Zaburi
Ni jatel wi wer; iwi Gitith.* P’Asaf.
81 Wukok kud anyong’a ni Mungu ma en e tego mwa.
Wukok ku dwal mir aloci ni Mungu pa Yakobo.
2 Wucak wer man wuting’ nyathi vul,
Adungu mi wer karacelo ku jamgoyo wer ma juthondhe.
3 Wukudh agwara i por pa dwi,
Man kinde ma dwi ugudo, pi nindo mi foc mwa.
4 Kum etie cik ni Israel,
Lembang’ola m’uai i bang’ Mungu pa Yakobo.
5 Ekethe ni poyowic ni Yozefu
Kinde m’ewok i kum ng’om mi Misiri.
Awinjo dwal* moko m’ang’iyo ngo uwacu kumae:
6 “Ating’o ter kud iwi goke;
Agonyo cinge kud i kum katoko.
7 Ilwong’a kinde ma in’i can, man aleri;
Adwoko iri kud i polo m’ubemor.*
Amulo ii i pii mi Meriba.* (Sela)
8 Winji, dhanu para, man abiwodho lembatuca i kumi.
E Israel, ka nwang’u ndhu icopo winja ba!
9 Mungu mi juwirok kud unwang’ere i beng’i,
Man kud ikul kori i wang’ mungu mi juwirok.
10 An a Yehova Mungu peri,
Ng’atu m’uwodhi woko kud i ng’om mi Misiri.
Yab dhogi ma lac, e abipong’e.
11 Ento dhanu para uwinjo ngo dwanda;
Israel ujwigere ngo ira.
12 E aweko gilubo tok adundegi ma nwang’;
Gitimo gin ma giparu nia tie atira.*
13 Ka nwang’u ndhu dhanu para uwinja ba,
Ka nwang’u ndhu Israel uwotho i yo para ba!
14 Nwang’u ajwigo judegi migi nyapio pio;
Nwang’u aloko cinga i kum jukwor migi.
15 Ju ma gidagu Yehova gibibino i wang’e ma kumgi ubemiel amiela ku lworo,
Man ajiki* migi bibedo pi rondo ku rondo.