Yeremia
21 Yehova uweco i bang’ Yeremia kinde m’Ubimo Zedekia uoro Pacur ma wod Malkiya man Zefania ma wod Maaseya ma jalam i bang’e, pi nikwaye kumae: 2 “Timba kway Yehova piwa, pilembe Ubimo Nebukadnezar* mi Babeli ubekiedo lwiny i dhogwa. Saa moko nyo Yehova bitimo udu pare moko acel piwa, e ebiwekowa.”
3 Yeremia ugam uyero igi kumae: “Maeni tie lembe ma wucikuru niyero ni Zedekia: 4 ‘Yehova Mungu mir Israel uwacu kumae: “Nen, abiloko jamlwiny ma n’i cingwu i kumwu, jamlwiny ma wubekiedo ko i dhug ubimo mi Babeli man i dhu Jukaldayo m’utiekowu woko i ng’ey gang’. Man abicoko dhoggi i diere mir adhura maeni. 5 An ku kuma abikiedo i dhogwu ku cing’ m’arieya man ku bot ma tek, ku ng’eicwiny ku kwinyo man ku ng’eicwiny ma lake tek. 6 Abigoyo dhanu ma bedo i adhura maeni, dhanu ku yedi zoo. Gibitho ku thong’om* ma dit.”’
7 “‘“I ng’ey maeno,” Yehova wacu, “abimiyo Ubimo Zedekia mi Yuda man jutic pare ku dhanu mir adhura maeni, niwacu ju m’uboth kud i thong’om, kud i lak paralumaru man kud i ndru, i cing Ubimo Nebukadnezar* mi Babeli, i cing’ judegi migi, man i cing’ ju m’ubesayu nikabu kwo migi.* Ebinegogi ku palamularu. Kisa binege ngo i kumgi, kadi can kunoke ngisi de binege ngo i kumgi.”’
8 “Ni dhanu maeni ke ibiyero kumae: ‘Yehova uwacu kumae: “Nen, abeketho yo mi kwo man yo mi tho i weng’wu. 9 Ju ma bidong’ i adhura maeni bitho ku palamularu, ku ndru man ku thong’om. Ento ng’atu moko ci m’uwok woko man m’umiyere ni Jukaldayo m’utiekowu bimedere nikwo man ebibodho kwo* pare.”’
10 “‘“Kum aketho wang’a i kum adhura maeni pi nyoth ento pi bero ngo,” Yehova wacu. “Abimiye i cing ubimo mi Babeli man ebiwang’e ku mac.”
11 “‘Wu juruot p’ubimo mi Yuda: Wuwinj lembe pa Yehova. 12 Ee ot pa Daudi, Yehova uyero kumae:
“Wumok kii i kum bedopwe kubang’ rupiny,
Man wular ng’atu ma jubeyaku kud i cing’ won ayeki,
Kara ng’eicwiny para kud uliel calu mac
Man eliel ma ng’atu moko mbe ma romo nege
Nikum timo mwu ma reco.”’
13 ‘Nen, an’i kumwu, Ee wu dhanu ma wubedo i poga,*
Ee cana mi ng’om pambu,’ Yehova wacu.
‘Man wun ma wubeyero kumae: “Ng’a ma bibino i dhogwa?
Man ng’a ma bimondo i kabedo mwa?”
14 Abikwayu wuwodh wel
M’uromo ku timo mwu,’ Yehova wacu.
‘Man abicwinyo mac i kum luli pare,
E ebiwang’u piny ceke m’udhoke tingili.’”