Lemkei mi kwong’o

14 Hiram m’ubimo mi Turo uoro jukwenda i bang’ Daudi karacelo ku yend tido, ku jubodho mi giedo ma ku kidi,* man jubodho mi bau pi nigiero ot* ire. 2 E Daudi unyang’ nia Yehova uketho ker pare ucungo nging’ nging’ iwi Israel, kum ker pare udodere malu pi bero mi dhanu pare Israel.

3 Daudi ugamu mon dupa i Yeruzalem, man enyolo awiya ma co ku ma nyir dupa. 4 Awiya m’unyoliri ire i Yeruzalemne nying’gi ni e: Camua, Cobab, Nathan, Suleman, 5 Ibhar, Elicua, Elpelet, 6 Noga, Nefeg, Yafia, 7 Elicama, Beliada, man Elifelet.

8 Kinde ma Jufilisti giwinjo nia juwiro Daudi ni ubimo iwi Israel ceke, gin ceke gibino pi nisayu kaka Daudi. Saa ma Daudi uwinjo lembene, ewok ecidho i kumgi. 9 Kinde ma Jufilisti gitundo, gicaku yaku dhanu ma bedo i poga* mi Jurefaim. 10 Daudi ugam upenjo Mungu kumae: “Nyo ukwayu acidh i kum Jufilisti? Nyo ibiwok miyogi i cinga?” E Yehova udwoko ire kumae: “Cidhi, abimiyogi i cingi andha.” 11 Pieno, Daudi uidho i Baal-perazim man ewok eloyogi kuca. E Daudi uyero kumae: “Mungu mandha ukaku kind judegina nikadhu kud i cinga calu pii ma kaku piny.” Eno re m’uketho julwong’o nying’ kabedone nia Baal-perazim.* 12 Jufilisti giweko mungu migi keca, e Daudi ung’olo nia juwang’gi cen, man juwang’ugi ku mac.

13 I ng’eye, Jufilisti gibin giyaku piny kendo i poga.* 14 E Daudi upenjo Mungu kendo, ento Mungu mandha uwacu ire kumae: “Kud iriem tokgi atira atira. Ento kadh ku yor i ng’eygi man icor i wigi ku yor i wang’ luli mi baka. 15 Saa m’iwinjo ba tielo iwi luli mi baka ma calu ba tiend udul dhanu ma gibewotho, cak lwiny wang’ acel, kum nwang’u Mungu mandha udaru kadhu i weng’i pi ninego udul askari mi Jufilisti.” 16 Daudi utimo tap calu ma Mungu mandha ung’olo ire, man ginego udul askari mi Jufilisti niai i Gibeon nicidho i Gezer. 17 Pi Daudi uyik i ng’ombe ceke, man Yehova uketho lworo pare iwi thek ceke.