Yeremia
20 Nwang’u Pacur ma wod Imer ma jalam, m’ubino bende jego ma dit i ot pa Yehova ubino winjo kinde ma Yeremia ubeewo lembuno. 2 E Pacur ugoyo jabila Yeremia man eroye i kol m’ubino i Dhugang’ ma malu pa Benjamin, m’ubino i ot pa Yehova. 3 Ento urwonde kinde ma Pacur ugonyo Yeremia kud i kol, Yeremia uyero ire kumae:
“Yehova ucaku ngo nyingi nia Pacur, ento Ndiri kakare zoo. 4 Kum Yehova uwacu kumae: ‘Abiketho ibidoko gin ma ng’oyo ndiri iri giri man ni jurimbi ceke, man abiketho gibipodho i lak palamularu mi judegi migi kinde ma weng’i ubeneno; e abimiyo Yuda ceke i cing ubimo mi Babeli man ebiterogi i ng’eca i Babeli man ebinegogi ku palamularu. 5 Man abimiyo lonyo mir adhura maeni ceke, limne ceke, piny ceke m’i iye ma pigi tek man lonyo ceke mi jubim mi Yuda i cing’ judegi migi. E gibiyakugi, gibimakugi man gibiterogi i Babeli. 6 Ento in i Pacur ku dhanu ceke ma bedo yo peri, wubicidho i ng’eca. Ibicidho i Babeli man ibitho kuca, jubikunyi ku jurimbi ceke kuca, pilembe iewo lembila mi ndra igi.’”
7 Ee Yehova, iwonda man juwonda.
Itiyo ku tego peri i kuma man ivoya.
Adoko ni jamng’iero dieceng’ duu;
Dhanu ceke ubecaya.
8 Kum saa ceke m’abeweco, akok akoka man atwong’o kumae:
“Eni rop ku nyoth kwa!”
Kum lembe pa Yehova uketho jubecaya man jubeng’iera dieceng’ duu.
9 Pieno ayero kumae: “Abiweco ngo pire,
Man abiweco ngo kendo nyanok de ku nyinge.”
Ento i adundena lembene udoko ve mac m’ubeliel ma bang’e cikere i cogona,
Man aol ku gwoko lembene i iya;
Acopo medara ngo nicire kendo.
10 Kum awinjo rwonglembe dupa ma reco;
Ndiri udaru tieka tingili.
“Wudote; wek wadotue!”
Dhanu ceke m’ubino kwayu pi kwiyocwiny ira gibekiyo nia apodhi, gibeyero kumae:
“Saa moko nyo ming’o bicwaye ebitimo kosa moko,
E wabivoye man wabiculo kwor mwa i kume.”
11 Ento Yehova ubino karacelo kuda calu jaramony ma ng’oyo ndiri.
Pi thelembe maeno re ma ju ma gibenyayu ragedo i kuma gibikier man gibivoya ngo.
Lewic ma dit binyay i wigi, kum lembe biwotho ngo igi miero.
Acidi migi bibedo rondo ku rondo, wijo biwil ungo i kume.
12 Ento in, Ee Yehova mir udul, ing’iyo won bedopwe;
Ineno pidoic m’upondo* man adunde.
Wek anen kwor peri m’ibeculo i wigi,
Kum aweko lemkesi para i cingi.
13 Wuwer ni Yehova! Wupak Yehova!
Kum ebodho jacan* kud i cing’ jutimrac.
14 Kwong’ ubed iwi nindo m’anyolara i iye!
Mugisa kud ukwany nindo ma maa nyola i iye!
15 Kwong’ ubed iwi ng’atu m’utero lembanyong’a ni vwa, m’eyero ko kumae:
“Nyathin ma nico udaru nyolere iri!”
M’uketho anyong’a unege lee.
16 Wek ng’atune dok calu adhura ma Yehova urwombo m’umbe ang’eyang’o.
Wek ewinj nduru kugweno man kok mi lwiny ku dieceng’.
17 Pirang’o enega ngo niai kud i ic,
Kara maa udok kakuny para
Man kara ebed ku ic saa ceke?
18 Pirang’o ugam ukwayu awok kud i ic
Pi nineno can man ang’abacwiny,
Man nidaru dong kwo para zoo i lewici?