Yeˬhawˇbaˬ˗euˬ Saˇ kiˇ deuˬ nehˬ˗ehˇ Jaˇliꞈ dzaw˗eu heu naˇ, aˬ joˆ˗ehˇ ya dzaw˗eu nga?
Yeˬhawˇbaˬ˗euˬ Saˇ kiˇ deuˬ nawˬ˗ahˇ Jaˇliꞈ mehˬ˗eu jeˬ˗ahˇ siˬ nya laˇ ni caw ba nehˬ nya ma. Nawˇ Jaˇliꞈ dzaw naˇ,
dehꞈ ziˇ laꞈ kʼoeˇ laˬ kʼaˬ cehˇ laˇ˗eu meh.
Miˬyehˇ nehˬ˗ehˇ cawˬ cawˬ nya laˇ˗eu meh.
mehˬ hu paw nehˬ˗ehˇ taꞈ leˇ˗awˇ Jaˇliꞈ laꞈ kʼoeˇ saˇ jaˇ dzaˬ taˬ˗euˬ jeˬ˗ahˇ ya siˬ˗eu meh.
Heu kawˆ laꞈ kʼoeˇ nawˇ ya siˬ˗eu jeˬ
Jaˇliꞈ dzaw naˇ, Yeˬhawˇbaˬ˗euˬ Saˇ kiˇ geuꞈ lehˇ ka tiˇ laˇ meh laˬ?
Jaˇliꞈ dzaw gaˇ, yawˬ deuˬ yawˬ˗ahˇ jiˇ kuˇ laꞈ˗eu za meh laˬ?
Tiˬ gʼaˬ neh˗iˬ maˬ bi mehˬ laˇ ni, yawˬ haˇ yawˬ ha tehꞈ˗ehˇ dzaw nya meh laˬ?
Jaˇliꞈ aˬ joˆ˗ehˇ dzaw˗eu nga?
Jaˇliꞈ dzaw nehˬ˗eu gʼaˬ, nawˬ˗ahˇ Jaˇliꞈ laꞈ kʼoeˇ˗euˬ gaˇ kawˆ tiˬ kawˆ saˇ˗i tiˬ kawˆ siˬ nya laˇ ni caw ba nehˬ laꞈ meh. Aˬ dui mˬ maˬ maˬ byaˆ zaˇ ziˇ laˬ kʼaˬ cehˇ nya lehˇ ehˇ˗eu paˇ dmˬ neh Jaˇliꞈ dzaw ngeh, Jaˇliꞈ heu naˇ nawˬ˗euˬ dehꞈ ziˇ˗ahˇ aˬ joˆ˗ehˇ gaˇ dahˇ tsoeˬ˗eu nga lehˇ tiˬ poˆ cuiˆ cuiˆ˗ehˇ siˬ nya laˇ meh. Jaˇliꞈ aˬ joˆ˗ehˇ dzaw˗eu lehˇ heu naˆ maˬ tseˇ siˬ nya mawꞈ naˇ, biˬdiˬoˬ heu hmˬ˗ahˇ haw.
Jaˇliꞈ dzaw˗eu aˇ poeˬ ya biꞈ meh laˬ?
Maˬ ya biꞈ˗a. Yeˬhawˇbaˬ˗euˬ Saˇ kiˇ deuˬ Yeˬsuˇ neh aˬ yawꞈ˗euˬ zaˬ lahˇ deuˬ˗ahˇ “aˇ poeˬ maˬ biꞈ ni za˗euˬ loꞈ˗ehˇ, aˇ poeˬ maˬ yuˇ ni yawˬ ngehꞈ˗ehˇ caw ba nehˬ˗awˬ” lehˇ ehˇ nehˬ˗euˬ dawˬ˗ahˇ mˇ caw˗eu meh. (Maꞈtehˬ 10:8) Jaˇliꞈ dzaw ngeh zmˬ˗eu Jaˇliꞈ hawˇ˗eu Aˬ dui mˬ maˬ maˬ byaˆ zaˇ ziˇ laˬ kʼaˬ cehˇ nya lehˇ ehˇ˗eu paˇ dmˬ jiˇ maˬ ya zeuˇ˗a. Yawˬ ngehꞈ˗ehˇ yuˇ nya meh.
