Isaya
15 Atwong’a pi Moab:
Calu ma judaru nyothe i diewor acel,
Ar mi Moab udaru ling’.
Calu ma judaru nyothe i diewor acel,
Kir mi Moab udaru ling’.
2 Edaru idho malu i Ot* man i Dibon,
I kabedo ma malu pi niwak.
Moab ubegoyo nduru pi Nebo man pi Medeba.
Jugobo wi dhanu ceke lelele, man jugobo yirtik ceke.
3 I die gengine gironyo kendi mi saki.
Gin ceke gibegoyo nduru iwi udi migi man i akarayo migi;
Gibeloro piny ku wak.
4 Hecbon ku Eleale gibewak ma tek;
Dwandgi ubewinjere bor nitundo bir i Yahaz.
Pi thelembe maeno re ma juaskari mi Moab gibemediri nikok.
Kume* bemiel.
5 Adundena ubewak pi Moab.
Jupare m’upiey uringo bor nitundo i Zoar man i Eglath-celiciya.
Gibeidho ku wak i kaidho mi Luhith;
Gibewak ma tek pi nyoth i yo mi Horonaim.
6 Pilembe pii mi Nimrim udwono pet;
Lum ma numu udaru thwo,
Lum uthum man piny moko ci ma numu m’udong’ umbe.
7 Pi thelembe maeno re ma gibeyeyo piny m’udong’ i kakanpiny migi man lonyo migi;
Gibekadhu loka poga* mi mbegu.
8 Kum wak ubewinjere i die ng’om mi Moab zoo.
Nduru ubewinjere cil i Eglaim;
Nduru ubewinjere cil i Ber-elim.
9 Kum rimo upong’ i pii mi Dimon,
Man fodi agwoko masendi mange pi Dimon:
Umvor pi ju mi Moab ma bivuth
Man pi ju ma bidong’ i ng’ombe.