Aˬ yawꞈ Miˬyehˇ˗ahˇ saˇ jaˇ ziꞈ

Moˇseˬ Iˇjiˇtuˆ miˇ kʼahˬ˗ahˇ neh cehˆ doˆ leꞈ ngeh, zaˬ kʼaˆ geuꞈ luꞈ˗eu Iˇsaˬleˬlaˆ˗euˬ nymˇ jiˇ tiˬ jiˇ laꞈ kʼoeˇ Gaˬlehˆ lehˇ myahˇ˗eu zaˬ tiˬ gʼaˬ dehꞈ le˗euˬ meh. Aˬ yawꞈ zaˬ kʼaˆ geuꞈ geuꞈ˗ehˇ ya huiˬ laˇ˗euˬ kʼawꞈ aˇ nah naˇ ya buˬ iˇ˗euˬ meh. Gaˬlehˆ 40 kʼoꞈ ehˇ gʼaˬ ni kʼawˆ laˇ taˬ ngeh Moˇseˬ Yeˬhawˇbaˬ neh ehˇ˗euˬ loꞈ˗ehˇ Iˇsaˬleˬlaˆ deuˬ˗ahˇ ka kʼoꞈ˗eu gʼaˇ duˬ Iˇjiˇtuˆ miˇ kʼahˬ˗ahˇ gʼoꞈ laˇ˗euˬ meh. Yeˬhawˇbaˬ aˬ yawꞈ˗euˬ baoˬ˗ahˇ zmˬ˗awˇ kʼehˬ˗eu kʼaˆ˗eu jeˬ tseˇ jeˬ bi keuˆ le gaˇ maˬ ehˇ, iˬ ma laˆ shaˆ yaw neˇ˗ahˇ nyiˬ paˆ bi paˆ iˇ gaˇ maˬ ehˇ, Iˇjiˇtuˆ tsawˇ haˬ˗euˬ laꞈ˗ahˇ neh aˬ yawꞈ maꞈ˗ahˇ ka kʼoꞈ nehˬ gaˇ maˬ ehˇ, Gaˬlehˆ haw haw˗ehˇ zahˬ leˇ˗eu yaw duˬ baw meh.

Gaˬlehˆ nui jah bi ziꞈ dzehˬ laˇ˗eu gaˇ kawˆ heu deuˬ˗ahˇ tiˬ jawˇ˗iˬ maˬ ngehˇ leˇ˗a. Iˇjiˇtuˆ miˇ kʼahˬ˗ahˇ neh doˆ laˇ˗euˬ ba la myaˆ siˬ byah laˇ ngeh Iˇsaˬleˬlaˆ tsawˇ haˬ gʼawˬ mya ni Siˇnaˆ gawˬ jawˬ˗ahˇ Miˬyehˇ˗ahˇ saˇ jaˇ puiˬ˗euˬ meh. Ehˇ kʼawꞈ Gaˬlehˆ˗aˬ toˆ˗ehˇ maˬ gʼeh˗aˬ. Teu gaˇ neh tiˬ kʼehˬ naˇ, aˬ yawꞈ huiˬ˗eu gaˇ tiˬ hmˬ za˗euˬ meh. Aˬ yawꞈ Yawˇshuˆ hawˇ˗eu Iˇsaˬleˬlaˆ˗euˬ aˬ yuiꞈ aˬ tsu 10 gʼaˬ nehˬ˗ehˇ saˇ jaˇ dzaˬ taˬ˗euˬ miˇ kʼahˬ˗ahˇ ya kʼoeˬ sho haw leˇ˗euˬ meh.

