Yeˬhawˇbaˬ nehˬ˗ehˇ yaw gʼoeˇ gʼoeˇ˗ehˇ jawˇ

1, 2. Nymˬ˗mˇ iˬ nah gʼoe duˬ aˬ gaˇ neh za˗eu nga?

Jaˬ lehˇ lehˇ ma baw laˇ˗eu aˇ nah˗ahˇ, nawˇ tiˬ gaˇ paw iˇ luꞈ˗eu lehˇ shaˇ noeˬ haw sheˇ. Maˬ noeˬ gaˇ mˬ zahˇ le˗awˇ, mˬ myawꞈ myawꞈ laˇ˗awˇ, tiˬ kʼehˬ naˇ uˬ yehˇ yehˇ le˗euˬ meh. Teu ngeh yamˬ˗ahˇ, nawˇ awˆ duˬ tiˬ tsahˇ ya mawˇ ngeh, laˬ kʼaˬ aˇ naˆ ni cehˇ laˇ paˬ˗ehˇ gʼeh˗eu nga.

² Teu gaˇ duˇ ni nymˬ˗mˇ iˬ nah aˬ dui kʼawꞈ, miˇ tsaˬ kʼoeˇ taˆ tiˬ nah saˇ˗i tiˬ nah doeˇ dzehˬ laˇ˗eu aˇ yamˬ laꞈ kʼoeˇ jawˇ luꞈ ma. ‘Aˬ suˇ gʼaˬ˗ahˇ shaˇ ju iˇ paˬ nga?’ lehˇ nawˇ noeˬ tehꞈ˗a. Ja ceuˬ sahˬ boꞈ boꞈ˗eu gʼaˬ “[Yeˬhawˇbaˬ˗aˬ] ngaˬ˗ahˇ ngehˬ gʼeh haw piˇ˗eu gʼaˬ meh. Nawˇ˗aˬ ngaˬ˗euˬ Miˬyehˇ meh. Nawˬ˗ahˇ ngaˇ gʼoe ma” lehˇ boꞈ taˬ˗euˬ meh. (Ja ceuˬ 91:2) Aˬ dui shaˬ zahˬ gʼawˬ mya jeˬ˗ahˇ ya tahˬ puˬ kʼawꞈ, Yeˬhawˇbaˬ aˬ dui˗ahˇ caw ba nehˬ˗awˇ, mehˬ hu paw kʼawꞈ muiˬ dui dui˗eu noeˬ tmˬ˗eu jeˬ˗ahˇ paˇ biꞈ˗eu meh.

3. Yeˬhawˇbaˬ aˬ dui˗euˬ gʼoe duˬ, aˬ joˆ˗ehˇ bi pyeuꞈ nya nga?

³ Yeˬhawˇbaˬ nawˬ˗ahˇ aˬ joˆ˗ehˇ haw piˇ nehˬ˗eu nga? Aˬ dui shaˬ zahˬ˗ahˇ laˆ piˇ nya ni aˬ yawꞈ caw ba nehˬ˗awˇ, aˬ yawꞈ˗aˬ, aˬ dui˗ahˇ yaw doeˇ jahˇ laˇ˗eu jeˬ naˆ maˬ tseˇ, baoˬ huiˬ dzehˬ˗eu meh. Nymˬ˗mˇ aˬ dui˗ahˇ maˬ muiˬ˗eu jeˬ pyeuꞈ laˇ luꞈ kʼawꞈ, mehˬ hu paw Yeˬhawˇbaˬ cawˆ˗iˇ taˬ˗euˬ jeˬ˗ahˇ laˆ muiˬ kʼoꞈ nehˬ meh lehˇ jah nya meh. Jaˇliꞈ aˬ dui˗ahˇ “Miˬyehˇ˗euˬ gʼoeˇ˗eu gaˬ˗eu jeˬ laꞈ kʼoeˇ naw maꞈ yaw muiˬ˗ehˇ jawˇ˗awˬ” lehˇ ehˇ˗eu meh. (Yuˇdaˆ 21) Shaˬ ngeh zahˬ ngeh Yeˬhawˇbaˬ caw ba nehˬ laꞈ ni, aˬ dui aˬ yawꞈ˗euˬ dawˬ peh ya jawˇ˗eu meh. Aˬ dui teu loꞈ˗ehˇ aˬ joˆ˗ehˇ jahˇ nya˗eu nga?

Miˬyehˇ˗euˬ nui gaˬ˗ahˇ aˇ poeˬ taˬ baw

4, 5. Yeˬhawˇbaˬ aˬ dui˗ahˇ nui gaˬ aˬ joˆ˗ehˇ mˇ mawˇ˗eu nga?

