Isaya
19 Atwong’a pi Misiri:
Nen! Yehova uidho iwi afuru m’uberingo ma tek man ebebino i Misiri.
Mungu mi Misiri ma tijgi mbe kumgi bimiel i wang’e,
Man adunde Misiri biloy i iye gire.
2 “Abithubo Jumisiri i dhu Jumisiri,
Man gibikiedo i kindgi,
Ng’atuman i dhug umin man jadhugola pare,
Adhura i dhug adhura, ker i dhu ker.
3 Man tipo Jumisiri binyothere i igi,
Man abijebo lembe ma gipangu.
Gibilokiri i bang’ mungu ma tijgi mbe,
I bang’ ju ma timo thangu, ju ma weco ku tipo, man juewlembe.
4 Abimiyo Misiri i cing’ rwoth ma kisa mbe i iye,
Man ubimo ma kwiny bibimo i wigi,” Rwoth mandha ma Yehova mir udul uwacu.
5 Pii mi nam bithwo,
Kulo de bidwono man ebital kaw.
6 Man ng’wic kulo bidoko tik;
Jang Nil mi Misiri bidwono man bithwo.
Agada kud usi bitop.
7 Uboko ma n’i ng’et Kulo Nil, i dhu Nil,
Man kodhi ceke ma jucoyo i ng’om i ng’et Nil bithwo.
Yamu bidunye cen, man ebibedo mbe.
8 Man judwar nam bicur,
Ju ma bolo gol i Nil biwagiri,
Man wend ju ma bolo voi migi i pii bijwik.
9 Ju ma tiyo ku lin* ma jukoro iye
Man ju ma cwiyo kendi ma tar ku jamcwiyo kendi gibiyeyo lewic.
10 Ebinyono i jacwii kendi pare;
Can binego adunde* jutic ceke ma juculo acula.
11 Judongo ma wijo mi Zoan gin abelu.
Jumii juk ma riek mandha pa Farao gibemiyo juk mi ming’o.
Wucopo yero nenedi ni Farao nia,
“Atie nyakwar jururieko,
Nyakwar jubim ma yang’ con”?
12 Jururieko perine ke dong’ gini kani?
Wek gikenyuth iri gin ma Yehova mir udul ukeco nitimo i kum Misiri.
13 Judongo ma wijo mi Zoan gitimo lembe ku ming’o;
Judaru wondo judongo ma wijo mi Nof;*
Judongo mi suru pare giketho Misiri ukier.
14 Yehova ucoro tipo mi jebowic i wiye;
Man giketho Misiri ukier i lembe ceke m’ebetimo,
Calu ma jamero ng’iendere ko i ng’ok pare.
15 Man Misiri bibedo mbe ku tic moko acel de m’ebitimo,
Dok ebed wic kadi yib, jange kadike usi.*
16 I nindo maeca, Misiri bidoko calu mon. Kume bimiel man ndiri bimake nikum cing’ ma nyayu lworo ma Yehova mir udul birieyo i kume. 17 Man ng’om mi Yuda bidoko ni gin ma nyayu ndiri i Misiri. Ndiri bing’oy i iye kinde m’ebiwinjo jubeweco pire nikum lembe ma Yehova mir udul ung’olo i kumgi.
18 I nindo maeca, adhura abic bibedo i ng’om mi Misiri ma weco dhok mi Kanan, man gibikwong’o nia gibigwoko bedoleng’ ni Yehova mir udul. Adhura acel jubilwong’o nia Adhura mi rwombo piny.
19 I nindo maeca, pemlam bibedo nuti ni Yehova i die ng’om mi Misiri man mbegi ni Yehova i kieune. 20 Ebibedo ni ayi man lembatuca ni Yehova mir udul i ng’om mi Misiri; kum gibiwak i bang’ Yehova nikum jusend, man ebioro iri jalar, ng’atu ma dit ma bibodhogi. 21 Man Yehova biketho Jumisiri bing’eye, man Jumisiri bing’eyo Yehova i nindo maeca. E gibithiero lam man gibimiyo giramiya, gibitimo lembang’ola ku kwong’ ni Yehova man gibipong’e. 22 Yehova bigoyo Misiri, ebigoye man ebikeye; e gibidwogo i bang’ Yehova, man ebidwoko kawang’ kwac migi man ebikeyo kumgi.
23 I nindo maeca, gengi ma dit biai i Misiri bicidho i Asiria. E Asiria bibino i Misiri, man Misiri de bicidho i Asiria; man Misiri bitimo ni Mungu karacelo kud Asiria. 24 I nindo maeca, Israel bibedo mir adege karacelo ku Misiri man Asiria, niwacu mugisa i die ng’om, 25 kum Yehova mir udul bipoko mugisa i wiye m’ebewacu kumae: “Mugisa bed iwi Misiri ma dhanu para, iwi tic mi cinga m’Asiria, man iwi giralaga para ma Israel.”