Болушчы ишчилер кандый иш бӱдӱрип јат?

Агару Бичикте христиан јуунды кичееп кӧрӱп турган эки бӧлӱк эр улус керегинде айдылат, олор «кӧрӧӧчилер ле болушчы ишчилер» (Филиппыдагыларга 1:1, ЈТ). Мындый акалар кажы ла јуунда бар. Болушчы ишчилер кандый иш бӱдӱрет?

Олор аксагалдардыҥ јӧбине болужат. Болушчы ишчилер — ич-кӧгӱс кӧрӱмдӱ, бӱдӱмјилӱ ле ижин ак-чек бӱдӱрер эр улус. Олор јуунныҥ керектериле колбулу јаан учурлу иштерди кичеенип бӱдӱргилейт. Олордыҥ болужынаҥ улам аксагалдарга јуунды ӱредерине ле кӱдӱчиниҥ ижин чыҥдый бӱдӱрерине јеҥил болот.

Олор јуунныҥ керектерине болужат. Кезик болушчы ишчилер башкараачылардыҥ ижин бӱдӱрет, олор јуунга келген ончо улусты уткып јат. Ӧскӧлӧри аппаратура, бичиктер берери, јуунныҥ акча-манадын чотооры ла јарлаар иштиҥ участокторын ӱлештирери учун каруулу болот. Анайда ок олор Каандыктыҥ Туразын чебер тударында ла арутаарында болужат. Аксагалдар олорды јуунныҥ јажы јаанай бергендерге болужып ийзин деп сураар аргалу. Болушчы ишчилер кандый да молјулар бӱдӱрӱп турган болзо, олордыҥ белен болгонына бис тоомјылу баштанар учурлу (1 Тимофейге 3:13).

Олор јакшы тем кӧргӱзет. Болушчы ишчилер болорго ич-кӧгӱзи тереҥ акалар кӧстӧлип јат. Туштажулардыҥ программазына туружып, олор јаантайын бистиҥ бӱдеристи тыҥыдарга албадангылайт. Јарлаар иште башкару алып олордыҥ јӱткӱп иштегенин кӧрӱп, бистиҥ база анайып ла иштеер кӱӱнис келет. Аксагалдардыҥ јӧбиле кожо јӧмӧжип иштеерге олордыҥ белен болгоны јуунныҥ бирлигин ле сӱӱнчизин тыҥыдып јат (Ефестегилерге 4:16). Соондо олорды аксагал болуп иштеерине кӧстӧӧр болор.

• Болушчы ишчилер олор кемдер?

• Болушчы ишчилер јуунныҥ эптӱ-јӧптӱ ижине канайып јӧмӧжӧт?