Yeremia
26 I acaki mi camuker pa Yehoiakim ma wod Yosiya m’ubimo mi Yuda, Yehova uyero ni Yeremia kumae: 2 “Yehova uwacu kumae: ‘Cung i lela ot pa Yehova man wec pi* dhanu ceke mir adhura mi Yuda ma bebino rwo i ot pa Yehova. Yer igi lembe ceke m’ang’olo iri; kud iwek lembe moko acel de udong’. 3 Saa moko nyo gibiwinjo man ng’atuman biloko kud i timo pare ma rac, man abiloko paru para pi nyoth ma nwang’u akeco nikelo i wigi* pi timo migi ma reco. 4 Wac igi kumae: “Yehova uwacu kumae: ‘Tek wuwinja ngo man wubeworo ngo cik para m’aketho i weng’wu, 5 ma wubewinjo ko ngo wec mi jutic para ma jubila m’abeoro i beng’wu kendo kendo, ma re wuwinjogi ngo, 6 e abidwoko ot maeni calu Cilo man abidwoko adhura maeni ni jambalam ni thek ceke mi ng’om.’”’”
7 E julam, jubila man dhanu ceke uwinjo Yeremia ubeyero lembe maeni i ot pa Yehova. 8 Pieno, kinde ma Yeremia udaru yero lembe ceke ma Yehova ung’olo ire nia eyer ni dhanu zoo, julam, jubila man dhanu ceke gigam gimake man giwacu ire kumae: “Ibitho andha. 9 Pirang’o ibeewo lembila ku nying’ Yehova m’ibeyero ko kumae: ‘Ot maeni bidoko calu Cilo man adhura maeni binyothere ma ng’atu moko mbe ma bidong’ i iye’?” E dhanu ceke cokiri i kum Yeremia i ot pa Yehova.
10 Saa ma judongo ma wijo mi Yuda giwinjo wec maeno, gigam giai kud i ot* p’ubimo man giidho i ot pa Yehova; giwok gibedo i dhu kamondo mi dhugang’ ma nyen mi ot pa Yehova. 11 Julam ku jubila giyero ni judongo ma wijo man ni dhanu ceke kumae: “Ng’atuni uromo ku tho, pilembe eewo lembila i kum adhura maeni tap calu ma wuwinjo ku ithwu.”
12 Yeremia ugam uyero ni judongo ma wijo zoo man ni dhanu ceke kumae: “Yehova re m’uora niewo lembe ceke ma wuwinjo i kum ot maeni man i kum adhura maeni. 13 Dong’ kawoni, wulok kura ku timo mwu man wuwor dwand Yehova Mungu mwu, e Yehova biloko paru pare* pi nyoth m’eyero nia ebikelo i wiwu. 14 Ento an re, an’i cingwu eni. Dong’ wutim i kuma gin moko ci ma wuneno nia utie ber man atira i weng’wu. 15 Re wung’ey cuu nia tek wunega, wubikelo rimb ng’atu m’ukoso ngo i wiwu, iwi adhura maeni man iwi dhanu ma bedo i iye, kum i andha Yehova re m’uora i beng’wu pi niyero lembuni ceke i ithwu.”
16 E judongo ma wijo man dhanu ceke giyero ni julam man ni jubila kumae: “Ng’atuni uromo ngo ku tho, pilembe eweco i bang’wa i nying’ Yehova Mungu mwa.”
17 M’umedo maeno, jumoko m’i kind judongo mi ng’ombe giai malu man gicaku yero ni dhanu ceke m’ucokiri kumae: 18 “Mika mi Moreceth ubed uewo lembila i rundi p’Ubimo Hezekia mi Yuda man ebed eyero ni dhanu mi Yuda ceke kumae: ‘Yehova mir udul uwacu kumae:
“Jubifuro Sayuni calu podho,
Yeruzalem bidoko udhuru mir uvuru,
Man got mi Ot* bidoko calu kaka m’uting’ere i luli.”’
19 “Nyo Ubimo Hezekia mi Yuda man dhanu ceke mi Yuda gigam ginege? Nyo ubimo ugam ulworo ngo Yehova man ekwayu ngo Yehova utim bero kara Yehova ulok paru pare pi nyoth m’eyero nia ebikelo i wigi? Pieno, wan wabecikelo nyoth ma dit i wiwa giwa.*
20 “Man ng’atu mange de ubino nuti m’ubed uewo lembila ku nying’ Yehova, ma nyinge Uriya ma wod Cemaya mi Kiriath-jearim. Ebed eewo lembila pir adhura maeni man pi ng’ombuni ku wec ma calu pa Yeremia. 21 Ubimo Yehoiakim ku dhanu pare ceke ma gi jurukara man judongo ma wijo ceke giwinjo wec pare, man ubimo yenyo yore mi nege. Kinde ma Uriya uwinjo lembene ci, e lworo umake man eringo i Misiri. 22 E Ubimo Yehoiakim uoro Elnathan ma wod Akbor karacelo ku dhanu mange i Misiri. 23 Gigamu Uriya kud i Misiri man gikele i bang’ Ubimo Yehoiakim. Egam enege ku palamularu man ebayu avuje i kakuny mi dhanu ma say.”
24 Ento Ahikam ma wod Cafan ucero bang’ Yeremia, uketho jumiye ngo i cing’ dhanu pi ninege.