⁴ Miˬyehˇ˗euˬ dawˬ peh peh leˇ˗eu gʼaˇ duˬ, Miˬyehˇ aˬ dui˗ahˇ aˇ naˆ ni gaˬ˗eu nga lehˇ ya shaˇ noeˬ˗awˇ, Yeˬhawˇbaˬ neh aˬ dui˗euˬ gʼaˇ duˬ kʼaˇ mˇ˗euˬ jeˬ˗ahˇ ya noeˬ mawˇ˗eu meh. Miˬyehˇ aˬ dui˗ahˇ muiˬ˗eu miˇ tsaˬ tahˬ kʼawˇ˗ahˇ bi jawˇ˗awˇ, muiˬ˗eu dzaˇ hawˇ˗eu jeˬ zaˬ gʼawˬ mya jeˬ, kuiˇ dui dui˗eu dzaˇ, shawˇ jehˆ ni gʼeh˗eu iˇ cuꞈ heu deuˬ˗ahˇ biꞈ˗awˇ, Jaˇliꞈ˗ahˇ neh jiˇ aˬ yawꞈ˗euˬ tsawˇ myahˇ hawˇ˗eu, seuˆ dzeuꞈ aˇ gʼehˇ bi siˬ nehˬ laꞈ˗euˬ meh. Teu naˆ maˬ tseˇ huiˬ dzehˬ˗eu tiˬ hmˬ naˇ, aˬ yawꞈ aˬ dui˗ahˇ gaˬ dui dui˗eu miˇ neh, aˬ yawꞈ gaˬ dui dui˗eu Zaˬmaˇ Yeˬsuˇ˗euˬ dehꞈ ziˇ bi lawˇ le˗euˬ heu meh. (Yoˇhaˬ 3:16) Lawˇ nehˬ˗euˬ jeˬ heu baˬ da neh, aˬ dui noeˬ tmˬ˗eu jeˬ jaˆ laˇ˗euˬ ma.

⁵ Yeˬhawˇbaˬ mˬ taˆ jawˇ˗eu uˆ lahˇ˗eu aˇ maꞈ˗ahˇ zmˬ˗awˇ, gʼawˬ myahˇ maˬ gʼeh˗ehˇ shaˬ zahˬ dawˬ tawˆ luꞈ˗ahˇ laˆ byoˆ jiˇ nehˬ le meh. Kʼoeˇ naˇ, miˇ tsaˬ heu siˬ Baˬlaˬdiˇsuˆ bi pyeuꞈ laˇ˗awˇ, yawˬ gʼaˬ na luꞈ˗ahˇ kʼahˬ lahˇ˗eu jeˬ maˬ jaˆ ni laˬ kʼaˬ tiˬ cehˇ aˬ myah luꞈ bi jawˇ gʼeh meh. (Ja ceuˬ 37:29) Yeˬhawˇbaˬ aˬ dui˗ahˇ gaˬ˗eu lehˇ mˇ mawˇ˗eu nyaˆ taꞈ tiˬ jeˬ naˇ, nymˬ˗mˇ mi naˆ˗ehˇ yaw dehꞈ aˬ joˆ˗ehˇ ya dehꞈ˗eu lehˇ mehˬ nehˬ˗eu jeˬ heu pyeuꞈ meh. Yeˬhawˇbaˬ aˬ myah luꞈ guiˬ lahˬ shaˇ˗awˬ lehˇ kuˇ˗awˇ, shaˇ dawˬ˗ahˇ naˇ haˬ˗eu gʼaˇ duˬ, lehˬ hmˬ deuˇ taˬ˗euˬ meh. Yeˬhawˇbaˬ˗aˬ, aˬ dui yawˬ gʼaˬ na luꞈ˗ahˇ maˇ diˇ gaˬ ngaˇ lehˇ, maˇ jawˆ ni mawˇ laˇ˗eu meh.

