“Zaˬ miˬ zaˬ deuˬ laꞈ kʼoeˇ aˬ cawˬ naˆ maˬ tseˇ guiˬ lahˬ huiˬ˗eu gʼaˬ”

Siˇseˬlaˇ naˇ guiˇ maꞈ˗euˬ aˬ yuiꞈ pyeuꞈ meh. Ehˇ kʼawꞈ aˬ yawꞈ˗euˬ tsawˇ haˬ deuˬ˗ahˇ Yeˬzaˬleˬlaˇ deh kʼawꞈ˗ahˇ byehˇ dzeh yaꞈ˗awˇ yawˬ ha shiˇ kʼawˇ buˬ ni cehˆ˗euˬ meh. Maˇ diˇ naˇ Siˇseˬlaˇ˗euˬ guiˇ maꞈ gʼaˬ kʼaˆ dui dui˗awˇ laˆ lawˬ jiˇ 900 laˇ jawˇ˗eu meh. Ehˇ kʼawꞈ guiˇ deuˆ˗eu keu ka maˬ kuꞈ˗eu uˬ taꞈ laˆ lawˬ jiˇ maˬ jawˇ˗eu Iˇsaˬleˬlaˆ deuˬ neh bi deuˆ gʼaˬ˗euˬ meh. Aˬ yawꞈ teu˗ahˇ tiˬ pawꞈ˗iˬ maˬ jah coeˇ˗a. Nymˬ˗mˇ naˇ aˬ yawꞈ aˬ gaˇ cehˆ zaꞈ paˬ nga lehˇ tehꞈ˗ehˇ shaˇ noeˬ luꞈ meh. Aˬ yawꞈ Kaˬnaˆ tsawˇ haˬ pyeuꞈ˗eu Heˬbeuˬ˗euˬ sehˬ gʼawˆ˗ahˇ cehˆ gʼeh˗euˬ meh.

Aˬ myah myah naˇ Kaˬnaˆ tsawˇ haˬ deuˬ Iˇsaˬleˬlaˆ deuˬ nehˬ˗ehˇ cawˬ cawˬ˗eu meh. Aˬ yawꞈ maꞈ aˬ geu ngeh neh cawˬ dahˬ beh˗euˬ nga? Moˇseˬ Kaˬnaˆ tsawˇ haˬ˗ahˇ yuˇ˗euˬ gaˇ neh dahˬ beh˗euˬ meh. Nymˬ˗mˇ aˬ yawꞈ maꞈ Iˇsaˬleˬlaˆ miˇ kʼahˬ˗ahˇ jawˇ˗eu meh. Ehˇ kʼawꞈ Heˬbeuˬ naˇ Kaˬnaˆ tsawˇ haˬ nui deuˬ˗ahˇ maˬ duˇ˗a. Aˬ yawꞈ Iˇsaˬleˬlaˆ deuˬ nehˬ˗ehˇ maˬ cawˬ ni Kaˬnaˬ sahˬ paˬ Yaˬbiˬ nehˬ˗ehˇ cawˬ˗euˬ meh. Teu miˇ neh Yaˬbiˬ˗euˬ guiˇ maꞈ˗euˬ aˬ yuiꞈ pyeuꞈ˗eu Siˇseˬlaˇ, Heˬbeuˬ˗euˬ sehˬ gʼawˆ˗ahˇ cehˆ gʼeh naˇ buˬ˗iˇ nya ma lehˇ noeˬ˗eu meh. Ehˇ kʼawꞈ aˬ yawꞈ Heˬbeuˬ˗euˬ miˬ zaˬ Yeˬlaˇ Iˇsaˬleˬlaˆ paw pyawˬ˗eu paˬ lehˇ maˬ noeˬ keuˆ˗aˬ.

