Nymˇ jiˇ laˬ kʼaˬ cehˇ ni aˬ joˆ˗ehˇ ya jahˇ˗eu nga?—Aˇ tsehˆ 2

Zaˬ deuˬ˗aˬ Yeˬhawˇbaˬ neh biꞈ˗euˬ laꞈ sawˬ pyeuꞈ meh. Yeˬhawˇbaˬ aˬ da aˬ ma deuˬ aˬ yawꞈ neh biꞈ˗euˬ muiˬ˗eu laꞈ sawˬ heu˗ahˇ yaw muiˬ˗ehˇ ngehˬ gʼeh meh lehˇ noeˬ tmˬ˗eu meh. Teu miˇ neh zaˬ deuˬ˗ahˇ aˬ joˆ˗ehˇ ya ngehˬ gʼeh˗eu lehˇ mehˬ nehˬ taˬ˗awˇ, zaˬ deuˬ˗ahˇ jiˇ nymˇ jiˇ laˬ kʼaˬ cehˇ ni aˬ jeˬ jeˇ ya jahˇ˗eu lehˇ mehˬ nehˬ taˬ˗euˬ meh.

1. Yeˬhawˇbaˬ aˬ da aˬ ma deuˬ˗ahˇ aˬ jeˬ mehˬ nehˬ taˬ˗euˬ nga?

Yeˬhawˇbaˬ aˬ da aˬ ma deuˬ˗ahˇ zaˬ˗ahˇ gaˬ˗awˇ, kʼaˇ gʼeh nya gaˇ neh aˇ yamˬ bi biꞈ mawꞈ˗eu meh. Kʼoeˇ uˬ taꞈ zaˬ deuˬ˗ahˇ bi haw teˬ bi haw piˇ mawꞈ˗awˇ, Jaˇliꞈ zahˇ˗ahˇ dawˬ pehˬ taˬ˗awˇ bi mehˬ mawꞈ˗eu meh. (Dawˬdaˬ 1:8) Jaˇliꞈ aˬ da deuˬ˗ahˇ ‘naw˗euˬ zaˬ deuˬ˗ahˇ Yeˬhawˇbaˬ˗euˬ zahˇ sahˇ kʼoꞈ mehˬ nehˬ tsoˆ nehˬ˗awˇ bo saˆ huiˬ˗awˬ’ lehˇ ehˇ˗eu meh. (Eˇpeˇsu 6:4-ahˇ gui.) Aˬ da aˬ ma deuˬ Yeˬhawˇbaˬ˗euˬ zahˇ dawˬ˗ahˇ mˇ caw˗eu laꞈ kʼoeˇ zaˬ˗ahˇ bo saˆ huiˬ˗awˇ, zaˬ cu˗eu gaˇ heu aˬ cawˬ˗ahˇ maˬ bi daˇ ni yawˬ ha˗euˬ zaˬ˗ahˇ yawˬ ha cu naˇ, Yeˬhawˇbaˬ nui kʼahˇ shiˇ˗eu meh.

2. Yeˬhawˇbaˬ zaˬ deuˬ˗ahˇ aˬ jeˬ mehˬ nehˬ taˬ˗euˬ nga?

Yeˬhawˇbaˬ zaˬ deuˬ˗ahˇ ‘yawˬ ha˗euˬ aˬ ma aˬ da ehˇ dawˬ˗ahˇ naˇ haˬ geuꞈ˗awˬ’ lehˇ ehˇ nehˬ taˬ˗euˬ meh. (Gawˇlawˇsehˇ 3:20-ahˇ gui.) Zaˬ deuˬ aˬ da aˬ ma˗ahˇ yaw zeu baw˗awˇ, aˬ yawꞈ maꞈ˗euˬ ehˇ dawˬ naˇ haˬ naˇ, Yeˬhawˇbaˬ jiˇ laˬ kʼaˬ cehˇ˗awˇ aˬ da aˬ ma deuˬ jiˇ laˬ kʼaˬ cehˇ˗eu meh. (Dawˬdaˬ 23:22-25) Yeˬsuˇ yaw nyiˇ ngeh zaˬ deuˬ dzaw geuꞈ paˬ˗ehˇ gʼeh˗eu jeˬ mˇ mehˬ yaꞈ˗euˬ meh. Aˬ yawꞈ byah kuꞈ˗eu tsawˇ haˬ pyeuꞈ kʼawꞈ, aˬ da aˬ ma˗ahˇ yaw zeu baw˗awˇ ehˇ dawˬ naˇ haˬ˗eu meh.—Luˇkaꞈ 2:51, 52.