Aˬ yawꞈ maꞈ 12 gʼaˬ kʼaˬ duˬ ni Kaˬnaˬ miˇ kʼahˬ˗ahˇ le˗awˇ miˇ kʼahˬ teu kʼahˬ laꞈ kʼoeˇ jaˆ˗eu meuˬ deuˬ, tsawˇ haˬ deuˬ hawˇ˗eu dzaˬ la gʼoˆ cehˇ, aˇ siˬ aˇ lu deuˬ˗euˬ gaˇ kawˆ˗ahˇ 40 nah byah ni kʼoeˬ sho haw leˇ˗euˬ meh. Aˬ yawꞈ maꞈ gʼoꞈ le ngeh aˇ siˬ tiˬ jeˬ na yuˇ leꞈ˗euˬ meh. Teu laꞈ kʼoeˇ neh aˬ gaꞈ aˇ siˬ tiˬ puˇ tehꞈ˗ehˇ tsoꞈ˗eu uˬ pyaˬ tiˬ pyaˬ tehꞈ˗ehˇ kʼawꞈ, tsawˇ haˬ nyiˬ gʼaˬ daˇ kawˬ cawˬ ahˇ˗awˇ ya baꞈ˗eu meh. Ehˇ kʼawꞈ miˇ kʼahˬ teu kʼahˬ˗euˬ gaˇ kawˆ ya ja nehˬ ngeh, kʼoeˇ tseˇ gʼaˬ “maˬ ngeuˇ˗eu jeˬ˗ehˇ ja byah gʼeh˗euˬ meh.” Teu ngeh, Gaˬlehˆ nui ma cawˆ dui dui˗eu yaw duˬ baw meh. Aˬ yawꞈ maꞈ Kaˬnaˬ tsawˇ haˬ deuˬ naˇ gʼaˬ kʼaˆ dui dui˗awˇ, goˇ dui dui˗eu miˇ neh tiˬ jeˬ gʼeh neh˗iˬ maˬ deuˆ gʼaˬ nya nga lehˇ ehˇ˗awˇ, iˇ cuꞈ dahˬ pymˬ laˇ ngeh shiˇ jiˇ˗euˬ Naˇpaˬ˗leˬ˗euˬ zaˬ deuˬ uˆ deuˬ pyeuꞈ nga lehˇ jiˇ paˇ ehˇ˗eu meh. Dawˬ teu˗ahˇ ya gaˬ ngeh, Iˇsaˬleˬlaˆ deuˬ nui ma gʼaˬ baˬ˗iˇ dui dui˗awˇ, tiˬ deuˬ na ngehˬ˗ehˇ dzehˬ Iˇjiˇtuˆ miˇ kʼahˬ˗ahˇ gʼoꞈ˗iˇ˗eu gʼaˇ duˬ, aˬ yuiꞈ tiˬ gʼaˬ paˇ ya tseˇ nga lehˇ ehˇ˗eu meh.

Gaˬlehˆ hawˇ˗eu Yawˇshuˆ naˇ aˬ yawꞈ maꞈ˗ahˇ maˬ duˇ˗a. Aˬ yawꞈ nyaꞈ nui jah gʼaˬ baˬ luꞈ˗eu Iˇsaˬleˬlaˆ tsawˇ haˬ deuˬ˗ahˇ ‘Yeˬhawˇbaˬ Miˬyehˇ aˬ dui nehˬ˗ehˇ jawˇ˗eu miˇ neh taˬ guˆ’ lehˇ gʼaˬ biꞈ nehˬ˗euˬ meh. Ehˇ kʼawꞈ, Iˇsaˬleˬlaˆ deuˬ nui ma pehˇ˗eu miˇ neh, aˬ yawꞈ nyaꞈ˗ahˇ kʼaˬ lo neh bi sehꞈ˗eu lehˇ ja˗eu meh.