Siˇseˬlaˇ oe keuˆ ngeh sehˬ gʼawˆ˗ahˇ Yeˬlaˇ jawˇ˗eu tehꞈ meh. Aˬ yawꞈ˗euˬ kʼaˬ dzeˇ zaˬ maˬ jawˇ˗a. Teu ngeh Yeˬlaˇ aˬ joˆ˗ehˇ jahˇ˗eu lehˇ kawˇ ma˗ehˇ ya noeˬ tsehˆ meh. Aˬ yawꞈ Siˇseˬlaˇ naˇ aˬ suˇ gʼaˬ pyeuꞈ˗awˇ aˇ naˆ ni guˆ laˇ paˬ˗ehˇ gʼeh˗eu lehˇ siˬ nya meh. Aˬ yawꞈ Siˇseˬlaˇ zaˬ miˬ zaˬ tiˬ gʼaˬ˗euˬ laꞈ neh ya shiˇ meh lehˇ Yeˬhawˇbaˬ˗euˬ bawˇlawˇpeh ma Diˬboˇlaˬ neh ehˇ˗euˬ dawˬ˗ahˇ maˬ siˬ nya˗eu paˬ. Ehˇ kʼawꞈ Yeˬhawˇbaˬ aˬ yawꞈ˗ahˇ bi jahˇ mawꞈ˗eu jeˬ˗ahˇ nmˇ siˬ nya gaˇ duˇ˗eu meh. Aˬ jeˬ miˇ neh toˆ˗ehˇ ehˇ nya nga?

Aˇ nah naˇ Yeˬhawˇbaˬ sheuˬ gʼeh˗eu laꞈ kʼoeˇ Siˇseˬlaˇ˗euˬ guiˇ maꞈ˗ahˇ Baˬyehˇ deuˆ gʼaˬ˗euˬ gaˇ kawˆ dawˬ caˇ bi caˇ˗euˬ meh. Aˬ yawꞈ “Zaˬ miˬ zaˬ deuˬ laꞈ kʼoeˇ aˬ cawˬ naˆ maˬ tseˇ guiˬ lahˬ huiˬ˗eu gʼaˬ Kaˬnaˆ tsawˇ haˬ Heˬbeuˬ˗euˬ zaˬ miˬ zaˬ Yeˬlaˇ meh. Sehˬ gʼawˆ˗ahˇ jawˇ˗eu zaˬ miˬ zaˬ deuˬ laꞈ kʼoeˇ aˬ cawˬ naˆ maˬ tseˇ aˬ yawꞈ guiˬ lahˬ huiˬ˗eu meh” lehˇ caˇ˗euˬ meh. Heu gaˇ haw ngeh Yeˬlaˇ˗aˬ, pyehˆ tseˇ˗eu tiˬ gʼaˬ na neh ehˇ˗euˬ loꞈ˗ehˇ mehˇ shuiˇ shuiˇ nya˗eu haiˬ˗eu tsawˇ haˬ maˬ ngeuˇ˗eu lehˇ siˬ laˇ˗eu meh. Maˇ diˇ naˇ aˬ yawꞈ˗aˬ Yeˬhawˇbaˬ˗euˬ guiˇ laꞈ kʼoeˇ kʼaˬ duˬ ni deuˆ˗euˬ gʼaˬ pyeuꞈ meh. Laˬhaˇ loꞈ˗ehˇ duˇ ni Yeˬlaˇ muiˇ˗eu deuˬ paw maˬ ngeuˇ˗eu Yeˬhawˇbaˬ jawˇ paw pyawˬ˗euˬ meh. Nymˬ˗mˇ aˬ yawꞈ Yeˬhawˇbaˬ˗ahˇ muiˇ˗eu gʼaˬ pyeuꞈ˗eu Siˇseˬlaˇ˗ahˇ sehꞈ˗eu aˬ kawˬ˗aˬ jaˆ luꞈ meh. Yeˬlaˇ aˬ joˆ˗ehˇ jahˇ˗euˬ nga?

Yeˬlaˇ Siˇseˬlaˇ naˇ guiˇ deuˆ˗eu nya dui dui˗awˇ gʼaˬ kʼaˆ dui dui˗eu miˇ neh, aˬ yawꞈ tiˬ jeˬ gʼeh neh˗iˬ maˬ behˬ leˇ nya˗a lehˇ siˬ nya˗eu meh. Teu miˇ neh Siˇseˬlaˇ˗ahˇ aˬ yawꞈ˗euˬ sehˬ gʼawˆ˗ahˇ gʼaˬ naˬ naˬ laˇ˗awˬ lehˇ kuˇ˗euˬ meh. Kʼoeˇ naˇ aˇ bui sheu dm nehˬ˗awˇ, iˇ cuꞈ shaˇ dawˇ ngeh mawˇ neˇ aˬ coeˇ bi dawˇ˗euˬ meh. Teu ngeh Siˇseˬlaˇ Yeˬlaˇ˗ahˇ sehˬ gʼawˆ gʼoˆ kʼehˬ˗ahˇ bi loꞈ˗awˇ, tiˬ gʼaˬ˗iˬ maˬ jawˇ˗a lehˇ jaˬ myawꞈ bi myawꞈ˗euˬ meh. Toˆ˗ehˇ ehˇ gʼaˬ naˇ yuꞈ kʼaˆ byoˆ leꞈ˗euˬ meh.

