ehˇ jiˇ taꞈ˗eu meh. (Yoˇhaˬ 3:16) Mˬ maˬ maˬ byaˆ zaˇ ziˇ dehꞈ gʼeh˗eu noeˬ tmˬ˗eu jeˬ˗ahˇ siˬ nya laˇ˗eu heu naˇ, aˬ dui˗euˬ dehꞈ ziˇ˗ahˇ maˇ jawˆ ni bi gʼeh˗eu meh.

6-7. Mehˬ hu paw˗euˬ gaˇ kawˆ yaw tsaˬ yaw dawˇ jeˬ˗ahˇ ya siˬ˗eu heu naˇ Eˬgʼawˬ˗ahˇ aˬ joˆ˗ehˇ gaˇ dahˇ tsoeˬ˗eu nga?

⁶ Aˬ dui Eˬgʼawˬ lehˇ kuˇ˗eu mehˇ nmˇ zaˬ miˬ aˬ buˇ tiˬ gʼaˬ˗euˬ gaˇ kawˆ˗ahˇ haw ma. Aˬ yawꞈ naˇ yaw tsaˬ yaw dawˇ laꞈ kʼoeˇ huiˬ laˇ˗euˬ tiˬ gʼaˬ maˬ ngeuˇ˗a. Nyiˇ ngeh aˬ yawꞈ shiˇ˗eu jeˬ˗ahˇ guˆ dui dui˗eu meh. Aˬ yawꞈ “Ni shawˬ lehˇ ehˇ˗eu jeˬ maˬ paˇ jaˆ meh” lehˇ ehˇ˗eu sahˬ boꞈ tiˬ hmˬ˗ahˇ ya gui gʼaˬ ngeh tiˬ jawˇ maˬ ngehˇ leˇ coeˇ˗a. Aˬ yawꞈ ehˇ˗eu “Sahˬ boꞈ teu baˬ da neh uˬ ciꞈ jiˇ maˬ yuꞈ kʼaˆ leˇ nya. Mehˬ hu paw aˬ joˆ˗ehˇ pyeuꞈ laˇ˗eu maˬ siˬ lehˇ tehꞈ˗ehˇ shaˇ noeˬ˗eu miˇ neh. Ngaˇ ‘Tsawˇ haˬ˗euˬ dehꞈ ziˇ˗aˬ, heu naˆ tehꞈ maˬ shaˇ shaˇ ngeuˇ˗eu paˬ leˇ.’ Ngaˇ aˬ jeˬ gʼaˇ duˬ dehꞈ luꞈ nya heu lehˇ noeˬ˗euˬ ma. Ngaˬ˗ahˇ maˬ shiˇ mawꞈ nya” lehˇ ehˇ˗eu meh.

⁷ Eˬgʼawˬ zaˬ guˬ guˬ dzawˇ dzawˇ laˇ ngeh Yeˬhawˇbaˬ Saˇ kiˇ deuˬ nehˬ˗ehˇ ya mawˇ dzoeˇ˗euˬ meh. Aˬ yawꞈ “Ngaˇ miˇ tsaˬ Baˬlaˬdiˇsuˆ˗ahˇ mˬ maˬ maˬ byaˆ zaˇ ziˇ ya dehꞈ meh lehˇ ehˇ˗eu noeˬ tmˬ˗eu jeˬ˗ahˇ jah dahˬ beh laˇ˗euˬ ma” lehˇ ehˇ˗eu meh. Yaw tsaˬ yaw dawˇ jeˬ˗ahˇ ya siˬ nya laˇ˗euˬ heu naˇ, aˬ yawꞈ˗ahˇ aˬ joˆ˗ehˇ gaˇ dahˇ tsoeˬ˗eu nga? Aˬ yawꞈ “Mehˬ hu paw˗euˬ gaˇ kawˆ hawˇ˗eu shiˇ˗eu jeˬ˗euˬ gaˇ kawˆ shaˇ noeˬ shaˇ noeˬ˗ehˇ kʼahˬ lahˇ˗eu miˇ neh, maˬ yuꞈ kʼaˆ leˇ ni maˬ paˇ ya shaˬ miˬ˗a” lehˇ ehˇ˗eu meh. Eˬgʼawˬ yaw tsaˬ yaw dawˇ jeˬ˗ahˇ aˇ poeˬ taˬ baw dui dui˗eu meh. Aˬ yawꞈ mehˬ hu paw˗euˬ noeˬ tmˬ˗eu jeˬ gaˇ kawˆ heu aˬ cawˬ˗ahˇ laˬ kʼaˬ tiˬ cehˇ dzawˇ gaˬ nehˬ˗eu meh.—1 Tiˆmoˇseˬ 4:16.

