Isaya
21 Atwong’a pi langa mi nam:*
Ebebino calu vira m’ubekoto yo piny,
Niai kud i langa, niai kud i ng’om ma ng’oyo ndiri.
2 Junyutho ira gin ma wok i wang’ moko mi zungo:
Ng’atu ma cibojo ubecibo
Man janyoth de ubenyotho piny.
Ai malu, Ee Elam! Tiek piny, Ee Medi!
Abijigo cur ceke m’enyayu.
3 Pi thelembe maeno re ma ndiri umaka lee.*
Ajakajaka ugoya,
Calu dhaku m’ubegonyere.
Cwinya ung’abere lee m’acopo winjo ngo lembe;
Wiya unyothere lee ma dong’ acopo neno ngo piny.
4 Adundena ubekwiyo; kuma ubemiel ni ndiri.
Piny m’ubegamere m’abino kuro kud ava ulund uketho kuma bemiel.
5 Wuyik meza man wukper kom!
Wucam man wumadhi!
Wuai malu, wu judongo ma wijo, wuwir* ban!
6 Kum Yehova uyero ira kumae:
“Cidhi, keth jakur kara enyuth iri gin m’ebeneno.”
7 Man eneno magali mi lwiny ma riuni ario ario ubepeyo,
Magali mi lwiny m’udul kana ubepeyo,
Magali mi lwiny m’udul ngamia ubepeyo.
Enenogi cuu mandha, eyo, cuu mandhandha.
8 E ekok calu umvor kumae:
“Ee Yehova, abecungo thiri thiri kubang’ ceng’ iwi otkur ma wiw,
Man acungo i kakur para kubang’ diewor.
9 Nen gin m’ubebino:
Jumaco n’i magali mi lwiny ma riuni ario ario ubepeyo!”
E eyero ku dwande ma tek kumae:
“Epodho! Babeli udaru podho!
Judaru rungo i ayi gin m’acwiya m’ang’ika ceke mi mungu pare i ng’om!”
10 Ee dhanu para ma jufwodo calu cam,
Piny* m’uai i lela para mi fwodo cam,
Anyutho iwu lembe m’awinjo kud i bang’ Yehova mir udul, Mungu mir Israel.
11 Atwong’a pi Duma:
Ng’atu moko ubelwong’a kud i Seir kumae:
“Jakur, piny biruu awene?
Jakur, piny biruu awene?”
12 Jakur udwoko kumae:
“Kugweno dhingo man diewor de.
Tek wumito penjo penji, wupenji.
Wudwog kendo!”
13 Atwong’a pi pambu mi langa:
Ibivuto diewor traka i luli i pambu mi langa,
Ee udul juruwoth mi Dedan.
14 Wuter pii ni ng’atu ma rieu ubenego,
Wu dhanu ma bedo i ng’om mi Thema,
Wuter mukathi ni ng’atu m’uberingo.
15 Kum giringo palamularu, palamularu ma juwodho kud i ukorone,
Giringo athero ma jutelo man lwiny m’ubogo mac.
16 Kum Yehova uwacu ira kumae: “I kind oro acel, calu oro pa jatic ma juculo acula,* dwong’ ceke mi Kedar bithum. 17 Wend weg athero bidong’ nyanok i kind jurumony mi Kedar, pilembe Yehova Mungu mir Israel udaru weco.”