Isaya

39 I saa maeno ubimo mi Babeli, niwacu Merodak-baladan ma wod Baladan ugam uoro barua ku giramiya ni Hezekia, kum ewinjo nia ebino twoyo man ekey. 2 Hezekia ugam ujolo jukwendane kud anyong’a* man enyutho igi ot m’ekanu iye lonyo pare, niwacu mola ma tar, mola ma kwar, moj balsam ku mo mange ma beco, jamlwiny pare ceke, man piny ceke m’ubino i kakanpiny pare. Gin moko mbe m’udong’ ma Hezekia unyutho ngo igi i ot* pare man i the bimobim pare ceke.

3 I ng’ey lembe maeno, jabila Isaya ucidho i bang’ Ubimo Hezekia man epenje kumae: “Dhanu maeno giyero ang’o man giai kani?” Hezekia udwoko ire kumae: “Giai i ng’om ma bor i Babeli.” 4 I ng’eye, epenje kumae: “Gineno ang’o i ot* peri?” Hezekia udwoko kumae: “Gineno piny ceke ma n’i ot para. Gin moko mbe m’anyutho ngo igi i kakanpiny para.”

5 E Isaya uyero ni Hezekia kumae: “Kewinj lembe ma Yehova mir udul uwacu: 6 ‘Nen! nindo bebino ma jubiyeyo i iye piny ceke ma n’i ot* peri man piny ceke ma kwaru peri gikanu nitundo tin, jubitero i Babeli. Gin moko mbe ma bidong’,’ Yehova wacu. 7 ‘Man woti moko m’ibinyolo de jubiyakugi man gibidoko jutic ma dongo mi kal p’ubimo mi Babeli.’”

8 E Hezekia uyero ni Isaya kumae: “Lembe pa Yehova m’iyero tie ber.” I ng’eye, emedo kumae: “Pilembe kwiyocwiny ku bedomoth* bibedo nuti i nindo mi kwo para zoo.”