Тимофе́й улуска болужарга јӱткӱген

Тимофей улуска сӱӱнип болужатан јиит кижи болгон. Мындый амадулу болуп, ол кӧп јорыктаган, оныҥ јӱрӱми сӱреен јилбилӱ болды. Ол керегинде сен билерге кӱӱнзейдиҥ бе?~

Тимофей Ли́стра деген калада чыдаган. Бала тужында ого Лои́да јааназы ла Евни́ка энези Иегова керегинде ого куучындап туратан. Качан Тимофей чыдап јаанай берерде, ол улуска Иегова керегинде билзин деп, болужарга кӱӱнзеген.

Тимофей јиит уул болордо, элчи Павел оны бойыла кожо ыраак ороондорго сӱӱнчилӱ јарды јарлаарга кычырды. Тимофей ол ло тушта: «Мен јӧп!» — деп, айтты. Ол улуска болужарга белен болгон.

Тимофей Павелле кожо Фессало́ника деген калага јорукка атанган. Ол калага једерге олор озо баштап јойу барган, оноҥ керепле јӱзӱп барган. Фессалоникада, Павел ле Тимофей кӧп улуска Иегова керегинде билип аларга болушты. Је мында кезик улуска бу чек јарабады. Павелге ле оныла кожо јӱргендерге олор табару эдерге сананган. Оныҥ учун олорго бу каланы артыргызып, ӧскӧ јерлерде јарлаарга келишкен.

Тоолу ай ӧткӧн кийнинде, Павел Тимофейди ойто кайра Фессалоникага барып, ондогы акаларды тыҥыдып кӧкӱтсин деп сурады. Бу калага кайра барарга, јалтанбас болоры сӱреен тыҥ керек болгон! Је Тимофей бир де коркыбаган. Ондогы ака-эјелер учун санааркап, Фессалоникага кайра барды. Оныҥ албаданганы калас болбоды. Ол элчи Павелге Фессалоникадагы акалардыҥ бӱдӱп турганы бек деп, сӱӱнчилӱ јетирӱ экелди!

Тимофей Павелле кожо кӧп јылдардыҥ туркунына иштеген. Бир ӧйдӧ Тимофей, ӧскӧлӧрине кӧрӧ, јуундарды эҥ артык кичееген деп, Павел бичиген. Нениҥ учун дезе ол Иегованы ла улусты тыҥ сӱӱген.

Сен улусты сӱӱйдиҥ бе, олорго Иегова керегинде куучындаарга кӱӱнзейдиҥ бе?~ Эйе болзо, Тимофейдиҥ јӱрӱми чылап сениҥ де јӱрӱмиҥ ырысту ла јилбилӱ болор!