Yeremia
28 I oro ma rom eno, i acaki mi camuker p’Ubimo Zedekia mi Yuda, i oro mir ang’wende, i dwi mir abije, jabila Hanania ma wod Azur mi Gibeon uyero ira i ot pa Yehova i vut julam ku dhanu ceke kumae: 2 “Yehova mir udul ma Mungu mir Israel uwacu kumae: ‘Abituro mberembere p’ubimo mi Babeli. 3 I kind oro ario, abidwogo i kabedo maeni ajeni ceke mi ot pa Yehova m’Ubimo Nebukadnezar mi Babeli ucoko kud i kabedo maeni man etero i Bableli.’” 4 “‘Man abidwogo Yekonia ma wod Yehoiakim m’ubimo mi Yuda i kabedo maeni, man dhanu ceke mi Yuda m’ucidho i ng’eca i Babeli,’ Yehova wacu, ‘kum abituro mberembere p’ubimo mi Babeli.’”
5 E jabila Yeremia uweco i bang’ jabila Hanania i vut julam, man dhanu ceke m’ucungo i ot pa Yehova. 6 Jabila Yeremia uwacu kumae: “Amen!* Dong’ Yehova utim lembuno! Dong’ Yehova upong’ wec m’iewo, edwog kud i Babeli ajeni mi ot pa Yehova, man dhanu ceke m’ucidho i ng’eca i kabedo maeni! 7 Ento akweyi, kewinj wec maeni m’abeyero i ithi man i ith dhanu e zoo. 8 Yang’ con, jubila m’ular uwok ira man iri ubed uewo lembila pi ng’om dupa, man pi ker ma dongo, pi lwiny, pi nyoth, man pi thong’om.* 9 Tek jabila moko uewo lembila pi kwiyocwiny man wec parene utimere andha, e jubing’eyo nia Yehova uoro jabilane andha.”
10 E wang’ acel jabila Hanania uting’o mberembere kud i ng’ut jabila Yeremia man eturo iye. 11 Hanania ugam uyero i vut dhanu ceke kumae: “Yehova uwacu kumae: ‘Abituro mberembere p’Ubimo Nebukadnezar mi Babeli tap kumeni kud i ng’ut thek ceke i kind oro ario.’” E jabila Yeremia ugam ucidho i wang’e.
12 I ng’ey ma jabila Hanania uturo mberembere kud i ng’ut jabila Yeremia, lembe pa Yehova ugam ubino i bang’ Yeremia, uyero kumae: 13 “Cidh iyer ni Hanania kumae: ‘Yehova uwacu kumae: “Ituro i mberembere mi yen ento ibiyiko mberembere mi cuma kakagi.” 14 Kum Yehova mir udul ma Mungu mir Israel uwacu kumae: “Abiketho mberembere mi cuma i ng’ut thek maeni ceke, kara gitim ni Ubimo Nebukadnezar mi Babeli, man gicikiri nitimo ire. Abimiyo ire kadok yedi mi lum de.”’”
15 Jabila Yeremia ugam uyero ni jabila Hanania kumae: “Akweyi, kewinji, Ee Hanania! Yehova uori ngo, ento iketho dhanu maeni ugeno ndra. 16 Pieno, Yehova wacu kumae: ‘Nen! abekebi cen kud iwi ng’om. Ibitho oro maeni, kum icwalu dhanu ujai i kum Yehova.’”
17 E jabila Hanania utho de i oro maeca, i dwi mir abirone.