8-9. (a) Yeˬsuˇ neh ja˗euˬ yaw jeˬ ma jeˬ laꞈ kʼoeˇ˗euˬ tsawˇ haˬ teu gʼaˬ, poˆ mawˇ˗euˬ pyuˇ pahˬ˗ahˇ aˇ naˆ ni aˇ poeˬ taˬ baw˗eu nga? (b) Nawˬ˗euˬ gʼaˇ duˬ tawˇ neh yaw tsaˬ yaw dawˇ jeˬ aˬ naˆ ni aˇ poeˬ baw˗eu nya?

⁸ Jaˇliꞈ˗euˬ yaw tsaˬ yaw dawˇ jeˬ laꞈ kʼoeˇ Miˬyehˇ Miˇkʼahˬ laˬ kʼaˬ cehˇ˗eu guiˬ lahˬ dawˬ jiˇ ahˇ˗eu meh. Yeˬsuˇ Miˬyehˇ Miˇkʼahˬ˗euˬ yaw tsaˬ yaw dawˇ jeˬ heu˗ahˇ pyuˇ pahˬ nehˬ˗ehˇ sheu cehˆ taˬ˗euˬ meh. Maꞈtehˬ 13:44-ahˇ Yeˬsuˇ “Mˬtaˆ Miˇkʼahˬ˗aˬ, heu loꞈ˗ehˇ duˇ˗eu meh. Tsawˇ haˬ tiˬ gʼaˬ deh ma tiˬ kawˬ˗ahˇ pyuˇ pahˬ mawˇ˗awˇ, yaˆ pymˬ taˬ yaꞈ˗euˬ meh. Aˬ yawꞈ laˬ kʼaˬ cehˇ dui dui˗eu laꞈ kʼoeˇ, kʼaˇ jaˆ˗eu jeˬ dawˬ tawˆ luꞈ ahˬ jiˇ˗awˇ, deh ma kʼoeˇ kawˬ zeuˇ tsehˆ˗euˬ meh” lehˇ ehˇ˗eu meh. Tsawˇ haˬ teu gʼaˬ pyuˇ pahˬ˗ahˇ poˆ luꞈ˗eu maˬ ngeuˇ˗a. Ehˇ kʼawꞈ ya mawˇ ngeh tiˬ jawˇ pyuˇ teu˗ahˇ za˗eu gʼaˇ duˬ, aˬ yawꞈ gʼawˬ mya jeˬ byehˇ dzeh˗euˬ meh. Aˬ yawꞈ jaˆ˗eu jeˬ dawˬ tawˆ luꞈ ahˬ dzeh jiˇ˗eu meh. Aˬ jeˬ miˇ neh nga? Aˬ yawꞈ pyuˇ pahˬ teu aˇ naˆ ni poeˬ˗eu jeˬ pyeuꞈ˗eu lehˇ siˬ nya˗eu miˇ neh meh. Teu naˇ aˬ yawꞈ neh byehˇ dzeh˗euˬ jeˬ dawˬ tawˆ luꞈ naˆ maˬ tseˇ poeˬ˗eu meh.