6. Nawˇ Yeˬhawˇbaˬ˗euˬ nui gaˬ˗ahˇ aˇ poeˬ taˬ baw˗eu lehˇ aˬ joˆ˗ehˇ mˇ mawˇ le?

⁶ Nawˇ Miˬyehˇ˗euˬ nui gaˬ˗ahˇ aˇ poeˬ taˬ baw˗eu lehˇ aˬ joˆ˗ehˇ mˇ mawˇ le? Miˬyehˇ neh mˇ nehˬ laꞈ˗euˬ jeˬ˗ahˇ guiˬ lahˬ huiˬ miˇ˗a lehˇ ya mˇ mawˇ˗eu meh. Ehˇ kʼawꞈ, nymˬ˗mˇ iˬ nah tsawˇ haˬ myaˬ ni, Yeˬhawˇbaˬ˗euˬ guiˬ lahˬ˗ahˇ maˬ noeˬ mawˇ˗a. Yeˬsuˇ miˇ tsaˬ kʼoeˇ taˆ jawˇ ngeh jiˇ, tsawˇ haˬ myaˬ ni teu loꞈ˗ehˇ gʼeh˗eu meh. Yaw jeˬ ma jeˬ,Yeˬsuˇ coiˬ doi naˇ˗eu tsawˇ haˬ 10 gʼaˬ˗ahˇ laˆ taˬ nehˬ ngeh, guiˬ lahˬ kʼoꞈ laˇ˗euˬ tiˬ gʼaˬ tehꞈ meh. (Luˇkaꞈ 17:12-17) Aˬ dui Yeˬsuˇ˗ahˇ guiˬ lahˬ kʼoꞈ laˇ˗euˬ gʼaˬ loꞈ˗ehˇ pyeuꞈ mawꞈ˗awˇ, Yeˬhawˇbaˬ˗ahˇ aˬ myah luꞈ guiˬ lahˬ kʼoꞈ nehˬ mawꞈ˗eu ma.

7. Aˬ dui Yeˬhawˇbaˬ˗ahˇ aˇ naˆ ni ya gaˬ˗eu nga?

⁷ Kʼoeˇ naˇ, Yeˬhawˇbaˬ˗ahˇ gaˬ˗eu lehˇ jiˇ ya mˇ mawˇ˗eu meh. Yeˬsuˇ aˬ yawꞈ˗euˬ zaˬ lahˇ deuˬ˗ahˇ, nui noeˬ hawˇ˗eu nui ma gʼawˇ mawˇ dawˬ tawˆ luꞈ, Yeˬhawˇbaˬ˗ahˇ ya gaˬ meh lehˇ ehˇ nehˬ˗euˬ meh. (Maꞈtehˬ 22:37-ahˇ gui.) Heu aˬ jeˬ˗ahˇ ehˇ mawꞈ˗eu nga?

8, 9. Aˬ dui Yeˬhawˇbaˬ aˬ yawꞈ˗ahˇ gaˬ ngaˇ lehˇ bi siˬ˗eu gʼaˇ duˬ, aˬ dui aˬ jeˬ ya jahˇ˗eu nga?

⁸ Yeˬhawˇbaˬ˗ahˇ gaˬ ma lehˇ ehˇ neh tehꞈ˗ehˇ jiˇ meh loˇ? Maˬ jiˇ˗a. Nui noeˬ nui duˇ hawˇ˗eu nui ma gʼawˇ mawˇ dawˬ tawˆ luꞈ Yeˬhawˇbaˬ˗ahˇ gaˬ naˇ, mˇ˗eu shaˇ˗eu jeˬ heu neh ya mˇ mawˇ nehˬ˗eu meh. (Maꞈtehˬ 7:16-20) Aˬ dui Miˬyehˇ˗ahˇ gaˬ naˇ, aˬ yawꞈ˗euˬ dawˬ˗ahˇ naˇ haˬ meh lehˇ Jaˇliꞈ˗ahˇ maˇ jawˆ ni ehˇ taˬ˗euˬ meh. Naˇ haˬ˗eu yaw shaˬ ngaˇ loˇ? Maˬ shaˬ˗a. Aˬ jeˬ miˇ neh ehˇ naˇ, “aˬ yawꞈ˗euˬ dawˬ˗aˬ, aˬ dui maˬ caw teh nya paˬ˗ehˇ shaˬ˗eu jeˬ maˬ ngeuˇ”˗eu miˇ neh meh.—1 Yoˇhaˬ 5:3-ahˇ gui.

⁹ Aˬ dui Yeˬhawˇbaˬ˗euˬ dawˬ˗ahˇ naˇ haˬ naˇ, dehꞈ ziˇ laꞈ kʼoeˇ maˇ maˇ ni laˬ kʼaˬ cehˇ˗eu jeˬ˗ahˇ za˗eu meh. (Iˇsaˬyaˇ 48:17, 18) Nymˬ˗mˇ aˬ dui Yeˬhawˇbaˬ nehˬ˗ehˇ aˬ joˆ˗ehˇ gʼoeˇ dzehˬ leˇ nya˗eu nga lehˇ haw ma.

