Isaya
5 Akwayuwu, wukewek awer ni jamerna
Wer moko pi ng’atu m’amaru man pi podho pare mir ulok.
Jamerna ubedo ku podho mir ulok i ng’et ungulu got* ma miyo.
2 Efure man ekwanyu kidi m’i iye.
Edog epidho yend ulok ma kwar m’alonda i iye,
Egiero ot ma wiw i dierene,
Man etong’o vur mi biyo pigulok i iye.
I ng’eye, ebedo geno nia ebicego nying ulok ma beco,
Ento elund ecego kende kende nying ulok mi lum.
3 “Dong’ kawoni, wu ju ma wubedo i Yeruzalem man dhanu mi Yuda,
Akwayuwu, wupok lembe i kindwa ku podho para mir ulok.
4 Nwang’u atim ang’o mange pi podho para mir ulok
M’uweko gin ma dong’ adaru timo?
Pirang’o kinde m’abino geno nia ebicego nying ulok ma beco,
Elund ecego kende kende nying ulok mi lumi?
5 Kawoni akwayuwu, wukewek ayer iwu
Gin m’abitimo i kum podho para mir ulok:
Abiyaku gang’ne,
Man jubiwang’e cen.
Abirwombo gang’kidine,
Man jubinyone.
6 Abidwoke ni ng’om m’unyothere;
Jubilwero ngo jange kadi there de jubigiero ngo.
Yend ukudho ku doy bijiyo i iye,
Man abing’olo ni afuru kud ucwii koth nyanok de i wiye.
7 Kum podho mir ulok pa Yehova mir udul utie ot mir Israel,
Man dhanu mi Yuda tie podho ma nwang’u emaru akeca.
Ebino geno bedopwe,
Ento nen! gondiri re m’utie;
Ebino geno pokolembe m’atira,
Ento nen! wak mi masendi re m’utie.”
8 Can iwi ju ma thubo ot i kum ot mange
Man ma diko podho ku podho mange,
Nitundo ma kaka moko mbe ma dong’
Man gikwo kendgi i ng’ombe!
9 Yehova mir udul ukwong’o kwong’ i the itha
Nia udi dupa, dok gibed ma dongo man ma leng’,
Bidoko ni piny ma ng’oyo ndiri,
Ma ng’atu moko mbe ma bedo i iye.
10 Kum podho mir ulok hektar ang’wen bicego
Ulok ma pige pong’o agulu* acel kende,
11 Can iwi ju ma ai pir kugweno pi nimadhu kong’o,
Ma riyo duu i wiye nitundo ma piny nyutho ko i wigi
Cil ma pigulok caku liel i igi calu mac!
12 Gitie kud adungu man jamgoyo wer ma juthondhe,
Nyathi vul, usegu, man pigulok i foc migi;
Ento giketho ngo wigi i kum gin ma Yehova timo,
Man gineno ngo tic mi cinge.
13 Pieno dhanu para bicidho i ng’eca
Nikum koso ng’eyong’ec;
Kec binego dhanu migi ma weg dwong’,
Man dhanu migi ceke bisendiri ku rieu pii.
14 E Liel* umedere ma dit
Man eyabu dhoge ma lac ma kieune mbe;
Man dhanu pare ma weg yung, udul dhanu pare ma giwoy, man dhanu pare ma gimaru foc
Gibiloro i iye ma jiji mbe.
15 Man dhanu bijwigere,
Jubijwige
Man jubijwigo wang’ ng’atu ma ting’ere.
16 Yehova mir udul bidodere malu nikum pokolembe* pare;
Mungu mandha, ma Ng’atu ma Leng’ bidwokere leng’ nikadhu kud i pokolembe m’atira.
17 Man nyithi rombe bicamu calu i luba migi;
Umondo bicamu kaka m’udong’ kende ma ley ubed ucamu ma ber i iye.
18 Can iwi ju ma peyo kosa migi ku thol mi ndra
Man ma peyo dubo migi ku thondh magali;
19 Dhanu m’ubeyero kumae: “Wek Mungu udhul tic pare;
Wek ebin pio kara wanene.
Wek lembakeca pa Ng’atu ma Leng’ mir Israel utimere,
Kara watund ning’eye!”
20 Can iwi ju ma yero nia lembe ma ber tie rac man ma rac tie ber,
Ju ma dwoko mudho ni der man der ni mudho,
Ma ketho piny ma kec kaka ma lim lim man ma lim lim kaka ma kec!
21 Can iwi ju ma riek i wang’gi gigi
Man ma neno gin gigi nia gi riek!
22 Can iwi ju ma tek i madhu pigulok
Man ma jubodho i jebo kong’o ma lake tek,
23 Ju ma yiyo kanyaka pi niweko jatimrac
Man ma twono won bedopwe ku pokolembe m’atira!
24 Pieno, tap calu ma lebmac wang’u ko soka
Man lum m’uthwo rungere ko i lebmac,
Ulaggi de bitop,
Man thiwgi biduny calu mogo,
Pilembe gikwero cik* pa Yehova mir udul
Man gicayu wec pa Ng’atu ma Leng’ mir Israel.
25 Pi thelembe maeno re ma ng’eicwiny pa Yehova ubeliel i kum dhanu pare;
Ebirieyo cinge i kumgi man ebigoyogi.
Gudi biyengere,
Man avujgi bibedo calu susu i gengi.
Pi lembuno zoo, ng’eicwiny pare uloko ngo ku ng’eye,
Ento cinge tie asu arieya pi nigoyo.
26 Eting’o giranyutha* malu ni thek ma bor;
Elwiyogi kara gibin niai kud i tung’ ng’om;
Man nen! gibebino pio pio mandha.
27 Ng’atu moko acel de mbe m’i kindgi m’uol kadi m’ubekier.
Ng’atu moko mbe ma nindo ubenuro kadi m’ubenindo.
Mukaba mi piergi ugony ungo,
Kadi thondh wara migi de ucot ungo.
28 Lak athero migi ceke utie bith,
Man gitelo athero migi.*
Ubong’ tiend riuni* migi calu kidi ma lake bith,
Man tiend magali migi calu vira.
29 Rundo migi calu p’umvor;
Girundo calu nyithindh umvor.*
Gibirundo man gibimaku cam migi,
Gibiyeye ma ng’atu moko mbe m’ulare.
30 I nindo maeca, gibirundo i wiye
Calu rundo pa nam.
Ng’atu moko ci ma bineno ng’ombe bineno mudho ma ng’abu cwinyjo;
Kadok der de bicido bii nikum afuru.