3. Pehˬ zaˬ ma zaˬ luꞈ Miˬyehˇ nehˬ˗ehˇ aˬ joˆ˗ehˇ gʼoeˇ dzehˬ leˇ nya˗eu nga?

Nawˇ aˬ da aˬ ma pyeuꞈ naˇ, zaˬ deuˬ˗ahˇ nawˇ Yeˬhawˇbaˬ˗ahˇ gaˬ˗eu loꞈ˗ehˇ bi gaˬ mawꞈ˗eu yaw duˬ baw meh. Teu loꞈ˗ehˇ pyeuꞈ leˇ nya ni aˬ joˆ˗ehˇ ya jahˇ˗eu nga? Yeˬhawˇbaˬ˗euˬ ‘zahˇ dawˬ kʼoꞈ dawˬ kʼoeˇ deuˬ naw maꞈ˗euˬ zaˬ deuˬ uˆ deuˬ˗ahˇ mehˬ nehˬ tsoˆ nehˬ˗awˬ. Iˇ kahˇ jawˇ ngeh maˬ ehˇ, gaˇ mahˇ kaˬ gaˇ ya iˇ ngeh maˬ ehˇ, zahˇ dawˬ kʼoꞈ dawˬ kʼoeˇ deuˬ˗ahˇ gui poˆ poˆ˗awˬ’ lehˇ Jaˇliꞈ mehˬ˗eu jeˬ heu˗ahˇ mˇ caw naˇ pyeuꞈ leˇ nya meh. (Dawˬmehˬmehˬ˗eu 6:7) ‘Gui poˆ poˆ˗eu’ lehˇ ehˇ˗eu heu naˇ, tiˬ jeˬ na˗ahˇ mehˬ˗euˬ taꞈ˗ehˇ mehˬ poˆ gaˇ jiˇ ehˇ mawꞈ˗eu meh. Zaˬ deuˬ˗ahˇ tiˬ jeˬ na bi noeˬ taˬ nya˗eu gʼaˇ duˬ, ehˇ taꞈ˗ehˇ ya ehˇ poˆ˗eu meh. Jaˇliꞈ heu deuˆ˗ahˇ ehˇ taˬ˗euˬ loꞈ˗ehˇ, aˬ da aˬ ma deuˬ zaˬ deuˬ˗ahˇ Yeˬhawˇbaˬ˗euˬ gaˇ kawˆ leh jeh˗awˇ tiˬ kʼehˬ maˬ taˬ ya ja nehˬ˗eu meh. Yawˬ jaw na luꞈ nymˇ jiˇ uˬ duˬ tahˬ˗eu gʼaˇ duˬ aˇ yamˬ biˇ doˆ taˬ paˬ˗ehˇ gʼeh˗eu meh. Zaˬ maˬ jawˇ˗eu deuˬ kʼawꞈ yawˬ jaw na luꞈ Jaˇliꞈ pyehˆ tseˇ˗eu aˇ yamˬ yuˇ doˆ taˬ naˇ, gaˇ dahˇ tsoeˬ dui dui˗eu meh.

Naꞈ suiˇ ni dzaw

4. Zaˬ˗ahˇ mehˬ ngeh gaˬ˗eu laꞈ kʼoeˇ mehˬ nehˬ

Zaˬ˗ahˇ mehˬ˗eu heu naˇ yaw awˬ maˬ ngeuˇ˗a. Jaˇliꞈ aˬ dui˗ahˇ aˬ joˆ˗ehˇ caw ba nehˬ nya˗eu nga? Yaˬkoˆ 1:19, 20-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Aˬ da aˬ ma deuˬ zaˬ nehˬ˗ehˇ dawˬ ngehˬ cawˬ ngeh, gaˬ˗eu laꞈ kʼoeˇ aˬ joˆ˗ehˇ ngehˬ nya˗eu nga?