Yeˬhawˇbaˬ nehˬ˗ehˇ gʼoeˇ dzehˬ laˇ

10. Aˬ jeˬ miˇ neh Yeˬhawˇbaˬ˗euˬ gaˇ kawˆ ya dzaw daˆ leꞈ˗eu nga?

¹⁰ Nawˇ Yeˬhawˇbaˬ nehˬ˗ehˇ cawˬ aˬ joˆ˗ehˇ jahˇ neh pyeuꞈ laˇ deˬ? Jaˇliꞈ dzaw˗eu miˇ neh Yeˬhawˇbaˬ˗ahˇ siˬ nya laˇ˗awˇ, aˬ yawꞈ nehˬ˗ehˇ tiˬ poˆ cuiˆ cuiˆ˗ehˇ gʼoeˇ laˇ˗euˬ meh. Yaw jeˬ ma jeˬ, miˬ dzaˬ tsawˬ bu˗ahˇ miˬ dzaˬ maˬ bi miˆ˗iˇ mawꞈ naˇ, miˬ dzaˬ ya dawˆ lahˬ˗eu maˬ ngeuˇ˗a loˇ? Teu gaˇ duˇ ni, Yeˬhawˇbaˬ naw nyaꞈ˗euˬ cawˬ cawˬ˗eu jeˬ bi ziꞈ mawꞈ naˇ, aˬ yawꞈ˗euˬ gaˇ kawˆ ya dzaw daˆ leꞈ meh.—Dawˬdaˬ 2:1-5.

11. Jaˇliꞈ dzaw daˆ leꞈ naˇ, nawˇ aˬ jeˬ ya mawˇ˗eu nga?

¹¹ Nawˇ Jaˇliꞈ dzaw daˆ leꞈ naˇ, nawˬ˗euˬ nui ma˗ahˇ zaw laˇ˗eu yaw myaˬ jeˬ˗ahˇ paˇ ya mawˇ˗a siˬ. Yeˬsuˇ aˬ yawꞈ˗euˬ zaˬ lahˇ nyiˬ gʼaˬ˗ahˇ Jaˇliꞈ laꞈ kʼoeˇ˗euˬ maˬ keuˆ laˇ miˇ ehˇ taˬ dawˬ ja nehˬ ngeh, “gaˇ pehˇ˗ahˇ aˬ yawꞈ aˇ nyaꞈ˗ahˇ dawˬ ngehˬ cawˬ laˇ˗awˇ Jaˇliꞈ gaˇ kawˆ ja mehˬ nehˬ laꞈ ngeh, nui ma laꞈ kʼoeˇ miˬ dzaˬ doꞈ˗eu loꞈ˗ehˇ gʼeh law miˇ˗a ehˇ lawˬ” lehˇ zaˬ lahˇ kʼoeˇ nyiˬ gʼaˬ ja˗eu meh.—Luˇkaꞈ 24:32.

12, 13. (a) Yeˬhawˇbaˬ˗ahˇ gaˬ˗eu jeˬ, aˬ joˆ˗ehˇ pyeuꞈ iˇ nya nga? (b) Yeˬhawˇbaˬ˗ahˇ gaˬ˗eu jeˬ maˬ bi cuiˆ iˇ ni, aˬ jeˬ ya jahˇ˗eu nga?

¹² Nawˇ kʼawꞈ Jaˇliꞈ˗ahˇ gʼoˆ shaw laˇ ngeh, Yeˬsuˇ˗euˬ zaˬ lahˇ teu nyiˬ gʼaˬ˗euˬ nui ma˗ahˇ zaw leˇ˗euˬ loꞈ˗ehˇ duˇ tehꞈ˗a. Heu naˇ, nawˇ Yeˬhawˇbaˬ˗euˬ gaˇ kawˆ˗ahˇ dzaw mawꞈ ni maˬ ehˇ, aˬ yawꞈ˗ahˇ gaˬ ni maˬ ehˇ caw ba nehˬ˗eu meh. Ehˇ kʼawꞈ, Yeˬhawˇbaˬ˗ahˇ gaˬ˗eu jeˬ cuiˆ iˇ nya meh. Nawˇ teu loꞈ˗ehˇ maˬ bi pyeuꞈ mawꞈ˗eu maˬ ngeuˇ nya loˇ.—Maꞈtehˬ 24:12.

