Isaya

20 I rundi m’Ubimo Sargon mir Asiria uoro Tartan* i Acdod, ekiedo i dhug Acdod man emake. 2 I nindo maeca, Yehova uweco nikadhu kud i bang’ Isaya ma wod Amoz, eyero kumae: “Cidhi, kab kendi mi saki kud i pieri man wodh wara mi tiendi.” E etimo kumeca, ewotho muneru* man ma wara mbe i tiende.

3 E Yehova ugam uyero kumae: “Tap calu ma Isaya ma jatic para uwotho muneru man ma wara mbe i tiende pi oro adek kara ebed ni giranyutha man cimowang’ ni Misiri man Ethiopia, 4 ubimo mir Asiria de bitero ju m’emaku mi Misiri man ng’eca mir Ethiopia, awiya ma co ku ju m’utii. Ebiterogi muneru, ma wara de mbe i tiendgi man m’adhiggi ngbeng’ kamaleng’. Eyo, jubinyayu lewic iwi Misiri. 5 Ndiri ku lworo binegogi i kum Ethiopia ma genogen migi man Misiri ma gidoro pire.* 6 I nindo maeca, dhanu ma bedo i dhu nam biyero kumae: ‘Kenen lembe m’uwok i kum genogen mwa ma nwang’u wabed waringo i bang’e pi ninwang’u kony man both nikum ubimo mir Asiria e do! Eni re dong’ wabiboth nenedi?’”