⁹ Nawˇ˗ahˇ jiˇ yaw tsaˬ yaw dawˇ jeˬ nehˬ˗ehˇ taꞈ leˇ˗awˇ, teu loꞈ˗ehˇ noeˬ miˇ˗a laˬ? Nawˇ jiˇ toˆ˗ehˇ noeˬ tehꞈ˗a. Miˇ tsaˬ neh biꞈ nehˬ˗eu jeˬ heu naˇ, nymˬ˗mˇ iˬ nah Yeˬhawˇbaˬ˗ahˇ uˬ duˬ ya tahˬ˗awˇ, mehˬ hu paw Miˬyehˇ Miˇkʼahˬ uˆ lahˇ˗eu uˬ moˆ mˬ maˬ maˬ byaˆ zaˇ ziˇ ya dehꞈ gʼeh˗eu noeˬ tmˬ˗eu jeˬheu nehˬ˗ehˇ sheu cehˆ naˇ, tiˬ jeˬ ehˇ nyaꞈ maˬ nyeuˆ˗a. Yeˬhawˇbaˬ nehˬ˗ehˇ cawˬ ya cawˬ˗eu heu naˇ, byehˇ dzeh yaꞈ˗eu jeˬ dawˬ tawˆ luꞈ na maˬ tseˇ aˇ poeˬ baw dzehˬ˗eu meh. Yeˬhawˇbaˬ “nui kʼahˇ shiˇ˗eu jeˬ˗ahˇ” aˬ myah luꞈ mˇ nya laˇ˗eu heu naˇ aˬ dui˗ahˇ laˬ kʼaˬ kʼaˇ bi cehˇ laˇ˗eu jeˬ pyeuꞈ meh.—Gawˇlawˇsehˇ 1:10.

10-11. Maiˇkeuˬ˗ahˇ huiˬ dui dui˗eu dehꞈ poˆ dehꞈ paˇ jeˬ mˇ ni laˆ noeˬ nehˬ˗euˬ jeˬ naˇ aˬ jeˬ nga?

¹⁰ Aˬ dui Yeˬhawˇbaˬ nui kʼahˇ shiˇ˗eu jeˬ˗ahˇ za˗eu gʼaˇ duˬ yaw myaˬ jeˬ˗ahˇ byehˇ dzeh˗euˬ ma. Tiˬ deuˬ na tsawˇ myahˇ doˆ˗eu jeˬ hawˇ˗eu gaˇ yaw muiˬ byehˇ dzeh˗euˬ meh. Tiˬ deuˬ na smˇ muiˬ muiˬ laˇ nya˗eu gaˇ ma˗ahˇ byehˇ dzeh˗euˬ meh. Tiˬ gʼaˬ na Yeˬhawˇbaˬ˗euˬ gaˇ kawˆ˗ahˇ ya siˬ nya laˇ ngeh dehꞈ ziˇ ziˇ lah ni beˬ paˇ jiˇ˗euˬ meh. Maiˇkeuˬ lehˇ kuˇ˗eu mehˇ nmˇ tiˬ gʼaˬ teu loꞈ˗ehˇ jahˇ˗euˬ meh. Maiˇkeuˬ naˇ yaw tsaˬ yaw dawˇ jeˬ laꞈ kʼoeˇ huiˬ laˇ˗euˬ maˬ ngeuˇ˗a. Aˬ yawꞈ zaˬ guˬ ngeh Kaꞈlaˬteˇ ya dzaw˗euˬ meh. Aˬ yawꞈ “Ngaˬ˗euˬ gʼawˬ mawˇ gʼaˬ kʼaˆ dui dui˗awˇ, deuˇ geuˆ ni gʼeh˗eu miˇ neh ngaˬ˗ahˇ nui kʼahˇ shiˇ˗eu lehˇ miˇ˗a. Tiˬ poˆ na ngaˬ˗ahˇ, ngaˬ˗ahˇ beh leˇ˗eu tiˬ gʼaˬ˗iˬ maˬ jawˇ nga lehˇ noeˬ laˇ nya” leh ehˇ˗eu meh. Ehˇ kʼawꞈ Jaˇliꞈ dzaw laˇ ngeh tiˬ jawˇ aˬ yawꞈ Yeˬhawˇbaˬ di ceh dawˆ ceh ceh˗eu jeˬ˗ahˇ aˬ joˆ˗ehˇ noeˬ˗eu lehˇ ya siˬ nya laˇ˗euˬ meh. (Ja ceuˬ 11:5) Maiˇkeuˬ ehˇ˗eu “Ngaˬ˗ahˇ Jaˇliꞈ mehˬ laˇ˗eu kʼoeˇ nyiˬ dzeˇ zaˬ ngaˬ˗ahˇ Kaꞈlaˬteˇ taˬ paˇ dzaw lehˇ tiˬ jawˇ˗iˬ maˬ ehˇ˗a. Aˬ yawꞈ nyaꞈ ngaˬ˗ahˇ Jaˇliꞈ˗euˬ yaw tsaˬ yaw dawˇ tehꞈ˗ehˇ mehˬ nehˬ laꞈ˗eu meh.”

