Yeremia
15 I ng’eye, Yehova uyero ira kumae: “Kadok nwang’u Musa giku Samwel gicungo i wang’a de, abitimo ngo bero ni dhanu maeni. Riemgi cen kud i wang’a. Wek gicidhi. 2 Man tek gipenji kumae: ‘Wacidh kani?’ Yer igi kumae: ‘Yehova uwacu kumae:
“Ju m’ukwayu utho ku thong’om, bitho ku thong’om!
Ju m’ukwayu utho ku palamularu, bitho ku palamularu!
Ju m’ukwayu utho ku ndru, bitho ku ndru!
Ju m’ukwayu ucidh i ng’eca, bicidho i ng’eca!”’
3 “‘Man abiketho nyoth ang’wen* ma e i wigi,’ Yehova wacu, ‘palamularu pi ninegogi, gwogi pi niwayu avujgi, winyo mi kor polo ku yedi mi ng’om pi niramu man ninyothogi. 4 Man abiketho gibidoko ni gin ma ng’oyo ndiri ni ker ceke mi ng’om, nikum gin ma Manase ma wod Hezekia m’ubimo mi Yuda utimo i Yeruzalem.
5 Ng’a ma ngisi binege i kumi, Ee Yeruzalem,
Ng’a ma kisa binege i kumi,
Man ng’a ma bicungo pi nipenjo nia ibedo nenedi?’
6 ‘Iweka,’ Yehova wacu.
‘Ibemediri niloko ng’eyi ira.*
Pieno abirieyo cinga i kumi man abinyothi.
Adaru ol ku timo iri kisa.*
7 Abikworogi ku kanya i dhugang’ mi ng’ombe.
Abikabu awiya migi cen.
Abinyotho dhanu para,
Pilembe gikwero niloko kud i yo migi ma rac.
8 Wend montho migi binyai lee i wang’a nisagu kwiyo mi nam.
Abikelo janyoth i kumgi ku dieceng’, i kum mego kud awobi.
Abikelo ang’abacwiny ku ndiri i wigi rek.
9 Dhaku m’unyolo awiya abiro udaru voc;
Ebeyuyo* ku titi.
Ceng’ pare umwony ma ke fodi piny utie dieceng’,
Uketho lewic kud acidi umake.’
‘Man nyathi dong’gi m’udong’ de
Abimiyo judegi migi binegogi ku palamularu,’ Yehova wacu.”
10 Can i wiya, Ee maa, pilembe inyola,
A ng’atu ma ng’om zoo sayu ali i dhoge man dhaw kude.
Amiyo ngo banja kadi agamu de ngo banja;
Ento gin ceke gibelama.
11 Yehova uyero kumae: “Abikonyi andha;
Abicero beng’i andha i saa mi nyoth,
I saa mi masendi i wang’ jadegi.
12 Nyo ng’atu moko copo rungo i cuma ng’ili ng’ili,
Cuma m’uai yo malu, man mola?
13 Abiketho jubiyaku lim ku lonyo peri,
Jubing’iewogi ngo ang’iewa, ento ebibedo pi dubo ceke m’itimo i ng’om peri zoo.
14 Abimiyogi ni judegi peri
Kara gicidh kugi i ng’om m’ing’eyo ngo.
Kum ng’eicwiny para udaru cwinyo mac,
Man ebeliel pi niwang’uwu.”
15 Ing’eyo, Ee Yehova,
Poy pira man lok weng’i yor i bang’a.
Cul kwor i kum ju m’unyayu ragedo i kuma.
Kud igal ku ng’eicwiny peri, gimaru nega.*
Ng’ey nia ayeyo lewic maeni piri.
16 Anwang’u lembe peri man acamugi;
E lembe peri unyayu anyong’a ku mutoro i adundena,
Kum nyingi ulwong’ere i kuma, Ee Yehova Mungu mir udul.
17 Abedo ngo karacelo ku ju m’umaru foc pi ninyayu anyong’a i iya.
Abedo kenda, pilembe cingi n’i wiya,
Kum ipong’a ku ng’eicwiny.
18 Pirang’o litho para ubethum ungo man rem para ubekey ungo?
Ekwero nikey.
Nyo ibidoko ira calu kut mi pii mi ndra
Ma jucopo geno ngo?
19 Pieno Yehova uyero kumae:
“Tek ilokiri, e abikeyo kumi,
Man ibicungo i wang’a.
Tek ikoyo piny ma pigi tek kud i kind piny ma tijgi mbe
E ibidoko calu dhoga buu.*
Bikwayu gilokiri i beng’i,
Ento in ibilokiri ngo i bang’gi.”
20 “Abedwoki ni gang’ ma tek mi mola ni dhanu maeni.
21 “Abileri kud i cing’ jutimrac
Man abiweri kud i die cing’ ju ma kisa mbe i igi.”