Dzaw deuˆ 01
Jaˇliꞈ nawˬ˗ahˇ aˬ joˆ˗ehˇ caw ba nehˬ nya˗eu nga?
Aˬ dui yawˬ gʼaˬ na luꞈ dehꞈ ziˇ hawˇ˗eu shaˬ˗eu zahˬ˗eu jeˬ˗ahˇ maˬ ehˇ, shiˇ˗eu jeˬ hawˇ˗eu mehˬ hu paw pyeuꞈ laˇ˗eu jeˬ˗ahˇ maˬ ehˇ, siˬ nya mawꞈ˗eu meh. Aˬ dui aˬ yawꞈ nah yawꞈ mˇ dzaˬ kʼawꞈ dawˇ˗eu gaˇ kawˆ hawˇ˗eu nymˇ jiˇ laˬ kʼaˬ cehˇ ni aˬ joˆ˗ehˇ ya jahˇ˗eu gaˇ kawˆ˗ahˇ jiˇ kʼahˬ lahˇ nya˗eu meh. Jaˇliꞈ dehꞈ ziˇ nehˬ˗ehˇ taꞈ˗eu aˇ yeˇ huiˬ˗eu gaˇ kawˆ deuˬ˗ahˇ ehˇ nehˬ taˬ˗euˬ tehꞈ˗ehˇ maˬ gʼaˬ ni, aˬ yawꞈ nah yawꞈ yaw dehꞈ dehꞈ gaˇ zmˬ˗iˇ nya˗eu jeˬ jiˇ mehˬ nehˬ taˬ ngaˇ lehˇ gʼawˬ mya gʼaˬ ya mawˇ˗euˬ meh. Jaˇliꞈ yawˬ gʼaˬ na luꞈ˗ahˇ gaˇ dahˇ tsoeˬ ngaˇ laˬ? Nawˬ˗ahˇ aˬ joˆ˗ehˇ noeˬ nya?
1. Jaˇliꞈ laꞈ kʼoeˇ aˬ jeˬ jeˇ˗euˬ gaˇ kawˆ ehˇ nehˬ taˬ˗euˬ nga?
Jaˇliꞈ aˇ yeˇ huiˬ˗eu gaˇ kawˆ heu deuˬ˗ahˇ ehˇ nehˬ taˬ˗euˬ meh. Dehꞈ˗eu jeˬ aˬ joˆ˗ehˇ dahˬ beh˗euˬ nga? Aˬ dui aˬ jeˬ˗euˬ gʼaˇ duˬ yaw dehꞈ dehꞈ luꞈ˗eu nga? Aˬ jeˬ miˇ neh shaˬ zahˬ˗ahˇ ya tahˬ puˬ˗eu nga? Tsawˇ haˬ shiˇ naˇ aˬ gaˇ iˇ˗eu nga? Aˬ dui yawˬ gʼaˬ na luꞈ nui saˇ oꞈ˗eu jeˬ geuꞈ mawꞈ kʼawꞈ, guiˇ deuˆ˗eu jeˬ aˬ jeˬ miˇ neh heu myaˆ myaˆ˗ehˇ myaˬ˗eu nga? Mehˬ hu paw miˇ tsaˬ heu siˬ˗ahˇ aˬ jeˬ pyeuꞈ laˇ˗eu nga? Jaˇliꞈ naˇ haˬ˗eu jeˬ heu deuˬ˗euˬ dawˬ kʼoꞈ˗ahˇ poˆ˗awˬ lehˇ gʼaˬ biꞈ taˬ˗euˬ meh. Yaw myaˬ lam gʼaˬ nui kʼahˇ shiˇ laˇ paˬ˗ehˇ gʼeh˗eu dawˬ kʼoꞈ˗ahˇ poˆ mawˇ˗euˬ meh.