• Aˬ da aˬ ma deuˬ nui ma pehˇ luꞈ ngeh, aˬ jeˬ miˇ neh zaˬ deuˬ˗ahˇ mehˬ paˬ˗ehˇ maˬ gʼeh˗eu nga?a

5. Zaˬ deuˬ˗ahˇ haw piˇ

Zaˬ deuˬ˗ahˇ kʼaˬ miˬ sheu˗eu gaˇ kawˆ ehˇ nehˬ˗eu heu naˇ shaꞈ dawˇ laˇ paˬ˗ehˇ gʼeh kʼawꞈ, aˬ yawꞈ maꞈ˗ahˇ haw piˇ˗eu gʼaˇ duˬ gaˇ kawˆ heu mehˬ gahˇ nehˬ˗eu heu naˇ aˇ yeˇ huiˬ dui dui˗eu meh. Biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.

Biˬdiˬoˬ: Nawˬ˗euˬ zaˬ˗ahˇ ‘haiˬ˗eu jeˬ’˗ahˇ neh haw piˇ (2:58)

• Aˬ da aˬ ma tiˬ deuˬ na˗euˬ gʼaˇ duˬ, zaˬ˗ahˇ kʼaˬ miˬ sheu˗eu gaˇ kawˆ ehˇ nehˬ˗eu heu naˇ aˬ jeˬ miˇ neh yaw awˬ maˬ ngeuˇ nga?

• Zaˬ˗ahˇ kʼaˬ miˬ sheu˗eu gaˇ kawˆ ehˇ nehˬ˗eu gʼaˇ duˬ, aˬ da aˬ ma tiˬ deuˬ na aˬ joˆ˗ehˇ jahˇ˗euˬ nga?

Jaˇliꞈ laꞈ kʼoeˇ ehˇ taˬ˗euˬ loꞈ˗ehˇ Saˬdaˬ˗euˬ miˇ tsaˬ doeˇ taꞈ˗ehˇ doeˇ dzehˬ laˇ luꞈ˗eu meh. 2 Tiˆmoˇseˬ 3:1, 13-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yaw nyiˇ 13˗ahˇ ehˇ taˬ˗euˬ haiˬ˗eu tsawˇ haˬ tiˬ deuˬ na, zaˬ˗ahˇ dawꞈ˗euˬ meh. Teu miˇ neh aˬ da aˬ ma deuˬ zaˬ˗ahˇ kʼaˬ miˬ sheu˗eu gaˇ kawˆ ehˇ nehˬ˗eu heu naˇ aˬ jeˬ miˇ neh aˇ yeˇ huiˬ˗eu nga? Aˬ cawˬ yaw doeˇ jahˇ laˇ ngeh, yawˬ haˇ yawˬ ha laˆ piˇ nya ni zaˬ deuˬ˗ahˇ mehˬ gahˇ nehˬ taˬ˗eu heu naˇ aˬ jeˬ miˇ neh aˇ yeˇ huiˬ nga?

Nawˇ siˬ nya ma loˇ?

Yeˬhawˇbaˬ˗euˬ Saˇ kiˇ deuˬ aˬ da aˬ ma deuˬ˗ahˇ zaˬ˗ahˇ kʼaˬ miˬ sheu˗eu gaˇ kawˆ ehˇ nehˬ nya ni hawˇ˗eu zaˬ˗ahˇ yaw doeˇ jahˇ laˇ˗eu jeˬ˗ahˇ neh haw piˇ nehˬ nya ni caw ba nehˬ˗eu gʼaˇ duˬ, gʼawˬ mya jeˬ boꞈ doˆ jahˇ doˆ nehˬ taˬ˗euˬ meh.

• Nawˬ˗euˬ zaˬ˗ahˇ haw piˇ (biˬdiˬoˬ)

• Huiˬ dui dui˗eu saˬ laˬ˗ahˇ dzaw geuꞈ, gaˇ kawˆ 10 hawˇ˗eu 32

• “Zaˬ deuˬ˗ahˇ kʼaˬ miˬ sheu˗eu gaˇ kawˆ ehˇ nehˬ” (Noeˬlaˇ˗awˬ!, 2016 Ngaˬ dmˬ aˬ yawꞈ dmˬ)

6. Aˬ da aˬ ma˗ahˇ yaw zeu baw

Biˬdiˬoˬ: Ngaˬ da ngaˬ ma nehˬ˗ehˇ aˬ joˆ˗ehˇ ngehˬ paˬ nga? (2:19)

• Yaw zeu baw˗eu laꞈ kʼoeˇ aˬ da aˬ ma nehˬ˗ehˇ ngehˬ cawˬ˗eu heu naˇ, aˬ jeˬ miˇ neh aˇ yeˇ huiˬ˗eu nga?

