Isaya
16 Wuor nyog urombo i bang’ jabim mi ng’ombe,
Niai i Sela nikadhu kud i langa
Nitundo i bang’ got pa Nyasayuni.
2 Calu winyo ma juriemo bor ku ode,
Nyimoab de bibedo kumeno kaka ma pii mir Arnon mwomere i iye.
3 “Mii juk, tii ku yub ma jumaku.
Ku dieceng’, keth tiponi ubed calu diewor.
Kan ju ma igi lal, man kud icib ju m’uberingo.
4 Wek dhanu para m’ulal ubed i ii, Ee Moab.
Dok kaka ma giromo pondo i iye ni janyoth.
Jasend bijik,
Nyoth de bijik,
Man ju m’ubenyono jumange bithum kud i ng’om.
5 E komker bicungo ma tek mandha nikum mer ma lokere ngo.
Ng’atu ma bijany i wiye i hema pa Daudi bibedo ng’atu mandha;
Ebipoko lembe i atira man ebitimo bedopwe m’umbe galu.”
6 Wadaru winjo pi doro pa Moab, edoro ku rac;
Wawinjo pi luliri pare, doro pare, man kwinyo pare;
Ento wec pare ma iye nanu bithum.
7 Pieno Moab bigoyo nduru pi Moab;
Gin ceke gibigoyo nduru.
Ju ma jugoyo bicur pi mukathi mi nying ulok mi Kir-hareseth.
8 Kum mathutha mi Hecbon udaru tur,
Man yend ulok mi Sibma de,
Jubim mi thek ginyono i jange m’ubogere ngbo;*
Gicidho nitundo bir i Yazer;
Gibembo nicidho i langa.
Jange ujany man ucidho nitundo bir i nam.
9 Pi thelembe maeno re m’abewak pi yend ulok mi Sibma calu m’awagu ko Yazer.
Abitobi ku piwang’a, Ee Hecbon man Eleale,
Pilembe kok m’ikok ko pi nying yen peri mi cir man pi kayucam peri udaru jik.*
10 Jukabu anyong’a ku mutoro cen kud i podhoyen ma cego nying’gi,
Man wer mir anyong’a kadi kok dong’ ubewinjere ngo i podho mir ulok.
Janyon pigulok dong’ ubenyono ngo pigulok i vur mi biyo pigulok,
Kum aketho kok ujik.
11 Pi thelembe maeno re ma die iya ubeyengere pi Moab,
Calu thondh adungu,
Man cwinya ubemiel pi Kir-hareseth.
12 Kadok Moab uol yere yere i kabedo ma malu man ecidho nirwo i hekalu pare de, re gin m’ebitimo mbe.
13 Eno re ma lembe ma Yehova ular uyero pi Moab. 14 Man kawoni Yehova uwacu kumae: “I kind oro adek, calu oro pa jatic ma juculo acula,* jubinyayu lewic iwi dwong’ pa Moab ku yakini ma dit mi kwonde ceke, man wend ju m’udong’ bibedo nyanok mandha man ma kony migi mbe.”