Ezekiel
19 “Icikiri niwero wer wak pi judongo ma wijo mir Israel 2 man yer kumae:
‘Meru ubino ang’o? Min umvor i kind umvor.
Evuto i kind nyithindh umvor ma tek* man etungo nyithindhe.
3 Etungo acel m’i kind nyithindhe man edoko nyathin umvor ma tek.
Eponjo ayi mi yeco i cam,
Ecamu kadok dhanu.
4 Thek dupa uwinjo pire man gimake i vur migi,
E gitere i ng’om mi Misiri ku gol.
5 Min umvorne ukuro kpe man tokcenne enyang’ nia genogen mi dwogo mbe ire.
Pieno egamu nyathinne mange acel man eore m’etie nyathin umvor ma tek.
6 Ewotho bende i kind umvor man edoko nyathin umvor ma tek.
Eponjo ayi mi yeco i cam man ecamu kadok dhanu.
7 Ewotho i kind udi migi ma tek ma wiw man enyotho adhura migi,
Uketho dwande m’erundo ko uromo i ng’om m’udong’ ni uvuru.
8 Thek m’uai i theng ng’om m’udhoke ubino i kume pi nibolo voi migi i wiye,
Man gimake i vur migi.
9 Giroye i goga ku gol man gitere i bang’ ubimo mi Babeli.
Kuca giwok gitwiyo bang’e kara kudi dwande uwinjere kendo nyanok de iwi gudi mir Israel.
10 Meru ubino calu yend ulok i rimbi,* jupidhe i dhu pii.
Ecego nyinge man jange pong’ lee i kume nikum pii m’upong’.
11 Jange* udoko ma tek m’uromo nibedo uluthker.
Edongo man ewic nisagu yen mange ceke,
Ecaku nen cuu pilembe edongo man nikum ithe m’ujiyo.
12 Ento jufudhe ku kwinyo man jubole i ng’om,
E yamu ma yo nyangu uthwoyo nyinge.
Jutong’o jange ma tek cen, e githwo man mac uwang’ugi.
13 Kawoni jupidhe i langa,
I ng’om ngele ma pii mbe i iye.
14 Mac umew niai kud i jange* man uwang’u jange m’uloth ku nyinge,
E jange ma tek acel de mbe m’udong’, uluthker acel de mbe pi bimobim.
“‘Eno tie wer wak, man jubitiyo kude de ni wer wak.’”