• Yaw zeu baw˗eu laꞈ kʼoeˇ aˬ da aˬ ma nehˬ˗ehˇ aˬ joˆ˗ehˇ ngehˬ cawˬ nya˗eu nga?

Dawˬdaˬ 1:8-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Aˬ da aˬ ma mehˬ nehˬ tsoˆ nehˬ laꞈ ngeh, aˬ joˆ˗ehˇ jahˇ paˬ˗ehˇ gʼeh˗eu nga?

7. Pehˬ zaˬ ma zaˬ luꞈ Yeˬhawˇbaˬ˗ahˇ uˬ duˬ tahˬ

Yeˬhawˇbaˬ˗euˬ Saˇ kiˇ pyeuꞈ˗eu nymˇ jiˇ deuˬ naˇ, pehˬ zaˬ ma zaˬ luꞈ uˬ duˬ tiˬ kawˆ loꞈ˗ehˇ tahˬ˗eu gʼaˇ duˬ, yawˬ jaw na luꞈ aˇ yamˬ laˆ doˆ taˬ˗eu meh. Nymˇ jiˇ uˬ duˬ tahˬ ngeh aˬ jeˬ jeˇ jahˇ nya˗eu nga? Biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.

Biˬdiˬoˬ: Nymˇ jiˇ uˬ duˬ tahˬ˗eu yaw shaˬ kʼawꞈ, guiˬ lahˬ gʼawˬ mya jeˬ za (8:04)

• Yawˬ jawˇ na luꞈ nymˇ jiˇ uˬ duˬ tahˬ nya˗eu gʼaˇ duˬ, aˬ jeˬ ya jahˇ˗eu nga?

• Aˬ da aˬ ma deuˬ nymˇ jiˇ uˬ duˬ tahˬ ngeh gaˇ dahˇ kʼawꞈ tsoeˬ, yaw byawˬ jiˇ byawˬ ni aˬ joˆ˗ehˇ ya jahˇ˗eu nga?—Heu kawˆ˗euˬ dahˬ beh˗eu aˇ baˇ˗ahˇ haw.

• Nawˬ˗euˬ nymˇ jiˇ tiˬ kawˆ loꞈ˗ehˇ uˬ duˬ maˬ tahˬ nya˗eu heu naˇ, aˬ jeˬ˗euˬ baˬ da neh kʼawꞈ pyeuꞈ nya nga?

Yeˬhawˇbaˬ gaˇ hu˗euˬ Iˇsaˬleˬlaˆ deuˬ˗ahˇ nymˇ jiˇ laꞈ kʼoeˇ˗euˬ deuˬ nehˬ˗ehˇ tiˬ kʼehˬ maˬ taˬ Miˬyehˇ˗euˬ dawˬ kawˬ bi ja cawˬ mawꞈ˗eu meh. Dawˬmehˬmehˬ˗eu 6:6, 7-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Aˬ dui Jaˇliꞈ heu deuˆ laꞈ kʼoeˇ mehˬ nehˬ taˬ˗euˬ jeˬ˗ahˇ aˬ joˆ˗ehˇ mˇ caw nya˗eu nga?

Nymˇ jiˇ uˬ duˬ tahˬ ngeh aˬ jeˬ jeˇ jahˇ nya˗eu nga?

• Mehˬ bawˬ˗euˬ gʼaˇ duˬ lehˬ hmˬ˗eu.

• Nymˇ jiˇ laꞈ kʼoeˇ˗euˬ deuˬ ya leˇ˗eu Jaˇliꞈ laꞈ kʼoeˇ˗euˬ gaˇ kawˆ tiˬ kawˆ na˗ahˇ gui˗awˇ ja sawˇ˗eu.

• Zaˬ yaw nyiˇ jawˇ naˇ jw.org gʼoeˇsaiˇ laꞈ kʼoeˇ zaˬ deuˬ˗euˬ gʼaˇ duˬ jahˇ doˆ taˬ˗euˬ jeˬ˗ahˇ daoˇloˆ maˬ ngeuˇ naˇ, yaˬ doˆ˗awˇ bi mui˗eu.

• Zaˬ guˬ jawˇ naˇ, jw.org gʼoeˇsaiˇ laꞈ kʼoeˇ ahˇ˗eu zaˬ guˬ deuˬ nehˬ˗ehˇ taꞈ˗eu gaˇ kawˆ tiˬ kawˆ na ja sawˇ˗eu.

