Кудайдыҥ јӧптӧрин тузаланзагар, билегер ырысту болор

Баштапкы билени Иеговаa Кудай јайаган. Агару Бичикте Кудай баштапкы ӱй кижини јайап, «оны кижиге экелген» деп айдылат. Адам сӱрекей тыҥ сӱӱнип: «Бу эмди сӧӧгимнеҥ бӱткен сӧӧк, эдимнеҥ бӱткен эт» — деп айткан (Башталганы 2:22, 23). Иегова билелӱ улусты бӱгӱнги де кӱнде ырысту болзын деп кӱӱнзейт.

Биле тӧзӧп јаткан улус, олордыҥ јурты сӱреен јакшы болор деп иженет. Је эш-нӧкӧрлӧр бой-бойын чыннаҥ да сӱӱп турган болзо, олордо тӱҥей ле уур-кӱчтер болор (1 Коринфтегилерге 7:28). Бу брошюрада билеге ырысту болорго болужатан библиялык принциптер бар (Сарын 19:8—11).

1 ИЕГОВАНАҤ БЕРИЛГЕН МОЛЈУНЫ БӰДӰРИГЕР

АГАРУ БИЧИК НЕНИ АЙДАТ. Билениҥ бажы — ӧбӧӧни болот (Ефестегилерге 5:23).

Иегова ӧбӧӧни ӱйин кичееп јӱрзин деп кӱӱнзейт (Петрдыҥ 1-кы самаразы 3:7). Кудай ӱй кижини ӧбӧӧниниҥ болушчызы эдип јайаган ла ӧбӧӧни ӱйин сӱӱп ле баалап турзын деп кӱӱнзейт (Башталганы 2:18). Ӧбӧӧни ӱйин чыннаҥ сӱӱп турган болзо, оныҥ керексиништерин бойындыйынаҥ бийик тургузар (Ефестегилерге 5:25—29).

Иегова ӱйи ӧбӧӧнин тооп, ого билени кичеерге болужып турзын деп кӱӱнзейт (1 Коринфтегилерге 11:3; Ефестегилерге 5:33). Ӱйи ӧбӧӧниниҥ чыгарган јӧптӧрине јӧмӧжип, оныҥ чындык болушчызы болор учурлу (Колоссыдагыларга 3:18). Анайып ол ӧбӧӧниниҥ де, Иегованыҥ да кӧзинде кееркемјилӱ болор (Петрдыҥ 1-кы самаразы 3:1—6).

ТУЗАЛУ ЈӦПТӦР

• Бойыгардыҥ эш-нӧкӧригердеҥ: «Меге неде солынар керек?» — деп сурап угугар. Каруузын лаптап угуп, оныҥ кӧрӱмин ајаруга аларга албаданыгар

• Чыдамкай болугар. Нениҥ учун дезе билениҥ ырызына јӧмӧжӧрине ӱренип аларга, кӧп ӧй керек

2 ЭШ-НӦКӦРИГЕРДИҤ СЕЗИМДЕРИН АЈАРУГА АЛЫГАР

АГАРУ БИЧИК НЕНИ АЙДАТ. Эш-нӧкӧригердиҥ керексиништерин сананыгар (Филиппыдагыларга 2:3, 4). Эш-нӧкӧригер бойын керектӱ деп сезип турзын. Иегованыҥ ишчизи «ончо улуска кӱӱнзек [јымжак, ЈТ] болор» учурлу деп ундыбагар (2 Тимофейге 2:24). «Кем де, сананбай айткан сӧстӧриле, кылыш чылап шыркалап јат, је ойгор кижиниҥ айткан сӧстӧри эмдеп јат» (Укаа сӧстӧр 12:18). Оныҥ учун нени айдарын озодоҥ сананар керек. Кудайдыҥ агару тыны сӧстӧрди акту јӱректеҥ јымжак айдарга болужар (Галаттарга 5:22, 23; Колоссыдагыларга 4:6).

ТУЗАЛУ ЈӦПТӦР

• Эш-нӧкӧригерле курч сурактарды шӱӱжердеҥ озо, јобош болорго ло оныҥ кӱӱн-санаазын ајаруга аларга мӱргӱп алыгар

• Кандый сӧстӧр айдарын ла канайып айдарын јакшы шӱӱп алыгар

3 САНААГАР ЈАҤЫС БОЛЗЫН

АГАРУ БИЧИК НЕНИ АЙДАТ. Биле тӧзӧгӧн кийнинде слер эш-нӧкӧригерле «јаҥыс эт-кан» болуп јадыгар (Матфей 19:5). Је слердиҥ кӧрӱм-санаагар башка болордоҥ айабас, не дезе слер чек эки башка кижи болодыгар. Оныҥ учун санаагар јаҥыс болзын деп, ӱренер керек (Филиппыдагыларга 2:2). Санаагар јаҥыс болзо, кандый бир шӱӱлтеге келерге јеҥил болор. Агару Бичикте мынайып айдылат: «Јӧптӧжип тургузылган план једимдӱ болот» (Укаа сӧстӧр 20:18). Јаан учурлу сурактардыҥ аайына чыгарга, библиялык принциптерле башкарынып туругар (Укаа сӧстӧр 8:32, 33).

ТУЗАЛУ ЈӦПТӦР

• Эш-нӧкӧригерге јӱк ле кӧргӧн-укканаарды эмезе кӧрӱмигерди эмес, је сезимдеригерди де куучындап туругар

• Нени-нени эдердеҥ озо эш-нӧкӧрӧӧрлӧ јӧптӧжип туругар