Nymˬ˗mˇ˗aˬ Siˇseˬlaˇ˗ahˇ sehꞈ˗eu muiˬ dui dui˗eu aˇ yamˬ pyeuꞈ ngaˇ. Teu ngeh Yeˬlaˇ aˬ yawꞈ zmˬ dzaw taˬ˗euˬ daˇ kawˬ neh jahˇ˗euˬ gaˇ duˇ˗eu diˬ puˬ hawˇ˗eu sehˬ gʼawˆ taꞈ cmˬ yuˇ˗awˇ, yuꞈ kʼaˆ taˬ˗euˬ Siˇseˬlaˇ jawˇ gaˇ aˬ za za˗ehˇ iˇ˗euˬ meh. Aˬ yawꞈ˗euˬ uˬ duˬ dawˬ peh le˗awˇ sehꞈ˗eu lehˇ lehˬ hmˬ luꞈ˗eu meh. Tiˬ jeˬ paˬ laˆ lehˬ˗awˇ Siˇseˬlaˇ noeˬ laˇ naˇ Yeˬlaˇ ya shiˇ˗eu yaw duˬ baw meh. Ehˇ kʼawꞈ aˬ yawꞈ tiˬ jeˬ˗iˬ maˬ laˆ lehˬ ni Siˇseˬlaˇ˗euˬ uˬ duˬ˗ahˇ taꞈ cmˬ diˬ˗awˇ miˇ tsa diˬ tsoˆ gʼeh˗euˬ meh. Siˇseˬlaˇ Yeˬlaˇ˗euˬ aˬ kuiˇ dawˬ peh shiˇ˗euˬ meh.

Teu ngeh Siˇseˬlaˇ˗ahˇ poˆ luꞈ˗eu Baˬyehˇ oe keuˆ˗euˬ meh. Yeˬlaˇ aˬ yawꞈ˗ahˇ ha˗awˇ “Laˇ˗awˬ. Nawˇ poˆ luꞈ˗eu gʼaˬ˗ahˇ ngaˇ mehˬ nehˬ nyaˇ” lehˇ ehˇ nehˬ˗euˬ meh. Baˬyehˇ sehˬ gʼawˆ˗ahˇ le ahˇ ngeh, “Siˇseˬlaˇ˗ahˇ zaˬ miˬ zaˬ tiˬ gʼaˬ˗euˬ aˬ laꞈ laꞈ kʼoeˇ a nehˬ tehꞈ˗a” lehˇ bawˇlawˇpeh ma Diˬboˇlaˬ neh ehˇ taˬ˗euˬ dawˬ byah laˇ gaˇ ya mawˇ˗euˬ meh.

Gʼaˬ leˇ˗euˬ dawˬ caˇ laꞈ kʼoeˇ Baˬyehˇ hawˇ˗eu Diˬboˇlaˬ Yeˬlaˇ˗ahˇ ja ceuˬ taˬ˗euˬ meh. Teu gaˇ neh naˇ Jaˇliꞈ laꞈ kʼoeˇ Yeˬlaˇ˗euˬ gaˇ kawˆ maˬ paˇ ngehˬ keuˆ taˬ meh. Aˬ yawꞈ dehꞈ yaꞈ˗euˬ gaˇ neh nymˬ˗mˇ keuˆ ni 3,200 kʼoꞈ dzehˬ˗iˇ˗euˬ kʼawꞈ, aˬ dui aˬ yawꞈ˗ahˇ dzaw geuꞈ nya luꞈ˗a siˬ. Nymˬ˗mˇ iˬ nah Miˬyehˇ˗euˬ tsawˇ haˬ deuˬ guiˇ deuˆ˗eu keu ka baꞈ baꞈ˗ehˇ guiˇ maˬ ya deuˆ˗a. Nui jah paw˗euˬ guiˇ law nmˇ ya deuˆ luꞈ˗a siˬ. Nymˬ˗mˇ iˬ nah aˬ dui aˬ myah myah naˆ maˬ tseˇ Yeˬlaˇ loꞈ˗ehˇ kʼaˬ duˬ ni ya gʼeh meh.