• Zaˬ deuˬ nehˬ˗ehˇ Jaˇliꞈ laꞈ kʼoeˇ˗euˬ gaˇ kawˆ mui niˇ gʼa˗eu.

• jw.org gʼoeˇsaiˇ laꞈ kʼoeˇ˗euˬ biˬdiˬoˬ tiˬ hmˬ na˗ahˇ haw˗awˇ ja sawˇ˗eu.

Kawˆ shawˆ

Yeˬhawˇbaˬ aˬ da aˬ ma deuˬ˗ahˇ zaˬ˗ahˇ bi gaˬ mawꞈ˗awˇ bi mehˬ mawꞈ bi haw piˇ mawꞈ˗eu meh. Zaˬ deuˬ˗ahˇ jiˇ aˬ da aˬ ma˗ahˇ yaw zeu bi baw mawꞈ˗awˇ ehˇ dawˬ bi naˇ haˬ mawꞈ˗eu meh. Kʼoeˇ naˇ pehˬ zaˬ ma zaˬ luꞈ aˬ yawꞈ˗ahˇ uˬ duˬ tiˬ kawˆ loꞈ˗ehˇ bi tahˬ mawꞈ˗eu meh.

Ja sawˇ poˆ˗eu

• Aˬ da aˬ ma deuˬ, yawˬ ha˗euˬ zaˬ˗ahˇ aˬ joˆ˗ehˇ ya mehˬ ya haw piˇ nehˬ˗eu nga?

• Zaˬ deuˬ aˬ da aˬ ma˗ahˇ yaw zeu aˬ joˆ˗ehˇ baw nya˗eu nga?

• Nymˇ jiˇ uˬ duˬ tahˬ˗eu gʼaˇ duˬ yawˬ jaw na luꞈ aˇ yamˬ laˆ doˆ taˬ naˇ, aˬ joˆ˗ehˇ gaˇ dahˇ tsoeˬ˗eu nga?

Haw lahˬ

Zaˬ deuˬ˗ahˇ huiˬ laˇ ngeh˗euˬ laꞈ taꞈ, aˬ jeˬ jeˇ lehˬ hmˬ nehˬ nya˗eu nga lehˇ haw.

“Zaˬ deuˬ˗ahˇ mehˬ nehˬ paˬ˗ehˇ gʼeh˗eu koꞈ jeˬ” (Noeˬlaˇ˗awˬ!, 2019 Nyiˬ dmˬ aˬ yawꞈ dmˬ)

Aˇ kʼoꞈ kʼawˆ laˇ˗euˬ aˬ da aˬ ma deuˬ˗ahˇ aˬ joˆ˗ehˇ ya ngehˬ gʼeh˗eu lehˇ Jaˇliꞈ mehˬ˗eu jeˬ˗ahˇ haw.

“Jaˇliꞈ aˇ kʼoꞈ kʼawˆ laˇ˗euˬ aˬ da aˬ ma˗ahˇ aˬ joˆ˗ehˇ ngehˬ gʼeh lehˇ ehˇ˗eu nga?” (Iˇteuꞈnehꞈ laꞈ kʼoeˇ˗euˬ gaˇ kawˆ)

Zaˬ˗ahˇ aˬ joˆ˗ehˇ ya cu˗eu lehˇ maˬ siˬ nya˗eu aˬ da tiˬ gʼaˬ, muiˬ˗eu aˬ da aˬ joˆ˗ehˇ pyeuꞈ laˇ nya˗euˬ nga lehˇ haw.

Yeˬhawˇbaˬ neh mehˬ nehˬ laꞈ˗euˬ loꞈ˗ehˇ nymˇ jiˇ˗ahˇ ngehˬ gʼeh bo saˆ˗euˬ ma (5:58)

Aˬ da deuˬ yawˬ ha˗euˬ aˬ li nehˬ˗ehˇ gʼoeˇ dzehˬ laˇ ni aˬ joˆ˗ehˇ ya jahˇ˗eu nga lehˇ haw.

“Aˬ da deuˬ yawˬ ha˗euˬ aˬ li nehˬ˗ehˇ yaw gʼoeˇ gʼoeˇ lehˇ aˬ joˆ˗ehˇ jawˇ nya˗eu nga?” (Loꞈ˗eu nymˇgoˇ, 2011 Tseˇ tiꞈ siˬ ba la 1)