Иегованыҥ чындык нормаларын бӱдӱрип јӱр

Иегова Кудай улуска јакшыныҥ ла јаманныҥ нормаларын тургузып салган. Темдектезе, биле — ол эр ле ӱй кижи ортодо тургузылган јӧптӧжӱ деп, јарт айдып салган (Мф 19:4—6, 9). Кудай балыр јӱрӱмниҥ кандый да бӱдӱмин јаратпай јат (1Кр 6:9, 10). Ого ӱзеери, кийим ле тыш бӱдӱм јанынаҥ принциптер берет. Кудайдыҥ албатызы бу принциптерле башкарынып, телекейдиҥ улузынаҥ аҥыланып јат (Јҥ.т 22:5; 1Тм 2:9, 10).

Бӱгӱнги кӱнде кӧп улус Иегованыҥ нормаларын јектеп јат (Рм 1:18—32). Олордыҥ кийинижи, тыш бӱдӱми, кылык-јаҥы бу телекейдиҥ кӧрӱми аайынча болот. Андый улус бойыныҥ јаман кылык-јаҥыла оморкоп, Кудайдыҥ нормаларыла јӱрӱп тургандарды электеп јадылар (1Пт 4:3, 4).

Бис Иегованыҥ Керечилери болгон адыста, улустаҥ јалтанбай, Кудайдыҥ чындык нормаларыла јӱрер учурлу (Рм 12:9). Темдектезе, Кудай нени јарадып, нени јаратпай турганын улуска чике, је черчеҥ јартап бередис. Анайда ок, Кудайдыҥ чындык нормаларыла јӱрӱп турганыс кийингенистеҥ ле тыш бӱдӱмистеҥ кӧрӱнет. Оныҥ учун бойыҥга мындый сурактар бер: «Мениҥ талдаганым Иегованыҥ нормазын ба, эмезе бу телекейдиҥ нормазын кӧргӱзет пе? Мениҥ кийимимнеҥ ле тыш бӱдӱмимнеҥ Кудайды сӱӱндирерге турганым кӧрӱнет пе?» Соот-јыргалдар талдап тура, мындый сурактарды шӱӱп кӧрӧргӧ јараар: Иеговага бу кино эмезе бу телеберилте јараар ба? Олор кандый нормаларга ӱредет? Андый соот-јыргалдар ак-чек артарга бек шӱӱп алганымга каршузын јетирер бе? (Ср 101:3). Мениҥ талдаганым јуук улузымга ла ӧскӧ улуска бӱдӱрилетен таш болуп калбас па? (1Кр 10:31—33).

Иегованыҥ чындык нормаларын нениҥ учун бӱдӱрер керек? Нениҥ учун дезе Иисус Христос јердиҥ ӱстинде јаман кылынып турган улусты удабас јоголтып салар (Иез 9:4—7). Јердиҥ ӱстинде јӱк ле Иегованыҥ табын бӱдӱрип тургандар артар (1Ин 2:15—17). Оныҥ учун улус бистиҥ керектеристи кӧрӱп, Кудайды мактазын деп, Оныҥ чындык нормаларын јаантайын бӱдӱрип јӱректер! (1Пт 2:11, 12).

«ИЕГОВА КУДАЙДЫҤ НАЈЫЗЫ БОЛ. БИР ЭР КИЖИ, БИР ӰЙ КИЖИ» ДЕГЕН МУЛЬТФИЛЬМДИ КӦРӰП, МЫНДЫЙ СУРАКТАРГА КАРУУ БЕР:

• Иегованыҥ нормаларыла јӱрерин нениҥ учун ойгор деп айдарга јараар?

• Ада-энелер балдарына Иегованыҥ нормаларын канча ла кире эрте куучындап баштаза, нениҥ учун јакшы болор?

• Улуска ӱргӱлји ле ырысту јӱрӱмди аларга, јааныс та, јажыс та канайып болужар аргалу?