Yeˬhawˇbaˬ nui kʼahˇ shiˇ˗eu byawˬ laˇ cehˇ laˇ˗eu jeˬ˗ahˇ tseˇ

Yeˬhawˇbaˬ “laˬ kʼaˬ cehˇ˗eu Miˬyehˇ” pyeuꞈ meh. (1 Tiˆmoˇseˬ 1:11, Miˇ shuiꞈ dawˬ paˇ Jaˇliꞈ) Miˬyehˇ aˬ dui˗ahˇ laˬ kʼaˬ tiˬ cehˇ bi dehꞈ mawꞈ˗eu meh. Aˬ yawꞈ aˬ dui˗ahˇ tiˬ poˆ na gaˇ˗ahˇ neh gʼaˬ naˬ bi naˬ mawꞈ˗awˇ, bi byawˬ bi cehˇ gʼa mawꞈ˗eu meh. Aˬ dui heu kawˆ laꞈ kʼoeˇ gʼaˬ naˬ naˬ˗eu aˇ yamˬ˗ahˇ yawˬ ha kʼawꞈ laˬ kʼaˬ cehˇ laˇ˗awˇ Yeˬhawˇbaˬ jiˇ nui kʼahˇ shiˇ˗eu jeˬ˗ehˇ aˬ joˆ˗ehˇ zmˬ nya˗eu nga lehˇ ja sawˇ ma.

1. Byawˬ laˇ cehˇ laˇ˗eu jeˬ˗ahˇ tseˇ ngeh, aˬ jeˬ˗ahˇ noeˬ keuˆ paˬ˗ehˇ gʼeh˗eu nga?

Nawˇ gʼaˬ naˬ naˬ ngeh, aˬ jeˬ jahˇ gaˇ ya leˇ nya? Tiˬ deuˬ na iˇ kahˇ˗ahˇ jawˇ˗awˇ sahˬ boꞈ gui gaˇ ya leˇ˗awˇ, tiˬ deuˬ na naˇ dawˬ caˇ naˇ haˬ gaˇ, biˬdiˬoˬ haw gaˇ, iˇteuꞈnehꞈ mui gaˇ ya leˇ˗eu meh. Tiˬ deuˬ na dawˬ deh gʼa˗iˇ˗eu, iˇ diˬ diˬ niˇ gʼa˗iˇ˗eu, cawˬ deuˬ nehˬ˗ehˇ mui niˇ gʼa˗eu, heu deuˬ˗ahˇ ya leˇ˗eu meh. Aˬ dui yawˬ ha˗ahˇ byawˬ laˇ cehˇ laˇ˗eu aˬ geu jeˬ jahˇ˗eu maˬ kaˬ ‘Miˬyehˇ nui ma tsaˬ˗eu jeˬ’ ya bi pyeuꞈ meh. (Eˇpeˇsu 5:10) Aˬ jeˬ miˇ neh ehˇ naˇ, aˬ dui˗ahˇ bi byawˬ bi cehˇ laˇ˗eu gʼawˬ mya jeˬ laꞈ kʼoeˇ Yeˬhawˇbaˬ bye˗eu jeˬ ahˇ˗eu meh. Yaw jeˬ ma jeˬ, diˬ˗eu sehꞈ˗eu ceh˗eu, dehꞈ bahˬ dehꞈ muˆ˗eu, maw loˬ ja maw maw˗eu, heu deuˬ ahˇ˗eu meh. (Ja ceuˬ 11:5-ahˇ gui.) Toˆ˗ehˇ naˇ aˬ dui˗ahˇ bi byawˬ bi cehˇ laˇ˗eu jeˬ˗ahˇ yaw gahˇ gahˇ˗ehˇ aˬ joˆ˗ehˇ tseˇ nya˗eu nga?

