Yeremia
34 Lembe pa Yehova ubino i bang’ Yeremia saa m’Ubimo Nebukadnezar* mi Babeli man udul mony pare ceke ku ker ceke mi ng’om ma n’i the bimobim pare man dhanu ceke gibino kiedo i dhu Yeruzalem man adhurane ceke:
2 “Yehova ma Mungu mir Israel uyero kumae: ‘Cidh iwec kud Ubimo Zedekia mi Yuda man iyer ire kumae: “Yehova uwacu kumae: ‘Nen, abimiyo adhura maeni i cing ubimo mi Babeli man ebiwang’e ku mac. 3 Man ibiboth ungo kud i cinge, pilembe jubimeki andha man jubimiyi ire. Ibineno ubimo mi Babeli wang’ ku wang’, ebiweco kudi dhok ku dhok, man ibicidho i Babeli.’ 4 Ento winj lembe pa Yehova, Ee Ubimo Zedekia mi Yuda, ‘eni tie lembe ma Yehova uyero piri: “Ibitho ngo ku palamularu. 5 Ibitho i kwiyocwiny man jubiwang’u udok ma ng’wice ng’ar piri calu ma jutimo pi kwaru peri m’ular ubimo i weng’i, man jubiwegi kumae: ‘Akaa, Ee rwoth!’ kum ‘adaru yero lembene,’ Yehova wacu.”’”’”
6 Jabila Yeremia ugam uyero lembe maeni ceke ni Ubimo Zedekia mi Yuda i Yeruzalem, 7 saa m’udul mony p’ubimo mi Babeli ubino kiedo i dhu Yeruzalem, man i dhug adhura ceke mi Yuda ma nwang’u udong’, i dhu Lakic man i dhug Azeka, pilembe nwang’u adhura maeno kende re m’udong’ kud i kind adhura ma tek mi Yuda.
8 Lembe pa Yehova ubino i bang’ Yeremia i ng’ey m’Ubimo Zedekia utimo lembariba ku dhanu ceke mi Yeruzalem pi nitwong’o igi gony, 9 nia ng’atuman ucikere nigonyo ng’eca pare ma gi Juebrania ma co ku ma mon, kara ng’atu moko kud umedere niketho Jayahudi wadi ubed ni ng’eca pare. 10 E judongo ma wijo ceke man dhanu ceke uworo lembene. Nwang’u gidaru timo lembariba nia ng’atuman ucikere nigonyo ng’eca pare ma co ku ma mon man kud emedere niketho ebed ni ng’eca pare asu. Giworo man giweko gicidho. 11 Ento i ng’eye gigamu ng’eca ma co ku ma mon ma nwang’u gigonyo, man gidwokogi ni ng’eca kendo ku tego. 12 E lembe pa Yehova ubino i bang’ Yeremia niai i bang’ Yehova uwacu kumae:
13 “Yehova Mungu mir Israel uwacu kumae: ‘Atimo lembariba ku kwaruwu i nindo m’awodhogi i iye kud i ng’om mi Misiri, kud i ot mi ng’eca, awacu kumae: 14 “I ajiki mi oro mir abiro, ng’atuman m’i kindwu ucikere nigonyo umin ma Jaebrania ma julworo ire man m’udaru timo ire oro abusiel; icikiri nigonye.” Ento kwaruwu giwinjo ngo kadi giciko de ngo ithgi i bang’a. 15 Man nindo m’ukadhu ceng’ini eni* wuloko paru mwu man wutimo lembe m’atira i wang’a, ng’atuman m’i kindwu utwong’o gony ni wagi man utimo lembariba i wang’a i ot ma nyinga lwong’ere i kume. 16 Ento wulund uloko paru mwu man wucido nyinga pilembe wudwogo ng’eca ma co ku ma mon ma nwang’u wugonyo ucidho i wang’gi calu ma gimaru man wudwokogi kendo ni ng’eca ku tego.’
17 “Pieno Yehova uyero kumae: ‘Wuwora ngo kinde ma wutwong’o gony, ng’atuman ni umin man ni wadi. Kawoni abitwong’o iwu gony,’ Yehova wacu, ‘wubitho ku palamularu, thong’om* man ndru; man abiketho wubidoko ni gin ma ng’oyo ndiri ni ker ceke mi ng’om. 18 Man maeni tie lembe ma binwang’u dhanu m’uturo lembariba para, pilembe giworo ngo lembariba ma gitimo i wang’a saa ma gikaku i nyathi dhiang’ bwa ni ario man gikadhu kud i kind thengene, 19 niwacu judongo ma wijo mi Yuda, judongo ma wijo mi Yeruzalem, bajego, julam, man dhanu ceke mi ng’ombe m’ukadhu kud i kind theng nyathi dhiang’ne: 20 Abimiyogi i cing’ judegi migi man i cing’ ju m’ubesayu nikabu kwo migi,* avujgi bidoko ni cam ni winyo mi kor polo man ni yedi mi ng’om. 21 Man abimiyo Ubimo Zedekia mi Yuda ku judongo ma wijo pare i cing’ judegi migi man i cing’ ju m’ubesayu nikabu kwo migi,* man i cing udul mony p’ubimo mi Babeli, m’ubeloko cen kud i beng’wu.’
22 “‘Nen, abimiyo cik,’ Yehova wacu, ‘man abidwogogi i adhura maeni. Gibikiedo i dhoge, gibimake man gibiwang’e ku mac; e abiketho adhura mi Yuda bidoko ni ng’om ngele ma ng’atu moko mbe ma bedo i iye.’”