Uˆ lahˇ˗eu aˇ muˇ pyeuꞈ laˇ˗euˬ yaw shuiꞈ nyiˬ gʼaˬ

2023 kʼoꞈ, Tiˬ siˬ ba la 18 nah, jawˇ nah dzeuˇ 3 nah˗ahˇ jw.org gʼoeˇsaiˇ laꞈ kʼoeˇ aˇ yeˇ huiˬ˗eu tsaꞈ gaˬ˗eu jeˬ daˆ laˇ˗euˬ meh. Teu naˇ mehˇ nmˇ Geˇ Paˬ˗liˬgoˬ hawˇ˗eu Jeˇpaˬ˗liˬ Gʼoeˇdeuˬ Yeˬhawˇbaˬ˗euˬ Saˇ kiˇ deuˬ˗euˬ uˆ lahˇ˗eu aˇ muˇ laꞈ kʼoeˇ˗euˬ tiˬ deuˬ pyeuꞈ laˇ˗euˬ gaˇ kawˆ meh. Aˬ yawꞈ nyaꞈ nyiˬ gʼaˬ luꞈ saˇ jaˇ ziꞈ˗eu laꞈ kʼoeˇ Miˬyehˇ˗euˬ gaˇ mˇ luꞈ˗eu myahˇ laˇ˗euˬ meh.

Mehˇ nmˇ Paˬ˗liˬgoˬ Aˬmeˬliˇkaˬ miˇ kʼahˬ, Peˬsiˬgʼoeˬniˬ˗yaˬ gahˬ kaˬ nah ma ga kʼehˬ paw huiˬ laˇ˗euˬ meh. Aˬ yawꞈ˗euˬ aˬ da aˬ ma naˇ Yeˬhawˇbaˬ˗euˬ Saˇ kiˇ pyeuꞈ˗awˇ Miˬyehˇ˗euˬ gaˇ˗ahˇ leh jeh˗eu meh. Aˬ yawꞈ pehˬ˗euˬ nymˇ jiˇ pehˬ za ma zaˬ luꞈ tsaꞈ gaˬ˗eu deuˬ loˬ˗eu meuˬ meuˬ zaˬ tiˬ meuˬ˗ahˇ pawˇ˗iˇ˗euˬ meh. Teu gaˇ neh tiˬ kʼehˬ naˇ, mehˇ nmˇ Paˬ˗liˬgoˬ 1988 kʼoꞈ, Tseˇ tiˬ siˬ ba la 20 nah˗ahˇ iˇ cuꞈ shawˇ˗euˬ meh.

Aˬ yawꞈ˗euˬ aˬ da aˬ ma aˬ yawꞈ˗ahˇ aˇ yamˬ tiˬ byah ni Miˬyehˇ˗euˬ gaˇ bi mˇeu gʼaˇ duˬ gʼaˬ biꞈ˗eu meh. Aˬ yawꞈ pehˬ tiˬ kʼehˬ maˬ kaˬ aˇ maꞈ˗ahˇ sheuˬ gʼeh˗eu deuˬ hawˇ˗eu Beˬdeˬlaˇ nymˇ jiˇ laꞈ kʼoeˇ˗euˬ deuˬ˗ahˇ kuˇ kuˇ˗ehˇ ha˗eu meh. Teu ngeh mehˇ nmˇ Paˬ˗liˬgoˬ mehˇ nmˇ teu deuˬ˗euˬ dehꞈ ziˇ laˬ kʼaˬ cehˇ dui dui gaˇ ya mawˇ˗euˬ meh. Teu miˇ neh iˇ cuꞈ shawˇ˗euˬ tiˬ kʼehˬ naˇ 1989 kʼoꞈ, Gʼoeˬ siˬ ba la 1 nah˗ahˇ aˬ myah luꞈ huˬ mehˬ mehˬ˗eu gaˇ mˇ dahˬ beh laˇ˗euˬ meh. Teu gaˇ neh nyiˬ kʼoꞈ naˇ, aˬ yawꞈ neh 12 kʼoꞈ kʼawˆ ngeh Beˬdeˬlaˇ˗ahˇ mˇ˗iˇ ma lehˇ daˬ taˬ˗euˬ aˇ pyaˇ kʼoeˇ maˇ diˇ pyeuꞈ laˇ˗euˬ meh. Aˬ yawꞈ 1991 kʼoꞈ, Tseˇ siˬ ba la˗ahˇ Buˇkiˬ˗liˬ Beˬdeˬlaˇ˗ahˇ gaˇ ya mˇ dahˬ beh˗euˬ meh.