¹¹ Maiˇkeuˬ Yeˬhawˇbaˬ˗ahˇ ngehˬ˗ehˇ siˬ nya laˇ naˇ ngehˬ˗ehˇ Yeˬhawˇbaˬ˗ahˇ gaˬ dzehˬ laˇ˗euˬ meh. Aˬ yawꞈ Yeˬhawˇbaˬ aˬ yawꞈ˗euˬ gaˇ mˇ zaˬ deuˬ˗ahˇ gʼawˬ shaˬ gaˬ˗eu lehˇ ehˇ˗eu heu˗ahˇ ya dui dui leˇ˗eu meh. Aˇ nah naˇ Maiˇkeuˬ dehꞈ ziˇ dehꞈ poˆ dehꞈ paˇ ya mˇ nga lehˇ ya siˬ˗euˬ meh. Aˬ yawꞈ “Kaꞈlaˬteˇ muiˬ niˇ gʼa˗eu byehˇ dzeh˗eu lehˇ ehˇ˗eu heu naˇ, ngaˬ˗euˬ gʼaˇ duˬ shaˬ dui dui˗eu jeˬ pyeuꞈ miˇ˗a. Ehˇ kʼawꞈ ngaˇ byehˇ dzeh nya naˇ Yeˬhawˇbaˬ nui kʼahˇ shiˇ dui dui meh lehˇ siˬ nya˗eu ma. Ngaˇ Miˬyehˇ˗ahˇ uˬ duˬ tahˬ laˇ˗eu gʼaˇ duˬ yaw jeˬ na luꞈ byehˇ dzeh˗eu geuˇ ngaˇ˗a lehˇ jah˗eu ma” lehˇ ehˇ˗eu meh. Maiˇkeuˬ aˬ yawꞈ neh poˆ mawˇ˗eu yaw tsaˬ yaw dawˇ jeˬ˗ahˇ aˇ poeˬ taˬ baw dui dui˗eu meh. Heu naˇ aˬ yawꞈ˗ahˇ dehꞈ ziˇ laꞈ kʼoeˇ huiˬ dui dui˗eu dehꞈ poˆ dehꞈ paˇ jeˬ mˇ ni laˆ noeˬ nehˬ˗eu meh.—Yaˬkoˆ 1:25.

12-13. Jaˇliꞈ laꞈ kʼoeˇ˗euˬ yaw tsaˬ yaw dawˇ jeˬ Meˬliˬ˗ahˇ aˬ joˆ˗ehˇ caw ba nehˬ˗euˬ nga?