Jaˇliꞈ aˇ deuˆ heu deuˬ˗ahˇ gui:

• Yaˇkʼaˬdaˇ˗eu 4:9, 11, 17-22; 5:24-31

Ja sawˇ˗eu gʼaˇ duˬ:

Yeˬlaˇ kʼaˬ duˬ ni gʼeh˗eu lehˇ aˬ joˇ joˆ˗ehˇ mˇ mawˇ˗euˬ nga?

Aˬ joˆ˗ehˇ zmˬ˗iˇ nya nga lehˇ shaˇ noeˬ

• Yawˬ ha˗euˬ kʼaˬ dzeˇ zaˬ Yeˬhawˇbaˬ˗euˬ Saˇ kiˇ maˬ ngeuˇ˗eu mehˇ nmˇ aˬ buˇ deuˬ, Yeˬlaˇ loꞈ˗ehˇ gʼeh˗eu nui kʼaˬ aˬ geu ngeh loˬ nga?

  Dawˬ kʼoꞈ

• Yeˬlaˇ naˇ Diˬboˇlaˬ loꞈ˗ehˇ bawˇlawˇpeh ma maˬ ngeuˇ˗a. Baˬyehˇ loꞈ˗ehˇ yehˇ kʼawꞈ maˬ ngeuˇ˗a. Ehˇ kʼawꞈ aˬ yawꞈ kʼaˇ mˇ nya˗eu jeˬ mˇ˗euˬ meh. Aˬ dui yawˬ ha maˬ mˇ nya˗eu jeˬ jaˆ ngeh, Yeˬlaˇ˗ahˇ aˬ joˆ˗ehˇ dzaw geuꞈ nya nga? (Aˇ baˇ 2)

  Dawˬ kʼoꞈ

  

• Yeˬlaˇ˗euˬ kʼaˬ duˬ ni gʼeh˗eu jeˬ˗ahˇ aˬ joˆ˗ehˇ paˇ dzaw geuꞈ nya nga siˬ?

  Dawˬ kʼoꞈ

Naꞈ suiˇ ni shaˇ noeˬ

• Gaˇ kawˆ heu Yeˬhawˇbaˬ nehˬ˗ehˇ taꞈ leˇ˗awˇ ngaˬ˗ahˇ aˬ jeˬ bi siˬ laꞈ nga?

  Dawˬ kʼoꞈ

• Gaˇ kawˆ heu miˇ shuiꞈ˗ahˇ Yeˬhawˇbaˬ neh saˇ jaˇ dzaˬ taˬ˗euˬ jeˬ nehˬ˗ehˇ aˬ joˆ˗ehˇ taꞈ nga?

  Dawˬ kʼoꞈ

• Yeˬlaˇ gʼoꞈ dehꞈ laˇ ngeh ngaˇ aˬ jeˬ naˇ haˬ paˬ nga?

  Dawˬ kʼoꞈ

Haw lahˬ

Yeˬlaˇ˗euˬ gaˇ kawˆ mehˇ nmˇ aˬ buˇ tiˬ gʼaˬ˗ahˇ tsaꞈ gaˬ peuˬ ni aˬ joˆ˗ehˇ caw ba nehˬ˗euˬ nga lehˇ haw.

Tsawˇ guˆ deuˬ˗ahˇ maˬ ngeuˇ kʼaˬ duˬ ni gʼeh˗eu deuˬ˗ahˇ dzaw geuꞈ—Meˬlawˆ meuˬ˗ahˇ jawˇ˗eu deuˬ˗ahˇ maˬ ngeuˇ˗eu Yeˬlaˇ˗ahˇ dzaw geuꞈ (1:40)

Yeˬlaˇ˗ahˇ neh tehꞈ˗ehˇ maˬ ngeuˇ˗eu aˬ dui zaˬ miˬ aˬ buˇ nui deuˬ˗ahˇ neh jiˇ gʼawˬ mya jeˬ dzaw geuꞈ nya meh. Aˬ yawꞈ maꞈ laꞈ kʼoeˇ˗euˬ tiˬ gʼaˬ na˗euˬ gaˇ kawˆ˗ahˇ gui haw.

“Jaˇliꞈ laꞈ kʼoeˇ˗euˬ zaˬ miˬ aˬ buˇ deuˬ˗ahˇ neh aˬ jeˬ dzaw geuꞈ nya nga?” (ijwbq˗SI gaˇ kawˆ 161)