Jaˇliꞈ aˇ myah keuˆ ni ya dzaw˗eu nga?
Jaˇliꞈ dzaw gaˇ zmˬ˗eu paˇ dmˬ laꞈ kʼoeˇ dzaw deuˆ 60 hmˬ ahˇ˗eu meh. Aˇ myah keuˆ ni dzaw˗eu lehˇ nawˇ yawˬ ha naꞈ˗i tseˇ nya meh. Dzaw zaˬ gʼawˬ mya gʼaˬ tiˬ jaw laꞈ kʼoeˇ dzaw deuˆ tiˬ deuˆ, maˬ ngeuˇ naˇ teu myaˆ maˬ tseˇ dzaw˗eu meh.
Aˬ joˆ˗ehˇ ya dzaw dahˬ beh˗eu nga?
1. Gʼoeˇsaiˇ laꞈ kʼoeˇ jaˇ laˇ dawˆ. Nawˬ neh boꞈ ahˇ leꞈ˗euˬ jeˬ teu, Yeˬhawˇbaˬ˗euˬ Saˇ kiˇ tiˬ gʼaˬ nawˬ˗ahˇ bi ngehˬ cawˬ leꞈ˗eu gʼaˇ duˬ zmˬ˗eu tehꞈ ma.
2. Jaˇliꞈ dzaw nehˬ˗eu gʼaˬ nawˬ˗ahˇ ngehˬ cawˬ leꞈ meh. Nawˬ˗ahˇ dzaw nehˬ˗eu gʼaˬ, Jaˇliꞈ aˬ joˆ˗ehˇ ya dzaw˗eu lehˇ ehˇ nehˬ laꞈ˗awˇ, nawˇ siˬ nya mawꞈ˗eu gaˇ kawˆ jiˇ ehˇ nehˬ laꞈ meh.
3. Aˬ geu ngeh, aˬ joˆ˗ehˇ dzaw˗eu lehˇ ja tsaˬ. Tiˬ gʼaˬ tiˇ gʼaˬ mawˇ dzoeˇ˗awˇ dzaw˗eu laˬ, naˬ gaˬ paw neh dzaw˗eu laˬ, maˬ ngeuˇ naˇ sahˬ boꞈ sha sha˗ehˇ dzaw˗eu laˬ lehˇ tseˇ nya meh. Aˬ myah myah naˇ tiˬ poˆ dzaw ngeh, naˬ liˬ tiˬ laꞈ ehˇ gʼaˬ ni ga leˇ˗eu meh. Ehˇ kʼawꞈ nawˇ aˇ myah ni tehꞈ˗ehˇ dzaw˗eu lehˇ tseˇ nya˗awˇ, teu myah maˬ tseˇ dzaw˗eu laˬ lehˇ tseˇ nya meh.
Tiˬ kawˆ na tehꞈ˗ehˇ dzaw haw˗eu za meh laˬ?
Za meh. Gʼoeˇsaiˇ laꞈ kʼoeˇ jaˇ laˇ dawˆ˗awˬ. Nawˬ˗ahˇ dzaw nehˬ˗eu gʼaˬ ngehˬ cawˬ leꞈ ngeh, tiˬ kawˆ na dzaw haw mawꞈ nya lehˇ ehˇ nehˬ nya meh. Nawˇ Jaˇliꞈ dzaw gaˇ ya leˇ miˇ˗a laˇ siˬ nya laˇ ni caw ba nehˬ˗eu gʼaˇ duˬ, nawˬ˗ahˇ dzaw nehˬ˗eu gʼaˬ, Aˬ dui mˬ maˬ maˬ byaˆ zaˇ ziˇ laˬ kʼaˬ cehˇ nya lehˇ ehˇ˗eu boˬloˬshaˬ zmˬ˗awˇ mehˬ nehˬ laꞈ meh. Paˇ dmˬ heu dmˬ laꞈ kʼoeˇ dzaw deuˆ smˬ deuˆ ahˇ˗eu meh.
