Isaya
38 I nindo maeno, Hezekia ucaku twoyo man nwang’u edhingo tho. E jabila Isaya ma wod Amoz ugam ubino i bang’e man uwacu ire kumae: “Yehova uyero kumae: ‘Mii telowic ni juruot peri, kum ibitho; ibikey ungo.’” 2 E Hezekia uloko wang’e yor i kum kor ot man ecaku rwo i bang’ Yehova kumae: 3 “Abekweyi, Ee Yehova, ka copere, poy nia awotho i weng’i i lemandha man kud adunde ma zoo; atimo lembe ma ber i weng’i.” E Hezekia ucaku wak lee mandha.
4 Yehova ugam uweco i bang’ Isaya, uyero kumae: 5 “Lok idok ku ng’eyi man iwac ni Hezekia kumae: ‘Yehova Mungu pa Daudi ma kwaru uyero kumae: “Awinjo rwo peri. Aneno piweng’i. Dong’ abemedo oro apar abic iwi kwo* peri, 6 man abibodhi, abibodho bende adhura maeni kud i cing ubimo mir Asiria man abicero bang’ adhura maeni. 7 Giranyutha m’uai i bang’ Yehova m’unyutho nia Yehova bitimo lembe m’eyero ni e: 8 Nen, abiketho tipo ceng’ m’ubeloro iwi mangasi* pa Ahaz, bidok ku ng’eye dagutielo apar.”’” Pieno, ceng’ udok ku ng’eye dagutielo apar iwi mangasine ma ke nwang’u dong’ edaru loro.
9 Lembe m’Ubimo Hezekia mi Yuda ukiewo* kinde m’ecaku twoyo man m’ekey.
10 Awacu kumae: “I diere mi kwo para
Abimondo i dhugola mi Liel.*
Jubitwona ku dong oro para m’udong’.
11 Ayero kumae: “Abineno ngo Yah,* Yah i ng’om mi ju ma kwo.
Abineno ngo kendo kodhi dhanu
Kinde ma ni karacelo ku dhanu ma bedo kaka ma piny ceke jik i iye.
12 Jufudho kabedo para man jukabe kud i bang’a
Calu hema pa jakwac.
Adolo kwo para calu ma jacwii kendi dolo ko kendi;
Ethuma calu wuzi mi thol m’akieda.
Niai mombwa nitundo i dhug uthieno ibemediri nitera i ajiki.
13 Akwiyo kuma nitundo kugweno.
Calu umvor, emedere nirungo cogona zoo;
Niai mombwa nitundo i dhug uthieno ibemediri nitera i ajiki.
14 Amedara niwak calu ugwelo kunoke amoo,*
Amedara nicur calu akuru.
15 Acopo yero ang’o?
Edaru weco i bang’a man etimo.
Abiwotho ku jwigiri i dong oro para ceke
Nikum can para ma dit.*
16 ‘Ee Yehova, dhanu ceke kwo nikum lembe maeni,*
Man kwo mi tipona n’i igi.
Ibikeyo kuma man ibigwoka abed kwo.
17 Nen! kaka kwiyocwiny, atie ku can ma dit;
Ento nikum mer m’imara ko,*
Icera ku mondo i vur mi nyoth.
Ibayu dubo para ceke yor i ng’eyi.*
18 Kum Liel* copo yungi ngo,
Tho copo peki ngo.
Ju m’uloro piny i vur copo geno ngo bedoleng’ peri.
19 Ju ma kwo, ju ma kwo romo peki,
Tap calu m’abetimo tin eni.
Wego romo ketho wote ng’eyo bedoleng’ peri.
20 Ee Yehova, bodha,
Man wabigoyo wer para ku jamgoyo wer ma juthondhe
I nindo ceke mi kwo mwa i ot pa Yehova.’”
21 I ng’eye, Isaya uyero kumae: “Wukel mukathi mi nying ulam m’uthwo man wukethe iwi vur p’ubimo kara kume ukey.” 22 Hezekia upenjo kumae: “Ang’o m’ubenyutho nia abiidho malu i ot pa Yehova?”