Сеге Кудай керегинде билип алар керек

Кудайдыҥ најызы болорго, сеге ол керегинде билип алар керек. Најыларыҥ сениҥ адыҥды билер бе, оноҥ сени адыҥла адагылайт па? Ондый эмей. Кудай сени оныҥ адын билип, оны адыла адап турзын деп база кӱӱнзейт. Кудайдыҥ ады — Иегова (Чыгыш 15:3; Матфей 6:9). Онойдо ок, ого не јарап турган ла не јарабай турганын сен билип алар учурлу. Кем оныҥ најылары, кем — ӧштӱлери, сеге база билип алар керек. Кемди-кемди билерге ӧй керек. Иеговала таныжарга бис ӧй келиштирип турган болзос јакшы болор эди деп, Агару Бичикте айдылат (Ефестегилерге 5:15, 16).

Кудайдыҥ најылары ого јарап турган керектерди эткилейт. Бойыҥныҥ најыларыҥ керегинде сананып кӧр. Олорго јарабай турган јаман немелер эдип турзас, олор бистиҥ најыларыс болуп артар ба? Јок эмей база! Сен Кудайдыҥ најызы болорго кӱӱнзеп турган болзоҥ, сеге ого јарап турган керектер эдер керек (Иоанн 4:24).

Бастыра кудайлык јаҥдар Кудайла најылажарына экелбейт. Кудайдыҥ эҥ ле јуук најызы — Иисус, эки јол керегинде айткан. Бир јол — јалбак, ондо дезе кӧп улус. Бу јол ӧлӱмге апарат. Ӧскӧ јол — чичке, мыныла јӱк ле кезиги барып јат. Бу јол ӱргӱлјик јӱрӱмге апарат. Бу дегежин сен Кудайла најылажарга турган болзоҥ, ого канайып чын бажырарын сеге кыйалта јогынаҥ билип аларга керектӱ болгонын темдектейт (Матфей 7:13, 14).