2. Aˬ yawꞈ nah yawꞈ laˬ kʼaˬ cehˇ nya ni Jaˇliꞈ aˬ joˆ˗ehˇ caw ba nehˬ˗eu nga?
Jaˇliꞈ laꞈ kʼoeˇ gʼawˬ mya jeˬ˗euˬ gaˇ kawˆ mehˬ nehˬ taˬ˗euˬ meh. Yaw jeˬ ma jeˬ, nymˇ jiˇ laꞈ kʼoeˇ laˬ kʼaˬ cehˇ ni aˬ joˆ˗ehˇ ya jahˇ˗eu nga? Noeˬ shaˬ kʼahˬ lahˇ ngeh aˬ jeˬ ya jahˇ˗eu nga? Gaˇ˗ahˇ laˬ kʼaˬ tiˬ cehˇ mˇ nya ni aˬ jeˬ ya jahˇ˗eu nga? Jaˇliꞈ gaˇ kawˆ heu deuˬ nehˬ˗ehˇ taꞈ leˇ˗awˇ aˬ jeˬ mehˬ taˬ˗euˬ nga lehˇ nawˇ ya siˬ˗awˇ, nawˇ dzaw daˆ leꞈ ngeh gaˇ kawˆ nui deuˬ˗ahˇ jiˇ ya siˬ duˬ meh. Toˆ˗ehˇ naˇ nawˇ ‘Jaˇliꞈ dawˬ kawˬ dawˬ tawˆ luꞈ gaˇ dahˇ tsoeˬ dui dui˗eu meh’ lehˇ ehˇ˗eu dawˬ˗ahˇ nui ma tsaˬ˗eu yaw duˬ baw meh.—2 Tiˆmoˇseˬ 3:16.
Paˇ dmˬ heu dmˬ˗aˬ Jaˇliꞈ˗euˬ dah zaˇ maˬ ngeuˇ˗a. Jaˇliꞈ˗ahˇ siˬ nya mawꞈ dzehˬ laˇ ni nawˬ˗ahˇ gʼaˬ biꞈ˗eu paˇ dmˬ pyeuꞈ meh. Teu miˇ neh, nga maꞈ nawˬ˗ahˇ gaˇ kawˆ heu deuˬ laꞈ kʼoeˇ ahˇ˗eu Jaˇliꞈ aˇ deuˆ deuˬ˗ahˇ gui˗awˇ, nawˇ dzaw luꞈ˗eu gaˇ kawˆ nehˬ˗ehˇ sheu cehˆ haw˗awˬ lehˇ gʼaˬ biꞈ˗eu ma.
Naꞈ suiˇ ni dzaw
Jaˇliꞈ dehꞈ ziˇ muiˬ daˆ laˇ ni aˬ joˆ˗ehˇ caw ba˗eu nga? Jaˇliꞈ gui gaˇ laˬ kʼaˬ cehˇ ni aˬ joˆ˗ehˇ ya jahˇ˗eu nga? Jaˇliꞈ˗ahˇ gʼoˆ shaw laˇ ni tiˬ gʼaˬ paˬ neh aˬ jeˬ miˇ neh ya bi caw ba˗eu nga? Gaˇ kawˆ heu deuˬ˗ahˇ ja sawˇ.
3. Jaˇliꞈ aˬ dui˗ahˇ gaˇ ma mehˬ nehˬ nya
Jaˇliꞈ˗aˬ gaˇ ma˗ahˇ bya˗eu yaw shehꞈ˗ahˇ duˇ˗eu meh. Jaˇliꞈ aˬ dui˗ahˇ yaw muiˬ˗ehˇ noeˬ tsehˆ nya ni maˬ ehˇ, mehˬ hu paw˗euˬ gaˇ kawˆ˗ahˇ siˬ nya ni maˬ ehˇ, caw ba nehˬ˗eu meh.
Ja ceuˬ 119:105-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
Ja ceuˬ sahˬ boꞈ boꞈ˗euˬ heu gʼaˬ Jaˇliꞈ˗ahˇ aˬ joˆ˗ehˇ noeˬ˗eu nga?
Nawˇ tawˇ neh, Jaˇliꞈ˗ahˇ aˬ joˆ˗ehˇ noeˬ nya?
