Yeremia
5 Wudhokuru i gengi mi Yeruzalem.
Wunen ng’etwu kun ku kun man wung’ii cuu.
Wuyeny i akarayo pare pi nineno
Ka nyo wucopo nwang’u ng’atu moko ma timo lembe m’atira,
Ng’atu m’uyenyo egwok bedopwe pare,
E abitimo kisa ni adhurane.
2 Kadok giyero kumae: “Calu andha Yehova bedo kwo!”
Re asu gibikwong’o kwong’ mi vupo.
3 Ee Yehova, nyo iyenyo ngo gwoko bedoleng’i?
Igoyogi, ento lembene timo ngo gin moko i kumgi.*
Idarugi, ento gikwero nijolo twiny.
Gilund gidwoko wang’gi udoko tek nisagu cana,
Man gikwero nilokiri.
4 Ento ayero yor i iya kumae: “Dhanu maeni tie dhanu ma kabodho migi mbe andha.
Gitimiri ve abelu, kum ging’eyo ngo ayi ma Yehova timo ko lembe,
Pokolembe pa Mungu migi.
5 Abicidho i bang’ dhanu mir awora man abiweco kugi,
Kum gicikiri niketho wigi i kum ayi ma Yehova timo ko lembe,
Pokolembe pa Mungu migi.
Ento gin ceke gituro i mberembere
Man gicodo jamtwic.”
6 Eno re m’uketho umvor mi luli ubecoro i wigi,
Urudi mi pambu mi langa uwotho nyothogi,
Man ng’uu ubekiyogi i adhura migi.
Ng’atu moko ci m’ubewok kud i adhurane gibeyeco iye nziki nziki.
Kum kier migi tie lee;
Man dubo migi wende kwanere ngo.
7 Acopo timo iwu kisa pi lembuni nenedi?
Wotwu giweka,
Man gibekwong’o kwong’ ku nying’ piny ma Mungu ngo.
Apong’o yeny migi ceke,
Ento gimediri nitimo abor,
Man ging’ino i ot pa dhaku ma won asara.
8 Gi calu riuni* m’ava poro uopo i kumgi,
Ng’atuman ubewak m’eberiemo ko tok ci wadi.
9 “Nyo acikara ngo* nikwayu giwodh wel pi lembuno?” Yehova wacu.
“Nyo acikara ngo niculo kwor i kum thek ma kumeno?”
10 “Wuidh i kum podho mir ulok pare man wukel nyoth,
Ento kud wunyothe tup ma tup.
Wung’ond jange m’ubeloth,
Pilembe gitie ngo pa Yehova.
11 Kum ot pa Israel man ot pa Yuda
Uciba ku rac mandha,” Yehova wacu.
12 “Gikwero Yehova man gibemediri niwacu kumae:
‘Ebitimo ngo gin moko.*
Masendi bibino ngo i wiwa;
Wabineno ngo palamularu kadi ndru.’
13 Yamu pong’ i jubila,
Man wec* umbe i igi.
Dong’ lembuno uwok i wigi!”
14 Pieno Yehova Mungu mir udul, uwacu kumae:
“Calu ma dhanu maeni gibeyero lembuni,
Nen, abeketho wec para ni mac i dhogi,
Man dhanu maeni ni yen,
E maje biwang’ugi.”
15 “Nen, abekelo thek m’uai bor i wiwu, Ee ot pa Israel,” Yehova wacu.
“Etie thek m’ugalu lee,
Thek ma yang’ con,
Thek m’ing’eyo ngo dhok migi,
Man ma wec migi de iromo nyang’ ungo i iye.
16 Thubu* migi calu liel m’uyabu dhoge;
Gin ceke gi jurumony.
17 Gibimvoro mwoka mwu man mukathi mwu.
Gibimvoro wotwu man nyigwu.
Gibimvoro rombe ku diegi mwu man dhieng’ mwu.
Gibimvoro yend ulok mwu man yend ulam mwu.
Adhura mwu ma tek ma wugeno gibinyotho ku palamularu.”
18 “Ento i nindo maeca de,” Yehova wacu, “abidaruwu ngo zoo. 19 Man ka gipenjo kumae: ‘Pirang’o Yehova Mungu mwa utimo lembuni zoo i kumwa?’ wucikuru nidwoko igi kumae: ‘Tap calu ma wuweka pi nitimo ni mungu ma juwirok i ng’om mwu, kumeno bende wubitimo ni mungu ma juwirok i ng’om ma mwu ngo.’”
20 Twong’ lembuni i ot pa Yakobo,
Man rweye i Yuda, yer kumae:
21 “Wukewinj lembe ma e, wu dhanu ma wun abelu man ma jukusegu:*
Wang’gi nuti, ento gineno piny ungo;
Ithgi nuti, ento giwinjo ngo.
22 Yehova wacu kumae: ‘Wubelwora ngo?
Nyo kumwu ucikere ngo nimiel i wang’a?
Utie an re m’aketho kwiyo ni kieu mi nam,
Etie cik ma nja m’ecopo kadhu ngo i wiye.
Kadok nwang’u mujangane bedongo malu de, re giromo voye ngo;
Kadok nwang’u gibewoy, re giromo kadhu ngo yor i wiye.
23 Ento dhanu maeni gitie kud adunde mi thwon man mi jai;
Gilokiri cen man gicidho i yo migi.
24 Man gibeyero ngo i adundegi kumae:
“Wek kawoni walworu Yehova Mungu mwa,
En m’e Ng’atu ma miyo iwa koth i nindone,
Koth ma kwong’a ku koth ma tokcen,
Ng’atu ma gwoko iwa yenga m’ukethere pi kayucam.”
25 Kosa mwu re m’ucero lembe maeno ku bino i beng’wu;
Dubo mwu re m’ucero iwu lembe ma beco.
26 Kum dhanu ma reco n’i kind dhanu para.
Gibekemo piny calu jacik winyo m’unyongo anyonga.
Giciko uwic mi tho.
Dhanu re ma gibemaku.
27 Calu goga m’upong’ ku winyo,
Ot migi de upong’ ku ndra.
Eno re m’uketho gidoko tek man gilony.
28 Gicwey man kumgi pili pili;
Gidhir ku lembe ma reco.
Gicungo ngo i kum nyathi kic i kesi,
Kara lembe migi bed miero;
Man gitwono jucan ku pokolembe m’atira.’”
29 “Nyo acikara ngo* nikwayu giwodh wel pi lembuno?” Yehova wacu.
“Nyo acikara ngo niculo kwor i kum thek ma kumeno?
30 Lembe moko ma ng’oyo ndiri man ma rac dit ubetimere i ng’ombe:
31 Jubila ubecwayu ndra,
Man julam gibebimo ku ng’ol migi gigi.
Man dhanu para umaru lembene ubed kumeno.
Ento wubitimo ang’o saa m’ajiki bitundo?”