Yeremia
4 Yehova uwacu kumae: “Tek ibidwogo, Ee Israel,
Tek ibidwogo i bang’a
Man tek ibikabu ayi gin m’acwiya peri ma judagu kud i wang’a,
E ibibedo ngo uring ng’wec.
2 Man tek ikwong’o kumae:
‘Calu andha Yehova bedo kwo!’ i lemandha, pokolembe m’atira man bedopwe,
E thek binwang’u igi mugisa nikume,
Man gibiluliri pire.”
3 Kum Yehova uyero ni dhanu mi Yuda man ni Yeruzalem kumae:
“Wufur iwu ng’om ma miyo,
Man wujig nicoyo piny i kind ukudho.
4 Wutim yaa i kumwu ni Yehova,
Man wukab dendkum mir adundewu,
Wu dhanu mi Yuda man wu ju ma wubedo i Yeruzalem,
Kara ng’eicwiny para kud uop i kumwu calu mac
Man uwang’ piny ma ng’atu moko mbe ma copo nege,
Pi timo mwu ma reco.”
5 Wutwong’ lembene i Yuda man wurwey lembene i Yeruzalem.
Wukok man wukudh agwara i die ng’ombe zoo.
Wukok ku dwendwu ma tek, wuwac kumae: “Wucokuru karacelo,
Man waringu i adhura ma tek.
6 Wuting’ ayi* yor i bang’ Sayuni.
Wuyeny the tipo, kud wucung dii,”
Kum abekelo masendi niai ku yo malu, nyoth ma dit.
7 Ewok calu umvor kud i vunga pare,
Janyoth mi thek uwok.
Ewok kud i kabedo pare pi nidwoko ng’om peri udok ni gin ma ng’oyo ndiri.
Jubidwoko adhura peri ni uvuru ma ng’atu moko mbe ma bedo i igi.
8 Pieno, wurony kendi mi saki,
Wuwaki* man wugoy nduru,
Pilembe ng’eicwiny pa Yehova m’uopo uloko ngo kud i bang’wa.
9 “I nindo maeca,” Yehova wacu, “adunde* ubimo biloy,
Man bende adunde judongo ma wijo;
Ndiri bimaku julam, man i jubila biwang’ lii.”
10 I ng’eye ayero kumae: “Akaa, Ee Rwoth Ubimo ma Malu Ngbir Yehova! Andha iwondo dhanu maeni man Yeruzalem, iwacu kumae: ‘Wubibedo ku kwiyocwiny,’ ma ke lundo palamularu n’i dandwa.”*
11 I rundi maeca, jubiyero ni dhanu maeni man ni Yeruzalem kumae:
“Yamu ma thwoyo piny m’uai iwi ungulu gudi* ma lelele mi langa,
Biweyo nya dhanu para;
Ebebino ngo nikworo nying’ cam kadi nidwoke leng’.
12 Nikum ng’ol para, yamu m’ubekoto ma tek ubebino i kum kabedo maeni.
Kawoni abitwong’o pokolembe i wigi.
13 Wunen! Ebebino calu polo koth,
Man magali pare calu yamu ma tek.
Riuni pare ringo ma tek nisagu acur.
Can i wiwa kum judaru nyothowa!
14 Lwok lembe ma reco kud i adundeni, Ee Yeruzalem, kara ibothi.
Ibimediri nibedo ku paru ma reco nitundo awene?
15 Kum dwal moko ubeyero lembang’eya kud i Dan,
Man ebetwong’o pi masendi kud i gudi mir Efraim.
16 Wunyuth pi lembene, eyo, wunyuth pi lembene ni thek;
Wutwong’e pi Yeruzalem.”
“Jukur ubebino niai kud i ng’om ma bor,
Man gibikok ma tek i pir adhura mi Yuda.
17 Gibino i kume kun ku kun calu ju ma kuro podho,
Pilembe ejai ira,” Yehova wacu.
18 “Kura ku timo peri bidwogo i wii.
Can peri kec mire maa,
Kum enyang’ cil i adundeni!”
19 Aa can kwa,* m’eni can kwa!
Abewinjo litho ma lee i adundena.*
Adundena ubedhongo i iya.
20 Jubeweco pi nyoth wi wadi wi wadi,
Kum ng’om ceke daru nyothere,
Hema para buu junyotho rek,
Junyotho bongu mi hema para nyagwil.
21 Abimedara nineno ayi* maeni nitundo awene,
Man abimedara niwinjo dwand agwara nitundo awene?
22 Kum dhanu para ming’,
Gidieng’ ungo kuda.
Gitie wot m’abelu, ma nyang’ ungo i lembe.
Ka mi timo racu re, gi riek magwei,
Ento ging’eyo ngo ayi mi timo gin ma ber.
23 Aneno ng’ombe, man nen! piny moko bino mbe i iye man edong’ ni uvuru.
Alund aneno polo, man derne bino mbe.
24 Aneno gudi, man nen! gibino yengiri,
Man ungulu gudi bino yengiri krr.
25 Aneno man nen! ng’atu acel de bino mbe,
Man winyo mi kor polo de uringo pet.
26 Adog aneno, man nen! podhoyen ma cego nyinge udoko ni langa,
Man adhura pare ceke jurwombo cen.
Ubino pi lembe pa Yehova,
Nikum ng’eicwiny pare m’uopo.
27 Kum Yehova uwacu kumae: “Ng’ombe bidong’ ni uvuru,
Ento abinyothe ngo zoo.
28 Pi thelembe maeno, ng’om biwang’,
Man malu ke polo bidoko col,
Pilembe adaru weco; adaru ng’olo lembene,
Man abiloko ngo paru para,* kadi abiloko de ngo ku ng’eya i kum lembene.
29 Nikum dwal ju ma ringo ku riuni man weg athero,
Adhura ceke uringo.
Gimondo i vunga,
Man giidho cana.
Adhura ceke juwenjo
Man ng’atu acel de mbe ma bedo i igi.”
30 Kawoni ma dong’ junyothi e, ibitimo ang’o?
Ibed ikendiri ku kendi ma kwar ngbo,
Ibed irukiri ku jamruko mi mola ma kwar,
Man ibed iwiro weng’i ku jamwiro wang’ ma col pi nidwoke leng’.
Ento idwokiri leng’ mananu,
Kum ju m’aveni ubed unegogi gidaru kweri;
Kawoni gibesayu lundo ginegi anega.
31 Kum awinjo dwal ma calu dwand dhaku m’uberemo,
Masendi ma calu pa dhaku m’ubenyolo nyathin pare ma kayu,
Dwand Nyasayuni m’ubeyuyo ma tek thiri thiri.
Ebeyero kumae m’ethang’u cinge:
“Can i wiya kum adaru voc nikum junek!”