2-ЧИ БӦЛӰК
Бой-бойыгарга чындык болугар
«Кудайдыҥ бириктиргенин кижи айрыбазын» (Марк 10:9).
Иегова бисти чындык болгонысла аҥыланып турзын деп кӱӱнзейт (Сарын 18:25). Бу кылык-јаҥ сӱреен керектӱ, не дезе эш-нӧкӧрлӧрдиҥ ортозында чындык јок болзо, олор бой-бойына бӱтпей барат. Је бӱдӱмји јок болгондо, сӱӱш сооп калат.
Бӱгӱнги кӱнде кезик эш-нӧкӧрлӧр бой-бойына чындык болор учурлу деп сананбай јат. Билени кичееп аларга, тузалу бу эки јӧпти бӱдӱрер керек.
1 БИЛЕНИ БААЛАП ТУРУГАР
АГАРУ БИЧИК НЕНИ АЙДАТ. Агару Бичик «эҥ артыгын» талдагар деп кычырат (Филиппыдагыларга 1:10). Биле бистиҥ јӱрӱмисте сӱреен јаан учурлу. Оныҥ учун оны баштапкы јерге тургузар керек.
Иегова эш-нӧкӧрлӧрди эптӱ-јӧптӱ јадып, јӱрӱмге кожо сӱӱнзин деп кӱӱнзейт (Јарлыкчы 9:9). Иегова эмеен-ӧбӧӧнгӧ бой-бойына ајару эдип турзын ла экӱ бойын сӱӱндиретен аргалар бедиреп турзын деп јакарат (1 Коринфтегилерге 10:24). Эжеер слердиҥ сӱӱжигерди ле оны баалап турганаарды кӧрӱп турзын деп, ончо аргаларды тузаланыгар.
ТУЗАЛУ ЈӦПТӦР
Эш-нӧкӧригер бойын кереги јок деп сананбазын деп, ӱзе керектереерди туура јылдырып, кожо болорго, ӧй таап туругар
«Мен» деп айдардыҥ ордына «бис» деп айдарга ӱренигер
2 БОЙЫГАРДЫҤ ЈӰРЕГЕЕРДИ ЧЕБЕРЛЕГЕР
АГАРУ БИЧИК НЕНИ АЙДАТ. «Ӱй кижиге кӱӱнзеп кӧргӧни, оныла кожо јӱрегинде кинчек эткени ол» (Матфей 5:28). Балыр санаалар сананып турган кижини бойыныҥ эш-нӧкӧрине чындык эмезин кӧргӱзет деп айдарга јараар.
Иегова: «Јӱрегиҥди чеберле» — деп кычырат (Укаа сӧстӧр 4:23; Иеремия 17:9). Јӱректи чеберлеерге, нени кӧрӱп турганыгарды ајаруга алып туругар (Матфей 5:29, 30). Бу јанынаҥ јакшы темди патриарх Иов кӧргӱскен. Ол бойыныҥ ӱйинеҥ ӧскӧ кандый бир ӱй кижиге качан да кӱӱнзеп кӧрбӧй турарга, бойыныҥ кӧстӧриле јӧптӧжӱ тургускан (Иов 31:1). Порнографияны качан да кӧрбӧскӧ бек сананып алыгар. Эш-нӧкӧрӧӧрдӧҥ ӧскӧ туура кижини јарадып баштаарынаҥ чеберленигер.
ТУЗАЛУ ЈӦПТӦР
Бойыгардыҥ эш-нӧкӧрӧӧргӧ бӱткӱлинче чындык болгоныгарды улус кӧрӱп турзын
Эш-нӧкӧригердиҥ сезимдерин ундыбай туругар. Ого, слердиҥ ӧскӧ кижиле канайып куучындажып турганыгар јарабай турган болзо, андый куучынды тургуза ла токтодып салыгар