Aˬ dui Yeˬhawˇbaˬ˗ahˇ gaˬ˗eu deuˬ nehˬ˗ehˇ cawˬ cawˬ naˇ, aˬ dui˗ahˇ bi muiˬ laˇ˗awˇ, byawˬ laˇ cehˇ laˇ˗eu jeˬ˗ahˇ yaw muiˬ˗ehˇ tseˇ ni caw ba nehˬ laꞈ˗eu meh. Aˬ dui Dzaw deuˆ 48-ahˇ ‘zaˬ siˬ tsawˇ gahˇ byah˗eu deuˬ nehˬ˗ehˇ cawˬ˗eu tsawˇ haˬ tsawˇ gahˇ ahˇ laˇ˗awˇ’ Miˬyehˇ˗euˬ zahˇ dawˬ˗ahˇ maˬ caw teh˗eu deuˬ nehˬ˗ehˇ cawˬ cawˬ˗eu tsawˇ haˬ “ya luˬ ya seˇ˗iˇ” meh lehˇ ya siˬ˗euˬ ma.—Dawˬdaˬ 13:20.

2. Byawˬ laˇ cehˇ laˇ˗eu jeˬ˗ahˇ aˇ yamˬ aˇ myaˆ ni zmˬ˗eu lehˇ laˆ duˬ taˬ˗eu, aˬ jeˬ miˇ neh aˇ yeˇ huiˬ˗eu nga?

Aˬ dui yaw muiˬ jeˬ˗ahˇ byawˬ gʼa cehˇ gʼa kʼawꞈ, teu gaˇ aˇ yamˬ gʼawˬ mya ni maˬ bi jiˇ leˇ ni ya yahˇ˗eu meh. Teu loꞈ˗ehˇ maˬ jahˇ naˇ aˬ dui aˇ yeˇ huiˬ dzehˬ˗eu jeˬ˗ahˇ aˇ yamˬ maˬ biꞈ nya˗a. Jaˇliꞈ aˬ dui˗ahˇ “aˇ yamˬ˗ahˇ gaˇ dahˇ tsoeˬ ni zmˬ˗awˬ” lehˇ ehˇ˗eu meh.—Eˇpeˇsu 5:15, 16-ahˇ gui.

Naꞈ suiˇ ni dzaw

Aˬ dui byawˬ laˇ cehˇ laˇ˗eu jeˬ˗ahˇ yaw muiˬ˗ehˇ aˬ joˆ˗ehˇ tseˇ nya˗eu nga lehˇ haw.

3. Maˬ muiˬ˗eu jeˬ˗ahˇ maˬ byawˬ maˬ cehˇ gʼa ni yahˇ

Aˬ dui byawˬ laˇ cehˇ laˇ˗eu jeˬ˗ahˇ aˬ jeˬ miˇ neh yaw muiˬ˗ehˇ ya tseˇ˗eu nga? Biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.

Biˬdiˬoˬ: Ngaˇ aˬ joˆ˗ehˇ gʼeh˗eu byawˬ gʼa mo gʼa˗eu jeˬ˗ahˇ tseˇ paˬ˗ehˇ gʼeh˗eu nga? (4:39)

• Gaˇ hu Loˇmaˆ saˇ ka˗ahˇ byawˬ gʼa cehˇ gʼa˗eu jeˬ, nymˬ˗mˇ iˬ nah nehˬ˗ehˇ aˬ joˆ˗ehˇ duˇ leˇ˗eu nga?

• Biˬdiˬoˬ laꞈ kʼoeˇ˗euˬ Dehˇniˬ byawˬ laˇ cehˇ laˇ˗eu jeˬ nehˬ˗ehˇ taꞈ leˇ˗awˇ aˬ jeˬ ya siˬ˗euˬ nga?

Loˇmaˆ 12:9-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Byawˬ laˇ cehˇ laˇ˗eu jeˬ˗ahˇ tseˇ ngeh, Jaˇliꞈ heu deuˆ aˬ joˆ˗ehˇ caw ba nehˬ nya˗eu nga?