Mehˇ nmˇ Paˬ˗liˬgoˬ Beˬdeˬlaˇ laꞈ kʼoeˇ paˇ dmˬ guꞈ˗eu paw 8 kʼoꞈ mˇ˗euˬ meh. Aˇ nah naˇ, aˬ yawꞈ tsaꞈ gaˬ˗eu paw haw piˇ˗eu gaˇ ya mˇ˗iˇ˗euˬ meh. Teu ngeh aˬ yawꞈ Laˇsiˬ˗yaˬ dawˬ ngeh˗eu aˇ muˇ laꞈ kʼoeˇ Miˬyehˇ˗euˬ gaˇ myaˆ kʼoꞈ mˇ˗euˬ meh. 2006 kʼoꞈ˗ahˇ, aˬ yawꞈ Naˇdi˗yaˬ nehˬ˗ehˇ sheuˬ dahˬ dzaˬ˗awˇ, Beˬdeˬlaˇ˗ahˇ tiˬ kawˆ loꞈ˗ehˇ mˇ˗euˬ meh. Aˬ yawꞈ nyaꞈ Pawˇtuˇgiˬ dawˬ ngehˬ˗eu aˇ muˇ laꞈ kʼoeˇ jawˇ˗euˬ meh. Aˇ nah naˇ, aˬ yawꞈ nyaꞈ Saˆpeˆ dawˬ ngehˬ˗eu aˇ muˇ˗ahˇ pawˇ˗iˇ˗awˇ, teu gaˇ 10 kʼoꞈ dzehˬ ni jawˇ˗euˬ meh. Mehˇ nmˇ Paˬ˗liˬgoˬ Tsaꞈ gaˬ˗eu paw haw piˇ˗eu gaˇ yaw myaˬ kʼoꞈ mˇ gʼaˬ ngeh tiˬ jawˇ, Mehˬ˗eu paw˗euˬ gawˬmiˬtiꞈ gaˇ ya mˇ˗iˇ˗awˇ, aˇ nah naˇ Tsaꞈ gaˬ˗eu paw˗euˬ gawˬmiˬtiꞈ gaˇ ya mˇ˗euˬ meh. Aˬ yawꞈ 2022 kʼoꞈ, Smˇ siˬ ba la˗ahˇ uˆ lahˇ˗eu aˇ muˇ˗euˬ Tsaꞈ gaˬ˗eu paw˗euˬ gawˬmiˬtiꞈ˗ahˇ caw ba˗eu gʼaˬ ya geuꞈ˗euˬ meh.

MehˇnmˇGʼoeˇdeuˬAˬmeˬliˇkaˬmiˇkʼahˬ,Kehˇliˬpawˇniˬ˗yaˬ gahˬ kaˬ, Meuˬliˬ˗yaˬtaꞈ meuˬ˗ahˇ huiˬ laˇ˗euˬ meh. Aˬ yawꞈ yaw tsaˬ yaw dawˇ jeˬ aˬ da aˬ ma˗ahˇ neh ya siˬ˗awˇ, 1986 kʼoꞈ, Smˇ siˬ ba la 29 nah˗ahˇ iˇ cuꞈ shawˇ˗euˬ meh. Iˇ cuꞈ shawˇ gʼaˬ˗awˇ nyaˆ taꞈ siˬ naˇ, tiˬ poˆ na huˬ mehˬ mehˬ˗eu gʼaˬ geuꞈ˗euˬ meh. Aˬ yawꞈ huˬ mehˬ mehˬ˗eu gaˇ ya mˇ gaˇ laˬ kʼaˬ cehˇ˗eu miˇ neh, huˬ mehˬ mehˬ˗eu gʼaˬ geuꞈ daˆ leꞈ˗euˬ meh. Aˬ yawꞈ tiˬ poˆ na huˬ mehˬ mehˬ˗eu gʼaˬ ba la gʼawˬ mya siˬ geuꞈ gʼaˬ ngeh tiˬ jawˇ, aˬ yawꞈ 1986 kʼoꞈ, Tseˇ siˬ ba la 1 nah˗ahˇ aˬ myah luꞈ huˬ mehˬ mehˬ˗eu gʼaˬ geuꞈ dahˬ beh˗euˬ meh.

