Zekaria

Yehova re ma ketho afuru mi koth wok,

Ma konjo koth ni dhanu,

Man emiyo uboko mi podho ni ng’atuman.

 2 Kum ayi gin m’acwiya ma therafim* ucwayu ndra;*

Man juewlembe gineno gin ma wok i wang’ mi vupo.

Gibekoro lek ma tijgi mbe,

Man gibeii nijuko cwinyjo mananu.

 3 Kwinyo para uopo i kum jukwac,

Man abikwayu wel i bang’ jutelwic ma jusend dhanu;*

Kum Yehova mir udul uloko wang’e i bang’ dwol pare, i bang’ ot mi Yuda,

Man eketho gidoko calu riuni* pare ma dit i lwiny.

 4 Ng’atu ma pire tek lee* ai i bang’e,

Jabim ma tielojo* ai i bang’e,

Athero mi lwiny ai i bang’e;

Jutelwic* ceke karacelo ubewok kud i bang’e.

 5 Man gibidoko calu jurukara,

Ma gibenyono ucodho m’i die gengi i lwiny.

Gibikiedo lwiny, kum Yehova ni karacelo kugi;

Man jubinyayu lewic iwi juring riuni.*

 6 Abidwoko ot mi Yuda tek,

Man abibodho ot pa Yozefu.

Abidwokogi kendo kakagi,

Kum abitimo igi kisa;

Man gibibedo ve alalugi ngo;

Kum an a Yehova Mungu migi man abidwoko igi lembe.

 7 Ju mir Efraim gibibedo calu jurumony ma jurukara,

Man anyong’a binego adundegi calu ve nikum pigulok.

Wotgi bineno maeni man anyong’a binegogi;

Mutoro binego adundegi nikum Yehova.

 8 ‘Abilwiyo pigi man abicoko dhoggi karacelo;

Kum abiwarugi man gibidoko dupa,

Man gibimediri nidoko dupa.

 9 Kadok nwang’u alalu igi calu kodhi i kind dhanu,’

Gibipoy pira kud i kabedo ma bor;

Ku wotgi gibicer man gibidwogo.

10 Abidwogogi niai kud i ng’om mi Misiri

Man abicoko dhoggi niai kud i Asiria;

Abidwokogi i ng’om mi Gilead man i Lebanon,

Man kaka bibedo mbe m’uromgi.

11 Abikadhu kud i nam m’abenyayu can i kume;

Man abigoyo* mujanga m’i nam;

Thuc mi kulo Nil ceke bithwo.

Jubiloro luliri mir Asiria piny,

Man uluthker mi Misiri bicidho.

12 Abidwokogi tek nikum Yehova,

Man gibiwotho nikum nyinge,’ Yehova wacu.”