Кӧстӧлгӧн акалар, Тимофейдиҥ теминеҥ ӱренигер!
ӦТКӦН јылда бастыра јердиҥ ӱстинде муҥдар тоолу акалар болушчы ишчилер ле аксагалдар болуп кӧстӧлгӧн. Слер андый улустыҥ тоозында болзоор, слерге јуунныҥ ижин бӱдӱрерге јарап турган болор.
Је слер бу молјугарды бӱдӱрип тура, эмеш ӧкпӧрип турган болорыгар. Джейсон деп бир јиит аксагал мындый сӧстӧр айткан: «Мени аксагал эдип кӧстӧп саларда: „Бу молјуларды канайып бӱдӱргейим не?!“ — деп санангам». Моисей ле Иеремия Иегованыҥ јакылталарын база бӱдӱрип болбозыс деп сананган (Чыг. 4:10; Иер. 1:6). Андый сезимдер слерде де бар болзо, мындый молјуларды бӱдӱретен ченемелди кайдаҥ алар? Тимофейдиҥ темин кӧрӱп ийектер (Ап. ижи 16:1—3).
ТИМОФЕЙДЕҤ ӰРЕНИГЕР
Павел Тимофейди јорыкчы кӧрӧӧчиниҥ ижине кожо алып аларда, ого 20 јаш болгон болор. Тимофей јиит болгонынаҥ улам улусты ӱредип, олорго јӧп берип турарга коркыган болордоҥ айабас (1 Тим. 4:11, 12; 2 Тим. 1:1, 2, 7). Је он јыл кире ӧдӧ берерде, Павел Филиппыдагы јуунга мынайып бичиген: «Иисус Кайраканныҥ табы болзо, слерге удабас Тимофейди ийерим деп, иженип турум... Менде [Тимофейдий ошкош кӧрӱмдӱ кижи јок, ЈТ]» (Флп. 2:19, 20).
Тимофейге јакшы аксагал болорго не болушкан ла оноҥ кандый тем аларга јараар?
1. Улуска акту кӱӱнинеҥ болушкан. Павел Филиппыдагы акаларга, Тимофейди улуска болужар кӱӱндӱ деп бичиген (Флп. 2:20). Эйе, Тимофей улуска јаантайын болужар болгон ло улуска кӧгӱс јанынаҥ болужарга ийде-кӱчин бир де кысканбайтан.
Слерге, графиктеҥ артпаска болуп, улусты автобуска отургыспазынаҥ јӱре берип турган тискинчидий болбос керек. Аксагал болгоны 20 јылдаҥ ажа берген Уильям ака јаҥы кӧстӧлгӧн акаларга мындый јӧп берет: «Улусты сӱӱгер. Јаҥыс ла бойыгардыҥ молјугарды эмес, је ака-эјелерди сананыгар».
2. Кӧгӱс керектерди баштапкы јерге тургускан. Павел Тимофейдеҥ ӧскӧ акалар керегинде: «Иисус Христостыйын эмес, бойындыйын бедиреп јадылар» — деп бичиген (Флп. 2:21). Бу самараны Павел Римде болордо бичиген. Павелдиҥ айтканыла, Римдеги акалар бойыныҥ керектерине ӧйинеҥ ӧткӱре јаан ајару эдип, кезикте кӧгӱс керектерди экинчи јерге тургузар болгон. Је Тимофей андый болбогон! Ол агару иште кӧптӧдӧ туружатан арга боло берзе, Исаия чылап: «Мен белен! Мени ий!» — деп айдатан (Иса. 6:8).
Је бойыстыҥ керектеристи ле јуунныҥ керектерин теҥ-тай апарарга, нени эдер керек? Баштапкызында, эҥ ле учурлу немени ундыбагар. Павел «эҥ артыгын талдап» турыгар деп ӱреткен (Флп. 1:10). Кудайдыҥ табын баштапкы јерге тургузыгар. Экинчизинде, јӱрӱмигерди уурлатпагар. Слердиҥ ӧйигерди ле ийде-кӱчигерди айрып турган не-немедеҥ айрылыгар. Павел Тимофейге: «Јиит тужыҥныҥ кычазынаҥ кыйыш... актуга, бӱдӱп јӱрерине, сӱӱшке, энчӱге јӱтки» — деп, јӧп берген (2 Тим. 2:22).