Yeˬhawˇbaˬ Iˇsaˬleˬlaˆ deuˬ˗ahˇ Iˇjiˇtuˆ˗euˬ tsawˇ haˬ˗euˬ laꞈ˗ahˇ neh ka kʼoꞈ˗eu gʼaˇ duˬ gʼawˬ mya jeˬ jahˇ˗euˬ kʼawꞈ, aˬ yawꞈ maꞈ tiˬ kʼehˇ laˇ kʼehˬ laꞈ kʼoeˇ tehꞈ˗ehˇ Yeˬhawˇbaˬ˗ahˇ maˬ paˇ jah˗euˬ meh. Teu miˇ neh Yeˬhawˇbaˬ˗euˬ nui ma˗ahˇ deuˬ dui dui leˇ˗euˬ meh. Ehˇ kʼawꞈ Gaˬlehˆ hawˇ˗eu Yawˇshuˆ naˇ nui jah ziꞈ dah ni gʼeh˗awˇ kʼaˬ duˬ ni gʼeh gaˇ Yeˬhawˇbaˬ ya mawˇ˗euˬ meh. Yeˬhawˇbaˬ “Ngaˬ˗euˬ zaˬ kʼaˆ Gaˬlehˆ nui ma taˬ˗eu aˬ cawˬ˗ahˇ beu gaˇ˗awˇ, ngaˬ˗ahˇ saˇ jaˇ ziꞈ˗eu” meh lehˇ ehˇ˗eu meh. Yeˬhawˇbaˬ nui jah maˬ ahˇ˗eu Iˇsaˬleˬlaˆ deuˬ˗ahˇ bawˇ tsahˬ bawˇ dahˇ˗ahˇ bi shiˇ˗eu lehˇ noeˬ tsehˆ˗euˬ meh.a Ehˇ kʼawꞈ Gaˬlehˆ hawˇ˗eu Yawˇshuˆ naˇ maˬ ya shiˇ ni saˇ jaˇ dzaˬ taˬ˗euˬ miˇ kʼahˬ˗ahˇ ya jawˇ leˇ meh.

Bawˇ tsahˬ bawˇ dahˇ laꞈ kʼoeˇ 40 kʼoꞈ ya cah ngeh, Gaˬlehˆ aˬ myah luꞈ nui jah ziꞈ dah ni gʼeh˗awˇ kʼaˬ duˬ ni gʼeh˗euˬ meh. Aˬ yawꞈ Moˇseˬ˗ahˇ saˇ jaˇ ziꞈ˗eu laꞈ kʼoeˇ caw ba˗euˬ meh. Moˇseˬ shiˇ dzeuˇ˗awˇ Yawˇshuˆ Iˇsaˬleˬlaˆ tsawˇ haˬ deuˬ˗ahˇ Yawˇdaˬ lawˇ baˬ˗ahˇ iˇ tsehˆ˗awˇ, saˇ jaˇ dzaˬ taˬ˗euˬ miˇ kʼahˬ˗ahˇ ya sheuˬ uˇ ngeh jiˇ saˇ jaˇ ziꞈ˗eu laꞈ kʼoeˇ caw ba˗euˬ meh. Aˇ kʼoꞈ kʼawˆ laˇ ngeh jiˇ Miˬyehˇ˗ahˇ muiˇ˗eu Kaˬnaˬ tsawˇ haˬ˗ahˇ kʼaˬ duˬ ni deuˆ˗euˬ meh.

Iˇsaˬleˬlaˆ tsawˇ haˬ deuˬ Yawˇdaˬ lawˇ baˬ˗ahˇ iˇ tsehˆ˗euˬ 6 kʼoꞈ byah laˇ ngeh, saˇ jaˇ dzaˬ taˬ˗euˬ miˇ kʼahˬ laꞈ kʼoeˇ˗euˬ jawˇ duˬ gʼawˬ mya tsahˇ˗ahˇ deuˆ gʼaˬ˗euˬ meh. Gaˬlehˆ aˬ gaˇ jawˇ iˇ˗eu lehˇ ya noeˬ tsehˆ˗eu aˇ yamˬ keuˆ laˇ˗euˬ meh. Aˬ yawꞈ Heˬbyoˬ meuˬ˗ahˇ tseˇ˗euˬ meh. Meuˬ teu meuˬ naˇ huiˬ dui goˇ dui dui˗awˇ gʼaˬ kʼaˆ dui dui˗eu tsawˇ haˬ deuˬ jawˇ˗eu miˇ neh, tiˬ jeˬ gʼeh neh˗iˬ maˬ deuˆ gʼaˬ nya˗a lehˇ kʼoeˬ sho haw leˇ˗euˬ tseˇ gʼaˬ neh ehˇ˗euˬ meuˬ pyeuꞈ meh. Gaˬlehˆ 85 kʼoꞈ kʼawˆ laˇ˗euˬ kʼawꞈ, nui jah ziꞈ dah ni gʼeh luꞈ˗awˇ, “Sahˬpa Miˬyehˇ neh ehˇ taˬ˗euˬ loꞈ˗ehˇ, ngaˬ nehˬ˗ehˇ Sahˬpaˬ Miˬyehˇ jawˇ˗awˇ, aˬ yawꞈ maꞈ˗ahˇ ngaˇ teh doˆ nya” ma lehˇ ehˇ˗eu meh. Ehˇ˗euˬ loꞈ˗ehˇ Gaˬlehˆ meuˬ teu meuˬ˗ahˇ deuˆ gʼaˬ nya˗awˇ teu gaˇ jawˇ˗euˬ meh. “Kʼoeˇ naˇ, miˇ kʼahˬ teu kʼahˬ laꞈ kʼoeˇ guiˇ maˬ deuˆ ni coꞈ ngehˇ ni jaˆ˗euˬ meh.”

