Yeremia
6 Wucidh wupond bor ku Yeruzalem, Ee wot Benjamin.
Wukudh agwara i Tekoa;
Wucwiny mac ni ayi iwi Beth-hakerem!
Kum masendi uai ku yo malu, nyoth ma dit.
2 Nyasayuni tie ve dhaku ma leng’ man ma jutadu wiye.
3 Jukwac bibino karacelo kud udul lim migi.
Gibiguro hema migi i ng’ete tingili,
Man ng’atuman biketho udul lim m’eneno wiye ucam lum.
4 “Wuyikuru pi nikiedo i dhoge!
Wuai malu, man waloyu i wiye ku dieceng’!”
“Can i wiwa kum ceng’ ubecimwony,
Kum tipopiny mir uthieno ubegalu!”
5 “Wuai malu man waloyu i wiye ku diewor
Man wanyothu udi pare ma wiw man ma tek.”
6 Kum Yehova mir udul uyero kumae:
“Wung’ond yen man wugier gang’ ma tek i kum Yeruzalem pi nitieke.
Etie adhura m’ucikere niwodho wel;
Gin ma n’i iye utie kende kende adici.
7 Tap calu ma vuj pii gwoko pii m’i iye ma ng’ic,
En de egwoko timo pare ma reco kumeno.
Rop ku nyoth ubewinjere i iye;
Twoyo ku goco n’i wang’a thiri thiri.
8 Winj juk, Ee Yeruzalem, kan ungo abidegi man abilokara* cen kud i kumi;
Abiketho ibidoko ni uvuru, ng’om ma ng’atu moko mbe ma bedo i iye.”
9 Yehova mir udul uwacu kumae:
“Jubibeko kund Israel mii calu nying ulok ma tokcen m’udong’ iwi yende.
Keth cingi ukadh kendo calu ng’atu m’upono nying ulok ku wi yende.”
10 “Abiweco i bang’ ng’a man abicimo ng’a?
Ng’a ma biwinjo?
Nen! Ithgi uculere,* uketho gicopo winjo ngo.
Nen! Lembe pa Yehova udoko igi ni gin ma gicayu;
Lembene nyang’ugi ngo.
11 E kwinyo pa Yehova upong’ i iya,
Man aol ku gwoke i iya.”
“Konje iwi nyathin i gengi,
Iwi udul awobi m’ucokiri karacelo.
Jubimakugi kpo, nico karacelo ku dhaku pare,
Ju m’utii karacelo ku ju m’utii yere yere.*
12 Jubimiyo udi migi ni jumange,
Karacelo ku podho migi man mon migi.
Kum abirieyo cinga i kum ju ma bedo i ng’ombe,” Yehova wacu.
13 “Niai i kum ng’atu ma nok nitundo i kum ng’atu ma dit, ng’atuman ubenwang’u piny i ayi m’atira ngo;
Niai i kum jabila nitundo i kum jalam, ng’atuman ubevuro avure.
14 Gibetemo nithiedho rem* mi dhanu para nyaswa swa, man giyero kumae:
‘Kwiyocwiny unuti! Kwiyocwiny unuti!’
Ma ke kwiyocwiny umbe.
15 Nyo lewic unegogi pi gin ma judagu ma gitimo?
Lewic unegogi ngo nyanok de!
Ging’eyo de ngo nia lewic utie ang’o!
Pieno gibipodho i kind ju m’udaru podho.
Saa m’abikelo matira i wigi gibikier,” Yehova wacu.
16 Yehova uwacu kumae:
“Wucung i akarayo man wunen.
Ento giyero kumae: “Wabiwotho ngo i iye.”
17 “Man aketho jukur m’uyero kumae:
‘Wucik ithwu wuwinj dwand agwara!’”
Ento giyero kumae: “Wabiciko ngo ithwa.”
18 “Pieno wuwinji, Ee thek!
Man wung’ey, Ee cokiri,
Lembe ma binwang’ugi.
19 Winji, Ee ng’om!
Abekelo masendi iwi dhanu maeni,
Ni matoke mi lembe ma reco ma gipangu,
Kum giciko ngo ithgi i kum lembe para,
Man gikwero cik* para.”
20 “Nyo lembe m’ibekelo ko udok sengi niai kud i Ceba
Man thiang’ ma mit* niai kud i ng’om ma bor e dieng’o cwinya de?
Lam peri m’awang’a ma boo uyiyere ngo,
Man lam peri de nyayu ngo anyong’a i iya.”
21 Pieno Yehova uwacu kumae:
“Nen, abeketho gin ma redhojo pi dhanu maeni,
Man gibikier i wigi,
Wego karacelo ku wot,
Jirani ku jawodhe,
Man gin ceke gibinyothiri.”
22 Yehova uwacu kumae:
“Nen! Dhanu moko bebino niai kud i ng’om ma yo malu,
Man thek ma dit bituk niai kud i theng ng’om ma bor mandha.
23 Gibimaku athero ku tong’.
Gi kwiny man kisa bibedo mbe i igi.
Dwandgi biwoy calu nam,
Man gibiringo ku riuni.*
Gikperiri pi lwiny calu ng’atu acel i kumi, Ee Nyasayuni.”
24 Wawinjo pi rwonglembene.
25 Kud wuwok woko i lum,
Man kud wuwoth i gengi,
Kum jadegi utie ku palamularu
Man enyayu ndiri kakare ceke.
26 Ee nya dhanu para,
Rony kendi mi saki man ng’iendiri i vuru.
Wak ve ibewagu wod ma kulong’ ku nduru ma kec,
Kum janyoth bibino rek i wiwa.
27 “Akethi* ibed ni japim cuma i kind dhanu para,
Ng’atu ma timo sayusac mii;
Icikiri nineno cuu man ning’iyo timo migi.
28 Gin ceke gi dhanu ma juthwon lee mandha,
Giwotho twong’ twong’ pi niyero nying’.
Gi calu mola man cuma;
Gin ceke ginyothiri.
29 Jamvuko mac uwang’.
Cuma ma pek re m’uwok kud i mac migi.
Jubemediri nidwoke leng’ mananu,
Man jukoyo ngo ju ma reco kud i kind dhanu.
30 Dhanu bilwong’ogi andha nia mola ma tar ma jukwero,
Pilembe Yehova ukwerogi.”