3. Агару ишке эрчимдӱ турушкан. Павел Филиппыдагы акаларга эзедип айткан: «Ол [Тимофей] дезе Сӱӱнчилӱ Јарга иштеп, уулы адазына болушканы чылап, меге болужып, чындык болгонын кӧргӱскен деп билеригер» (Флп. 2:22). Тимофей качан да јалкуурбаган. Павел ле Тимофейдиҥ ӧмӧ-јӧмӧ эрчимдӱ иштенгени олордыҥ колбуларын тыҥыткан.
Бӱгӱнги кӱнде Иегованыҥ организациязында иш бастырагыска једер. Бу иш биске јаан сӱӱнчи экелер ле ака-эјелерле колбуларысты тыҥыдар. Оныҥ учун слер де Кудайга јаантайын кӧптӧдӧ иштеер амадулу болугар (1 Кор. 15:58).
4. Билип алганын тузаланган. Павел Тимофейге бичиген: «Сен дезе ӱредӱде, јӱрӱмде, амадуда, бӱдӱп јӱреринде, чыдуда, сӱӱште, турумкайда мениле кожо баргаҥ» (2 Тим. 3:10). Эйе, Тимофей билип алганын тузаланып туратан. Анайып, ол оноҥ до ӧскӧ молјулар аларга белен болгон (1 Кор. 4:17).
Слерде ченемелдӱ најы бар ба? Јок болзо, андый акала најылажып алыгар. Ченемелдӱ Том деп бир аксагал мынайып куучындаган: «Меге ченемелдӱ бир аксагал болушкан. Ол мени кӧп немеге ӱреткен. Мен оныла јаантайын јӧптӧжип, оныҥ јӧби аайынча эдер болгом. Анайып, молјуумды коркыбай бӱдӱрерге тӱрген ӱренип алгам».
5. Јаантайын тазыктырынган. Павел Тимофейге: «Бойыҥды Кудайга беринеринде тазыктыр» — деп айткан (1 Тим. 4:7). Спортчыны тренер тазыктырып јат, је ого бойына база тазыктырынар керек. Оныҥ учун Павел Тимофейге: «Агару Бичикти кычыр, бӱдӱмјиле, ӱрет. [...] Једимиҥди ончо улус кӧрзин деп, мыны ончозын кичее, ого бастыра бойыҥды бер» — деп айткан (1 Тим. 4:13—15).
Слерге база јаантайын тазыктырынар керек, кӧгӱс јанынаҥ ӧзӧр керек, анайда ок организацияныҥ калганчы солунталарын билип турар керек ле бойыгарга иженбес керек. Темдектезе, бойыгарды ченемелдӱ деп сананып, јаан шиҥжӱ јогынаҥ кандый ла сурактыҥ аайына чыгып ийеригер деп сананбагар. Анайып биске: «Бойыҥа ла ӱредӱге ајарыҥкай бол, мында турумкай бол» — деп сӧстӧрди, Тимофей чилеп, бӱдӱрер керек (1 Тим. 4:16).
6. Иегованыҥ тынына иженген. Павел Тимофейдиҥ ижи керегинде мынайып бичиген: «Сеге ижемјилеген јакшыны бойыбыста јӱрген Агару Тынла чеберле» (2 Тим. 1:14). Тимофейге ижин оноҥ ло ары бӱдӱрерге, Кудайдыҥ тынына иженер керек болгон.
Канча јылдарга аксагал болуп турган Дональд мынайып айдат: «Кӧстӧлгӧн эр улус Кудайла колбуларын баалап турза, ийде-кӱчтӱ болор. Кудайдаҥ агару тын сурап, бу тынныҥ тӱжӱмине кирип турган кылык-јаҥга ӱренип турза, олор акаларга јаан алкыш болор» (Сар. 84:7; 1 Петр 4:11).
БОЙЫГАРДЫҤ МОЛЈУЛАРААРДЫ БААЛАГАР
Јуунда молјулар алып, ижин јакшы бӱдӱрип турган акаларды кӧрӱп, сӱӱнип јадыс. Ӧрӧги айдылган Джейсон мынайып айдат: «Аксагалдыҥ ижин бӱдӱрип тура, мен кӧп немеге ӱренип алгам, анайда ок коркыбай баргам. Эмди, аксагал болуп тура, јаан сӱӱнчи аладым. Меге бу молју сӱреен јаан кӱндӱ болот».
Слер аксагал эмезе болушчы ишчи болуп тура, ченемелдӱ болорго албаданадаар ба? Тимофейдеҥ тем алып турзагар, Кудайдыҥ албатызына јаан алкыш болорыгар.