4. Jaˇliꞈ aˬ dui siˬ nya mawꞈ˗eu jeˬ ehˇ nehˬ nya
Zaˬ miˬ aˬ buˇ tiˬ gʼaˬ aˬ yawꞈ˗ahˇ yaw myaˬ kʼoꞈ nui ma maˬ saˇ maˇ saˇ˗ehˇ gʼeh˗eu gaˇ kawˆ˗ahˇ Jaˇliꞈ˗ahˇ neh ya siˬ duˬ˗euˬ meh. Biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.
Biˬdiˬoˬ heu laꞈ kʼoeˇ˗euˬ zaˬ miˬ aˬ buˇ heu gʼaˬ, aˬ jeˬ jeˇ˗euˬ gaˇ kawˆ˗ahˇ siˬ nya mawꞈ˗eu nga?
Jaˇliꞈ dzaw˗eu teu aˬ yawꞈ˗ahˇ aˬ joˆ˗ehˇ caw ba nehˬ˗euˬ nga?
Jaˇliꞈ aˬ dui siˬ nya mawꞈ˗eu gaˇ kawˆ˗ahˇ poˆ˗awˬ lehˇ gʼaˬ biꞈ˗eu meh. Maꞈtehˬ 7:7-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
Nawˇ aˬ jeˬ jeˇ˗euˬ gaˇ kawˆ siˬ nya mawꞈ nya? Jaˇliꞈ dawˬ kʼoꞈ biꞈ nya paˬ˗ehˇ gʼeh ngaˇ laˬ?
5. Nawˇ Jaˇliꞈ gui gaˇ laˬ kʼaˬ cehˇ nya
Gʼawˬ mya gʼaˬ Jaˇliꞈ gui gaˇ laˬ kʼaˬ cehˇ˗awˇ gaˇ dahˇ tsoeˬ˗eu jeˬ za luꞈ˗eu meh. Biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.
Biˬdiˬoˬ heu laꞈ kʼoeˇ˗euˬ zaˬ guˬ deuˬ, sahˬ boꞈ gui gaˇ aˬ joˆ˗ehˇ noeˬ˗eu nga?
Aˬ yawꞈ maꞈ sahˬ boꞈ gui gaˇ maˬ ya leˇ kʼawꞈ, aˬ jeˬ miˇ neh Jaˇliꞈ gui gaˇ ya leˇ˗eu nga?
Jaˇliꞈ laꞈ kʼoeˇ aˬ dui˗ahˇ gʼaˬ hawˇ˗eu noeˬ tmˬ˗eu jeˬ biꞈ˗eu dawˬ deuˬ ahˇ˗eu meh. Loˇmaˆ 15:4-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
Aˬ dui˗ahˇ gʼaˬ hawˇ˗eu noeˬ tmˬ˗eu jeˬ biꞈ˗eu, Jaˇliꞈ laꞈ kʼoeˇ˗euˬ saˇ jaˇ dawˬ˗ahˇ nawˇ siˬ nya mawꞈ miˇ˗a laˬ?
6. Aˬ cawˬ nawˬ˗ahˇ Jaˇliꞈ˗ahˇ gʼoˆ shaw nya ni caw ba nehˬ nya
Jaˇliꞈ˗ahˇ yawˬ ha tiˬ gʼaˬ tehꞈ˗ehˇ gui kʼawꞈ, aˬ cawˬ neh bi caw ba naˇ gʼoˆ shaw dzehˬ laˇ miˇ˗a lehˇ gʼawˬ mya gʼaˬ ehˇ˗eu meh. Gʼaˬkʼehˇ 8:26-31-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
Jaˇliꞈ˗ahˇ gʼoˆ shaw nya laˇ ni aˬ joˆ˗ehˇ ya jahˇ˗eu nga?—Aˇ deuˆ 30 hawˇ˗eu 31-ahˇ haw.
