Zaburi
Wer mi idho.
132 E Yehova, poy i kum Daudi
Man i kum masendi pare ceke;
2 Kite m’ekwong’ere ko ni Yehova,
Kite m’etimo ko lembang’ola ma ku kwong’ ni Ng’atu ma tek pa Yakobo kumae:
3 “Abimondo ngo i hema para, i ot para.
Abivuto ngo iwi kavuto para, iwi pem para;
4 Abiyiyo ngo nindo ukadh i wang’a,
Kadi nia bind wang’a udok pek
5 Nitundo m’abinwang’u kaka ni Yehova,
Kabedo ma ber* ni Ng’atu ma tek pa Yakobo.”
6 Nen! wawinjo pire i Efratha;
Wanwang’e i podho mi luli.
7 Dong’ wamondu i kabedo* pare;
Warumu piny i wang’ dul m’i the tiende.
8 Ai malu, E Yehova, pi nibino i kabedo mi yom peri,
In man sanduku mi tego peri.
9 Dong’ julam peri gironyiri ku bedopwe,
Man ju peri ma gibegwoko bedoleng’ migi gikok kud anyong’a.
10 Pi Daudi ma jatic peri,
Kud icor* ng’atu peri ma juwiro cen.
11 Yehova ung’olo ku kwong’ ni Daudi;
Andha ebiloko ngo lembe m’eyero, ewacu kumae:
“Abiketho ng’atu acel m’i kind nyikweyi,
Iwi komker peri.
12 Tek woti giworo lembariba para
Man poyowic para m’aponjo kogi,
Wotgi bende
Bibedo iwi komker peri rondo ku rondo.”
13 Kum Yehova ung’iyo Sayuni;
Emaru nia eketh edok ni kabedo pare:
14 “Eni tie kayom para rondo ku rondo;
Abibedo keni, kum amare.
15 Abipong’e bik ku piny;
Abiyeng’o jucan m’i iye ku mukathi.
16 Abironyo julam m’i iye ku both,
Man ju ma gigwoko bedoleng’ migi i iye gibikok kud anyong’a.
17 Abimedo tego* pa Daudi lee keca.
Ayiko thala ni ng’atu ma juwiro para.
18 Abironyo judegi pare ku lewic,
Ento jamker mi wic m’i wiye birieny.”