¹³ Nawˇ Yeˬhawˇbaˬ˗euˬ cawˬ pyeuꞈ laˇ shaw˗euˬ naˇ, aˬ yawꞈ˗ahˇ gaˬ˗eu jeˬ maˬ bi cuiˆ iˇ ni, aˬ yawꞈ hawˇ˗eu Yeˬsuˇ˗euˬ gaˇ kawˆ˗ahˇ dzaw daˆ leꞈ˗eu loˬ meh. Kʼoeˇ naˇ, nawˬ neh dzaw˗euˬ jeˬ˗ahˇ jiˇ shaˇ noeˬ shaˇ sawˇ˗awˇ, dehꞈ ziˇ laꞈ kʼoeˇ aˬ joˆ˗ehˇ zmˬ iˇ nya˗eu nga lehˇ ya shaˇ noeˬ˗eu meh. (Yoˇhaˬ 17:3) Nawˇ Jaˇliꞈ gui ngeh maˬ ehˇ, dzaw ngeh maˬ ehˇ, ‘Gaˇ kawˆ heu Yeˬhawˇbaˬ Miˬyehˇ nehˬ˗ehˇ taꞈ leˇ˗awˇ ngaˬ˗ahˇ aˬ jeˬ mehˬ˗eu nga? Ngaˇ aˬ jeˬ miˇ neh nui ma gʼawˇ mawˇ hawˇ˗eu dehꞈ˗eu jeˬ dawˬ tawˆ luꞈ Miˬyehˇ˗ahˇ ya gaˬ˗eu nga?’ lehˇ yawˬ haˇ yawˬ ha ya naˇ haˬ˗eu meh.—1 Tiˆmoˇseˬ 4:15.

14. Guiˬ lahˬ shaˇ˗eu jeˬ heu, aˬ dui Yeˬhawˇbaˬ˗ahˇ gaˬ˗eu jeˬ ziꞈ laˇ ni, aˬ joˆ˗ehˇ caw ba nehˬ˗eu nga?

¹⁴ Nawˇ muiˬ˗eu cawˬ nehˬ˗ehˇ yawˬ nah na luꞈ ngehˬ cawˬ naˇ, cawˬ cawˬ˗eu jeˬ ziꞈ dah ni pyeuꞈ laˇ˗eu loꞈ˗ehˇ, Yeˬhawˇbaˬ nehˬ˗ehˇ kʼawꞈ guiˬ lahˬ shaˇ˗eu heu neh, yawˬ nah na luꞈ ngehˬ cawˬ naˇ, aˬ yawꞈ˗ahˇ gaˬ˗eu jeˬ myaˬ laˇ˗eu meh. (1 Teˇsaˬloˇni 5:17-ahˇ gui.) Guiˬ lahˬ shaˇ˗eu jeˬ heu naˇ, mˬ taˆ jawˇ˗eu aˬ dui˗euˬ Aˬda jawˇ gaˇ neh oe˗euˬ muiˬ dui dui˗eu laꞈ sawˬ pyeuꞈ meh. Teu miˇ neh, aˬ myah luꞈ aˬ yawꞈ nehˬ˗ehˇ ngehˬ cawˬ paˬ˗ehˇ gʼeh˗eu meh. (Ja ceuˬ 62:8) Guiˬ lahˬ shaˇ ngeh, yaw oeˇ tehꞈ˗ehˇ maˬ toˇ poˆ ni, nui ma laꞈ kʼoeˇ kʼaˇ noeˬ˗eu loꞈ˗ehˇ ya ngehˬ˗eu meh. Aˬ dui Jaˇliꞈ dzaw daˆ leꞈ˗awˇ nui ma laꞈ kʼoeˇ neh guiˬ lahˬ shaˇ naˇ, Yeˬhawˇbaˬ˗ahˇ gaˬ˗eu jeˬ ziꞈ dahˬ ni pyeuꞈ laˇ˗eu meh.

Yeˬhawˇbaˬ˗euˬ gaˇ kawˆ aˬ cawˬ˗ahˇ ja nehˬ

15, 16. Tsaꞈ gaˬ˗eu gaˇ˗ahˇ nawˇ aˬ joˆ˗ehˇ noeˬ nya?

¹⁵ Aˬ dui aˬ myah luꞈ Yeˬhawˇbaˬ˗euˬ dawˬ peh jawˇ mawꞈ naˇ, aˬ dui jah˗eu jeˬ aˬ cawˬ˗ahˇ ya ehˇ nehˬ meh. Aˬ dui Yeˬhawˇbaˬ˗euˬ gaˇ kawˆ aˬ cawˬ˗ahˇ ya ehˇ nehˬ˗eu heu naˇ, muiˬ dui dui˗eu tiˬ jeˬ pyeuꞈ meh. (Luˇkaꞈ 1:73-75) Yeˬsuˇ, Ka li zaˬ maˇ diˇ deuˬ˗ahˇ gaˇ heu a nehˬ˗euˬ meh. Teu miˇ neh, aˬ dui yawˬ gʼaˬ na luꞈ Miˬyehˇ˗euˬ Miˇkʼahˬ gaˇ kawˆ ya tsaꞈ gaˬ˗eu meh. Nawˇ tsaꞈ gaˬ iˇ shaw maˬ loˇ?—Maꞈtehˬ 24:14; 28:19, 20.