Dzeuˇ yaꞈ˗euˬ yaw myaˬ kʼoꞈ˗ahˇ Moˇseˬ Gaˬlehˆ˗aˬ “dawˬ˗ahˇ naˇ haˬ geuꞈ˗euˬ” meh lehˇ ehˇ˗eu meh. Gaˬlehˆ shiˇ ngeh keuˆ ni Yeˬhawˇbaˬ˗euˬ dawˬ˗ahˇ naˇ haˬ˗euˬ meh. Aˬ yawꞈ miˇ shuiꞈ˗ahˇ gʼoꞈ dehꞈ laˇ ngeh jiˇ naˇ haˬ˗eu yaw duˬ baw meh.

Jaˇliꞈ aˇ deuˆ heu deuˬ˗ahˇ gui:

• Bawˇtsahˬ 13:1–14:12, 20-38

• Yawˇshuˆ 14:6-15

Ja sawˇ˗eu gʼaˇ duˬ:

Gaˬlehˆ kʼaˬ duˬ ni gʼeh˗eu lehˇ aˬ joˇ joˆ˗ehˇ mˇ mawˇ˗euˬ nga?

Naꞈ suiˇ ni poˆ tseˇ

1. 1. Bawˇtsahˬ 13:23 laꞈ kʼoeˇ ngehˬ keuˆ taˬ˗euˬ saˇ jaˇ dzaˬ taˬ˗euˬ miˇ kʼahˬ laꞈ kʼoeˇ˗euˬ aˇ siˬ aˇ lu˗euˬ gaˇ kawˆ heu naˇ, aˇ dzehˬ dzeuˇ ni ehˇ taˬ˗euˬ maˬ ngeuˇ˗eu lehˇ aˬ joˆ˗ehˇ siˬ laˇ nga? (w06-SI 6/15 16 ¶1-2)

   Dawˬ kʼoꞈ

2. 2. Saˇ jaˇ dzaˬ taˬ˗euˬ miˇ kʼahˬ naˇ, Gaˬlehˆ hawˇ˗eu Yawˇshuˆ neh ehˇ˗euˬ loꞈ˗ehˇ “byaˬ byaˬ uiˇ hawˇ˗eu mawˇ neˇ aˬ coeˇ yoeˇ˗eu miˇ kʼahˬ” pyeuꞈ ngaˇ laˬ? (Bawˇtsahˬ 14:8; w11-SI 3/1 15) (Aˇ baˇ 1)

   Dawˬ kʼoꞈ

   

   Institute of Archaeology/Hebrew University © Tel Rehov Excavations

3. 3. Moˇseˬ Kaˬdeˬshaˇ˗ahˇ neh tsawˇ haˬ 12 gʼaˬ˗ahˇ bi kʼoeˬ sho haw leˇ ngeh, Iˇsaˬleˬlaˆ deuˬ saˇ jaˇ dzaˬ taˬ˗euˬ miˇ kʼahˬ nehˬ˗ehˇ gʼawˬ mahˇ ni kaˬ ngaˇ siˬ laˬ? (w04-SI 10/15 16-17 ¶11-12) (Aˇ baˇ 2)