Yeˬhawˇbaˬ aˬ jeˬ jeˇ˗ahˇ bye˗eu nga? Dawˬdaˬ 6:16, 17 hawˇ˗eu Gaˬlaˬtiˆ 5:19-21-ahˇ gui. Jaˇliꞈ tiˬ deuˆ˗ahˇ kʼaˇ gui gʼaˬ ngeh, naˇ haˬ˗eu jeˬ heu˗ahˇ tiˬ poˆ naˇ haˬ.

• Jaˇliꞈ aˇ deuˆ heu˗ahˇ ngehˬ keuˆ taˬ˗euˬ jeˬ, nymˬ˗mˇ iˬ nah˗euˬ byawˬ laˇ cehˇ laˇ˗eu jeˬ laꞈ kʼoeˇ aˬ jeˬ jeˇ ya mawˇ˗eu nga?

Byawˬ laˇ cehˇ laˇ˗eu jeˬ˗ahˇ yaw gahˇ gahˇ˗ehˇ aˬ joˆ˗ehˇ tseˇ nya˗eu nga?

Yawˬ ha˗ahˇ heu loꞈ˗ehˇ naˇ haˬ.

• Heu laꞈ kʼoeˇ Yeˬhawˇbaˬ bye˗eu jeˬ ahˇ ngaˇ laˬ?

• Heu baˬ da neh ngaˇ aˇ yeˇ huiˬ dzehˬ˗eu jeˬ˗ahˇ aˇ yamˬ maˬ biꞈ nya ni pyeuꞈ luꞈ nya laˬ?

• Ngaˬ˗ahˇ Yeˬhawˇbaˬ˗ahˇ maˬ gaˬ˗eu deuˬ nehˬ˗ehˇ bi gʼoeˇ dzehˬ leˇ nya laˬ?

Lehˬ laˇ ca laˇ nya˗eu jeˬ˗ahˇ gaˇ mahˇ ngehˬ˗ehˇ jawˇ kaˬ naˇ ngehˬ˗ehˇ muiˬ meh. Aˬ dui yawˬ ha˗ahˇ deuˬ laˇ˗eu byawˬ laˇ cehˇ laˇ˗eu jeˬ˗euˬ dawˬ peh maˬ iˇ ni ya yahˇ meh

4. Aˇ yamˬ˗ahˇ gaˇ dahˇ tsoeˬ ni zmˬ

Biˬdiˬoˬ: Nawˇ yawˬ ha˗euˬ aˇ yamˬ˗ahˇ aˬ joˆ˗ehˇ zmˬ luꞈ de? (2:45)

• Biˬdiˬoˬ laꞈ kʼoeˇ˗euˬ mehˇ nmˇ heu gʼaˬ maˬ muiˬ˗eu jeˬ˗ahˇ haw˗eu maˬ ngeuˇ kʼawꞈ, aˬ yawꞈ neh zmˬ˗euˬ aˇ yamˬ teu aˬ yawꞈ˗ahˇ aˬ joˆ˗ehˇ bi gʼeh leˇ nya˗eu nga?

Piˇliˇpiˆ 1:10-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Byawˬ laˇ cehˇ laˇ˗eu jeˬ˗ahˇ aˇ yamˬ aˇ myaˆ ni zmˬ˗eu lehˇ noeˬ tsehˆ ngeh, Jaˇliꞈ heu deuˆ aˬ joˆ˗ehˇ caw ba nehˬ nya˗eu nga?