Aˬ yawꞈ zaˬ guˬ guˬ dzawˇ dzawˇ laˇ ngeh Beˬdeˬlaˇ˗ahˇ Miˬyehˇ˗euˬ gaˇ mˇ luꞈ˗eu aˬ yawꞈ˗euˬ aˇ doˆ nyiˬ gʼaˬ jawˇ gaˇ dawˬ deh gʼa iˇ˗euˬ meh. Teu naˇ aˬ yawꞈ˗ahˇ huiˬ laˇ ngeh Beˬdeˬlaˇ˗ahˇ mˇ mawꞈ laˇ ni laˆ noeˬ nehˬ˗euˬ meh. 1990 kʼoꞈ, Ngaˬ siˬ ba la˗ahˇ aˬ yawꞈ˗ahˇ Gʼawˇkiˬ˗uˬ Beˬdeˬlaˇ˗ahˇ mˇ laˇ lehˇ kuˇ˗eu meh.

Mehˇ nmˇ Gʼoeˇdeuˬ Beˬdeˬlaˇ laꞈ kʼoeˇ laˆ luiˆ laˆ buˇ˗eu paw maˬ ehˇ, ka dzaˬ˗eu paw maˬ ehˇ, Beˬdeˬlaˇ saˇ naˇ˗euˬ gaˇ˗ahˇ maˬ ehˇ, ya mˇ˗euˬ meh. Aˬ yawꞈ 1997 kʼoꞈ˗ahˇ Aˇjaˬlaˬ nehˬ˗ehˇ sheuˬ dzahˬ dzaˬ˗awˇ, tiˬ kawˆ loꞈ˗ehˇ Beˬdeˬlaˇ˗ahˇ mˇ˗euˬ meh. 2014 kʼoꞈ˗ahˇ mehˇ nmˇ Gʼoeˇdeuˬ saˇ naˇ yaw huiˬ hmˬ˗ahˇ˗euˬ tsoˆ˗eu paw ya caw ba iˇ˗eu miˇ neh, aˬ yawꞈ nyaꞈ Gʼawˇgʼoiꞈ˗ahˇ pawˇ˗iˇ˗euˬ meh. 2016 kʼoꞈ˗ahˇ aˬ yawꞈ nyaꞈ Pehˇteu saˬ˗ahˇ˗euˬ Gʼawˇ˗ciˬtaoˬbeuˇ dzaw nymˇ˗ahˇ ya iˇ˗awˇ, mehˇ nmˇ Gʼoeˇdeuˬ teˇ saˇ hawˇ˗eu aˇ baˇ paw˗euˬ gaˇ ya mˇ˗euˬ meh. Teu gaˇ neh 4 kʼoꞈ naˇ, aˬ yawꞈ nyaꞈ Gʼawˇgʼoiꞈ˗ahˇ paˇ ya gʼoꞈ kʼoꞈ laˇ˗awˇ, mehˇ nmˇ Gʼoeˇdeuˬ Beˬdeˬlaˇ gaˇ mˇ zaˬ deuˬ˗euˬ gawˬmiˬtiꞈ gaˇ˗ahˇ ya mˇ˗euˬ meh. 2022 kʼoꞈ, Tseˇ siˬ ba la˗ahˇ, aˬ yawꞈ uˆ lahˇ˗eu aˇ muˇ˗euˬ Beˬdeˬlaˇ gaˇ mˇ zaˬ deuˬ˗euˬ gawˬmiˬtiꞈ gaˇ˗ahˇ caw ba˗eu gʼaˬ ya geuꞈ˗euˬ meh.

Aˬ dui Yeˬhawˇbaˬ˗ahˇ tsawˇ haˬ zaˬ pyeuꞈ˗eu “laꞈ sawˬ” mehˇ nmˇ heu nyiˬ gʼaˬ˗ahˇ guiˬ lahˬ biꞈ lehˇ guiˬ lahˬ shaˇ luꞈ˗eu ma. Aˬ yawꞈ nyaꞈ naˇ, Miˬyehˇ Miˇkʼahˬ gʼaˇ duˬ leh jeh dui dui˗eu meh.—Eˇpeˇsu 4:8.