Iˬdiˬyoˇbyaˇ tsawˇ haˬ tiˬ gʼaˬ Miˬyehˇ˗euˬ dawˬ kawˬ˗ahˇ gʼoˆ shaw nya˗eu gʼaˇ duˬ aˬ cawˬ caw ba nehˬ laꞈ˗eu jeˬ˗ahˇ loˬ˗eu loꞈ˗ehˇ, nymˬ˗mˇ iˬ nah˗euˬ gʼawˬ mya gʼaˬ jiˇ aˬ cawˬ neh bi caw ba naˇ Jaˇliꞈ˗ahˇ gʼoˆ shaw dzehˬ laˇ nya lehˇ ehˇ˗eu meh.
Tiˬ gʼaˬ na ehˇ˗eu: “Jaˇliꞈ dzaw˗eu teu˗aˬ, aˇ yamˬ jiˇ˗eu tehꞈ nya.”
Nawˇ tawˇ neh aˬ joˆ˗ehˇ noeˬ nya? Aˬ jeˬ miˇ neh?
Kawˆ shawˆ
Jaˇliꞈ laꞈ kʼoeˇ aˬ yawꞈ nah yawꞈ yaw dehꞈ dehꞈ gaˇ zmˬ˗iˇ nya˗eu jeˬ mehˬ nehˬ taˬ˗awˇ, aˇ yeˇ huiˬ˗eu gaˇ kawˆ ehˇ nehˬ taˬ˗euˬ uˬ taꞈ, gʼaˬ hawˇ˗eu noeˬ tmˬ˗eu jeˬ biꞈ˗eu dawˬ deuˬ jiˇ ahˇ˗eu meh.
Ja sawˇ poˆ˗eu
Jaˇliꞈ aˬ yawꞈ nah yawꞈ yaw dehꞈ dehꞈ gaˇ taꞈ˗eu aˬ jeˬ jeˇ˗euˬ gaˇ kawˆ mehˬ nehˬ taˬ˗euˬ nga?
Jaˇliꞈ aˬ jeˬ jeˇ˗euˬ naˇ haˬ˗eu jeˬ˗ahˇ dawˬ kʼoꞈ biꞈ nehˬ taˬ˗euˬ nga?
Nawˇ Jaˇliꞈ laꞈ kʼoeˇ˗euˬ aˬ geu kawˆ˗ahˇ siˬ nya mawꞈ nya?
Haw lahˬ
Jaˇliꞈ mehˬ˗eu jeˬ nymˬ˗mˇ iˬ nah keuˆ ni aˬ jeˬ miˇ neh zmˬ nya nga lehˇ haw.
“Jaˇliꞈ mehˬ˗eu jeˬ aˬ myah luꞈ gaˇ dahˇ tsoeˬ” (Loꞈ˗eu nymˇgoˇ, 2018 Dahˬ beh˗eu dmˬ)
Yawˬ haˇ yawˬ ha aˇ poeˬ maˬ baw nya lehˇ noeˬ˗euˬ zaˬ yo aˬ li tiˬ gʼaˬ˗ahˇ, Jaˇliꞈ aˬ joˆ˗ehˇ caw ba˗euˬ nga lehˇ haw.
Nymˇ jiˇ nehˬ˗ehˇ taꞈ leˇ˗awˇ Jaˇliꞈ mehˬ˗eu jeˬ˗ahˇ haw.
“Nymˇ jiˇ laˬ kʼaˬ cehˇ ni caw ba nehˬ˗eu 12 jeˬ” (Noeˬ laˇ˗awˬ!, 2018 Nyiˬ dmˬ aˬ yawꞈ dmˬ)
Miˇ tsaˬ˗ahˇ uˆ lahˇ˗eu gʼaˬ nehˬ˗ehˇ taꞈ leˇ˗awˇ, tsawˇ haˬ deuˬ gʼoˆ shaw bahˬ taˬ˗euˬ jeˬ˗ahˇ Jaˇliꞈ aˬ joˆ˗ehˇ ehˇ shaw nehˬ laꞈ nga lehˇ haw.
Aˬ dui aˬ jeˬ miˇ neh Jaˇliꞈ dzaw paˬ˗ehˇ gʼeh˗eu nga?—Tiˬ byah (3:14)