¹² Yaw tsaˬ yaw dawˇ jeˬ˗euˬ aˇ poeˬ˗ahˇ bi siˬ˗eu gʼaˇ duˬ Jaˇliꞈ˗ahˇ yaw tsaˬ yaw dawˇ jeˬ˗ahˇ yaw shehꞈ bya nehˬ˗eu tsiˇ kʼmˬ nehˬ˗ehˇ sheu cehˆ taˬ˗euˬ meh. (Ja ceuˬ 119:105; Eˇpeˇsu 5:8) Aˬzeˬbaˬjaˬ˗ahˇ jawˇ˗eu Meˬliˬ Jaˇliꞈ laꞈ kʼoeˇ˗euˬ yaw tsaˬ yaw dawˇ jeˬ˗ahˇ aˇ poeˬ taˬ baw dui dui˗eu meh. Aˬ yawꞈ naˇ zahˇ tiˬ gʼaˬ tiˬ jeˬ˗ehˇ tawˬ taˬ˗euˬ nymˇ jiˇ˗ahˇ huiˬ laˇ˗euˬ meh. Aˬ yawꞈ˗euˬ aˬ da naˇ Muˬsaˬ˗liˬ zahˇ tawˬ taˬ˗awˇ, aˬ yawꞈ˗euˬ aˬ ma naˇ, Yuˇdaˆ zahˇ tawˬ taˬ˗euˬ meh. Aˬ yawꞈ heu loꞈ˗ehˇ ehˇ˗eu meh. “Ngaˇ Miˬyehˇ jawˇ˗eu maˬ siˬ lehˇ tiˬ jawˇ˗iˬ maˬ noeˬ haw˗euˬ kʼawꞈ, naˇ haˬ˗eu jeˬ nmˇ jaˆ miˇ˗a. Ngaˬ˗ahˇ ‘Miˬyehˇ tsawˇ haˬ˗ahˇ aˬ jeˬ miˇ neh beh˗euˬ nga? Tsawˇ haˬ˗euˬ dehꞈ ziˇ aˬ jeˬ miˇ neh shaˬ zahˬ tehꞈ˗ehˇ jaˆ˗eu nga? Shiˇ dzeuˇ˗euˬ kʼawꞈ shiˬ buiˇ lah ma˗ahˇ mˬ maˬ maˬ byaˆ zaˇ ziˇ paˇ ya bi kʼehˬ˗eu jeˬ maˇ˗iˬ aˬ joˆ˗ehˇ jahˇ paˬ nga? lehˇ noeˬ laˇ nya. Tsawˇ haˬ deuˬ yawˬ jeˬ na luꞈ Miˬyehˇ˗euˬ nui kʼahˇ pyeuꞈ˗eu tehꞈ meh’ lehˇ ehˇ˗eu meh. Teu miˇ neh ngaˬ˗ahˇ ‘Toˆ˗ehˇ naˇ Miˬyehˇ beu tsawˇ haˬ zaˬ˗euˬ shaˬ zahˬ˗ahˇ bi pyeuꞈ laˇ˗eu gʼaˬ pyeuꞈ˗awˇ, tsawˇ haˬ zaˬ deuˬ shaˬ zahˬ puˬ luꞈ gaˇ laˬ kʼaˬ cehˇ˗eu jeˬ ngaˬ˗e’ lehˇ noeˬ laˇ nya.”

¹³ Meˬliˬ aˬ yawꞈ siˬ nya mawꞈ˗eu gaˇ kawˆ heu˗ahˇ yaw muiˬ paˬ˗ehˇ poˆ tseˇ˗euˬ meh. Aˇ nah naˇ aˬ yawꞈ Jaˇliꞈ dzaw laˇ˗awˇ, Yeˬhawˇbaˬ˗euˬ Saˇ kiˇ pyeuꞈ laˇ˗euˬ meh. Aˬ yawꞈ “Jaˇliꞈ laꞈ kʼoeˇ˗euˬ jah coeˇ paˬ˗ehˇ gʼeh˗eu gaˇ kahˇ dahˇ˗eu gaˇ kawˆ heu naˇ, ngaˬ˗euˬ dehꞈ ziˇ˗ahˇ laˬ kʼaˬ bi cehˇ laˇ˗euˬ meh. Jaˇliꞈ˗ahˇ neh ya siˬ˗euˬ jeˬ heu naˇ, ngaˬ˗ahˇ nui saˇ biꞈ nya” lehˇ ehˇ˗eu meh. Aˬ dui jiˇ Meˬliˬ loꞈ˗ehˇ ‘yaw zahˇ laꞈ kʼoeˇ neh kuˇ doˆ˗awˇ, zahˬ leˇ paˬ˗ehˇ gʼeh˗eu yaw shehꞈ laꞈ kʼoeˇ sheuˬ uˇ nehˬ laꞈ˗euˬ’ Yeˬhawˇbaˬ Miˬyehˇ˗ahˇ guiˬ lahˬ huiˬ˗awˇ ciˬ huiˬ ciˬ mahˇ mawꞈ˗eu ma.—1 Beˬtuˆluˆ 2:9.