Jaˇliꞈ dzaw naˇ, Yeˬhawˇbaˬ˗euˬ Saˇ kiˇ geuꞈ lehˇ ka tiˇ laˇ meh laˬ?
Maˬ ka tiˇ laˇ˗a. Yeˬhawˇbaˬ˗euˬ Saˇ kiˇ deuˬ tsawˇ haˬ deuˬ˗ahˇ Jaˇliꞈ ya mehˬ nehˬ gaˇ laˬ kʼaˬ cehˇ kʼawꞈ ni, nga maꞈ˗euˬ zahˇ tawˬ laˇ lehˇ tiˬ gʼaˬ˗ahˇ˗iˬ maˬ ka tiˇ. Nga maꞈ Jaˇliꞈ laꞈ kʼoeˇ ehˇ taˬ˗euˬ loꞈ˗ehˇ tsawˇ haˬ deuˬ˗ahˇ yaw zeu baw˗awˇ, aˬ yawꞈ maꞈ˗ahˇ aˬ jeˬ˗euˬ zahˇ tawˬ˗eu lehˇ yawˬ ha naꞈ˗i bi tseˇ˗eu ma.—1 Beˬtuˆluˆ 3:15.
Yawˬ ha˗euˬ Jaˇliꞈ zmˬ˗eu za meh laˬ?
Za meh. Yawˬ ha kʼaˇ ya leˇ˗eu Jaˇliꞈ zmˬ nya meh. Nga maꞈ naˇ, tsaˬ˗awˇ yaw awˬ˗ehˇ gʼoˆ shaw laˇ˗eu Miˇ shuiꞈ dawˬ paˇ Jaˇliꞈ˗ahˇ zmˬ gaˇ ya lehˇ miˇ˗a. Ehˇ kʼawꞈ yaw myaˬ gʼaˬ yawˬ ha neh zmˬ dzaw taˬ˗euˬ Jaˇliꞈ˗ahˇ zmˬ mawꞈ˗eu lehˇ nga maꞈ gʼoˆ shaw nehˬ nya ma.
Jaˇliꞈ dzaw gaˇ, yawˬ deuˬ yawˬ˗ahˇ jiˇ kuˇ laꞈ˗eu za meh laˬ?
Za meh. Nawˬ˗euˬ cawˬ deuˬ˗ahˇ maˬ ehˇ, nawˬ˗euˬ nymˇ jiˇ laꞈ kʼoeˇ˗euˬ deuˬ˗ahˇ maˬ ehˇ, aˬ suˇ gʼaˬ˗ahˇ maˬ kaˬ kuˇ laꞈ nya meh.
Dzeuˇ yaꞈ ngeh Yeˬhawˇbaˬ˗euˬ Saˇ kiˇ deuˬ nehˬ˗ehˇ Jaˇliꞈ dzaw haw˗euˬ naˇ, tiˬ poˆ paˇ dzaw kʼoꞈ˗eu za meh laˬ?
Za meh. Maˇ diˇ naˇ nymˬ˗mˇ iˬ nah pyeuꞈ luꞈ˗eu gaˇ kawˆ nehˬ˗ehˇ tsaˬ leˇ ni, Jaˇliꞈ dzaw˗eu paˇ dmˬ laˆ saˆ˗euˬ miˇ neh, nawˇ yaw beh naˆ maˬ tseˇ ya leˇ˗eu paˬ. Biˬdiˬoˬ deuˬ˗ahˇ haw˗awˇ, tiˬ gʼaˬ tiˇ gʼaˬ ja cawˬ˗eu loꞈ˗ehˇ dzaw˗eu heu naˇ, dzaw luꞈ˗eu gaˇ kawˆ˗ahˇ yaw muiˬ˗ehˇ gʼoˆ shaw laˇ ni caw ba nehˬ laꞈ meh.
