Yeremia
37 Man Ubimo Zedekia ma wod Yosiya ucaku bimo kaka Konia* ma wod Yehoiakim, pilembe Ubimo Nebukadnezar* mi Babeli ukethe ni ubimo i ng’om mi Yuda. 2 Ento en ku jutic pare man dhanu mi ng’ombe giwinjo ngo lembe ma Yehova uyero nikadhu kud i bang’ jabila Yeremia.
3 Ubimo Zedekia uoro Yehukal ma wod Celemia man Zefania ma wod Maaseya ma jalam i bang’ jabila Yeremia ewacu kumae: “Timba kway Yehova Mungu mwa piwa.” 4 Yeremia ubino wotho m’etie agonya i kind dhanu pilembe nwang’u fodi jubole ngo i kol. 5 Udul mony pa Farao gitugo woth kud i Misiri man Jukaldayo ma nwang’u utieko Yeruzalem giwinjo rwonglembene. Pieno giai kud i Yeruzalem. 6 E lembe pa Yehova ubino i bang’ jabila Yeremia, uyero kumae: 7 “Yehova Mungu mir Israel uwacu kumae: ‘Maeni tie lembe ma wucikuru niyero ni ubimo mi Yuda m’uorowu i bang’a pi nipenja: “Nen! udul mony pa Farao m’ubebino pi nikonyowu bidok i ng’om migi i Misiri. 8 Ento Jukaldayo gibiloko man gibikiedo i kum adhura maeni, gibimake man gibiwang’e ku mac.” 9 Yehova uwacu kumae: “Kud wuwonduru ma wuwac ko kumae: ‘Jukaldayo gibiwekowa andha man gibicidho cen kud i bang’wa,’ pilembe gibicidho ngo. 10 Kadok nwang’u wunego udul mony ceke mi Jukaldayo m’ubekiedo i dhogwu man ju migi ma ret n’i kumgi kende re m’udong’ de, gibiai asu kud i hema migi man gibiwang’u adhura maeni ku mac.”’”
11 Saa m’udul mony mi Jukaldayo uweko Yeruzalem nikum udul mony pa Farao, 12 Yeremia ugam utugo woth kud i Yeruzalem pi nicidho i ng’om pa Benjamin pi ninwang’u makapiny pare kuca i kind juthugi. 13 Ento saa m’etundo i dhugang’ pa Benjamin, jego mi jukur ma nyinge Iriya ma wod Celemia ma wod Hanania umaku jabila Yeremia man eyero ire kumae: “Iberingo pi nicidho i bang’ Jukaldayo!” 14 Ento Yeremia udwoko kumae: “Tie kumeno ngo, aberingo ngo pi nicidho i bang’ Jukaldayo.” Ento ewinje ngo. Pieno Iriya umaku Yeremia man etere i bang’ judongo ma wijo. 15 Ng’eicwiny umaku judongo ma wijo i kum Yeremia, gifwode man gitwiye i ot pa Yehonathan ma jagor ma nwang’u judwoko ni kol. 16 Jubolo Yeremia i kol ma n’i the ng’om, i kusikane man ebedo kuca pi nindo m’ulwar.
17 Ubimo Zedekia uoro jucidh jugame, man ubimo upenje ku penji i amung’ i ot pare. Epenje kumae: “Nyo Yehova uyero lembe moko de?” Yeremia udwoko nia, “eyo!” man emedo kumae: “Jubimii i cing ubimo mi Babeli!”
18 Yeremia upenjo bende Ubimo Zedekia kumae: “Dubo ang’o m’atimo iri, ni jutic peri, man ni dhanu maeni m’uketho ibola i kol? 19 Jubila mwu m’ubed uewo iwu nia ‘Ubimo mi Babeli bibino ngo i kumwu man i kum ng’om mwu e, gini kani kawoni’? 20 Dong’ akweyi, kewinja, Ee rwoth ubimo. Akweyi, bed ku kisa i kuma, kud idwoka timba i ot pa Yehonathan ma jagor, amaru wok tho kuca.” 21 E Ubimo Zedekia ung’olo nia jutwii bang’ Yeremia i Lela mi jukur, man kubang’ ceng’ jubed jumiyo ire lungu mukathi acel ma ngulu ngulu m’ubed uai i ndaki mi juted mukathi cil ma mukathi uthum ko pet kud i adhura. Man Yeremia ubedo asu i Lela mi Jukur.