14. Aˬ dui yaw tsaˬ yaw dawˇ jeˬ˗ahˇ gaˬ dzehˬ laˇ˗eu gʼaˇ duˬ aˬ jeˬ jahˇ nya˗eu nga? (“Nui jeˬ nehˬ˗ehˇ paˇ sheu cehˆ taˬ” lehˇ ehˇ˗eu oeˬ coeˇ oeˬ bawˬ˗ahˇ haw.)

¹⁴ Heu naˇ yaw tsaˬ yaw dawˇ jeˬ˗euˬ aˇ poeˬ˗ahˇ bi mawˇ laˇ˗eu puˬ haw mawˇ haw laꞈ˗euˬ tiˬ kawˆ na tehꞈ˗aˬ siˬ. Nawˇ siˬ nya˗eu puˬ haw mawˇ haw laꞈ˗euˬ nui jeˬ jiˇ jaˆ˗eu paˬ. Aˬ dui aˬ jeˬ miˇ neh yaw tsaˬ yaw dawˇ jeˬ˗ahˇ gaˬ paˬ˗ehˇ gʼeh nga siˬ lehˇ yawˬ haˇ yawˬ ha pyehˆ tseˇ haw˗awˬ. Aˬ dui yaw tsaˬ yaw dawˇ jeˬ˗ahˇ ngehˬ˗ehˇ gaˬ laˇ naˇ ngehˬ˗ehˇ yaw tsaˬ yaw dawˇ jeˬ˗ahˇ gaˬ˗eu lehˇ mˇ doˆ leꞈ˗eu leh jeh˗eu meh.

Yaw tsaˬ yaw dawˇ jeˬ˗ahˇ gaˬ˗eu lehˇ aˬ joˆ˗ehˇ mˇ mawˇ nya˗eu nga?