Tiˬ gʼaˬ neh˗iˬ maˬ bi mehˬ laˇ ni, yawˬ haˇ yawˬ ha tehꞈ˗ehˇ dzaw nya meh laˬ?
Dzaw nya meh. Dzaw zaˬ deuˬ myaˬ˗eu tiˬ paˆ, Jaˇliꞈ dzaw nehˬ˗eu gʼaˬ nehˬ˗ehˇ dzaw˗eu kʼawꞈ ni, tiˬ gʼaˬ na naˇ yaw beh ngeh yawˬ ha tehꞈ˗ehˇ dzaw˗eu meh. Nawˇ Jaˇliꞈ dzaw gaˇ caw ba nehˬ˗eu gʼaˇ duˬ, Jaˇliꞈ dzaw˗eu keu ka deuˬ maˬ ehˇ, biˬdiˬoˬ hawˇ˗eu gaˇ kawˆ deuˬ maˬ ehˇ, yawˬ ngehꞈ˗ehˇ haw˗iˇ nya meh. Heu gaˇ laꞈ oˆ ehˇ keuˆ taˬ˗euˬ keu ka heu deuˬ nawˬ˗ahˇ caw ba nehˬ nya meh.
Jaˇliꞈ mehˬ˗eu jeˬ. Heu laꞈ kʼoeˇ ahˇ˗eu gaˇ kawˆ deuˬ naˇ, aˬ dui˗euˬ dehꞈ ziˇ laꞈ kʼoeˇ maˇ diˇ zmˬ˗iˇ nya˗eu Jaˇliꞈ zahˇ˗ahˇ ngehˬ keuˆ taˬ˗euˬ meh. Yaw jeˬ ma jeˬ, noeˬ shaˬ kʼahˬ lahˇ ngeh aˬ joˆ˗ehˇ ya jahˇ˗eu nga? Zaˬ˗ahˇ aˬ joˆ˗ehˇ ya mehˬ˗eu nga? Yaw beh ngeh loꞈ˗ehˇ pyuˇ maˬ paˇ poˆ nya naˇ, aˬ joˆ˗ehˇ ya jahˇ˗eu nga?
Jaˇliꞈ mehˬ˗eu biˬdiˬoˬ deuˬ. Yaw nymˇ nymˇ lehˇ gʼeh˗eu biˬdiˬoˬ heu deuˬ naˇ, Jaˇliꞈ laꞈ kʼoeˇ ahˇ˗eu aˇ yeˇ huiˬ˗eu gaˇ kawˆ deuˬ˗ahˇ dzawˇ nehˬ taˬ˗euˬ meh.
Jaˇliꞈ gaˇ kawˆ naˇ haˬ˗eu. Heu tsahˇ naˇ, Jaˇliꞈ laꞈ kʼoeˇ ahˇ˗eu gaˇ kawˆ nehˬ˗ehˇ taꞈ leˇ˗awˇ, gʼawˬ mya jeˬ lehˇ naˇ haˬ taˬ˗euˬ jeˬ˗ahˇ dawˬ kʼoꞈ biꞈ taˬ˗euˬ meh.
Jaˇliꞈ aˇ deuˆ dzawˇ nehˬ˗eu. Heu laꞈ kʼoeˇ, tsawˇ haˬ yaw myaˬ gʼaˬ siˬ nya˗eu Jaˇliꞈ aˇ deuˆ, hawˇ˗eu dawˬ deuˬ˗euˬ dawˬ tsuiꞈ dzawˇ nehˬ taˬ˗euˬ meh.