¹⁶ Gʼaˬ kʼehˇ Pawˇluꞈ tsaꞈ gaˬ˗eu gaˇ˗ahˇ, “poeˬ dui dui˗eu pyuˇ shuiˇ myawˬ gahˬ” lehˇ sawˇ˗eu meh. (2 Gawˇliˬtu 4:7) Yeˬhawˇbaˬ˗euˬ gaˇ kawˆ hawˇ˗eu aˬ yawꞈ neh noeˬ taˬ˗euˬ jeˬ aˬ cawˬ˗ahˇ ehˇ nehˬ˗eu heu naˇ, nawˇ mˇ nya˗eu jeˬ laꞈ kʼoeˇ neh aˇ yeˇ huiˬ dzehˬ˗eu jeˬ pyeuꞈ meh. Heu˗aˬ, nawˇ Yeˬhawˇbaˬ˗euˬ gaˇ mˇ˗eu jeˬ pyeuꞈ meh. Nawˬ neh mˇ˗euˬ jeˬ˗ahˇ aˬ yawꞈ maˬ ngehˇ˗a. (Heˬbyehˇ 6:10) Tsaꞈ gaˬ˗eu jeˬ heu naˇ, nawˇ hawˇ˗eu nawˇ ehˇ gaˇ naˇ haˬ˗eu deuˬ˗ahˇ, Yeˬhawˇbaˬ˗euˬ dawˬ peh peh leˇ ni caw ba nehˬ˗eu uˬ taꞈ, aˬ myah luꞈ dehꞈ˗eu jeˬ za ni kʼawꞈ caw ba nehˬ˗eu miˇ neh, gaˇ dahˇ tsoeˬ˗eu meh. (1 Gawˇliˬtu 15:58-ahˇ gui.) Heu naˆ maˬ tseˇ nawˬ˗ahˇ laˬ kʼaˬ bi cehˇ˗eu gaˇ jaˆ meh siˬ loˇ?

17. Tsaꞈ gaˬ˗eu gaˇ aˬ jeˬ miˇ neh tehˬ dui dui˗eu gaˇ pyeuꞈ nga?

¹⁷ Tsaꞈ gaˬ˗eu gaˇ heu tehˬ dui dui˗eu gaˇ pyeuꞈ meh. Aˬ dui “Miˬyehˇ dawˬ kawˬ . . . leh jeh˗awˇ” ya mehˬ meh. (2 Tiˆmoˇseˬ 4:2) Tsawˇ haˬ deuˬ Miˬyehˇ˗euˬ Miˇkʼahˬ gaˇ kawˆ siˬ nya˗eu loˬ meh. Jaˇliꞈ Yeˬhawˇbaˬ˗euˬ “aˇ nah nah huiˬ, yaw kawˇ kawˇ˗ehˇ keuˆ le luꞈ meh” lehˇ ehˇ˗awˇ, “gʼawˬ myahˇ ni maˬ paˇ” ga meh lehˇ ehˇ˗eu meh. (Zeˬpaˬniˇ 1:14; Haˬbaˬkuˆ 2:3) Gʼawˬ myahˇ maˬ gʼeh˗ehˇ Yeˬhawˇbaˬ Saˬdaˬ˗euˬ haiˬ˗eu miˇ tsaˬ˗ahˇ laˆ cawˆ˗eu meh. Gaˇ kawˆ heu maˬ pyeuꞈ laˇ mi naˆ˗ehˇ, tsawˇ haˬ deuˬ Yeˬhawˇbaˬ˗euˬ gaˇ mˇ laˇ ni, aˬ dui aˬ yawꞈ maꞈ˗ahˇ ya ehˇ nehˬ iˇ˗eu meh.