   Dawˬ kʼoꞈ

   

4. 4. Yeˬhawˇbaˬ Gaˬlehˆ˗euˬ nui jah hawˇ˗eu kʼaˬ duˬ ni gʼeh˗eu jeˬ˗ahˇ guiˬ lahˬ aˬ joˆ˗ehˇ biꞈ˗euˬ nga? (w06-SI 10/1 18 ¶11)

   Dawˬ kʼoꞈ

Aˬ joˆ˗ehˇ zmˬ iˇ nya nga lehˇ shaˇ noeˬ

• Gaˬlehˆ yaw lehˬ maˬ mˇ˗euˬ gaˇ neh, Iˇsaˬleˬlaˆ deuˬ nehˬ˗ehˇ bawˇ tsahˬ bawˇ dahˇ laꞈ kʼoeˇ cah cah˗ehˇ ya shaˬ˗euˬ kʼawꞈ, taˬ aw˗eu laꞈ kʼoeˇ Yeˬhawˇbaˬ˗ahˇ nui ma taˬ˗euˬ meh. Aˬ dui Gaˬlehˆ˗ahˇ aˬ joˆ˗ehˇ gʼeh ngeh dzaw geuꞈ nya nga?

  Dawˬ kʼoꞈ

• Gaˬlehˆ˗euˬ gaˇ kawˆ heu naˇ, aˬ dui tsawˇ haˬ yaw myaˬ paw˗euˬ mehˬ nah “maˬ ya caw teh” ni aˬ joˆ˗ehˇ caw ba nehˬ nga? (Doˆ˗iˇ˗eu 23:2) (Aˇ baˇ 3)

  Dawˬ kʼoꞈ

  

• Gaˬlehˆ˗euˬ kʼaˬ duˬ ni gʼeh˗eu jeˬ˗ahˇ aˬ joˆ˗ehˇ dzaw geuꞈ nya nga siˬ?

  Dawˬ kʼoꞈ

Naꞈ suiˇ ni shaˇ noeˬ

• Gaˇ kawˆ heu Yeˬhawˇbaˬ nehˬ˗ehˇ taꞈ leˇ˗awˇ ngaˬ˗ahˇ aˬ jeˬ bi siˬ laꞈ nga?

  Dawˬ kʼoꞈ

• Gaˇ kawˆ heu miˇ shuiꞈ˗ahˇ Yeˬhawˇbaˬ neh saˇ jaˇ dzaˬ taˬ˗euˬ jeˬ nehˬ˗ehˇ aˬ joˆ˗ehˇ taꞈ nga?

  Dawˬ kʼoꞈ

• Gaˬlehˆ gʼoꞈ dehꞈ laˇ ngeh ngaˇ aˬ jeˬ naˇ haˬ paˬ nga?

  Dawˬ kʼoꞈ

Haw lahˬ

Gaˬlehˆ˗euˬ nui jah hawˇ˗eu kʼaˬ duˬ ni gʼeh˗eu jeˬ aˬ joˆ˗ehˇ taꞈ nga lehˇ haw.

“Miˬyehˇ˗ahˇ jah˗awˇ yaw zeu baw˗eu miˇ neh kʼaˬ duˬ ni gʼeh” (w06-SI 10/1 16-19 ¶1-12)

85 kʼoꞈ kʼawˆ laˇ˗euˬ Gaˬlehˆ Yeˬhawˇbaˬ Miˬyehˇ˗euˬ “dawˬ˗ahˇ naˇ haˬ geuꞈ˗euˬ ma” lehˇ aˬ jeˬ miˇ neh ehˇ nya˗euˬ nga? (Yawˇshuˆ 14:8)

“Nawˇ Yeˬhawˇbaˬ˗euˬ mehˬ nah tiˬ byah tiˬ loꞈ caw teh ma laˬ?” (w93-SI 5/15 26-29)