5. Yaw muiˬ jeˬ˗ahˇ byawˬ gʼa cehˇ gʼa

Yeˬhawˇbaˬ maˬ ya leˇ˗eu byawˬ gʼa cehˇ gʼa˗eu tiˬ jeˬ na jaˆ kʼawꞈ, aˬ yawꞈ ya leˇ˗eu byawˬ gʼa cehˇ gʼa˗eu jeˬ jiˇ gʼawˬ mya ni jaˆ˗eu meh. Dawˬtsoˆ 8:15 hawˇ˗eu Piˇliˇpiˆ 4:8-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Nawˇ gaˇ dahˇ tsoeˬ˗eu byawˬ gʼa cehˇ gʼa˗eu aˬ geu jeˬ˗ahˇ ya leˇ nya?

Kawˆ shawˆ

Yeˬhawˇbaˬ aˬ dui˗ahˇ yaw muiˬ jeˬ˗ahˇ bi byawˬ bi cehˇ mawꞈ˗eu meh.

Ja sawˇ poˆ˗eu

• Ka li zaˬ deuˬ aˬ joˆ˗ehˇ gʼeh˗eu byawˬ laˇ cehˇ laˇ˗eu jeˬ˗ahˇ yahˇ paˬ˗ehˇ gʼeh˗eu nga?

• Byawˬ laˇ cehˇ laˇ˗eu jeˬ˗ahˇ aˇ yamˬ aˇ myaˆ ni zmˬ˗eu lehˇ aˬ jeˬ miˇ neh shaˇ noeˬ paˬ˗ehˇ gʼeh˗eu nga?

• Nawˬ˗ahˇ Yeˬhawˇbaˬ ya leˇ˗eu byawˬ laˇ cehˇ laˇ˗eu jeˬ˗ahˇ aˬ jeˬ miˇ neh tseˇ mawꞈ nya?

Haw lahˬ

Bi byawˬ bi cehˇ laˇ˗eu jeˬ˗ahˇ aˬ suˇ gʼaˬ ya tseˇ˗eu nga lehˇ haw.

“Yeˬhawˇbaˬ˗euˬ Saˇ kiˇ deuˬ, biˬdiˬoˬ, paˇ dmˬ, dawˬ caˇ, tiˬ jeˬ na˗ahˇ maˬ bi haw maˬ bi naˇ haˬ nga laˬ?” (Iˇteuꞈnehꞈ laꞈ kʼoeˇ˗euˬ gaˇ kawˆ)

Byawˬ laˇ cehˇ laˇ˗eu jeˬ˗ahˇ yaw muiˬ˗ehˇ aˬ joˆ˗ehˇ tseˇ nya˗eu nga lehˇ haw.

“Gʼaˬ naˬ naˬ ngeh nawˇ jahˇ˗eu jeˬ gaˇ dahˇ tsoeˬ ngaˇ laˬ?” (Loꞈ˗eu nymˇgoˇ, 2011 Tseˇ siˬ ba la 15)

Zaˬ yo aˬ li tiˬ gʼaˬ aˬ yawꞈ˗ahˇ bi byawˬ bi cehˇ laˇ˗eu jeˬ˗ahˇ aˬ jeˬ miˇ neh laˆ paˇ nya˗euˬ nga lehˇ haw˗eu gʼaˇ duˬ, “Ngaˇ bye˗eu jeˬ˗ahˇ gʼaˬ leˇ nya˗euˬ ma” lehˇ ehˇ˗eu gaˇ kawˆ˗ahˇ haw.

“Jaˇliꞈ tsawˇ haˬ˗euˬ dehꞈ ziˇ˗ahˇ laˆ paˇ” (Loꞈ˗eu nymˇgoˇ, 2010 Nyiˬ siˬ ba la 1)

Nehꞈ gaˇ kawˆ doˆ laˇ gaˇ ya mawˇ ngeh, aˬ ma tiˬ gʼaˬ yaw muiˬ˗ehˇ aˬ joˆ˗ehˇ noeˬ tsehˆ˗euˬ nga lehˇ haw.

Nehꞈ nehˬ˗ehˇ taꞈ˗eu jeˬ˗ahˇ maˬ byawˬ maˬ cehˇ gʼa ni yahˇ (2:02)