18. Ka li zaˬ maˇ diˇ deuˬ nehˬ˗ehˇ, aˬ jeˬ miˇ neh Yeˬhawˇbaˬ˗ahˇ uˬ duˬ tahˬ paˬ˗ehˇ gʼeh˗eu nga?

¹⁸ Yeˬhawˇbaˬ aˬ dui˗ahˇ Ka li zaˬ maˇ diˇ deuˬ nehˬ˗ehˇ aˬ yawꞈ˗ahˇ uˬ duˬ bi tahˬ mawꞈ˗eu meh. “Aˬ cawˬ loꞈ˗ehˇ maˬ gʼeh ni, tiˬ kawˆ loꞈ˗ehˇ tahˬ dzoeˇ˗awˇ uˬ duˬ tahˬ˗eu gaˇ heu hmˬ maˬ byehˇ ni mˇ daˆ leꞈ kaˇ˗euˇ. Sahˬ paˬ Miˬyehˇ yaˇ kʼaˬ daˇ le˗eu aˇ nah dawˬ peh peh le˗euˬ naw maꞈ siˬ luꞈ mawˇ luꞈ˗eu loꞈ˗ehˇ, tiˬ gʼaˬ tiˇ gʼaˬ gʼaˬ biꞈ tehˇ tehˬ kaˇ˗euˇ” lehˇ Jaˇliꞈ ehˇ˗eu meh. (Heˬbyehˇ 10:24, 25) Aˬ dui bawˬ dzaˬ gaˇ iˇ˗eu gʼaˇ duˬ, kʼaˇ gʼeh nya gaˇ neh ya leh jeh˗eu meh. Bawˬ dzaˬ˗eu jeˬ heu naˇ, tiˬ gʼaˬ tiˇ gʼaˬ˗euˬ jah˗eu jeˬ ziꞈ laˇ ni gʼaˬ biꞈ˗eu aˇ yamˬ pyeuꞈ meh.

19. Ka li zaˬ mehˇ nmˇ deuˬ˗ahˇ gaˬ ni caw ba nehˬ˗eu aˬ jeˬ nga?

¹⁹ Nawˇ bawˬ dzaˬ gaˇ iˇ naˇ, Yeˬhawˇbaˬ˗ahˇ uˬ duˬ tahˬ ni caw ba nehˬ laꞈ˗eu muiˬ˗eu cawˬ deuˬ˗ahˇ ya mawˇ˗awˇ, nawˇ loꞈ˗ehˇ Miˬyehˇ˗ahˇ uˬ duˬ tahˬ˗eu leh jeh˗eu mehˇ nmˇ deuˬ˗ahˇ kʼawꞈ ya mawˇ˗eu meh. Aˬ yawꞈ maꞈ kʼawꞈ byah kuꞈ˗eu tsawˇ haˬ maˬ ngeuˇ˗eu miˇ neh, nawˇ loꞈ˗ehˇ tiˬ poˆ na laˆ lehˬ nya˗eu meh. Teu miˇ neh, aˬ yawꞈ maꞈ mˇ lehˬ ngeh, nawˇ kʼawꞈ iˬ baˇ ya pyehˬ nehˬ˗eu meh. (Gawˇlawˇsehˇ 3:13-ahˇ gui.) Aˬ myah luꞈ Ka li zaˬ mehˇ nmˇ deuˬ˗euˬ muiˬ˗eu jeˬ˗ahˇ haw˗eu heu naˇ, aˬ yawꞈ maꞈ˗ahˇ gaˬ laˇ˗awˇ, Yeˬhawˇbaˬ nehˬ˗ehˇ kʼawꞈ peh leˇ ni caw ba nehˬ laꞈ˗eu meh.

Maˇ maˇ ni gʼeh˗eu dehꞈ˗eu jeˬ

20, 21. “Maˇ maˇ ni gʼeh˗eu dehꞈ˗eu jeˬ” aˬ joˆ˗ehˇ gʼeh˗eu nga?

²⁰ Yeˬhawˇbaˬ aˬ yawꞈ˗euˬ cawˬ yawˬ gʼaˬ na luꞈ˗ahˇ, muiˬ dui dui˗eu dehꞈ ziˇ bi za mawꞈ˗eu meh. Aˬ kaˇ mehˬ hu paw˗euˬ aˬ dui˗euˬ dehꞈ ziˇ, nymˬ˗mˇ˗euˬ dehꞈ ziˇ nehˬ˗ehˇ beu gaˇ dui dui meh lehˇ Jaˇliꞈ mehˬ˗eu meh.

²¹ Aˬ kaˇ mehˬ hu paw aˬ dui 70, 80 kʼoꞈ tehꞈ˗ehˇ ya dehꞈ˗eu maˬ ngeuˇ˗a. Aˬ dui muiˬ˗eu Baˬlaˬdiˇsuˆ laꞈ kʼoeˇ jawˇ saˇ doˆ˗awˇ, laˬ kʼaˬ cehˇ nui saˇ oꞈ˗eu laꞈ kʼoeˇ “mˬ maˬ maˬ byaˆ zaˇ ziˇ” ya dehꞈ meh. Teu˗ahˇ Jaˇliꞈ “maˇ maˇ ni gʼeh˗eu dehꞈ˗eu jeˬ” lehˇ kuˇ˗eu meh. Yeˬhawˇbaˬ aˬ dui˗ahˇ maˇ maˇ ni gʼeh˗eu dehꞈ˗eu jeˬ biꞈ ma lehˇ saˇ jaˇ dzaˬ taˬ˗euˬ meh. Ehˇ kʼawꞈ, aˬ dui teu˗ahˇ “ziꞈ dah ni” tuˆ tehˬ taˬ nya ni, nymˬ˗mˇ mi naˆ˗ehˇ kʼaˇ jahˇ nya˗eu jeˬ˗ahˇ ya jahˇ˗eu meh.—1 Tiˆmoˇseˬ 6:12, 19.

