Кудайга ла јуугындагы кижиге сӱӱшти канайып тыҥыдар?

Христиандар Моисейдиҥ јасагыла јӱрбей де турган болзо, Кудайды ла јуугындагы кижини сӱӱри деген эҥ јаан эки јакылта Иегова бистеҥ нени сакып турганын оҥдоорго болужат (Мф 22:37—39). Мындый сӱӱш бойы табылбай јат. Оны ӧскӱрер керек. Канайып? Эҥ керектӱ аргалардыҥ бирӱзи — кӱнӱҥ сайын Агару Бичикти кычырары. Агару Бичиктеҥ Кудайдыҥ башка-башка јандарын билип алып турзаас, «Иегованыҥ јалакайын кӧрӱп» баштайдыс (Ср 27:4). Бистиҥ ого сӱӱжис тыҥыйт, санаагыс оныҥ санаазына там ла тӱҥей болуп барат. Бу бистерди Кудайдыҥ јакылталарын, ол тоодо бойын килебей, ӧскӧ улусты сӱӱр деген јакылтаны бӱдӱрерге кӱӱнзедет (Ин 13:34, 35; 1Ин 5:3). Агару Бичикти кычырары јилбилӱ болзын деп болушкадый тоолу јӧп:

• Санааҥды ла сезимдериҥди иштет. Бойыҥды учурал болуп јаткан јерде деп санан. Нени кӧрӱп, угуп, сезер эдиҥ? Бу учуралда болгон улус, байла, нени сескен?

  

• Башка-башка эп-аргаларды тузалан. Олордыҥ кезиги бу. Угуза кычыр эмезе аудиобичимелдерди угуп, текстти кӧрӱп тур. Кандый бир кижиле колбулу эмезе сени јилбиркедип турган темала колбулу ӱзӱктерди талдап кычырып кӧр. Темдектезе, Иисус керегинде кӧптӧдӧ билип аларга, «Слово Бога в картах и схемах» деген брошюра болужар (4 лӧ 16 кожулталар). Кӱнӱҥ сайын кычыратан ӱлгердиҥ бажалыгын бӱдӱнге кычыр. Агару Бичиктиҥ бичилген аайыла бичиктерин кычыр.

  

• Тереҥ шӱӱп кычыр. Бажалыктарды кӧп лӧ болзын деп кычырганча, кӱнине бир бажалык кычырып, оны оҥдоп, шӱӱп сананганы торт. Контекстти ле тӱӱкиде болгон айалгаларды ајаруга ал. Оок-теек немелерге ајару эдип тур. Карталарла тузалан, кӧчӱрӱлерди ле колбулу ӱлгерлерди кӧрӱп тур. Јарт эмес болгон бир де болзо суракты шиҥде. Аргалу болзо, кычырарына канча кире ӧй ӧткӱргеҥ, ончо ло кире ӧйгӧ шӱӱп санан.