15. Yaw tsaˬ yaw dawˇ jeˬ˗ahˇ gaˬ˗eu lehˇ mˇ mawˇ nya˗eu tiˬ jeˬ naˇ aˬ jeˬ nga?

¹⁵ Aˬ dui Jaˇliꞈ hawˇ˗eu Jaˇliꞈ˗ahˇ dawˬ pehˬ taˬ˗eu paˇ dmˬ deuˬ˗ahˇ aˬ myah luꞈ gui˗eu heu neh yaw tsaˬ yaw dawˇ jeˬ˗ahˇ gaˬ˗eu lehˇ aˬ myah luꞈ mˇ mawˇ nya meh. Aˬ dui yaw tsaˬ yaw dawˇ jeˬ laꞈ kʼoeˇ jawˇ luꞈ˗eu aˇ myah ni myahˇ laˇ˗euˬ kʼawꞈ, dzaw paˬ˗ehˇ gʼeh˗eu jeˬ gʼawˬ mya ni jaˆ˗eu meh. Jahˇ doˆ beh beh˗euˬ Loꞈ˗eu nymˇgoˇ paˇ dmˬ laꞈ kʼoeˇ heu loꞈ˗ehˇ ehˇ taˬ˗euˬ meh. “Yaw tsaˬ yaw dawˇ jeˬ heu naˇ bawˇ tsahˬ bawˇ dahˇ˗ahˇ yaˇ moꞈ neh bi nawˆ teh taˬ˗euˬ aˇ yehˆ tiˬ yehˆ˗ahˇ duˇ˗eu meh. Nawˇ aˇ yehˆ teu yehˆ˗ahˇ poˆ mawˇ mawꞈ naˇ, yaw muiˬ˗ehˇ nawˬ nawˬ˗ehˇ ya poˆ˗eu meh. . . . Geuꞈ mawꞈ naˇ jiˇ mˇ kʼoꞈ˗awˇ neh ya tseuˆ˗eu meh. Yaw tsaˬ yaw dawˇ jeˬ pyeuꞈ˗eu aˇ yehˆ heu˗ahˇ tiˬ yehˆ tehꞈ˗ehˇ za˗awˇ neh nui kʼahˇ maˬ ya shiˇ˗a. . . . Paˇ poˆ daˆ leꞈ˗awˇ, ya yuˇ uiˬ daˆ leꞈ˗eu meh.” Dzaw˗eu, pyehˆ tseˇ˗eu lehˇ ehˇ˗eu heu naˇ, awˬ˗eu gaˇ nmˇ maˬ ngeuˇ˗a. Ehˇ kʼawꞈ leh jeh poeˬ kʼoꞈ meh.

16. Nawˬ˗euˬ gʼaˇ duˬ Jaˇliꞈ˗ahˇ aˬ geu jeˬ lehˇ pyehˆ tseˇ naˇ muiˬ nya? (Dawˬdaˬ 2:4-6)

¹⁶ Gui˗eu pyehˆ tseˇ˗eu heu naˇ, yaw gʼaˬ na luꞈ ya leˇ˗eu lehˇ maˬ ngeuˇ˗a. Yeˬhawˇbaˬ aˬ dui˗ahˇ naꞈ suiˇ ni gʼeh˗eu Jaˇliꞈ laꞈ kʼoeˇ˗euˬ yaw tsaˬ yaw dawˇ jeˬ˗ahˇ maˬ tsehˆ leˇ ni “poˆ˗awˬ” lehˇ gʼaˬ biꞈ taˬ˗euˬ meh. (Dawˬdaˬ 2:4-6-ahˇ gui.) Aˬ dui teu loꞈ˗ehˇ leh jeh˗awˇ poˆ naˇ, gaˇ dahˇ tsoeˬ˗eu jeˬ za˗eu yaw duˬ baw meh. Koˬliˬ lehˇ kuˇ˗eu mehˇ nmˇ aˬ li tiˬ gʼaˬ aˬ yawꞈ Jaˇliꞈ gui ngeh, aˬ yawꞈ deuˆ yawꞈ˗ahˇ yaw muiˬ˗ehˇ haw tsoˆ taˬ˗eu ma lehˇ ehˇ˗eu meh. Aˬ yawꞈ “Ngaˇ ehˇ lahˬ yawˬ hmˬ na luꞈ˗ahˇ gui˗awˇ, Jaˇliꞈ teu deuˆ nehˬ˗ehˇ taꞈ˗eu aˇ deuˆ deuˬ˗ahˇ jiˇ gui˗eu uˬ taꞈ, poˆ tseˇ lahˬ˗eu ma. . . . Ngaˇ Jaˇliꞈ gui ngeh heu loꞈ˗ehˇ jahˇ˗eu miˇ neh gʼawˬ mya jeˬ ya siˬ nya laˇ˗euˬ ma” lehˇ ehˇ˗eu meh. Aˬ dui aˬ geu jeˬ lehˇ jahˇ jahˇ˗ehˇ gui˗eu maˬ kaˬ aˇ yamˬ biꞈ˗awˇ, gʼaˬ shaˇ doˆ˗awˇ pyehˆ tseˇ naˇ, yaw tsaˬ yaw dawˇ jeˬ˗ahˇ aˇ poeˬ taˬ baw˗eu lehˇ mˇ mawˇ˗eu jeˬ pyeuꞈ meh.—Ja ceuˬ 1:1-3.