22. (a) “Maˇ maˇ ni gʼeh˗eu dehꞈ˗eu jeˬ”˗ahˇ ziꞈ dah ni aˬ joˆ˗ehˇ tuˆ tehˬ taˬ nya˗eu nga? (b) Dehꞈ˗eu jeˬ heu aˬ dui leh jeh˗eu miˇ neh za˗eu ngaˇ loˇ?

²² “Maˇ maˇ ni gʼeh˗eu dehꞈ˗eu jeˬ”˗ahˇ ziꞈ dah ni aˬ joˆ˗ehˇ tuˆ tehˬ taˬ nya˗eu nga? Aˬ dui “muiˬ˗eu gaˇ gʼawˬ mya jeˬ” ya mˇ˗eu meh. (1 Tiˆmoˇseˬ 6:18) Heu naˇ, aˬ dui Jaˇliꞈ˗ahˇ neh ya siˬ˗euˬ jeˬ˗ahˇ mˇ caw gaˇ ehˇ mawꞈ˗eu meh. Ehˇ kʼawꞈ, maˇ maˇ ni gʼeh˗eu dehꞈ˗eu jeˬ za˗eu heu naˇ, aˬ dui leh jeh gaˇ iˇ˗eu maˬ ngeuˇ˗a. Dehꞈ˗eu jeˬ heu nehˬ˗ehˇ aˬ dui maˬ geuˇ leˇ˗a. Ehˇ kʼawꞈ, Yeˬhawˇbaˬ˗euˬ “guiˬ lahˬ yaw dzahˇ” baˬ da neh, yawˬ ngehꞈ˗ehˇ za˗euˬ laꞈ sawˬ pyeuꞈ meh. (Loˇmaˆ 5:15) Mˬ taˆ jawˇ˗eu aˬ dui˗euˬ Aˬda Yeˬhawˇbaˬ, aˬ yawꞈ˗euˬ gaˇ˗ahˇ saˇ jaˇ ziꞈ˗awˇ mˇ˗eu deuˬ˗ahˇ dehꞈ˗eu jeˬ heu biꞈ mawꞈ˗eu meh.

23. Nymˬ˗mˇ mi naˆ˗ehˇ aˬ jeˬ miˇ neh tsaˬ˗eu gaˇ ma˗ahˇ ya tseˇ˗eu nga?

²³ ‘Ngaˇ Miˬyehˇ ha geuꞈ˗eu jeˬ˗ehˇ uˬ duˬ tahˬ miˇ˗a laˬ?’ lehˇ yawˬ haˇ yawˬ ha ya naˇ haˬ˗eu meh. Nawˇ laˆ paˇ paˬ˗ehˇ gʼeh˗eu tiˬ jeˬ na˗ahˇ mawˇ naˇ, taˆ lehˇ ya laˆ paˇ˗eu meh. Yeˬhawˇbaˬ˗euˬ dawˬ naˇ haˬ˗eu gʼaˇ duˬ kʼaˇ gʼeh nya gaˇ neh leh jeh˗awˇ, aˬ yawꞈ˗ahˇ nui ma taˬ naˇ, aˬ yawꞈ kʼawꞈ nawˬ˗euˬ gʼoe duˬ pyeuꞈ laˇ˗eu meh. Saˬdaˬ˗euˬ haiˬ˗eu miˇ tsaˬ aˇ saˬ saˬ˗eu saˇ ka˗ahˇ, Miˬyehˇ aˬ yawꞈ˗ahˇ saˇ jaˇ ziꞈ˗eu deuˬ˗ahˇ haw piˇ nehˬ meh. Kʼoeˇ naˇ, Yeˬhawˇbaˬ aˬ dui˗ahˇ aˬ yawꞈ neh saˇ jaˇ dzaˬ taˬ˗euˬ loꞈ˗ehˇ, Baˬlaˬdiˇsuˆ˗ahˇ aˬ myah luꞈ bi jawˇ gʼeh˗eu duˬ meh. Nawˇ nymˬ˗mˇ mi naˆ˗ehˇ tsaˬ˗eu gaˇ ma˗ahˇ tseˇ naˇ, maˇ maˇ ni gʼeh˗eu dehꞈ˗eu jeˬ˗ahˇ za nya meh.