Агару Бичикти шиҥдегенис јилбилӱ ле једимдӱ болзын деп, нени эдер керек?

Иисус Навин Јасакты кычырып јат; Иерихонныҥ стенелери бузыла берерде, Раавтыҥ туразы бузылбаган; Иисус Навин колдорын теҥериге кӧдӱрип мӱргӱйт

ИИСУС НАВИНГЕ јеҥил эмес јакару берилген. Ого израильтяндарды Кудайдыҥ Берер болгон јерине кийдирер керек болгон. Је Иегова Иисусты јакаруны бӱдӱрип ийеринде бӱдӱмјилеп, јалтанбас ла турумкай болзын деген. Анайда ок Иисуска Јасакта бичилгенин чике бӱдӱрерге, оны тӱни-тӱжи кычырар керек болгон. Анайып, ол једимдӱ ле ойгор болор эди (Иис. Н. 1:7, 8).

Бис коркышту «уур-кӱч ӧйлӧрдӧ» јададыс, оныҥ учун бисте де јаан кӱчтер болуп јат (2 Тим. 3:1). Је олорды ӧдӱп чыгарга, биске Иегованаҥ Иисус Навинге берилген јакаруны — Агару Бичикти јаантайын кычырарын ла оныҥ јӧптӧрин тузаланарын — бӱдӱрер керек. Ол тушта бистиҥ тӱп-шӱӱлтелерис чын болор.

Агару Бичикти шиҥдеери кезик јарчыларга јилбилӱ эмес ле кӱч деп билдирип јат. Је андый да болзо, бу јаан учурлу јакылта. Агару Бичикти шиҥдегенис јилбилӱ ле једимдӱ болзын деп, «Тузалу јӧптӧр» деген рамканы тузаланыгар.

Сарнаачы: «Мени јакылталарыҥныҥ јолыла апар, нениҥ учун дезе оноҥ сӱӱнчи аладым» — деп бичиген (Сар. 119:35). Слер де Агару Бичикти шиҥдегенинеҥ ле шӱӱп сананганынаҥ јаан сӱӱнчи алып, кӧгӱс эрјинелер таап аларыгар.

Бӱгӱнги кӱнде слер, Иисус Навин чилеп, Кудайдыҥ албатызын апарбай да турган болзогор, слерде бойыгардыҥ кӱчтереер бар. Оныҥ учун Иисус Навиннеҥ тем алып, Агару Бичикти шиҥдегер ле билип алганаарды тузаланыгар. Ол тушта слер де једимдӱ болорыгар.

ТУЗАЛУ ЈӦПТӦР

Мӱргӱп алыгар. Агару Бичикте Кӱчтӱдеҥ Кӱчтӱ Кудайдыҥ санаалары бичилип калган. Олор биске тузазын јетирер аргалу. Оныҥ учун Агару Бичикти шиҥдеп тура, кычырганаарды оҥдоорго, ундыбаска ла тузаланарга Иегованаҥ болуш сурагар (Езд. 7:10).
Бойыгарга сурактар беригер. Агару Бичикти ле ого тӧзӧлгӧн бичиктерди кычырып, бойыгардаҥ сурагар: «Мынаҥ Иегова керегинде нени билип алдым? Кычырганым Агару Бичиктиҥ тӧс темазыла канайып колболып јат? Улуска болужарга, бу шӱӱлтелерди канайып тузаланарга јараар?»
Шӱӱп сананыгар. Кычырып јадала, токтой тӱжӱп, мындый сурактарды шӱӱп сананыгар: «Бу ӱзӱкти кычырала, меге кандый сезимдер келди? Мындый сезимдер нениҥ учун келди? Мындый сезимдер јӱрӱмимде алдында болгоныла, эмдиги болуп турганыла эмезе келер ӧйдӧ болотоныла канайып колболып јат? Бу библиялык принциптерди ле јӧптӧрди канайып тузаланар?» (Иов 23:5; Сар. 49:3). Анайда ок Иегова бойыныҥ албатызын кандый бир керектерди нениҥ учун этпезин дегенин ле албаты оныҥ сӧзин укпаза, не болор дегенин оҥдоп аларга албаданыгар (Јаҥ. т. 32:28, 29).
Кычырганаар санаагаарда јуралып турзын. Темдектезе, Иосифти акалары измаильтяндарга садып јатканын санаагарда јурап кӧрӱгер (Баш. 37:18—28). Бойыгарды ол улустыҥ ортозында деп, сананып ийигер. Слер нени кӧрӧдигер? Нени угадыгар? Слерге кандый јыттар јытанат? Бойоорды бу улустыҥ ордына тургузып кӧрӱгер. Олор нени сананат? Олорго кандый сезимдер келет? Мынайып, Агару Бичикти шиҥдеери јилбилӱ ле тузалу болор.
Шиҥдейтен материалдарды тузаланыгар. Мындый материалдар Агару Бичикти шиҥдеерин оноҥ јилбилӱ эдет. Андый материалдардыҥ слердиҥ тилге кепке базылганы эмезе электронный бӱдӱми бар ба деп билип алала, олорло тузаланарга ӱренип алыгар. Болуш сураарга уйалбагар. Темдектезе, «Индекс публикаций Сторожевой Башни» ле «Путеводитель по публикациям Свидетелей Иеговы» деген бичиктер кандый ла темага башка-башка јетирӱлерди эмезе библиялык ӱлгерлердиҥ јартамалын таап аларга болужар. Анайда ок «Слово Бога в картах и схемах» деген брошюрала тузаланыгар. Бу брошюрада карталар, хронологиялар, не-немени канайып кемјигени ле бескелегени керегинде ле оноҥ до ӧскӧ тузалу кӧп јетирӱлер бар.
Тӧс шӱӱлтелерди эске алыгар. Эске алары кычырганысты ундыбаска болужар. Је кычырганысты кемге-кемге куучындап берзеес, оноҥ јакшы болор. Эмезе кажы бир шӱӱлте јарлаар иште керектӱ болуп калардаҥ айабас. Анайып, слер де кычырганаарды ундыбазыгар, улус та слердиҥ шиҥдегенеердеҥ туза алар.