17. Yaw tsaˬ yaw dawˇ jeˬ˗ahˇ dehꞈ caw˗eu lehˇ ehˇ˗eu heu naˇ, aˬ jeˬ˗ahˇ ehˇ mawꞈ˗eu nga? (Yaˬkoˆ 1:25)

¹⁷ Aˬ dui yaw tsaˬ yaw dawˇ jeˬ˗ahˇ siˬ nya˗awˇ neh tehꞈ˗ehˇ maˬ gʼaˬ˗a siˬ. Teu˗ahˇ neh gaˇ dahˇ tsoeˬ˗eu jeˬ tiˬ byah tiˬ loꞈ za˗eu gʼaˇ duˬ, yaw tsaˬ yaw dawˇ jeˬ˗ahˇ ya dehꞈ caw˗eu meh. Aˬ dui neh ya siˬ˗eu jeˬ dehꞈ ziˇ laꞈ kʼoeˇ maˇ diˇ ya zmˬ˗eu meh. Toˆ˗ehˇ gʼeh˗awˇ neh tehꞈ˗ehˇ yaw tsaˬ yaw dawˇ jeˬ baˬ da neh maˇ maˇ ni laˬ kʼaˬ cehˇ˗eu jeˬ za˗eu meh. (Yaˬkoˆ 1:25-ahˇ gui.) Aˬ dui yaw tsaˬ yaw dawˇ jeˬ˗ahˇ dehꞈ caw luꞈ˗eu lehˇ aˬ joˆ˗ehˇ yaw duˬ bi baw nya˗eu nga? Mehˇ nmˇ zaˬ yo aˬ li tiˬ gʼaˬ aˬ dui˗ahˇ aˬ dui aˬ geu tsahˇ˗ahˇ huiˬ laˇ mahˇ laˇ taˬ˗awˇ, aˬ geu tsahˇ˗ahˇ huiˬ laˇ mahˇ laˇ˗eu loˬ nga siˬ lehˇ yaw muiˬ˗ehˇ pyehˆ tseˇ lehˇ nui noeˬ nui duˇ biꞈ taˬ˗euˬ meh. Gʼaˬ kʼehˇ Pawˇluˆ “Aˬ dui neh caw teh gʼeh laꞈ˗euˬ zahˇ sahˇ kʼoꞈ heu hmˬ˗ahˇ tehꞈ˗ehˇ caw teh˗awˇ, tiˬ kawˆ loꞈ˗ehˇ mˇ daˆ shaˇ daˆ leꞈ kaˇ˗euˇ” lehˇ ehˇ˗eu meh.—Piˇliˇpiˆ 3:16.

18. Aˬ dui aˬ jeˬ miˇ neh “yaw tsaˬ yaw dawˇ jeˬ laꞈ kʼoeˇ dehꞈ”˗eu leh jeh˗eu nga?

¹⁸ “Yaw tsaˬ yaw dawˇ jeˬ laꞈ kʼoeˇ dehꞈ”˗eu leh jeh˗eu baˬ da neh za˗euˬ guiˬ lahˬ deuˬ˗ahˇ shaˇ noeˬ haw. Yawˬ ha˗euˬ dehꞈ ziˇ muiˬ daˆ laˇ˗eu tehꞈ˗ehˇ maˬ gʼaˬ ni Yeˬhawˇbaˬ hawˇ˗eu nui jah taꞈ˗eu mehˇ nmˇ deuˬ˗ahˇ shiˬ keuˇ ni bi gʼeh leˇ˗eu meh. (Dawˬdaˬ 27:11; 3 Yoˇhaˬ 4) Aˬ dui heu˗euˬ baˬ da neh yaw tsaˬ yaw dawˇ jeˬ˗ahˇ gaˬ˗awˇ, yaw tsaˬ yaw dawˇ jeˬ˗ahˇ dehꞈ caw˗eu ma.