Yeremia
22 Yehova uwacu kumae: “Lor piny i ot* p’ubimo mi Yuda man iter rwonglembe maeni. 2 Icikiri niyero kumae: ‘Winj lembe pa Yehova, Ee ubimo mi Yuda, in m’ijany iwi komker pa Daudi, in ku jutic peri man dhanu peri, ju ma mondo kud i dhugang’ maeni. 3 Yehova uwacu kumae: “Wumok kii i kum pokolembe m’atira man bedopwe. Wular ng’atu ma jubeyaku kud i cing’ won ayeki. Kud wusend juwirok, kud wutim nyathikic* kadi dhatho rac. Man kud wucwir rimb ng’atu m’ukoso ngo i kabedo maeni. 4 Kum tek wutiyo ku lembe maeni cuu mandha, e jubim m’ujany iwi komker pa Daudi bimondo kud i dhugang’ mi ot maeni ma gibedo iwi magali man iwi riuni,* gin ku jutic migi man dhanu migi.”’
5 “‘Ento tek wuworo ngo lembuni, abekwong’o ku nyinga gira,’ Yehova wacu, ‘nia ot maeni bidoko ni uvuru.’
6 “Kum Yehova uwacu pi ot p’ubimo mi Yuda kumae:
‘Itie ira ve Gilead,
Ve usimbru Lebanon.
Ento abidwoki ni langa;
Jubibedo ngo i adhura peri acel de.
7 Man abiketho junyoth i kumwu,
Ng’atuman ku jamlwiny pare.
Gibing’ondo yend tido peri ma beco
Man gibiredhogi i mac.
8 “‘Man thek dupa ma bikadhu kud i kum adhura maeni bipenjiri i kindgi kumae: “Pirang’o Yehova utimo lembuni i kum adhura ma dit maeni?” 9 Man jubidwoko igi kumae: “Tie pilembe giweko lembariba pa Yehova Mungu migi, gikulo korgi piny ni mungu mange man gitimo igi.”’
10 Kud wuwak pi ng’atu m’utho,
Man kud wukum pire.
Ento wuwak lee mandha pi ng’atu m’ubesaru magwei,
Pilembe ebidwogo ngo kendo pi nineno ng’om ma junyole i iye.
11 “Kum maeni tie lembe ma Yehova uyero pi Calum* ma wod Yosiya m’ubimo mi Yuda m’ubebimo kaka won ma Yosiya man m’uai cen kud i kabedo maeni: ‘Ebidwogo ngo kendo keni. 12 Kum ebitho kaka ma jutere i iye i ng’eca man ebineno ngo kendo ng’om maeni.’
13 Can iwi ng’atu m’ubegiero ot pare ku gondiri,
Man m’ubegiero kusika pare ma malu ku lembe m’atira ngo,
M’uketho wadi ubetimo ire mi mananu,
M’ukwero nimiyo cul pare;
14 Ng’atu m’ubeyero kumae: ‘Abigiero ira ot ma iye lac
M’utie ku kusika ma malu ma igi lac.
Abiketho madhirisa dupa i kume,
Abiumo kum ode ku bau mi yend tido man abigoyo rangi ma kwar i kume.’
15 Nyo ibimediri nibimo pilembe nia itiyo lee ku yend tido nisagu jumange?
Wuru de ucamu man umadhu,
Ento emoko kii i kum pokolembe m’atira man bedopwe,
E lembe uwotho ber ire.
16 Ecero ba twero mi ju m’ubetagu man jucan,
E lembe uwotho ber ire.
‘Nyo ning’eya tie eno ngo?’ Yehova wacu.
17 ‘Ento weng’i kud adundeni ucungo kwa i kum nwang’u piny i ayi m’atira ngo,
Iwi cwiro rimb ju m’ukoso ngo,
Man iwi ayeki kud avure.’
18 “Pieno, Yehova uwacu pi Yehoiakim ma wod Yosiya m’ubimo mi Yuda kumae:
‘Jubiwage ngo nia,
“Akaa, umira! Akaa, nyamira!”
Jubiwage ngo kumae:
“Akaa, Ee rwoth! Akaa, ubimo!”
19 Jubikunye calu ma jukunyo ko kana,
Jubiwaye man jubibole cen
Woko i ng’ey dhugang’ mi Yeruzalem.’
20 Idh malu i Lebanon man goy nduru,
Ting’ dwendi i Bacan
Man goy nduru niai kud i Abarim,
Kum judaru rungo jumer peri ceke m’umeri akeca.
21 Aweco i beng’i kinde m’inweng’iri nia itie museme.
Ento iyero kumae: ‘Abiworo ngo.’
Eno kura peri niai m’itie aradu,
Kum iworo ngo dwanda.
22 Yamu bileko jukwac peri ceke,
Man jumer peri m’umeri akeca bicidho i ng’eca.
E jubinyayu lewic i wii man jubicidi pi nyoth peri ceke.
23 Ee in m’ibedo i Lebanon,
M’igiero ot peri i kind yend tido,
Ibicur cur maa kinde ma moc bigoyi,
Ang’abacwiny ma calu pa dhaku m’ubegonyere!”
24 “‘Calu andha abedo kwo,’ Yehova wacu, ‘kadok nwang’u Konia* ma wod Yehoiakim m’ubimo mi Yuda ubed lagith mi ketho ayi i cinga ma yor acwic de, abiwodhe cen! 25 Abimiyi i cing’ ju m’ubesayu nikabu kwo peri,* i cing’ ju m’ibelworo, i cing Ubimo Nebukadnezar* mi Babeli man i cing’ Jukaldayo. 26 Man abivudhowu ku meru m’unyoli i ng’om mange ma wunyoluru ngo i iye, man wubitho kuca. 27 Man gibidwogo ngo kendo nyanok de i ng’om m’ava dwogo i iye ubenegogi lee.
28 Nyo jalwo ma Konia e, utie ndhu kende kende agulu ma jucayu, agulu m’ung’eny,
Agulu ma ng’atu moko mbe m’utie ku yenyne?
Pirang’o juvudho en ku nyikwaye piny
Man jubayugi i ng’om ma ging’eyo ngo?’
29 Ee ng’om, ng’om, ng’om, winj lembe pa Yehova.
30 Yehova uwacu kumae:
‘Wukiew nia jalwo maeni tie jamugumba,
Etie jalwo ma lembe acel de mbe ma birombo ire i kwo pare* zoo,
Kum nyikwaye moko mbe ma bituc nijany
Iwi komker pa Daudi man nibimo kendo i Yuda.’”